ಭಾರತ ಮತ್ತು ಚೀನಾ ನಡುವೆ ನೇರ ವಿಮಾನಯಾನ ಮತ್ತೆ ಆರಂಭವಾಗಲಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು ತಿಳಿಸಿದ್ದಾರೆ. ಚೀನಾದ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್ ಅವರೊಂದಿಗಿನ ಭೇಟಿಯ ಬಳಿಕ ಈ ಮಾಹಿತಿಯನ್ನು ಪ್ರಧಾನಿ ಮೋದಿ ನೀಡಿದ್ದಾರೆ.
ಕೋವಿಡ್ ಸಾಂಕ್ರಾಮಿಕದ ಬಳಿಕ 2020ರಿಂದ ಐದು ವರ್ಷಗಳ ಕಾಲ ಉಭಯ ದೇಶಗಳ ನಡುವೆ ನೇರ ವಿಮಾನ ಹಾರಾಟ ಸೇವೆ ಇರಲಿಲ್ಲ. ಕೋವಿಡ್ ಬಳಿಕ ಗಾಲ್ವಾನ್ ಕಣಿವೆಯಲ್ಲಿ ಭಾರತ, ಚೀನಾ ಸಂಘರ್ಷದ ಹಿನ್ನೆಲೆ ವಿಮಾನ ಪುನರ್ ಆರಂಭ ಮಾಡಿರಲಿಲ್ಲ. ಇದೀಗ ವಿಮಾನಯಾನ ಪುನರಾರಂಭಿಸಲು ದೇಶಗಳು ಒಪ್ಪಿಕೊಂಡಿವೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಅಮೆರಿಕ ನೆಲದಲ್ಲಿ ಮೋದಿ ಸಾಧಿಸಿದ್ದಕ್ಕಿಂತ ತಲೆ ಬಾಗಿದ್ದೇ ಹೆಚ್ಚು
ಕೋವಿಡ್ ಬಳಿಕ ಸರಕು ಸಾಗಣೆ ಮತ್ತು ಪ್ರಯಾಣಿಕರ ಪ್ರಯಾಣ ಥೈಲ್ಯಾಂಡ್, ಸಿಂಗಾಪುರ ಮತ್ತು ಹಾಂಗ್ ಕಾಂಗ್‌ನಂತಹ ಮೂರನೇ ದೇಶಗಳ ಮೂಲಕ ನಡೆಯುತ್ತಿತ್ತು. ಇದು ಪ್ರಯಾಣದ ಅವಧಿ ಮತ್ತು ವೆಚ್ಚವನ್ನು ಹೆಚ್ಚಿಸಿತ್ತು. ಆದರೆ ಇದೀಗ ಮಾತುಕತೆ ನಡೆಸಿ ಮತ್ತೆ ವಿಮಾನಯಾನ ಆರಂಭಕ್ಕೆ ಒಪ್ಪಲಾಗಿದೆ.
“ನಾವು ಏಷ್ಯಾದ ಪ್ರಮುಖ ಆರ್ಥಿಕ ಕಾರಿಡಾರ್‌ಗಳಲ್ಲಿ ಒಂದನ್ನು ಮತ್ತೆ ತೆರೆಯುತ್ತಿದ್ದೇವೆ. ಈ ನಿರ್ಧಾರವು ಎರಡೂ ದೇಶಗಳಾದ್ಯಂತ ವ್ಯವಹಾರ ನಡೆಸಲು ಸಹಾಯವಾಗಲಿದೆ. ವಿದ್ಯಾರ್ಥಿಗಳು ಮತ್ತು ಕುಟುಂಬಗಳಿಗೆ ಸಂಚಾರಕ್ಕೆ ಪ್ರಯೋಜನವಾಗಲಿದೆ” ಎಂದು ಪ್ರಧಾನಿ ಮೋದಿ ಹೇಳಿರುವುದಾಗಿ ವರದಿಯಾಗಿದೆ.
2019ರ ಹಣಕಾಸು ವರ್ಷದಲ್ಲಿ ಸಾಂಕ್ರಾಮಿಕ ರೋಗಕ್ಕೆ ಮುಂಚಿತವಾಗಿ, ಭಾರತ, ಚೀನಾ ನಡುವೆ 816,000 ಕ್ಕೂ ಹೆಚ್ಚು ಪ್ರಯಾಣಿಕರು ಪ್ರಯಾಣಿಸಿದ್ದರು, ಏರ್ ಇಂಡಿಯಾ ಮತ್ತು ಇಂಡಿಗೊದಂತಹ ಭಾರತೀಯ ವಿಮಾನಯಾನ ಸಂಸ್ಥೆಗಳು ಚೀನೀ ವಿಮಾನಯಾನ ಸಂಸ್ಥೆಗಳೊಂದಿಗೆ ನೂರಾರು ಮಾಸಿಕ ವಿಮಾನಗಳನ್ನು ನಿರ್ವಹಿಸುತ್ತಿದ್ದವು. ಸರಕು ಸಾಗಣೆಯು ಸಹ ಗಮನಾರ್ಹವಾಗಿತ್ತು. ವಾರ್ಷಿಕವಾಗಿ ಸುಮಾರು 30,000 ಟನ್‌ಗಳನ್ನು ರವಾನಿಸಲಾಗುತ್ತಿತ್ತು. ಭಾರತ ಮತ್ತು ಯುಎಸ್ ನಡುವಿನ ಸರಕು ಪ್ರಮಾಣಕ್ಕಿಂತ ಹೆಚ್ಚು ಇದಾಗಿದೆ.
