ಗಣೇಶ ಮೂರ್ತಿ ಪ್ರತಿಷ್ಠಾಪನೆ ಹಾಗೂ ವಿಸರ್ಜನೆ ಎಂದಾಕ್ಷಣ ಡಿಜೆ ಸದ್ದು, ಪಟಾಕಿಗಳ ಅಬ್ಬರ, ಅದ್ಧೂರಿ ಮೆರವಣಿಗೆ ಇರುವುದು ಸಹಜ ಎಂಬಂತಾಗಿದೆ. ಆದರೆ, ಇವೆಲ್ಲಕ್ಕೂ ವಿಭಿನ್ನವಾಗಿ ಯೋಚಿಸಿರುವ ಕೊಪ್ಪಳ ತಾಲೂಕಿನ ಕಿನ್ನಾಳ ಗ್ರಾಮದ ಕಾಮನಕಟ್ಟೆ ಗಣೇಶ ಮಂಡಳಿಯ ಯುವಕರ ತಂಡವೊಂದು ಗಣೇಶೋತ್ಸವಕ್ಕೆ ಸಮಾಜಮುಖಿ ಸ್ಪರ್ಶ ನೀಡುವ ಮೂಲಕ ಸೈ ಎನಿಸಿಕೊಂಡಿದೆ.
ಡಿಜೆಯ ಕರ್ಕಶ ಶಬ್ದ ಹಾಗೂ ಪಟಾಕಿಗಳ ಸದ್ದಿನಿಂದ ಮಕ್ಕಳು, ಬಾಣಂತಿಯರು, ವೃದ್ಧರು ಸೇರಿದಂತೆ ಅನೇಕರಿಗೆ ತೊಂದರೆ ಉಂಟಾಗುವ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ಚರ್ಚೆ ನಡೆಯುತ್ತಿದೆ. ಇದರ ನಿಷೇಧಿಸಲು ಸಂಬಂಧಪಟ್ಟ ಇಲಾಖೆಗಳು ಕಟ್ಟುನಿಟ್ಟಿನ ಕ್ರಮಕೈಗೊಂಡರೂ ಸಹ ಎಲ್ಲೆಡೆ ಡಿಜೆ ಅಬ್ಬರ, ಪಟಾಕಿಗಳ ಸದ್ದು ಜೋರಾಗಿ ನಡೆಯುತ್ತಿದೆ. ಪರಿಸರ ಕಾಳಜಿಯುಳ್ಳ ಕಿನ್ನಾಳ ಗ್ರಾಮದ ಹಿಂದೂ ಗಜಾನನ ಮಂಡಳಿಯು ಡಿಜೆ, ಪಟಾಕಿಗಳಿಗೆ ಖರ್ಚು ಮಾಡಬೇಕಿದ್ದ ಒಂದು ಲಕ್ಷದಷ್ಟು ಹಣವನ್ನು ಗ್ರಾಮದ ಸರ್ಕಾರಿ ಶಾಲೆಗಳ ಗೋಡೆಗಳಿಗೆ ಬಣ್ಣ ಹಚ್ಚುವ ಮುಖಾಂತರ ಮಾದರಿಯಾಗಿದ್ದಾರೆ.
ಗಣೇಶೋತ್ಸವದ ಸಂಭ್ರಮದ ಜತೆಗೆ ಗ್ರಾಮದ ಸರ್ಕಾರಿ ಶಾಲೆಗಳ ಅಭಿವೃದ್ಧಿಗೆ ಕೈಜೋಡಿಸಿರುವ ಬಳಗವು, ಗ್ರಾಮದ ಕುವೆಂಪು ಶತಮಾನೋತ್ಸವ ಮಾದರಿ ಶಾಲೆ ಹಾಗೂ ಕೋಲಪೇಟೆ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಗೋಡೆಗಳಿಗೆ ಸುಣ್ಣಬಣ್ಣ ಬಳಿದು ಅಂದಗೊಳಿಸಿದೆ. ಇದರಿಂದ ಶಾಲಾ ಕಟ್ಟಡಗಳು ಹಾಗೂ ಆವರಣಕ್ಕೆ ಹೊಸ ಮೆರುಗು ಬಂದಿದ್ದು, ಹೊಸ ತಲೆಮಾರಿನ ಯುವ ಜನಾಂಗಕ್ಕೆ ಈ ಯುವಕರು ಪ್ರೇರಣೆಯಾಗಿದ್ದಾರೆ, ರಚನಾತ್ಮಕ ಕಾರ್ಯಕ್ಕೆ ಮುನ್ನುಡಿ ಬರೆದಂತಾಗಿದೆ.
