ವಿಶ್ವಸಂಸ್ಥೆಯ ಸಭೆಯೊಂದರಲ್ಲಿ ಇಸ್ರೇಲ್ ರಾಯಭಾರಿ ಹಾಗೂ ವಿಶ್ವಸಂಸ್ಥೆಯ ಅಧಿಕಾರಿಯೊಬ್ಬರ ನಡುವೆ ತೀವ್ರ ವಾಗ್ವಾದ ನಡೆದಿದ್ದು, “ಬಾಯಿ ಮುಚ್ಚಿ, ಇಲ್ಲ ತೊಲಗಿ” ಎಂದು ಇಸ್ರೇಲ್ ಪ್ರತಿನಿಧಿ ಧಮ್ಕಿ ಹಾಕಿರುವ ಘಟನೆ ನಡೆದಿದೆ.
ಸಂಘರ್ಷದ ವೇಳೆ ನಡೆಯುವ ಲೈಂಗಿಕ ದೌರ್ಜನ್ಯಗಳ ಕುರಿತಾದ ವರದಿಯೊಂದರ ವಿಚಾರವಾಗಿ ವಿಶ್ವಸಂಸ್ಥೆಯ ಸಾರ್ವಜನಿಕ ವಿಚಾರಣಾ ಸಭೆಯಲ್ಲಿ ಇಸ್ರೇಲ್ ರಾಯಭಾರಿ ಹಾಗೂ ವಿಶ್ವಸಂಸ್ಥೆಯ ಹಿರಿಯ ಅಧಿಕಾರಿಗಳ ನಡುವೆ ಶುಕ್ರವಾರ ತೀವ್ರ ವಾಗ್ವಾದ ನಡೆದಿದೆ. ಈ ವೇಳೆ ಆಕ್ರೋಶಗೊಂಡ ಇಸ್ರೇಲ್ ರಾಯಭಾರಿ, ಹಿರಿಯ ಅಧಿಕಾರಿಯೊಬ್ಬರಿಗೆ “ಸುಮ್ಮನಿರಿ ಅಥವಾ ಸಭೆಯಿಂದ ಹೊರನಡೆಯಿರಿ” ಎಂದು ಏರುಧ್ವನಿಯಲ್ಲಿ ತರಾಟೆಗೆ ತೆಗೆದುಕೊಂಡಿದ್ದಾರೆ.
‘ಸಂಘರ್ಷದಲ್ಲಿ ಲೈಂಗಿಕ ಹಿಂಸಾಚಾರ ನಿರ್ಮೂಲನಾ ದಿನ’ದ ಅಂಗವಾಗಿ ನ್ಯೂಯಾರ್ಕ್ನಲ್ಲಿ ಸಭೆ ಆಯೋಜಿಸಲಾಗಿತ್ತು. ಇತ್ತೀಚೆಗಷ್ಟೇ ವಿಶ್ವಸಂಸ್ಥೆ ಮಹಾಕಾರ್ಯದರ್ಶಿಯವರ ವಿಶೇಷ ಪ್ರತಿನಿಧಿಯಾದ (ಲೈಂಗಿಕ ಹಿಂಸಾಚಾರ ತಡೆ ವಿಭಾಗ) ಪ್ರಮೀಳಾ ಪ್ಯಾಟನ್ ಅವರು ವರದಿಯೊಂದನ್ನು ಸಿದ್ಧಪಡಿಸಿದ್ದರು. ಸಂಘರ್ಷದ ವೇಳೆ ಲೈಂಗಿಕ ದೌರ್ಜನ್ಯ ಎಸಗಿದ ಆರೋಪದ ಮೇಲೆ ಆ ವರದಿಯಲ್ಲಿ ಇಸ್ರೇಲ್ ಅನ್ನು ಇದೇ ಮೊದಲ ಬಾರಿಗೆ ವಿಶ್ವಸಂಸ್ಥೆಯ ಕಪ್ಪುಪಟ್ಟಿಗೆ (Blacklist) ಸೇರಿಸಲಾಗಿತ್ತು.
