ಚೀನಾದ ‘ಲೈನ್‌ಶೈನ್’ ಕಂಪ್ಯೂಟರ್ 2.198 ಎಕ್ಸಾಫ್ಲಾಪ್ಸ್ ವೇಗ ಹೊಂದಿದೆ. ಅಂದರೆ, ಅದು ಪ್ರತಿ ಸೆಕೆಂಡಿಗೆ ಸುಮಾರು 2.198 ಕ್ವಿಂಟಿಲಿಯನ್ ಲೆಕ್ಕಾಚಾರಗಳನ್ನು ಮಾಡಬಲ್ಲದು. ಇದನ್ನ ಇನ್ನೂ ಸರಳವಾಗಿ ತಿಳಿಯಬೇಕೆಂದರೆ, ಪ್ರಪಂಚದ ಪ್ರತಿಯೊಬ್ಬ ವ್ಯಕ್ತಿಯೂ (ಸುಮಾರು 800 ಕೋಟಿ ಜನ) ಸೆಕೆಂಡಿಗೆ ಒಂದು ಲೆಕ್ಕಾಚಾರವನ್ನು ಮಾಡುವುದಾದರೆ, ಆ 800 ಕೋಟಿ ಜನರೂ ಸೇರಿ ಇಡೀ ವರ್ಷ ಮಾಡಬಹುದಾದ ಲೆಕ್ಕಾಚಾರವನ್ನು ‘ LineShine ‘ ಕೇವಲ 1 ಸೆಕೆಂಡಿನಲ್ಲಿ ಪೂರೈಸುತ್ತದೆ. ನಿಮ್ಮ ಮನೆಯಲ್ಲಿರುವ ಸಾಮಾನ್ಯ ಲ್ಯಾಪ್‌ಟಾಪ್ ಅಥವಾ ಡೆಸ್ಕ್‌ಟಾಪ್ ಕಂಪ್ಯೂಟರ್‌ಗೆ ಇಂತಹ ಲೆಕ್ಕಾಚಾರಗಳನ್ನು ಮಾಡಲು ಹತ್ತಾರು ವರ್ಷಗಳೇ ಬೇಕಾಗಬಹುದು!
ಸೂಪರ್ ಕಂಪ್ಯೂಟಿಂಗ್ ಕ್ಷೇತ್ರದಲ್ಲಿ ಚೀನಾ ಮತ್ತೊಂದು ಐತಿಹಾಸಿಕ ಮೈಲಿಗಲ್ಲು ನೆಟ್ಟಿದೆ. ನಿನ್ನೆ (ಜೂನ್ 23)ಯಷ್ಟೇ ಜರ್ಮನಿಯಲ್ಲಿ ನಡೆದ ‘ISC 2026’ ಸಮಾವೇಶದಲ್ಲಿ ಪ್ರಕಟವಾದ ʼTOP500ʼ ಎನ್ನುವ ಸೂಪರ್ ಕಂಪ್ಯೂಟರ್‌ಗಳ ಶ್ರೇಯಾಂಕ ಪಟ್ಟಿಯಲ್ಲಿ 2017ರ ನಂತರ ಇದೇ ಮೊದಲ ಬಾರಿಗೆ ಚೀನಾ ಆಧಾರಿತ ಸಿಸ್ಟಮ್‌ವೊಂದು ಅಗ್ರಸ್ಥಾನ ಪಡೆದುಕೊಂಡಿದೆ. ಇದು ಅಮೆರಿಕದ ‘ಎಲ್ ಕ್ಯಾಪಿಟನ್’ (El Capitan) ಕಂಪ್ಯೂಟರ್‌ನ್ನು ಹಿಂದಿಕ್ಕಿದೆ. ಈ ಪಟ್ಟಿಯ ಪ್ರಕಾರ, ಚೀನಾದ ‘ಲೈನ್‌ಶೈನ್’ (LineShine) ಸೂಪರ್ ಕಂಪ್ಯೂಟರ್ ಜಗತ್ತಿನ ಅತಿ ವೇಗದ ಸೂಪರ್ ಕಂಪ್ಯೂಟರ್ ಎಂಬ ಪಟ್ಟ ಅಲಂಕರಿಸಿದೆ. ಚೀನಾ ಅಮೆರಿಕದ ವಿರುದ್ಧ ನೇರ ಸ್ಪರ್ಧೆಗೆ ಇಳಿದಿರುವುದು ಜಾಗತಿಕ ರಾಜಕೀಯ ಮತ್ತು ತಂತ್ರಜ್ಞಾನ ವಲಯದಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ.
