ಜಗತ್ತಿಗೆ ಅತಿ ಹೆಚ್ಚು ತೈಲ ಪೂರೈಸುವ ಪ್ರಮುಖ ಕಡಲ ದಾರಿಯಾದ ‘ಹಾರ್ಮುಜ್ ಜಲಸಂಧಿ’ ಇದೀಗ ಹಡಗುಗಳ ಸಂಚಾರಕ್ಕೆ ಸಂಪೂರ್ಣವಾಗಿ ಮುಕ್ತವಾಗಿದೆ. ಈ ಸುದ್ದಿ ಹೊರಬೀಳುತ್ತಿದ್ದಂತೆಯೇ, ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ದಿಢೀರನೆ ಕುಸಿದಿದೆ. ತೈಲ ದರದಲ್ಲಿ ಬರೋಬ್ಬರಿ ಶೇಕಡಾ 15 ರಿಂದ 16 ರಷ್ಟು ಇಳಿಕೆಯಾಗಿದೆ.
ಮಾರುಕಟ್ಟೆಯ ಇತ್ತೀಚಿನ ಅಂಕಿ-ಅಂಶಗಳ ಪ್ರಕಾರ, ಪ್ರಮುಖ ಕಚ್ಚಾ ತೈಲವಾದ ‘ಬ್ರೆಂಟ್ ಕ್ರೂಡ್’ ಬೆಲೆಯು ಭಾರಿ ಇಳಿಕೆ ಕಂಡು ಪ್ರತಿ ಬ್ಯಾರೆಲ್‌ಗೆ 92.35 ಡಾಲರ್‌ಗೆ ಬಂದು ನಿಂತಿದೆ. ಇತ್ತೀಚೆಗೆ ಮಧ್ಯಪ್ರಾಚ್ಯ ದೇಶಗಳಲ್ಲಿನ ಯುದ್ಧದ ವಾತಾವರಣದಿಂದಾಗಿ ಈ ಜಲಸಂಧಿ ಬಂದ್ ಆಗಬಹುದು ಎಂಬ ಭಯವಿತ್ತು. ಇದರಿಂದ ತೈಲ ಪೂರೈಕೆ ನಿಂತುಹೋಗುವ ಭೀತಿಯಿಂದ ಬೆಲೆ ಗಗನಕ್ಕೇರಿತ್ತು. ಆದರೆ ಈಗ ಆತಂಕ ದೂರವಾಗಿದ್ದು, ಹಡಗುಗಳ ಸಂಚಾರ ಸುಗಮವಾಗಿದೆ. ಹೀಗಾಗಿ ಬೆಲೆ ಒಮ್ಮೆಲೇ ಕೆಳಗಿಳಿದಿದೆ.
ವಿಶ್ವದ ಒಟ್ಟು ಕಚ್ಚಾ ತೈಲದಲ್ಲಿ ಶೇ 20 ರಷ್ಟು ಭಾಗ ಇದೇ ಹಾರ್ಮುಜ್ ಜಲಸಂಧಿ ಮೂಲಕವೇ ಸಾಗಣೆಯಾಗುತ್ತದೆ. ಈ ಕಿರಿದಾದ ದಾರಿಯಲ್ಲಿ ಸಣ್ಣ ಅಡಚಣೆಯಾದರೂ ಜಗತ್ತಿನಾದ್ಯಂತ ಪೆಟ್ರೋಲ್, ಡೀಸೆಲ್ ಬೆಲೆ ಏರಿಕೆಯಾಗುತ್ತದೆ. ಈಗ ಈ ಮಾರ್ಗದಲ್ಲಿ ತೈಲ ಟ್ಯಾಂಕರ್‌ಗಳು ಯಾವುದೇ ಭಯವಿಲ್ಲದೆ ಓಡಾಡುತ್ತಿರುವುದರಿಂದ, ತೈಲ ಪೂರೈಕೆಯಲ್ಲಿ ಇದ್ದ ತೊಂದರೆಗಳು ನಿವಾರಣೆಯಾಗಿವೆ. ಹೂಡಿಕೆದಾರರು ನಿರಾಳರಾಗಿದ್ದಾರೆ.
ಇದನ್ನು ಓದಿದ್ದೀರಾ? ಕಪ್ಪು ಮೈಬಣ್ಣ ಭೇದಭಾವಕ್ಕೆ ಅತ್ಯುತ್ತಮ ಆಟವೇ ಪ್ರತ್ಯುತ್ತರ: ಅನುಭವ ತೋಡಿಕೊಂಡ ಟೆನಿಸ್ ದಿಗ್ಗಜ
This video cannot be played in your browser. Open the video directly
ಭಾರತಕ್ಕೆ ಇದು ನಿಜಕ್ಕೂ ಬಹುದೊಡ್ಡ ವರದಾನ. ನಮ್ಮ ದೇಶಕ್ಕೆ ಬೇಕಾದ ಶೇ. 85 ರಷ್ಟು ತೈಲವನ್ನು ನಾವು ಬೇರೆ ದೇಶಗಳಿಂದಲೇ ಖರೀದಿಸುತ್ತೇವೆ. ಈಗ ಬ್ಯಾರೆಲ್ ಬೆಲೆ 92.35 ಡಾಲರ್‌ಗೆ ಇಳಿದಿರುವುದರಿಂದ, ತೈಲ ಆಮದು ಮಾಡಿಕೊಳ್ಳಲು ಭಾರತ ನೀಡುತ್ತಿದ್ದ ಸಾವಿರಾರು ಕೋಟಿ ರೂಪಾಯಿ ಉಳಿತಾಯವಾಗಲಿದೆ. ಇದರಿಂದ ಮುಂಬರುವ ದಿನಗಳಲ್ಲಿ ನಮ್ಮ ದೇಶದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಕೂಡ ಕಡಿಮೆಯಾಗಿ, ಜನಸಾಮಾನ್ಯರ ಮೇಲಿನ ಹೊರೆ ತಗ್ಗುವ ನಿರೀಕ್ಷೆ ಇದೆ.
ತೈಲ ಬೆಲೆ ಇಳಿಕೆಯಾದ ನಂತರ ಭಾರತೀಯ ಷೇರುಪೇಟೆ ತಕ್ಷಣವೇ ಸಕಾರಾತ್ಮಕವಾಗಿ ಸ್ಪಂದಿಸಿದೆ. ಸೆನ್ಸೆಕ್ಸ್ ಮತ್ತು ನಿಫ್ಟಿ ಸೂಚ್ಯಂಕಗಳಲ್ಲಿ ಭಾರಿ ಏರಿಕೆ ಕಂಡುಬಂದಿದೆ. ವಿಶೇಷವಾಗಿ ತೈಲ ಕಂಪನಿಗಳು, ಪೇಂಟ್ಸ್ ಹಾಗೂ ವಿಮಾನಯಾನ ಕಂಪನಿಗಳ ಷೇರುಗಳ ಮೌಲ್ಯ ಹೆಚ್ಚಾಗಿದೆ. ಜಾಗತಿಕ ಮಟ್ಟದಲ್ಲಿ ಹಣದುಬ್ಬರ ಕಡಿಮೆಯಾಗುವ ಲಕ್ಷಣಗಳು ಗೋಚರಿಸುತ್ತಿದೆ.
