ಅಮೆರಿಕ ಪತ್ರಕರ್ತೆ ಶೆಲ್ಲಿ ಕಿಟೆಲ್‌ಸನ್‌ ಅವರನ್ನು ಇರಾಕ್‌ನಲ್ಲಿ ಮಂಗಳವಾರ ಅಪಹರಿಸಲಾಗಿದೆ ಎಂದು ವರದಿಯಾಗಿದೆ.
ಅಮೆರಿಕ ಸರ್ಕಾರವು ಪತ್ರಕರ್ತೆಯ ಅಪಹರಣದ ಕುರಿತು ಪರಿಶೀಲನೆ ನಡೆಸುತ್ತಿದ್ದು, ಇರಾಕ್‌ನೊಂದಿಗೆ ಶೆಲ್ಲಿಯ ಸುರಕ್ಷತೆಯ ಕುರಿತು ಮಾತುಕತೆ ನಡೆಸಲಾಗುತ್ತಿದೆ ಎಂದು ಆಮೆರಿಕದ ಅಧಿಕೃತ ಮೂಲಗಳಿಂದ ಮಾಹಿತಿ ಲಭ್ಯವಾಗಿದೆ.
ಕೃತ್ಯದ ಭಾಗೀದಾರರು ಯಾರು ಎಂಬುದು ಸ್ಪಷ್ಟವಾಗಿಲ್ಲ. ಬಲ್ಲ ಮಾಹಿತಿಗಳ ಪ್ರಕಾರ ಪತ್ರಕರ್ತೆಗೆ ಇರಾನ್‌ನ ಪ್ರಾಕ್ಸಿ ಸಂಘ‌ಟನೆಯಾದ ಕೈತಬ್‌ ಹೆಝಬುಲ್ಲ ಜೀವ ಬೆದರಿಕೆ ಹಾಕಿತ್ತು, ಅಪಹರಿಸುವುದಾಗಿ ಬೆದರಿಸಲಾಗಿತ್ತು ಎಂದು ತಿಳಿದು ಬಂದಿದೆ.
ಯುಎಸ್‌ ಸಹಾಯಕ ಕಾರ್ಯದರ್ಶಿ ಡೇಯ್ಲನ್‌ ಜಾನ್ಸನ್‌ ತಮ್ಮ ಎಕ್ಸ್‌ ಖಾತೆಯಲ್ಲಿ, ಇರಾನ್‌ ಬೆಂಬಲಿತ ಕತೈಬ್‌ ಹಿಜ್ಬುಲ್ಲಾ ಸಂಘಟನೆ ಈ ಅಪಹರಣ ಕೃತ್ಯದಲ್ಲಿ ಭಾಗಿಯಾಗಿದ್ದು, ಇರಾಕ್‌ನ ಅಧಿಕಾರಿಗಳು ಸಂಬಂಧಪಟ್ಟವರನ್ನು ಬಂಧಿಸಿದ್ದಾರೆ ಎಂದು ಪೋಸ್ಟ್ ಮಾಡಿದ್ದಾರೆ.
ಕತಾಬ್‌ ಹಿಜ್ಬುಲ್ಲಾ ಇರಾನ್‌ ಬೆಂಬಲಿತ ಸಂಘಟನೆಯಾಗಿದ್ದು, ಅಮೆರಿಕ ಈ ಗುಂಪಿನ ಕೆಂಗಣ್ಣಿಗೆ ಗುರಿಯಾಗಿತ್ತು. ಶೆಲ್ಲಿ ಕಿಟೆಲ್‌ಸನ್‌ ಮಧ್ಯಪ್ರಾಚ್ಯ ಹಾಗೂ ಅಫಘಾನಿಸ್ತಾನ ಭಾಗದ ವಿಶೇಷ ವರದಿಗಾರ್ತಿಯಾಗಿದ್ದು, ಅಂತರಾಷ್ಟ್ರೀಯ ಪತ್ರಿಕೋದ್ಯಮದಲ್ಲಿ ಗುರುತಿಸಲ್ಪಟ್ಟಿದ್ದರು. ಯುಎಸ್‌ ಹಾಗೂ ಇಟಾಲಿಯನ್‌ ಪತ್ರಿಕೆಗಳಲ್ಲೂ ಇವರ ಕೆಲ ವರದಿಗಳು ಪ್ರಕಟವಾಗಿದ್ದವು.