ಈ LineShine ಕಂಪ್ಯೂಟರ್ 2.198 Exaflops (ಸೂಪರ್ ಕಂಪ್ಯೂಟರ್‌ನ ವೇಗವನ್ನು ಅಳೆಯುವ ಮಾನದಂಡ) ವೇಗವನ್ನು ಸಾಧಿಸಲು ಸಂಪೂರ್ಣವಾಗಿ ದೇಶೀಯವಾಗಿ ವಿನ್ಯಾಸಗೊಳಿಸಿದ ಚಿಪ್‌ಗಳು ಮತ್ತು ಸಾಫ್ಟ್‌ವೇರ್ ಪರಿಸರ ವ್ಯವಸ್ಥೆಯನ್ನು ಬಳಸಿದೆ.
FLOPSನ ಪೂರ್ಣ ರೂಪ Floating Point Operations Per Second. ಅಂದರೆ ಒಂದು ಸೆಕೆಂಡಿನಲ್ಲಿ ಕಂಪ್ಯೂಟರ್ ಮಾಡಬಲ್ಲ ಗಣಿತದ ಲೆಕ್ಕಾಚಾರಗಳ ಸಂಖ್ಯೆ. Exa ಎಂದರೆ, ಗಣಿತದ ಅತಿದೊಡ್ಡ ಅಳತೆಗಳಲ್ಲಿ ಒಂದು. 1 ಎಕ್ಸಾ ಎಂದರೆ 1 ಕ್ವಿಂಟಿಲಿಯನ್ (Quintillion). 1 ಕ್ವಿಂಟಿಲಿಯನ್ ಅಂದರೆ 1 ರ ನಂತರ 18 ಸೊನ್ನೆಗಳು.
ಚೀನಾದ ‘ಲೈನ್‌ಶೈನ್’ ಕಂಪ್ಯೂಟರ್ 2.198 ಎಕ್ಸಾಫ್ಲಾಪ್ಸ್ ವೇಗ ಹೊಂದಿದೆ ಎಂದರೆ, ಅದು ಪ್ರತಿ ಸೆಕೆಂಡಿಗೆ ಸುಮಾರು 2.198 ಕ್ವಿಂಟಿಲಿಯನ್ (ಅಂದರೆ 2.198 ಬಿಲಿಯನ್ ಬಿಲಿಯನ್) ಲೆಕ್ಕಾಚಾರಗಳನ್ನು ಮಾಡಬಲ್ಲದು ಎಂದರ್ಥ. ಇದನ್ನ ಇನ್ನೂ ಸರಳವಾಗಿ ತಿಳಿಯಬೇಕೆಂದರೆ, ಪ್ರಪಂಚದ ಪ್ರತಿಯೊಬ್ಬ ವ್ಯಕ್ತಿಯೂ (ಸುಮಾರು 800 ಕೋಟಿ ಜನ) ಸೆಕೆಂಡಿಗೆ ಒಂದು ಲೆಕ್ಕಾಚಾರವನ್ನು ಮಾಡುವುದಾದರೆ, ಆ 800 ಕೋಟಿ ಜನರೂ ಸೇರಿ ಇಡೀ ವರ್ಷ ಮಾಡಬಹುದಾದ ಲೆಕ್ಕಾಚಾರವನ್ನು ‘ LineShine ‘ ಕೇವಲ 1 ಸೆಕೆಂಡಿನಲ್ಲಿ ಪೂರೈಸುತ್ತದೆ. ನಿಮ್ಮ ಮನೆಯಲ್ಲಿರುವ ಸಾಮಾನ್ಯ ಲ್ಯಾಪ್‌ಟಾಪ್ ಅಥವಾ ಡೆಸ್ಕ್‌ಟಾಪ್ ಕಂಪ್ಯೂಟರ್‌ಗೆ ಇಂತಹ ಲೆಕ್ಕಾಚಾರಗಳನ್ನು ಮಾಡಲು ಹತ್ತಾರು ವರ್ಷಗಳೇ ಬೇಕಾಗಬಹುದು. ಅಷ್ಟು ಅಸಾಧ್ಯವಾದ ಗಣಿತದ ಸಮಸ್ಯೆಗಳನ್ನು ಈ ಯಂತ್ರ ಸೆಕೆಂಡುಗಳಲ್ಲಿ ಬಗೆಹರಿಸುತ್ತದೆ!
