ಜಾಗತಿಕ ತೈಲ ಸಾಗಣೆಯ ಪ್ರಮುಖ ನೌಕಾ ಮಾರ್ಗವಾದ ಹಾರ್ಮುಜ್ ಜಲಸಂಧಿಯಲ್ಲಿ ವಾಣಿಜ್ಯ ಹಡಗುಗಳ ಸುರಕ್ಷಿತ ಸಂಚಾರಕ್ಕಾಗಿ ಹೊಸ ಪ್ರವೇಶ ಮತ್ತು ನಿರ್ಗಮನ ಮಾರ್ಗಗಳನ್ನು ನಿಗದಿಪಡಿಸಲು ಇರಾನ್ ಹಾಗೂ ಒಮಾನ್ ದೇಶಗಳು ಸುದೀರ್ಘ ಚರ್ಚೆಯ ನಂತರ ಅಂತಿಮ ಒಪ್ಪಂದಕ್ಕೆ ಬಂದಿವೆ.
ಇರಾನ್‌ನ ಸಂಧಾನ ತಂಡದ ನಿಕಟ ಮೂಲಗಳನ್ನು ಉಲ್ಲೇಖಿಸಿ ‘ತಸ್ನಿಮ್’ ಸುದ್ದಿ ಸಂಸ್ಥೆ ವರದಿ ಮಾಡಿದ್ದು, ತೀವ್ರ ಸ್ವರೂಪದ ತಾಂತ್ರಿಕ ಹಾಗೂ ರಾಜತಾಂತ್ರಿಕ ಮಾತುಕತೆಗಳ ನಂತರ ಈ ಸಮುದ್ರ ಮಾರ್ಗದ ಸ್ವರೂಪವನ್ನು ಅಂತಿಮಗೊಳಿಸಲಾಗಿದೆ.
ಇದನ್ನೂ ಓದಿ: ‘ಹಾರ್ಮುಜ್ ಜಲಸಂಧಿಗೆ ನನ್ನ ಹೆಸರಿಡಿ’; ಟ್ರಂಪ್ ಬೇಡಿಕೆ
ನೂತನ ವ್ಯವಸ್ಥೆಯ ಪ್ರಕಾರ, ಪರ್ಷಿಯನ್ ಗಲ್ಫ್‌ಗೆ ಪ್ರವೇಶಿಸುವ ಸಮುದ್ರ ಮಾರ್ಗವು ಸಂಪೂರ್ಣವಾಗಿ ಇರಾನ್‌ನ ಪ್ರಾದೇಶಿಕ ಜಲ ಗಡಿಯ ವ್ಯಾಪ್ತಿಯಲ್ಲೇ ಇರಲಿದೆ. ಜಲಸಂಧಿಯಿಂದ ಹೊರಹೋಗುವ ಮಾರ್ಗದ ಒಂದು ಭಾಗವೂ ಇರಾನ್ ಜಲ ಗಡಿಯ ವ್ಯಾಪ್ತಿಗೆ ಒಳಪಡಲಿದೆ.
ನೂತನ ವ್ಯವಸ್ಥೆಯು ಅನುಷ್ಠಾನಕ್ಕೆ ಬರುತ್ತಿದ್ದಂತೆ, ಹಳೆಯ ದಕ್ಷಿಣ ಮಾರ್ಗವನ್ನು ಮುಚ್ಚಲಾಗುತ್ತದೆ. ದಕ್ಷಿಣ ಮಾರ್ಗವನ್ನು ಮುಕ್ತವಾಗಿಡಬೇಕು ಎಂಬ ಅಮೆರಿಕದ ಒತ್ತಡವನ್ನು ಇರಾನ್ ತಿರಸ್ಕರಿಸಿದೆ ಎಂದು ವರದಿಯಾಗಿದೆ.
ಹೊಸ ಸಂಚಾರ ಮಾರ್ಗವನ್ನು ನಿಗದಿಪಡಿಸಿರುವುದು ಎಂದರೆ ಹಾರ್ಮುಜ್ ಜಲಸಂಧಿಯನ್ನು ತಕ್ಷಣಕ್ಕೆ ಸಂಪೂರ್ಣವಾಗಿ ತೆರೆಯಲಾಗಿದೆ ಎಂದರ್ಥವಲ್ಲ ಎಂದು ಇರಾನ್ ಸ್ಪಷ್ಟಪಡಿಸಿದೆ. ಜಲಸಂಧಿಯ ಸಂಪೂರ್ಣ ಮರುಆರಂಭಕ್ಕೆ ಇರಾನ್ 7 ಷರತ್ತುಗಳನ್ನು ಅಮೆರಿಕದ ಮುಂದಿಟ್ಟಿದ್ದು, ಅಮೆರಿಕದ ಮುಂದಿನ ನಡವಳಿಕೆಯನ್ನು ಆಧರಿಸಿ ಜಲಸಂಧಿ ತೆರೆಯುವ ಬಗ್ಗೆ ತೀರ್ಮಾನಿಸಲಾಗುವುದು ಎಂದು ಮೂಲಗಳು ಹೇಳಿವೆ.
ಮಸ್ಕತ್‌ನಲ್ಲಿ ನಡೆಯಲಿರುವ ಪ್ರಾದೇಶಿಕ ವಿದೇಶಾಂಗ ಸಚಿವರ ಸಭೆಯಲ್ಲಿ ಈ ಒಪ್ಪಂದದ ಅಂತಿಮ ಕರಾರಿಗೆ ಅಂಕಿತ ಬೀಳಲಿದ್ದು, ಬಳಿಕ ವಿವರಗಳನ್ನು ಅಂತರರಾಷ್ಟ್ರೀಯ ನೌಕಾಯಾನ ಸಂಸ್ಥೆಗೆ (IMO) ಸಲ್ಲಿಸಲಾಗುತ್ತದೆ.
