ಕಳೆದೊಂದು ತಿಂಗಳಿನಿಂದ ಈರುಳ್ಳಿ ಬೆಲೆ ನಿರಂತರವಾಗಿ ಏರುತ್ತಿದ್ದು, ಗೃಹಿಣಿಯರ ಕಣ್ಣಿಗೆ ನೀರು ತರಿಸುತ್ತಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಒಂದು ಕೆಜಿ ಈರುಳ್ಳಿ ರೂ.50 ರಿಂದ 60 ವರೆಗೆ ಮಾರಾಟವಾಗುತ್ತಿದೆ. ಕಳೆದ ವಾರದವರೆಗೆ ₹40 ರ ಸುತ್ತಮುತ್ತಲಿದ್ದ ದರ ಇದೀಗ ಗಣನೀಯವಾಗಿ ಹೆಚ್ಚಾಗಿದೆ. ಹಬ್ಬದ ಆಸನ್ನತೆ, ಕಡಿಮೆ ಮಳೆ ಮತ್ತು ಪೂರೈಕೆ ಕೊರತೆಯಿಂದ ಈ ಪರಿಸ್ಥಿತಿ ನಿರ್ಮಾಣವಾಗಿದೆ.
ಬೆಂಗಳೂರಿನ ಕಲಸಿಪಾಳ್ಯ ಸೇರಿದಂತೆ ವಿವಿಧ ಮಾರುಕಟ್ಟೆಗಳಲ್ಲಿ ಸಗಟು ಬೆಲೆ ರೂ.32 ರಿಂದ ರೂ.40 ಕೆಜಿಗೆ ಏರಿದೆ. ಗುಣಮಟ್ಟವನ್ನು ಅನುಸರಿಸಿ ಒಂದನೇ ದರ್ಜೆಯ ಈರುಳ್ಳಿ ಚಿಲ್ಲರೆಯಲ್ಲಿ ರೂ.60 ತಲುಪಿದೆ. ಮಹಾರಾಷ್ಟ್ರದಿಂದ ಬರುವ ಈರುಳ್ಳಿಯ ಮೇಲೆಯೇ ರಾಜ್ಯ ಅವಲಂಬಿತವಾಗಿದೆ. ಸ್ಥಳೀಯ ಖಾರಿಫ್ ಬೆಳೆ ವಿಳಂಬವಾಗಿದ್ದು, ಕರ್ನಾಟಕ ಮತ್ತು ಆಂಧ್ರಪ್ರದೇಶದಲ್ಲಿ ಕಡಿಮೆ ಮಳೆ ಮತ್ತು ಬಿತ್ತನೆ ಕುಂಠಿತವಾಗಿರುವುದು ಪೂರೈಕೆಗೆ ಧಕ್ಕೆಯುಂಟುಮಾಡಿದೆ.
ರೈತರಿಗೆ ಲಾಭವಿಲ್ಲ: ಬೆಲೆ ಏರಿಕೆಯಾದರೂ ಸ್ಥಳೀಯ ರೈತರಿಗೆ ಗಮನಾರ್ಹ ಲಾಭ ಸಿಗುತ್ತಿಲ್ಲ. ಏಕೆಂದರೆ ಮಾರುಕಟ್ಟೆಗೆ ಬರುತ್ತಿರುವ ಹೆಚ್ಚಿನ ಈರುಳ್ಳಿ ಹೊರಗಿನಿಂದ, ವಿಶೇಷವಾಗಿ ಮಹಾರಾಷ್ಟ್ರದಿಂದ ಬರುತ್ತಿದೆ. ಸ್ಥಳೀಯ ಉತ್ಪನ್ನ ಇನ್ನೂ ಬರುತ್ತಿಲ್ಲ. ಮಳೆ ಕೊರತೆಯಿಂದ ಬಿತ್ತನೆ ವಿಳಂಬವಾಗಿದ್ದು, ಸ್ಥಳೀಯ ಬೆಳೆ ಆಗಮನಕ್ಕೆ ಇನ್ನೂ ಸಮಯ ಬೇಕಾಗಿದೆ. ಹೀಗಾಗಿ ರೈತರು ಈ ದರ ಏರಿಕೆಯಿಂದ ಲಾಭ ಪಡೆಯುವ ಸಾಧ್ಯತೆ ಕಡಿಮೆ.
ವ್ಯಾಪಾರಿಗಳು ಹೇಳುವಂತೆ, “ಹಬ್ಬದ ಬೇಡಿಕೆ ಹೆಚ್ಚಾಗಿದೆ. ಸಾಮಾನ್ಯವಾಗಿ ಮಹಾರಾಷ್ಟ್ರದಿಂದ ಬರುವ ಸರಕು ಸಾಕಾಗುತ್ತಿತ್ತು. ಈ ವರ್ಷ ಮಳೆ ಕಡಿಮೆ ಮತ್ತು ದಕ್ಷಿಣದ ಬೆಳೆ ದುರ್ಬಲವಾಗಿರುವುದರಿಂದ ಬೆಲೆ ಏರುತ್ತಿದೆ.”
ಸರ್ಕಾರದ ಕ್ರಮ ಕೇಂದ್ರ ಸರ್ಕಾರವು ಈರುಳ್ಳಿ ಖರೀದಿ ಬೆಲೆಯನ್ನು ಈ ವರ್ಷ ಏಳನೇ ಬಾರಿಗೆ ಹೆಚ್ಚಿಸಿ ರೂ.26.45 ಪ್ರತಿ ಕೆಜಿಗೆ ನಿಗದಿಪಡಿಸಿದೆ. ಆದರೆ ಪೂರೈಕೆ ಕೊರತೆ ಮುಂದುವರಿದರೆ ಬೆಲೆ ಇನ್ನಷ್ಟು ಏರುವ ಸಾಧ್ಯತೆಯಿದೆ ಎಂದು ತಜ್ಞರು ಎಚ್ಚರಿಸುತ್ತಿದ್ದಾರೆ. ಸ್ಥಳೀಯ ಉತ್ಪನ್ನ ಮಾರುಕಟ್ಟೆಗೆ ಬರುವವರೆಗೆ ಈ ಪರಿಸ್ಥಿತಿ ಮುಂದುವರಿಯುವ ಸಾಧ್ಯತೆ ಇದೆ.
ವರಮಹಾಲಕ್ಷ್ಮಿ ಮತ್ತು ಗಣೇಶ ಚತುರ್ಥಿ ಹಬ್ಬಗಳ ನಡುವೆ ತರಕಾರಿ ಬೆಲೆ ಏರಿಕೆಯು ಗ್ರಾಹಕರ ಮೇಲೆ ಹೆಚ್ಚುವರಿ ಹೊರೆ ಹೇರುತ್ತಿದೆ.