ಯಾವುದೇ ಜಾಗತಿಕ ಗ್ರಾಫಿಕ್ಸ್ ಕಾರ್ಡ್‌ಗಳ (GPU) ಸಹಾಯವಿಲ್ಲದೆ, ಕೇವಲ ಸಾಂಪ್ರದಾಯಿಕ CPUಗಳನ್ನು ಬಳಸಿಯೇ ಈ ಸಾಧನೆ ಮಾಡಿರುವುದು ಚೀನಾದ ಇಂಜಿನಿಯರಿಂಗ್ ಶಕ್ತಿಗೆ ಅತಿದೊಡ್ಡ ಸಾಕ್ಷಿ. ಆದರೆ, ಇಲ್ಲೊಂದು ತಾಂತ್ರಿಕ ಅಡೆತಡೆ ಇದೆ.
LineShine ಬಳಸುವ 42.2 ಮೆಗಾವ್ಯಾಟ್ ವಿದ್ಯುತ್ ಪ್ರಮಾಣವು, ಅಮೆರಿಕದ ಎಲ್ ಕ್ಯಾಪಿಟನ್‌ನ ಇಂಧನ ದಕ್ಷತೆಗೆ ಹೋಲಿಸಿದರೆ ಹೆಚ್ಚಾಗಿದೆ. ಇಂದಿನ ಡೇಟಾ ಸೆಂಟರ್‌ಗಳ ಯುಗದಲ್ಲಿ, ಕೇವಲ ವೇಗವಲ್ಲ, ಅತಿ ಕಡಿಮೆ ವಿದ್ಯುತ್ ಬಳಸಿ ಅತಿ ಹೆಚ್ಚು ಲೆಕ್ಕಾಚಾರಗಳನ್ನು ಮಾಡುವ ಸಾಮರ್ಥ್ಯವೇ ನಿಜವಾದ ವಿಜಯದ ಮಾನದಂಡ ಎನ್ನಲಾಗುತ್ತದೆ. ಜೊತೆಗೆ, AI ತರಬೇತಿಗೆ ಅಗತ್ಯವಿರುವ ವಿಶೇಷ ತಾಂತ್ರಿಕ ಮಾನದಂಡಗಳಲ್ಲಿ LineShine ಅಮೆರಿಕದ ಕಂಪ್ಯೂಟರ್‌ಗಳನ್ನ ಮೀರಿಸಿಲ್ಲ. ಇದೇ ಕಾರಣಕ್ಕೆ ತಜ್ಞರು ಈ ಸಾಧನೆಯನ್ನು ಎಚ್ಚರಿಕೆಯಿಂದ ನೋಡುತ್ತಿದ್ದಾರೆ.
ಈ ರೇಸ್‌ನಲ್ಲಿರುವ ಇನ್ನೊಂದು ಕುತೂಹಲಕಾರಿ ಸಂಗತಿಯೆಂದರೆ, ಇಂದಿನ ಅತಿ ಶಕ್ತಿಶಾಲಿ ಎಂದು ಕರೆಸಿಕೊಳ್ಳುವ ಕಂಪ್ಯೂಟರ್‌ಗಳು ಕೇವಲ ಸಾರ್ವಜನಿಕ ಪಟ್ಟಿಯಲ್ಲಿಲ್ಲ. ಗೂಗಲ್, ಮೈಕ್ರೋಸಾಫ್ಟ್ ಮತ್ತು ಮಸ್ಕ್ ಅವರ xAI ನಂತಹ ಕಂಪನಿಗಳು ನಿರ್ಮಿಸಿರುವ ‘ಕೊಲೊಸಸ್’ (Colossus) ನಂತಹ ವ್ಯವಸ್ಥೆಗಳು, AI ಸಂಶೋಧನೆಗಾಗಿ ಮೀಸಲಾಗಿವೆ. ಜತೆಗೆ ಇವು TOP500 ಪಟ್ಟಿಯ ರೇಸ್‌ನಲ್ಲಿ ಇರುವುದಿಲ್ಲ. ಅಂದರೆ ಆ ಪಟ್ಟಿಯಿಂದ ಹೊರಗುಳಿಯಲಿವೆ. ಇಂತಹ ಖಾಸಗಿ ಸೂಪರ್ ಕಂಪ್ಯೂಟರ್‌ಗಳ ಸಾಮರ್ಥ್ಯವು LineShine ನ ವೇಗವನ್ನೂ ಮೀರಿಸುವ ಸಾಧ್ಯತೆಯಿದೆ ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ. ಇದು ಈ ರೇಸ್ ಕೇವಲ ಸರ್ಕಾರಿ ಪ್ರಾಯೋಜಿತ ಸಂಶೋಧನೆಗಳ ನಡುವಿನ ಪೈಪೋಟಿಯಲ್ಲ, ಖಾಸಗಿ ವಲಯದ ನಾವೀನ್ಯತೆಯೂ ಈ ರೇಸ್‌ನ ದಿಕ್ಕನ್ನು ನಿರ್ಧರಿಸುತ್ತಿದೆ ಎಂಬುದನ್ನು ತೋರಿಸುತ್ತದೆ ಎನ್ನುವುದು ತಜ್ಞರ ಅಭಿಪ್ರಾಯ.