ಇನ್ನಿತರ ಮೂಲಗಳ ಪ್ರಕಾರ ಯುಎಸ್‌ ಹಾಗೂ ಇರಾಕಿ ಅಧಿಕಾರಿಗಳು ಇರಾನ್‌ ಪ್ರತಿಗಾಮಿ ಅಕ್ಷಗಳು ಕಿಟೆಲ್‌ಸನ್‌ಗೆ ಒಡ್ಡಿದ್ದವು ಎನ್ನಲಾದ ಬೆದರಿಕೆಯ ಜಾಲವನ್ನು ಭೇದಿಸುತ್ತಿದ್ದು, ಕಳೆದ ಒಂದು ವಾರದಿಂದ ಆಕೆಯ ಮೇಲೆ ಸತತವಾಗಿ ಮಾರಣಾಂತಿಕ ಹಲ್ಲೆ ಹಾಗೂ ಕೊಲೆ ಬೆದರಿಕೆಯನ್ನು ಹಾಕಲಾಗುತ್ತಿತ್ತು. ಜೊತೆಗೆ ದೇಶದಿಂದ ಹೊರಹೋಗುವಂತೆ ಬೆದರಿಸಲಾಗಿತ್ತು ಎನ್ನಲಾಗಿದೆ.
ಇರಾಕಿ ಭದ್ರತ ಪಡೆ ಸಂಶಯಿತ ವ್ಯಕ್ತಿಯನ್ನು ಬಂಧಿಸಿದ್ದು , ಅಪಹರಣಕ್ಕೆ ಬಳಸಳಾಗಿದೆ ಎಂಬ ಗುಮಾನಿಯಿದ್ದ ವಾಹನವನ್ನು ವಶಕ್ಕೆ ಪಡೆದಿದ್ದಾರೆ. ಭದ್ರತಾ ಪಡೆಗಳು ಕಾರಣೀಕರ್ತರನ್ನು ಹುಡುಕಿ ಪತ್ರಕರ್ತೆಯ ಸುರಕ್ಷಿತ ಬಿಡುಗಡೆಯ ಆಶ್ವಾಶನೆ ನೀಡಿವೆ.
ಇರಾಕ್‌ನಲ್ಲಿನ ಅಮೆರಿಕ ಎಂಬಸಿಯು ನಿರಂತರವಾಗಿ ತನ್ನ ದೇಶದ ನಾಗರಿಕರು ಇರಾಕ್‌ ತೊರೆದು ದೇಶಕ್ಕೆ ಮರಳಬೇಕೆಂದು ಎಚ್ಚರಿಕೆ ನೀಡುತ್ತಾ ಬಂದಿದೆ. ಇರಾನಿಯನ್‌ ಬೆಂಬಲಿತ ಪಡೆಗಳಿಂದ ಅಮೆರಿಕನ್ನರಿಗೆ ಜೀವ ಬೆದರಿಕೆ, ಅಪಹರಣದ ಅಪಾಯಗಳು ಎದುರಾಗಬಹುದು. ಆದರಿಂದ ಎಂತಹ ಸಂದರ್ಭದಲ್ಲೂ ಇರಾಕ್‌ನತ್ತ ಪ್ರಯಾಣ ಮಾಡದಿರುವಂತೆ ಅಮೆರಿಕ ಎಂಬೆಸಿ ತನ್ನ ಪ್ರಜೆಗಳನ್ನು ಎಚ್ಚರಿಸಿತ್ತು.