ಸಮಾನ ಮನಸ್ಕ ಯುವಕರ ಬಳಗ
ಹಿಂದೂ ಗಜಾನನ ಮಂಡಳಿಯಲ್ಲಿ 40 ವಯಸ್ಸಿನ ಒಳಗಿನ 60ಕ್ಕೂ ಅಧಿಕ ಸಮಾನ ಮನಸ್ಕ ಸದಸ್ಯರಿದ್ದಾರೆ. ಇದರಲ್ಲಿ ಸರ್ಕಾರಿ, ಖಾಸಗಿ ನೌಕರರು ಸೇರಿದಂತೆ ವಿದ್ಯಾರ್ಥಿ, ಯುವಜನರು ಇದ್ದಾರೆ. ಈ ತಂಡ ಕಳೆದ 11 ವರ್ಷಗಳಿಂದ ಗಣೇಶ ಮೂರ್ತಿ ಪ್ರತಿಷ್ಠಾಪಿಸಿ ಉತ್ಸವ ಆಚರಿಸಿಕೊಂಡು ಬರುತ್ತಿದೆ. ಗ್ರಾಮಸ್ಥರು ಹಾಗೂ ವಿವಿಧ ಸಂಘ-ಸಂಸ್ಥೆಗಳಿಂದ ದೇಣಿಗೆ ಸಂಗ್ರಹಿಸುವ ಜತೆಗೆ ಮಂಡಳಿ ಸದಸ್ಯರೂ ಹಣ ನೀಡುತ್ತಾರೆ. ಪ್ರತಿ ವರ್ಷ ಗಣೇಶೋತ್ಸವದ ವೇಳೆ ಸಂಗ್ರಹವಾಗುವ ಹಣ ಸಮಾಜದ ಒಳಿತಿಗಾಗಿ ಹೇಗೆ ಸದ್ಬಳಕೆ ಮಾಡಬೇಕೆಂದು ಸದಸ್ಯರು ಚರ್ಚಿಸಿ ನಿರ್ಧಾರ ಕೈಗೊಳ್ಳುತ್ತಾರೆ.
ಪುರಾತನ ಬಾವಿಗಳ ಪುನಶ್ಚೇತನ, ರಸ್ತೆ ಗುಂಡಿಗಳಿಗೆ ಮುಕ್ತಿ
ಗ್ರಾಮ ಪಂಚಾಯತ್‌ ಕೇಂದ್ರ ಆಗಿರುವ ಕಿನ್ನಾಳ ಗ್ರಾಮವು ತನ್ನದೇ ಆದ ವಿಶೇಷತೆ ಹೊಂದಿದೆ, 12 ಸಾವಿರಕ್ಕೂ ಅಧಿಕ ಜನಸಂಖ್ಯೆ ಇದ್ದು, ಚಿತ್ರಕಲೆಗೆ ಪ್ರಸಿದ್ಧಿ ಪಡೆದಿದೆ. ಗ್ರಾಮದಲ್ಲಿ ವಿವಿಧೆಡೆ ಗಣೇಶ ಮೂರ್ತಿ ಪ್ರತಿಷ್ಠಾಪನೆ ವೈಭವದಿಂದ ಜರುಗುತ್ತದೆ. ಆದರೆ, ಈ ಯುವಕರು ಗಣೇಶ ಉತ್ಸವ ಜೊತೆಗೆ ಊರಿನ ಸಾಮಾಜಿಕ ಕಾಳಜಿ, ಅಭಿವೃದ್ಧಿ ಕಾರ್ಯಗಳನ್ನು ಕೈಗೊಂಡು ಹೊಸತನ ಬಯಸುತ್ತಿದ್ದಾರೆ.
ಈ ಗಣೇಶ ಮಂಡಳಿಯ ಯುವಕರು 2024ರಲ್ಲಿ ಗಣೇಶ ಉತ್ಸವ ಸಂಬಂಧ ಸಂಗ್ರಹವಾದ ಹಣವನ್ನು ಗ್ರಾಮದಲ್ಲಿನ ಪುರಾತನ ಬಾವಿಗಳನ್ನು ಸ್ವಚ್ಛಗೊಳಿಸಿ ನೀರಿನ ಸದ್ಬಳಕೆ, ಅದರ ಮಹತ್ವ ಕುರಿತು ಜಾಗೃತಿ ಮೂಡಿಸಿ ಅಂತರ್ಜಲ ಹೆಚ್ಚಳಕ್ಕೆ ಶ್ರಮಿಸಿದರು. ಕಳೆದ ಬಾರಿ ಗಣೇಶ ಚತುರ್ಥಿ ಸಂಬಂಧ ಜಮೆಯಾದ ಹಣವನ್ನು ಕಿನ್ನಾಳ-ಕೊಪ್ಪಳ ರಸ್ತೆಯಲ್ಲಿ ನಿರ್ಮಾಣಗೊಂಡ ತಗ್ಗು-ಗುಂಡಿಗಳು ಮುಚ್ಚಿಸಿ ಸುಗಮ ಸಂಚಾರಕ್ಕೆ ಅನುಕೂಲ ಮಾಡಿಕೊಟ್ಟು ಮಾನವೀಯತೆಗೆ ಸಾಕ್ಷಿಯಾಗಿದ್ದರು.