ಈ ತಾಂತ್ರಿಕ ಸಮರ ಕೇವಲ ಅಮೆರಿಕ ಮತ್ತು ಚೀನಾಕ್ಕೆ ಸೀಮಿತವಾಗಿಲ್ಲ. ಜಪಾನ್‌ನ ‘ಫುಗಾಕು’ ಸೂಪರ್ ಕಂಪ್ಯೂಟರ್ ತನ್ನ ದಕ್ಷತೆ ಮತ್ತು ಸಮಾಜಮುಖಿ ಸಂಶೋಧನೆಗಳಿಗಾಗಿ ಈಗಲೂ ಜಗತ್ತಿನ ಗೌರವಾನ್ವಿತ ಸ್ಥಾನದಲ್ಲಿದೆ. ಯುರೋಪಿಯನ್ ಒಕ್ಕೂಟವು ‘ಯುರೋ-ಎಚ್‌ಪಿಸಿ’ ಯೋಜನೆಯಡಿ ಪರಿಸರ ಸ್ನೇಹಿ ಮತ್ತು ಹವಾಮಾನ ಬದಲಾವಣೆ ಸಂಶೋಧನೆಗೆ ಒತ್ತು ನೀಡುತ್ತಿದೆ. ಭಾರತವೂ ತನ್ನ ‘ನ್ಯಾಷನಲ್ ಸೂಪರ್‌ಕಂಪ್ಯೂಟಿಂಗ್ ಮಿಷನ್’ ಮೂಲಕ ಸ್ವದೇಶಿ ಸೂಪರ್ ಕಂಪ್ಯೂಟರ್‌ಗಳನ್ನು ಅಭಿವೃದ್ಧಿಪಡಿಸುತ್ತಿದೆ. ಆದಾಗ್ಯೂ, ಈ ಉಳಿದ ದೇಶಗಳು ನಂಬರ್ 1 ಪಟ್ಟಿಗಿಂತಲೂ ಹೆಚ್ಚಾಗಿ ತಮ್ಮ ಆಂತರಿಕ ಅವಶ್ಯಕತೆಗಳಾದ ಕೃಷಿ, ಸೈಬರ್ ಭದ್ರತೆ ಮತ್ತು ವೈಜ್ಞಾನಿಕ ಸಂಶೋಧನೆಯ ಮೇಲೆ ಗಮನ ಕೇಂದ್ರೀಕರಿಸಿವೆ.
