ಕರ್ನಾಟಕ ರಾಜ್ಯ ನೈಸರ್ಗಿಕ ವಿಪತ್ತು ಮೇಲ್ವಿಚಾರಣಾ ಕೇಂದ್ರ (ಕೆಎಸ್‌ಎನ್‌ಡಿಎಂಸಿ) ಮಾಹಿತಿ ಪ್ರಕಾರ, ಬೆಳಗಾವಿ ಜಿಲ್ಲೆಯಲ್ಲಿ ಜೂನ್ ತಿಂಗಳಲ್ಲಿ ಜಿಲ್ಲೆಯಲ್ಲಿ 146 ಮಿ.ಮೀ ಮಳೆಯಾಗಬೇಕಾಗಿತ್ತು, ಸದ್ಯ ಕೇವಲ 104 ಮಿ.ಮೀ ಮಳೆಯಾಗಿದೆ. ಇದರಿಂದ ಶೇ 29ರಷ್ಟು ಮಳೆ ಕೊರತೆ ದಾಖಲಾಗಿದೆ.
ಪ್ರಸಕ್ತ ಸಾಲಿನ ಮುಂಗಾರು ಕೊರತೆ ಹಾಗೂ ಜೂನ್ ತಿಂಗಳಲ್ಲಿಯೂ ಮುಂದುವರಿದ ಅತಿ ಬಿಸಿಲಿನಿಂದ ಬೆಳಗಾವಿ ಜಿಲ್ಲೆಯ ರೈತರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಮಳೆಯ ಕೊರತೆಯಿಂದ ಬಿತ್ತನೆಯು ಕಡಿಮೆಯಾಗಿದೆ, ಈಗಾಗಲೇ ಬಿತ್ತಿದ ಬೆಳೆಗಳೂ ಒಣಗುವ ಆತಂಕ ಎದುರಾಗಿದೆ.
ಜಿಲ್ಲೆಯ ತಾಲೂಕುಗಳ ಪೈಕಿ ಬೆಳಗಾವಿ ತಾಲೂಕಿನಲ್ಲಿ ಅತಿ ಹೆಚ್ಚು 105 ಮಿ.ಮೀ ಮಳೆಯಾಗಿದ್ದರೆ, ರಾಮದುರ್ಗ ತಾಲೂಕಿನಲ್ಲಿ ಕೇವಲ 46 ಮಿ.ಮೀ ಪ್ರಮಾಣದ ಕಡಿಮೆ ಮಳೆ ದಾಖಲಾಗಿದೆ. ಮಳೆಯ ಕೊರತೆಯ ಜೊತೆಗೆ ಜೂನ್ ತಿಂಗಳಿಡೀ ಬಿಸಿಲಿನ ಪ್ರಮಾಣ ಹೆಚ್ಚಿದ್ದರಿಂದ ಮುಂಗಾರು ಬೆಳೆಗಳು ಹಾಗೂ ಕಬ್ಬಿನ ಬೆಳೆ ಬಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಹಲವು ಗ್ರಾಮಗಳಲ್ಲಿ ರೈತರು ಹೊಲಗಳನ್ನು ಬಿತ್ತನೆಗೆ ಸಿದ್ಧಪಡಿಸಿಕೊಂಡಿದ್ದರೂ ಮಳೆಯಿಲ್ಲದೆ ಬಿತ್ತನೆ ಮುಂದೂಡಿದ್ದಾರೆ.
ಕೃಷಿ ಇಲಾಖೆಯ ಮಾಹಿತಿಯಂತೆ, ಜಿಲ್ಲೆಯಲ್ಲಿ 7,52,312 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಗುರಿ ಹೊಂದಲಾಗಿತ್ತು. ಆದರೆ ಇದುವರೆಗೆ 3,81,887 ಹೆಕ್ಟೇರ್ ಪ್ರದೇಶದಲ್ಲಿ ಮಾತ್ರ ಬಿತ್ತನೆಯಾಗಿದ್ದು, ಒಟ್ಟು ಗುರಿಯ ಶೇ 51ರಷ್ಟು ಮಾತ್ರ ಪ್ರಗತಿ ಸಾಧಿಸಲಾಗಿದೆ.