ಈ ಬಾರಿ ಗ್ರಾಮದ ಎರಡು ಶಾಲೆಗಳ ಗೋಡೆಗಳನ್ನು ಮಂಡಳಿಯ ಸದಸ್ಯರು ಖುದ್ದಾಗಿ ಅಂದಗೊಳಿಸಿದರು. ಹೀಗೆ ನಿರಂತರವಾಗಿ ಸಮಾಜಮುಖಿ ಕಾರ್ಯಗಳನ್ನು ಕೈಗೊಳ್ಳುತ್ತಿರುವ ಯುವಕರು ಗಣೇಶೋತ್ಸವ ಎಂಬುದು ಕೇವಲ ಧಾರ್ಮಿಕ ಆಚರಣೆಗೆ ಸೀಮಿತಗೊಳಿಸದೆ ಸಾಮಾಜಿಕ ಹೊಣೆಗಾರಿಕೆ ವೇದಿಕೆಯನ್ನಾಗಿ ರೂಪಿಸಿದ್ದು ಸಾರ್ವಜನಿಕ ವಲಯದಲ್ಲಿ ಮೆಚ್ಚುಗೆಗೆ ಪಾತ್ರವಾಗಿದೆ.
“2024ರಲ್ಲಿ ನಮ್ಮೂರಿನಿಂದ 7 ಕಿ.ಮೀ. ದೂರದ ಚಿಲವಾಡಗಿ ಗ್ರಾಮದವರೆಗೆ ಗುಂಡಿಗಳಿಂದ ತುಂಬಿ ಹೋಗಿದ್ದ ರಸ್ತೆಯನ್ನು 1 ಲಕ್ಷಕ್ಕೂ ಅಧಿಕ ಹಣ ವ್ಯಯಿಸಿ ದುರಸ್ತಿ ಮಾಡಲಾಗಿತ್ತು. ಹೊಸದಾಗಿ ಮಣ್ಣಿನ ರಸ್ತೆ ಕೂಡ ನಿರ್ಮಿಸಿದ್ದೇವೆ. ಆ ಕಾರ್ಯ ಜಿಲ್ಲಾ ನ್ಯಾಯಾಧೀಶರ ಪ್ರಶಂಸೆಗೆ ಕಾರಣವಾಗಿ ಆಗಿನ ಜಿಲ್ಲಾ ಹಾಗೂ ಸೆಷನ್ಸ್‌ ನ್ಯಾಯಾಲಯದ ನ್ಯಾಯಾಧೀಶರಾಗಿದ್ದ ಚಂದ್ರಶೇಖರ ಸಿ. ಅವರು ಕಿನ್ನಾಳ ಗ್ರಾಮವನ್ನು ದತ್ತು ತೆಗೆದುಕೊಂಡಿದ್ದರು” ಎಂದು ಗಣೇಶ ಮಂಡಳಿಯ ಅಧ್ಯಕ್ಷ ವೀರೇಶ ನಾಯಕ್ ʼಈದಿನʼ ಜೊತೆ ಮಾತನಾಡಿ ಖುಷಿ ಹಂಚಿಕೊಂಡರು.