‘ಫುಗಾಕು’ ಎಂಬುದು ಜಪಾನ್‌ನ ಮೌಂಟ್ ಫ್ಯೂಜಿ (Mount Fuji) ಪರ್ವತದ ಇನ್ನೊಂದು ಹೆಸರು. ಜಪಾನ್‌ ತನ್ನ ಈ ಅತಿ ಶಕ್ತಿಯುತ ಕಂಪ್ಯೂಟರ್‌ಗೆ ಈ ಹೆಸರು ನೀಡುವ ಮೂಲಕ, ಅದು ಉನ್ನತ ಮಟ್ಟದ ಕಾರ್ಯಕ್ಷಮತೆಯನ್ನು ಹೊಂದಿದೆ ಎಂದು ಸಂಕೇತಿಸಿದೆ. ಇದನ್ನು ಜಪಾನ್‌ನ ಪ್ರಮುಖ ವೈಜ್ಞಾನಿಕ ಸಂಸ್ಥೆ RIKEN ಮತ್ತು Fujitsu ಕಂಪನಿಗಳು ಜಂಟಿಯಾಗಿ ಅಭಿವೃದ್ಧಿಪಡಿಸಿವೆ. ಇದು ಜಪಾನ್‌ನ ಕೋಬ್ (Kobe) ನಗರದಲ್ಲಿರುವ RIKEN ಸೆಂಟರ್ ಫಾರ್ ಕಂಪ್ಯೂಟೇಶನಲ್ ಸೈನ್ಸ್‌ನಲ್ಲಿ ಕಾರ್ಯನಿರ್ವಹಿಸುತ್ತಿದೆ. 2020ರಲ್ಲಿ ಫುಗಾಕು ವಿಶ್ವದ ಅತಿ ವೇಗದ ಸೂಪರ್ ಕಂಪ್ಯೂಟರ್‌ಗಳ TOP500 ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದುಕೊಂಡಿತ್ತು. ಇದು ಆ ಸಮಯದಲ್ಲಿ ಕೇವಲ ವೇಗದಲ್ಲಿ ಮಾತ್ರವಲ್ಲದೆ, ಕೃತಕ ಬುದ್ಧಿಮತ್ತೆ (AI), ಬಿಗ್ ಡೇಟಾ ಸಂಸ್ಕರಣೆ ಮತ್ತು ಅಪ್ಲಿಕೇಶನ್ ಕಾರ್ಯಕ್ಷಮತೆ ಎಂಬ 4 ಪ್ರಮುಖ ಮಾನದಂಡಗಳಲ್ಲಿ ಒಂದೇ ಬಾರಿಗೆ ನಂ. 1 ಸ್ಥಾನ ಪಡೆದ ಮೊದಲ ಸೂಪರ್ ಕಂಪ್ಯೂಟರ್ ಎಂಬ ದಾಖಲೆ ನಿರ್ಮಿಸಿದೆ. ಇದು ಫುಜಿತ್ಸು ಕಂಪನಿಯ A64FX ಮೈಕ್ರೊಪ್ರೊಸೆಸರ್‌ಗಳನ್ನು ಬಳಸುತ್ತದೆ. ಇದು ARM ಆರ್ಕಿಟೆಕ್ಚರ್ ಆಧಾರಿತ ಪ್ರೊಸೆಸರ್ ಆಗಿದ್ದು, ಸೂಪರ್ ಕಂಪ್ಯೂಟರ್‌ಗಳಲ್ಲಿ ARM ತಂತ್ರಜ್ಞಾನದ ಪರಿಣಾಮಕಾರಿ ಬಳಕೆಗೆ ದಾರಿ ಮಾಡಿಕೊಟ್ಟಿದೆ. ಇದು ಅತ್ಯಂತ ಶಕ್ತಿಶಾಲಿ ಎನಿಸುವುದರ ಜತೆಗೆ ಇಂಧನ ದಕ್ಷತೆಯಲ್ಲಿಯೂ (Energy Efficiency) ವಿಶ್ವದಾಖಲೆ ಮಾಡಿದೆ.
