‘ಸಾಂಗ್ಸ್ ಆಫ್ ಫಾರ್ಗಾಟನ್ ಟ್ರೀಸ್’ ಹಿಂದಿ ಚಿತ್ರಕ್ಕಾಗಿ ಅನುಪರ್ಣಾ ರಾಯ್‌ ಅವರಿಗೆ ವೆನಿಸ್ ಚಿತ್ರೋತ್ಸವದಲ್ಲಿ ಅತ್ಯುತ್ತಮ ನಿರ್ದೇಶಕಿ ಪ್ರಶಸ್ತಿ ಲಭಿಸಿದೆ. ಅನುಪರ್ಣಾ ಅವರ ನಿರ್ದೇಶನದ ಮೊದಲ ಸಿನಿಮಾ ಇದಾಗಿದೆ. ಚಲನಚಿತ್ರ ನಿರ್ಮಾಪಕ ಅನುರಾಗ್ ಕಶ್ಯಪ್ ಅವರು ಪ್ರಸ್ತುತಪಡಿಸಿದ ಈ ಚಿತ್ರವು ಸೆಪ್ಟೆಂಬರ್ 1ರಂದು ವೆನಿಸ್ ಚಿತ್ರೋತ್ಸವದ ಪ್ರತಿಷ್ಠಿತ ಒರಿಝೋಂಟಿ ಸ್ಪರ್ಧಾ ವಿಭಾಗದಲ್ಲಿ ಪ್ರಥಮ ಪ್ರದರ್ಶನಗೊಂಡಿತ್ತು.
ವೆನಿಸ್ ಚಿತ್ರೋತ್ಸವವು ಚೊಚ್ಚಲ ಕೃತಿಗಳು, ಯುವ ಪ್ರತಿಭೆಗಳನ್ನು ಕೇಂದ್ರಿಕರಿಸಿದ್ದು, ಇದು ಹೊಸ ಪ್ರವೃತ್ತಿಗಳನ್ನು ಎತ್ತಿ ತೋರಿಸುವ ಚಲನಚಿತ್ರಗಳಿಗಾಗಿ ನಡೆಸುವ ಅಂತಾರಾಷ್ಟ್ರೀಯ ಸ್ಪರ್ಧೆಯಾಗಿದೆ.
ಇದನ್ನು ಓದಿದ್ದೀರಾ? ವೆನಿಸ್ ಚಿತ್ರೋತ್ಸವ | ದಾಖಲೆಯ 23 ನಿಮಿಷಗಳ ಚಪ್ಪಾಳೆ ಗಿಟ್ಟಿಸಿಕೊಂಡ ಗಾಝಾದ ‘ಹಿಂದ್ ರಜಬ್’ ಚಿತ್ರ
ಇನ್ನು ಈ ಪ್ರಶಸ್ತಿ ಪಡೆದ ಬಳಿಕ ಮಾತನಾಡಿದ ನಿರ್ದೇಶಕಿ ಅನುಪರ್ಣಾ ರಾಯ್‌ ಅವರು, “ಈ ಪ್ರಶಸ್ತಿಯು ಕಡೆಗಣಿಸಲ್ಪಟ್ಟ ಅಥವಾ ಸಮಾಜದಲ್ಲಿ ಮೂಲೆಗುಂಪು ಮಾಡಲಾದ ಎಲ್ಲಾ ಮಹಿಳೆಯರಿಗೆ ನೀಡಿದ ಗೌರವಾಗಿದೆ. ಈ ಸಿನಿಮಾ, ಅದರಾಚೆಗಿನ ಮಹಿಳೆಯರಿಗೆ ಧ್ವನಿ ಎತ್ತಲು ಹೆಚ್ಚಿನ ಪ್ರೇರಣೆ, ಶಕ್ತಿಯನ್ನು ಈ ಸಿನಿಮಾ ನೀಡಲಿ ಎಂದು ಆಶಿಸುತ್ತೇನೆ” ಎಂದು ಹೇಳಿದ್ದಾರೆ.
ಸಾಂಗ್ಸ್ ಆಫ್ ಫಾರ್ಗಾಟನ್ ಟ್ರೀಸ್ ಸಿನಿಮಾ ವಲಸೆ ಬಂದ ಮತ್ತು ಮಹತ್ವಾಕಾಂಕ್ಷಿ ನಟಿ ಥೂಯಾ ಅವರ ಕಥೆಯನ್ನು ಹೊಂದಿದೆ. ತಮ್ಮ ಸೌಂದರ್ಯ ಮತ್ತು ಬುದ್ಧಿವಂತಿಕೆಯನ್ನು ಬಳಸಿಕೊಂಡು ನಗರದಲ್ಲಿ ಹೇಗೆ ಬದುಕು ಕಟ್ಟಿಕೊಳ್ಳುತ್ತಾರೆ ಎಂಬುದನ್ನು ಈ ಸಿನಿಮಾದಲ್ಲಿ ತೋರಿಸಲಾಗಿದೆ.
ಈ ಸಿನಿಮಾದಲ್ಲಿ ನಾಜ್ ಶೇಖ್, ಸುಮಿ ಬಘೇಲ್ ನಟಿಸಿದ್ದಾರೆ. ಬಿಭಾನ್ಶು ರೈ, ರೋಮಿಲ್ ಮೋದಿ ಮತ್ತು ರಂಜನ್ ಸಿಂಗ್ ಸಿನಿಮಾ ನಿರ್ಮಿಸಿದ್ದು, ಭೂಷಣ್ ಶಿಂಪಿ, ರವಿ ಮಾನ್, ಪ್ರೀತಮ್ ಪಿಲಾನಿಯಾ ಮತ್ತು ಲವ್ಲಿ ಸಿಂಗ್ ಕೂಡ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದಾರೆ.