“ನಮ್ಮ ಗಣೇಶ ಮಂಡಳಿಯ ಸದಸ್ಯರೆಲ್ಲರೂ ಸೇರಿ ಗಣೇಶ ವಿಸರ್ಜನೆ ವೇಳೆ ಡಿಜೆ, ಪಟಾಕಿಗಳ ಬದಲಿಗೆ ಸಾಮಾಜಿಕ ಕಾರ್ಯ ಕೈಗೊಳ್ಳಲು ನಿರ್ಧರಿಸಿದ್ದೇವೆ. ಗಣೇಶ ಪ್ರತಿಷ್ಠಾಪನೆ ವೇಳೆ, ತದನಂತರದಲ್ಲಿಯೂ ಆರೋಗ್ಯ ಶಿಬಿರ, ಸಸಿ ನೆಡುವುದು, ಅಂತರ್ಜಲ ಮಟ್ಟ ಹೆಚ್ಚಳಕ್ಕೆ ಪುರಾತನ ಬಾವಿ ಸ್ವಚ್ಛತೆ ಸೇರಿ ಗ್ರಾಮಾಭಿವೃದ್ಧಿ ಕಾರ್ಯ ಕೈಗೈತ್ತಿಕೊಳ್ಳುತ್ತಿದ್ದೇವೆ. ಇದಕ್ಕಾಗಿ ಪ್ರತಿ ವರ್ಷ ಲಕ್ಷಕ್ಕೂ ಅಧಿಕ ಹಣ ಖರ್ಚು ಮಾಡುತ್ತೇವೆ. ಈ ಬಾರಿ ಡಿಜೆ, ಪಟಾಕಿಗಳಿಗೆ ಖರ್ಚಾಗಲಿದ್ದ 50 ಸಾವಿರಕ್ಕೂ ಹೆಚ್ಚಿನ ಹಣವನ್ನು ಸರ್ಕಾರಿ ಶಾಲೆಗಳ ಗೋಡೆಗಳಿಗೆ ಬಣ್ಣ ಹಚ್ಚಿ ಅಂದಗೊಳಿಸಿ ಶೈಕ್ಷಣಿಕ ಪ್ರಗತಿಯ ಕುರಿತಾದ ಘೋಷವಾಕ್ಯಗಳ ಅರಿವು ಮೂಡಿಸಲಾಗಿದೆ. ಗಣೇಶೋತ್ಸವದ ಸಂಭ್ರಮದ ಜತೆಗೆ ಸಮಾಜಕ್ಕೆ ಉಪಯುಕ್ತವಾದ ಕೆಲಸ ಮಾಡಬೇಕು ಎಂಬುದು ನಮ್ಮ ಮಂಡಳಿಯ ಉದ್ದೇಶವಾಗಿದೆʼ ಎಂದು ಹೇಳಿದರು.
ಇದನ್ನೂ ಓದಿ : ಈ ದಿನ ಸಂಪಾದಕೀಯ | ನಕಲಿ ಆಹಾರ ಮತ್ತು ಔಷಧ: ಜನರ ಜೀವದ ಜೊತೆ ಚೆಲ್ಲಾಟ
ಗಣೇಶೋತ್ಸವದ ಹೆಸರಿನಲ್ಲಿ ಡಿಜೆ, ಪಟಾಕಿ ಸೇರಿ ಅನಗತ್ಯ ದುಂದು ವೆಚ್ಚ ಮಾಡುವ ಬದಲು, ಅದೇ ಹಣವನ್ನು ಶಿಕ್ಷಣ, ರಸ್ತೆ, ಸ್ವಚ್ಛತೆ, ಪರಿಸರ, ಆರೋಗ್ಯ ಸೇರಿದಂತೆ ಸಾರ್ವಜನಿಕ ಹಿತದ ಕೆಲಸಗಳಿಗೆ ಬಳಸಬಹುದು ಎಂಬುದನ್ನು ಕೊಪ್ಪಳ ಜಿಲ್ಲೆಯ ಕಿನ್ನಾಳ ಗ್ರಾಮದ ಯುವಕರು ಸಮಾಜಕ್ಕೆ ಸಾರಿ ಹೇಳುತ್ತಿದ್ದಾರೆ. ಹಬ್ಬದ ಸಂಭ್ರಮದ ಜತೆಗೆ ಈ ಯುವಕರ ಸಾಮಾಜಿಕ, ಪರಿಸರ ಕಾಳಜಿಯನ್ನು ಇತರೆ ಗಣೇಶ ಮಂಡಳಿಗಳಿಗೂ ಮಾದರಿಯಾಗಬೇಕಿದೆ. ನೆಲದ ಸೌಹಾರ್ದತೆಯ ಉಳಿವಿಗಾಗಿ ಇಂತಹ ಸಮಾಜಮುಖಿ ಕಾರ್ಯಗಳು ಎಲ್ಲೆಡೆ ನಡೆಯುವುದು ಅವಶ್ಯಕತೆಯಿದೆ.
ಬಾಲಾಜಿ ಕುಂಬಾರ್
ಬಾಲಾಜಿ ಕುಂಬಾರ ಅವರು ಔರಾದ್ ತಾಲ್ಲೂಕಿನ ಚಟ್ನಾಳ ಗ್ರಾಮದವರು. ಸಾಹಿತ್ಯ, ಶಿಕ್ಷಣ ಹಾಗೂ ರಾಜಕೀಯ ಕ್ಷೇತ್ರದಲ್ಲಿ ಸೇವೆ ಸಲ್ಲಿಸಿದ್ದಾರೆ. ಸದ್ಯ 'ಈದಿನ.ಕಾಮ್‌' ಮಾಧ್ಯಮ ಸಂಸ್ಥೆಯಲ್ಲಿ ಬೀದರ್ ಜಿಲ್ಲಾ ಹಿರಿಯ ಸಂಯೋಜಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಕವಿತೆ, ಲೇಖನ, ದೇಶಿ ನುಡಿ ಬರಹ ಬರೆಯುವುದು ಇವರ ಮುಖ್ಯ ಹವ್ಯಾಸ.