ಫುಗಾಕು ಸಮಾಜದ ಸಮಸ್ಯೆಗಳನ್ನು ಬಗೆಹರಸುವಲ್ಲಿಯೂ ಹೆಸರುವಾಸಿ. ಕೋವಿಡ್-19 ಸಾಂಕ್ರಾಮಿಕದ ಸಂದರ್ಭದಲ್ಲಿ, ಸೋಂಕು ಹೇಗೆ ಹರಡುತ್ತದೆ (ಡ್ರಾಪ್‌ಲೆಟ್ ಇನ್ಫೆಕ್ಷನ್), ಮಾಸ್ಕ್ ಧರಿಸುವುದರಿಂದ ಮತ್ತು ಗಾಳಿಯಾಡುವುದರಿಂದ (ventilation) ಸೋಂಕು ತಡೆಯಲು ಹೇಗೆ ಸಾಧ್ಯ ಎಂಬ ಬಗ್ಗೆ ಅತ್ಯಂತ ನಿಖರವಾದ ಸಿಮ್ಯುಲೇಶನ್‌ಗಳನ್ನು ನಡೆಸಿ ಜಗತ್ತಿಗೆ ಮೂಡಿಸಿತ್ತು. ಅಲ್ಲದೆ, ಲಸಿಕೆ ಮತ್ತು ಔಷಧ ಸಂಶೋಧನೆಯಲ್ಲಿಯೂ ಇದು ಪ್ರಮುಖ ಪಾತ್ರ ವಹಿಸಿತ್ತು. ಸದ್ಯ ಫುಗಾಕು ಹವಾಮಾನ ಮುನ್ಸೂಚನೆ, ವಿಪತ್ತು ನಿರ್ವಹಣೆ (ಸುನಾಮಿ/ಭೂಕಂಪನಗಳ ಸಿಮ್ಯುಲೇಶನ್), ಮತ್ತು ಹೊಸ ವಸ್ತುಗಳ ಸಂಶೋಧನೆಗೆ ವ್ಯಾಪಕವಾಗಿ ಬಳಕೆಯಾಗುತ್ತಿದೆ. ಸರಳವಾಗಿ ಹೇಳುವುದಾದರೆ, ಫುಗಾಕು ಜಪಾನ್‌ನ ತಾಂತ್ರಿಕ ಸಾಧನೆಯ ಸಂಕೇತ. ಇದು ತನ್ನ ಅಸಾಧಾರಣ ಸಾಮರ್ಥ್ಯದಿಂದಾಗಿ ವಿಜ್ಞಾನ ಮತ್ತು ಸಮಾಜದ ನಡುವಿನ ಅಂತರವನ್ನು ಕಡಿಮೆ ಮಾಡುವಲ್ಲಿ ಯಶಸ್ವಿಯಾಗಿದೆ.
ಅಮೆರಿಕ ಅಧ್ಯಕ್ಷ ಟ್ರಂಪ್‌, ಕ್ವಾಂಟಮ್ ಕಂಪ್ಯೂಟಿಂಗ್ ಕ್ಷೇತ್ರಕ್ಕೆ ಹೆಚ್ಚಿನ ಬಂಡವಾಳ ಹೂಡಲು ತುರ್ತು ಆದೇಶಗಳನ್ನು ಜಾರಿಗೊಳಿಸುತ್ತಿರುವುದು, ಈ ಪೈಪೋಟಿಯು ಸಾಂಪ್ರದಾಯಿಕ ವೇಗದ ರೇಸ್‌ನಿಂದ ಕ್ವಾಂಟಮ್ ತಂತ್ರಜ್ಞಾನದ ಕಡೆಗೆ ವರ್ಗಾವಣೆಯಾಗುತ್ತಿದೆ ಎಂಬುದನ್ನು ಸೂಚಿಸುತ್ತದೆ. ಲೈನ್‌ಶೈನ್ ಸಾಧನೆಯು ಚೀನಾದ ದೇಶೀಯ ತಾಂತ್ರಿಕ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ ಎಂಬುದು ನಿಜ, ಆದರೆ ಅಮೆರಿಕದ ಸಾಫ್ಟ್‌ವೇರ್ ಪರಿಸರ ವ್ಯವಸ್ಥೆ (ಉದಾಹರಣೆಗೆ NVIDIA CUDA) ಮತ್ತು AI ತಂತ್ರಜ್ಞಾನದ ಮೇಲಿನ ಹಿಡಿತ ಇನ್ನೂ ಪ್ರಬಲವಾಗಿದೆ.
ಇದನ್ನೂ ಓದಿ: ಅಕ್ರಮ ಕಟ್ಟಡಗಳ ಅಗ್ನಿ ದುರಂತಗಳು; ಸಾಲು ಸಾಲು ಸಾವಿಗೆ ಹೊಣೆ ಯಾರು?