ಸಭೆಯಲ್ಲಿ ಈ ವಿಷಯ ಪ್ರಸ್ತಾಪಿಸಿದ ಇಸ್ರೇಲ್ನ ಯುಎನ್ ರಾಯಭಾರಿ ಡ್ಯಾನಿ ಡ್ಯಾನನ್, “ಇಸ್ರೇಲ್ ಅನ್ನು ಗುರಿಯಾಗಿಸಿಕೊಳ್ಳುವ ವಿಶ್ವಸಂಸ್ಥೆ ಮುಖ್ಯಸ್ಥ ಆಂಟೋನಿಯೊ ಗುಟೆರಸ್ ಅವರ ಹಠಕ್ಕೆ ನೀವು ಮಣಿದಿದ್ದೀರಿ” ಎಂದು ನೇರ ಆರೋಪ ಮಾಡಿ, ಪ್ರಮೀಳಾ ಪ್ಯಾಟನ್ ಅವರ ರಾಜೀನಾಮೆಗೆ ಆಗ್ರಹಿಸಿದರು.
ಡ್ಯಾನನ್ ಅವರ ಈ ಹೇಳಿಕೆಗೆ, ಮಕ್ಕಳ ಮತ್ತು ಸಶಸ್ತ್ರ ಸಂಘರ್ಷ ವಿಭಾಗದ ವಿಶ್ವಸಂಸ್ಥೆಯ ಪ್ರತಿನಿಧಿ ವನೆಸ್ಸಾ ಫ್ರೇಜಿಯರ್ ಅವರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. ಡ್ಯಾನನ್ ಅವರು ವೈಯಕ್ತಿಕ ದಾಳಿ ನಡೆಸುತ್ತಿದ್ದಾರೆ ಎಂದು ಆರೋಪಿಸಿದ ಅವರು, “ನಮ್ಮ ಕಚೇರಿಯ ವರದಿಯು ಪರಿಶೀಲಿಸಿದ ಸಾಕ್ಷ್ಯಗಳ ಆಧಾರದ ಮೇಲೆಯೇ ರೂಪುಗೊಂಡಿದೆ” ಎಂದು ಸಮರ್ಥಿಸಿಕೊಂಡರು.
ಇದರಿಂದ ತೀವ್ರ ಕೋಪಗೊಂಡ ಡ್ಯಾನಿ ಡ್ಯಾನನ್, ವನೆಸ್ಸಾ ಫ್ರೇಜಿಯರ್ ಅವರನ್ನು ಸುಮ್ಮನಿರುವಂತೆ ತಾಕೀತು ಮಾಡಿದರು. “ನಾವು ವಿಶ್ವಸಂಸ್ಥೆಯ ಸದಸ್ಯ ರಾಷ್ಟ್ರ, ನೀವು ವಿಶ್ವಸಂಸ್ಥೆಯ ಉದ್ಯೋಗಿ. ನೀವು ಈಗ ಸುಮ್ಮನಿರಬೇಕು… ನೀವೂ ಮತ್ತು ನಿಮ್ಮ ನಾಚಿಕೆಗೇಡಿನ ವರದಿಯೂ ಸುಮ್ಮನಿರಬೇಕು” ಎಂದು ಗುಡುಗಿದರು.
ಮಾತು ಮುಂದುವರಿಸಿದ ಅವರು, “ನೀವು ಈ ನಿಲುವು ಏಕೆ ತಳೆದಿದ್ದೀರಿ ಎಂಬುದು ನಮಗೆ ತಿಳಿದಿದೆ. ಈ ನಾಚಿಕೆಗೇಡಿನ ಅಭಿಯಾನದ ಭಾಗವಾಗಲು ನಾವು ನಿಮಗೆ ಬಿಡುವುದಿಲ್ಲ. ನನ್ನ ಮಾತುಗಳನ್ನು ಪೂರ್ಣಗೊಳಿಸುತ್ತೇನೆ. ನಿಮಗೆ ಕೇಳಿಸಿಕೊಳ್ಳಲು ಇಷ್ಟವಿಲ್ಲದಿದ್ದರೆ ಹೊರಗೆ ಹೋಗಿ” ಎಂದು ಸಭೆಯಲ್ಲೇ ಕಿಡಿಕಾರಿದರು. ವಾಗ್ವಾದ ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿದ್ದಂತೆ ಸಭೆಯ ಆಯೋಜಕರು ಪರಿಸ್ಥಿತಿ ತಿಳಿಗೊಳಿಸಲು ಯತ್ನಿಸಿದರು.