ಜಿಲ್ಲೆಯಲ್ಲಿ ಹೆಸರು 38,271 ಹೆಕ್ಟೇರ್, ಭತ್ತ 32,540 ಹೆಕ್ಟೇರ್, ಸೋಯಾಬಿನ್ 42,405 ಹೆಕ್ಟೇರ್, ಮೆಕ್ಕೆಜೋಳ 14,820 ಹೆಕ್ಟೇರ್, ಹತ್ತಿ 99,993 ಹೆಕ್ಟೇರ್ ಹಾಗೂ ಕಬ್ಬು 2,29,229 ಹೆಕ್ಟೇರ್ ಪ್ರದೇಶದಲ್ಲಿ ಬೆಳೆ ಬೆಳೆದಿದೆ. ಆದರೆ ಮಳೆ ಕೊರತೆಯಿಂದ ಕೆಲವು ತಾಲೂಕುಗಳಲ್ಲಿ ಬಿತ್ತನೆ ಇನ್ನೂ ಆರಂಭವಾಗಿಲ್ಲ.
ಅಥಣಿ ತಾಲೂಕಿನಲ್ಲಿ 71,285 ಹೆಕ್ಟೇರ್ ಬಿತ್ತನೆ ಗುರಿ ಹೊಂದಲಾಗಿದ್ದರೂ, ಮಳೆಯ ಅಭಾವದಿಂದ ಕೇವಲ 36,230 ಹೆಕ್ಟೇರ್ ಪ್ರದೇಶದಲ್ಲಿ ಮಾತ್ರ ಬಿತ್ತನೆ ನಡೆದಿದೆ. ತಾಲೂಕಿನ ಹಲವಾರು ಗ್ರಾಮಗಳಲ್ಲಿ ರೈತರು ಹೊಲಗಳನ್ನು ಸಿದ್ಧಪಡಿಸಿಕೊಂಡು ಮಳೆಯ ನಿರೀಕ್ಷೆಯಲ್ಲಿದ್ದಾರೆ.
ಎರಡನೇ ಬಾರಿ ಈರುಳ್ಳಿ ಬಿತ್ತನೆ
ಮಳೆಯ ಕೊರತೆ ಮತ್ತು ಜೂನ್ ತಿಂಗಳಿನಲ್ಲಿ ಹೆಚ್ಚಾದ ತಾಪಮಾನದಿಂದ ಈರುಳ್ಳಿ ಬೆಳೆ ಒಣಗಿದ ಪರಿಣಾಮ ಅನೇಕ ರೈತರು ಈಗಾಗಲೇ ಬಿತ್ತಿದ್ದ ಬೆಳೆಯನ್ನು ಉಳುಮೆ ಮಾಡಿ ಮತ್ತೆ ಜೂನ್ ಕೊನೆಯ ವಾರದಲ್ಲಿ ಬಿತ್ತನೆ ನಡೆಸಿದ್ದಾರೆ. ಇದರಿಂದ ಉತ್ಪಾದನಾ ವೆಚ್ಚ ಹೆಚ್ಚಾಗಿದ್ದು ರೈತರಿಗೆ ಆರ್ಥಿಕ ಹೊರೆಯಾಗಿದೆ.