ಭಾರತವು ತನ್ನ ‘ನ್ಯಾಷನಲ್ ಸೂಪರ್‌ಕಂಪ್ಯೂಟಿಂಗ್ ಮಿಷನ್’ (NSM) ಅಡಿಯಲ್ಲಿ ಸ್ವದೇಶಿ ಸೂಪರ್ ಕಂಪ್ಯೂಟರ್‌ಗಳಾದ ‘ಪರಮ್ ಸಿದ್ಧಿ’ ಮತ್ತು ‘ಐರಾವತ್’ (AIRAWAT) ಮೂಲಕ ತಾಂತ್ರಿಕ ಸ್ವಾವಲಂಬನೆಯತ್ತ ಧಾಪುಗಾಲು ಹಾಕಿದೆ. ವಿಶೇಷವಾಗಿ ‘ಐರಾವತ್’ ಭಾರತದ ಅತಿ ವೇಗದ ಮತ್ತು ಬೃಹತ್ AI ಸೂಪರ್ ಕಂಪ್ಯೂಟರ್ ಆಗಿದ್ದು, ಇದು ಕೃತಕ ಬುದ್ಧಿಮತ್ತೆಯ ಸಂಶೋಧನೆಯಲ್ಲಿ ಜಾಗತಿಕ ಮಟ್ಟದಲ್ಲಿ ಮನ್ನಣೆ ಪಡೆದಿದೆ. ಭವಿಷ್ಯದ ‘ನಾಗ’ (NAGA) ನಂತಹ ಮುಂಬರುವ ಯೋಜನೆಗಳ ಮೂಲಕ ಭಾರತ ಕೂಡ ಕ್ವಾಂಟಮ್ ಕಂಪ್ಯೂಟಿಂಗ್ ಮತ್ತು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಕ್ಷೇತ್ರದಲ್ಲಿಯೂ ಜಾಗತಿಕವಾಗಿ ಸ್ವಾವಲಂಬಿಯಾಗಲು ಸಜ್ಜಾಗುತ್ತಿದ್ದೇವೆ. ಆದರೆ ಸಾಗಬೇಕಿರುವ ಹಾದಿ ಇನ್ನೂ ದೂರವಿದೆ.
LineShine ಸಾಧನೆಯು ಚೀನಾದ ತಾಂತ್ರಿಕ ಸ್ವಾವಲಂಬನೆಯನ್ನ ಜಗತ್ತಿಗೆ ಸಾರಿದೆ. ಆದರೆ, ಈ ಸೂಪರ್ ಕಂಪ್ಯೂಟಿಂಗ್ ಪೈಪೋಟಿಯು ಸಾಫ್ಟ್‌ವೇರ್ ಪರಿಸರ ವ್ಯವಸ್ಥೆ, ಇಂಧನ ದಕ್ಷತೆ ಮತ್ತು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಕ್ಷೇತ್ರದಲ್ಲಿನ ನೈಜ ಸಾಮರ್ಥ್ಯದ ನಡುವಿನ ಕದನ. ಇದರಲ್ಲಿ ಗೆಲ್ಲುವುದು ಅಷ್ಟು ಸುಲಭವಲ್ಲ ಎನ್ನುತ್ತಾರೆ ವಿಜ್ಞಾನಿಗಳು. ಭವಿಷ್ಯದ ತಾಂತ್ರಿಕ ಜಗತ್ತನ್ನು ಯಾರು ಆಳಲಿದ್ದಾರೆ ಎಂಬುದು, ಮಾನವಕುಲದ ಸಂಕೀರ್ಣ ಸಮಸ್ಯೆಗಳಿಗೆ ಯಾರು ಹೆಚ್ಚು ಸುಸ್ಥಿರ ಮತ್ತು ಪರಿಣಾಮಕಾರಿ ಪರಿಹಾರಗಳನ್ನು ನೀಡಬಲ್ಲರು ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ. ಈ ಜಾಗತಿಕ ಸೂಪರ್ ಕಂಪ್ಯೂಟಿಂಗ್ ರೇಸ್ ಎನ್ನುವುದು ಮಾನವನ ಜ್ಞಾನದ ಮಿತಿಗಳನ್ನು ವಿಸ್ತರಿಸುತ್ತಾ, ಹೊಸದೊಂದು ತಾಂತ್ರಿಕ ಯುಗಕ್ಕೆ ನಮ್ಮನ್ನು ಕೊಂಡೊಯ್ಯುತ್ತಿರುವ ಅತ್ಯಂತ ರೋಮಾಂಚನಕಾರಿ ಹಾಗೂ ದಾಖಲಿಸಲೇಬೇಕಾದ ಬೌದ್ಧಿಕ ಕ್ರಾಂತಿ.