ಈ ವಾರವಷ್ಟೇ ಬಿಡುಗಡೆಯಾದ ವನೆಸ್ಸಾ ಫ್ರೇಜಿಯರ್ ಅವರ ವರದಿಯಲ್ಲಿ, ಪ್ಯಾಲೆಸ್ಟೀನ್ ಮಕ್ಕಳ ಮೇಲಿನ ದೌರ್ಜನ್ಯಗಳ ಪ್ರಮಾಣ ಭಾರಿ ಏರಿಕೆಯಾಗಿದೆ ಎಂದು ಕಳವಳ ವ್ಯಕ್ತಪಡಿಸಲಾಗಿತ್ತು. ಅಲ್ಲದೆ, ಮಕ್ಕಳ ಮೇಲಿನ ಗಂಭೀರ ಉಲ್ಲಂಘನೆಗಳಿಗಾಗಿ ಇಸ್ರೇಲ್ನ ವಸಾಹತುಶಾಹಿ ಗುಂಪುಗಳನ್ನು ಜಾಗತಿಕ ಕಪ್ಪುಪಟ್ಟಿಗೆ ಸೇರಿಸುವ ಎಚ್ಚರಿಕೆಯನ್ನೂ ನೀಡಲಾಗಿತ್ತು. ಮಕ್ಕಳ ಮೇಲಿನ ದೌರ್ಜನ್ಯಕ್ಕಾಗಿ ಇಸ್ರೇಲ್ ಅನ್ನು ಈ ವರದಿಯ ‘ಶೇಮ್ ಲಿಸ್ಟ್’ (ನಾಚಿಕೆಗೇಡಿನ ಪಟ್ಟಿ) ನಲ್ಲಿ ಈಗಾಗಲೇ ಹೆಸರಿಸಲಾಗಿದೆ.
ಇದನ್ನು ಓದಿದ್ದೀರಾ? ವೈಭವ್ ಸೂರ್ಯವಂಶಿ ವಿರುದ್ಧ ಶಿಸ್ತುಕ್ರಮದ ಬಗ್ಗೆ ಮೌನ ಮುರಿದ ಬಿಸಿಸಿಐ
ಗಾಜಾ ಪಟ್ಟಿಯಲ್ಲಿ ನಡೆಯುತ್ತಿರುವ ಸೇನಾ ಕಾರ್ಯಾಚರಣೆ, ಅಲ್ಲಿನ ಮಾನವೀಯ ಬಿಕ್ಕಟ್ಟು ಹಾಗೂ ವಿಶ್ವಸಂಸ್ಥೆಯ ನಿಲುವಿನ ವಿಚಾರವಾಗಿ ಇಸ್ರೇಲ್ ಮತ್ತು ವಿಶ್ವಸಂಸ್ಥೆಯ ನಡುವೆ ಸಾಕಷ್ಟು ಭಿನ್ನಾಭಿಪ್ರಾಯಗಳಿವೆ. ವಿಶ್ವಸಂಸ್ಥೆಯ ಹಲವು ನಿರ್ಣಯಗಳನ್ನು ಇಸ್ರೇಲ್ ಈ ಹಿಂದೆಯೂ ತಳ್ಳಿಹಾಕಿತ್ತು. ಇದೀಗ ನಡೆದಿರುವ ಈ ಬಹಿರಂಗ ವಾಗ್ವಾದವು, ಇಸ್ರೇಲ್ ಮತ್ತು ವಿಶ್ವಸಂಸ್ಥೆಯ ನಡುವಿನ ರಾಜತಾಂತ್ರಿಕ ಬಿರುಕು ಎಷ್ಟರ ಮಟ್ಟಿಗೆ ಹದಗೆಟ್ಟಿದೆ ಎಂಬುದನ್ನು ಜಗಜ್ಜಾಹೀರು ಮಾಡಿದೆ ಎಂದು ವರದಿಯಲ್ಲಿ ವಿವರಿಸಲಾಗಿದೆ.