ಈ ಕುರಿತು ಈದಿನ್.ಕಾಮ್ ಜತೆ ಮಾತನಾಡಿದ ರೈತ ವಿಠಲ ಸುನಗದ, “ನಾವು ಎರಡು ಎಕರೆ ಈರುಳ್ಳಿ ಬಿತ್ತಿದ್ದೀವಿ. ಆದ್ರ ಜೂನ್ ತಿಂಗಳೊಳಗ ಸರಿಯಾಗಿ ಮಳೆ ಆಗಲಿಲ್ಲ. ಈರುಳ್ಳಿ ಬೆಳೆಗೆ ತಂಪಾದ ವಾತಾವರಣ ಬೇಕಾಗ್ತದ. ಆದ್ರ 38 ಡಿಗ್ರಿವರೆಗೂ ಬಿಸಿಲು ಬಿದ್ದಿದ್ದರಿಂದ ಬೆಳೆ ಪೂರ್ತಿ ಒಣಗಿ ಹೋಗಿದೆ. ಅದಕ್ಕ ಹೊಲ ಹರಗಿ ಜೂನ್ ಕೊನೆ ವಾರದಲ್ಲಿ ಮತ್ತೊಮ್ಮೆ ಬಿತ್ತನೆ ಮಾಡಬೇಕಾಯ್ತು. ಎರಡು ಎಕರೆ ಈರುಳ್ಳಿ ಬೆಳೆಗೆ ಮೊದಲೇ ಸುಮಾರು ₹10 ಸಾವಿರ ಖರ್ಚಾಗಿತ್ತು. ಈಗ ಮತ್ತೆ ಅಷ್ಟೇ ಖರ್ಚು ಮಾಡಬೇಕಾಯ್ತು. ಈರುಳ್ಳಿ ಬೆಳೆಗೆ 90ರಿಂದ 105 ದಿನ ಬೇಕಾಗ್ತದ. ಒಂದು ಸಲ ಕಳೆ ತೆಗೆಯಾಕ ₹5 ಸಾವಿರ ಖರ್ಚು ಆಗ್ತದ. ನಾಲ್ಕು ಸಲ ಕಳೆ ತೆಗೆಯಬೇಕಾಗ್ತದ. ಅದಲ್ಲದೇ ಎರಡು ಎಕರೆಗೆ ಕಳೆನಾಶಕಕ್ಕೆ ₹1,400 ಖರ್ಚು, ಕೀಟನಾಶಕ ಸಿಂಪಡಣೆಗೂ ಸಾಕಷ್ಟು ಹಣ ಬೇಕಾಗ್ತದ. ಇಂಥಾ ಪರಿಸ್ಥಿತಿಯಲ್ಲಿ ಕೃಷಿ ಇಲಾಖೆ ರೈತರ ನೆರವಿಗೆ ಬರಬೇಕು” ಎಂದು ಮನವಿ ಮಾಡಿದರು.
ರೈತ ರಮೇಶ ಚಾಕಲಬ್ಬಿ ಮಾತನಾಡಿ, “ನಾವು ಎಂಟು ಎಕರೆಯಲ್ಲಿ ಹೆಸರು ಬಿತ್ತಿದ್ದೀವಿ. ಈ ವರ್ಷ ಮಳೆಯಾಗದ ಕಾರಣ ಇಳುವರಿ ಕಡಿಮೆ ಆಗಲಿದೆ. ನಾಲ್ಕು ಎಕರೆಯಲ್ಲಿ ಈರುಳ್ಳಿಯೂ ಬಿತ್ತಿದ್ದೀವಿ. ಎಂಟು ಎಕರೆಯಲ್ಲಿ ಕಬ್ಬು ಹಾಕಿದ್ದೀವಿ. ಇನ್ನೂ ಐದಾರು ದಿನದೊಳಗ ಮಳೆ ಆಗದಿದ್ದರ ಕಬ್ಬು ಕೂಡ ಒಣಗುವ ಭಯ ಇದೆ. ಈ ವರ್ಷ ಸರ್ಕಾರ ರೈತರ ಕಷ್ಟಕ್ಕೆ ಸ್ಪಂದಿಸಿ ನೆರವಿನ ಹಸ್ತ ನೀಡಬೇಕಿದೆ” ಎಂದು ಆಗ್ರಹಿಸಿದರು.
ಮುಂಗಾರು ಆರಂಭದಲ್ಲೇ ಮಳೆ ಕೊರತೆ ಉಂಟಾಗಿರುವುದರಿಂದ ಬಿತ್ತನೆ ಪ್ರಮಾಣ ಕುಸಿದಿದ್ದು, ಬೆಳೆಗಳ ಬೆಳವಣಿಗೆಯ ಮೇಲೂ ಪ್ರತಿಕೂಲ ಪರಿಣಾಮ ಬೀರಿದೆ. ಹೀಗಾಗಿ ಸರ್ಕಾರ ತಕ್ಷಣವೇ ಪರಿಸ್ಥಿತಿ ಪರಿಶೀಲಿಸಿ ಅಗತ್ಯ ನೆರವು ಹಾಗೂ ಪರಿಹಾರ ಕ್ರಮಗಳನ್ನು ಕೈಗೊಳ್ಳಬೇಕು ಎಂಬುದು ಜಿಲ್ಲೆಯ ರೈತರ ಮನವಿಯಾಗಿದೆ.
