ಮಂಡ್ಯ ಜಿಲ್ಲೆ ಶ್ರೀರಂಗಪಟ್ಟಣ ತಾಲೂಕು ಕಡತನಾಳು ಗ್ರಾಮದ ದರಸಗುಪ್ಪೆ ಗ್ರಾಮ ಪಂಚಾಯಿತಿಯ ಕಂದಾಯ ಗ್ರಾಮ ವಿದ್ಯಾನಗರದ ಹತ್ತಿರ ಸುಮಾರು 73 ಅಡಿ ಎತ್ತರದ ಮೆಮೋರಿಯಲ್ ಪಿಲ್ಲರ್ ಇದ್ದು, ರಾಜ್ಯ ಪುರಾತತ್ವ ಇಲಾಖೆಗೆ ಸೇರಿದ ಸ್ಮಾರಕ ಕಂಬಗಳಲ್ಲಿ ಒಂದಾಗಿದೆ. ಟಿಪ್ಪು ಸುಲ್ತಾನನ ಪತನದ ನಂತರದ ಕಾಲಘಟ್ಟದಲ್ಲಿ ಈ ಸ್ಮಾರಕವು ಒಂದು ಮುಖ್ಯ ಐತಿಹಾಸಿಕ ಗುರುತಾಗಿದೆ. ಇಂಥ ಸ್ಮಾರಕಗಳ ಸಂರಕ್ಷಣೆಗೆ ರಾಜ್ಯ ಸರ್ಕಾರ ಮುಂದಾಗಬೇಕು. ರಕ್ಷಣಾ ವ್ಯವಸ್ಥೆಯನ್ನು ನಿರ್ಮಿಸಬೇಕು ಮತ್ತು ಪ್ರವಾಸಿಗರು ಭೇಟಿ ನೀಡುವ ಸ್ಥಳವನ್ನಾಗಿ ಮಾರ್ಪಡಿಸಬೇಕೆಂದು ಸ್ಥಳೀಯರು ಮನವಿ ಮಾಡಿದ್ದಾರೆ.
ಈ ಸ್ಮಾರಕವು ಬ್ರಿಟಿಷ್ ಸೈನ್ಯವು 1799ರಲ್ಲಿ ಶ್ರೀರಂಗಪಟ್ಟಣದ ಕೋಟೆಯನ್ನು ಭೇದಿಸಿದ ಸ್ಥಳಕ್ಕೆ ತೀರಾ ಹತ್ತಿರದಲ್ಲಿದೆ. ಇದು ಒಂದು ಎತ್ತರದ ಒಬೆಲಿಸ್ಕ್ (Obelisk) ಮಾದರಿಯ ಸ್ತಂಭವಾಗಿದ್ದು, ಕೋಟೆಯ ವಾಯುವ್ಯ ಭಾಗದಲ್ಲಿ (North-west) ಸ್ಥಾಪಿಸಲಾಗಿದೆ. ಗ್ರಾನೈಟ್ ಶಿಲೆಯಿಂದ ನಿರ್ಮಿತವಾದ ಪಿರಮಿಡ್ ಆಕಾರದ ಮೇಲ್ಭಾಗವನ್ನು ಹೊಂದಿರುವ ಸ್ತಂಭವಾಗಿದೆ. ಈ ಸ್ಮಾರಕವನ್ನು ಮೈಸೂರಿನ ಅಂದಿನ ದಿವಾನರಾಗಿದ್ದ ಪೂರ್ಣಯ್ಯ ಕ್ರಿ.ಶ. 1804ರಲ್ಲಿ ನಿರ್ಮಿಸಿದರು. ಪೂರ್ಣಯ್ಯ ಜೋಶಿಯಾ ವೆಬ್ ಅವರ ಆಪ್ತ ಗೆಳೆಯರಾಗಿದ್ದರು.
Josiah webbe ಬ್ರಿಟಿಷ್ ಈಸ್ಟ್ ಇಂಡಿಯಾ ಕಂಪನಿಯ ಮದ್ರಾಸ್ ಸರ್ಕಾರದ ಮೊದಲ ಮುಖ್ಯ ಕಾರ್ಯದರ್ಶಿ (Chief Secretary) ಆಗಿ ಸೇವೆ ಸಲ್ಲಿಸಿದ್ದರು.ನಂತರ 1803ರಲ್ಲಿ ಮೈಸೂರು ಸಂಸ್ಥಾನದ ಬ್ರಿಟಿಷ್ ರೆಸಿಡೆಂಟ್ ಆಗಿ ನೇಮಕಗೊಂಡಿದ್ದರು. ನಂತರ 1804 ರಲ್ಲಿ ಗ್ವಾಲಿಯರ್‌ನಲ್ಲಿ ಬ್ರಿಟಿಷ್ ರೆಸಿಡೆಂಟ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾಗ ನಿಧನರಾದರು.
ಜೋಶಿಯಾ ವೆಬ್ ಆರಂಭದಲ್ಲಿ ಟಿಪ್ಪು ಸುಲ್ತಾನ್ ವಿರುದ್ಧ ಯುದ್ಧ ಮಾಡುವುದನ್ನು ವಿರೋಧಿಸಿದ್ದರು ಮತ್ತು ಬ್ರಿಟಿಷ್ ನೀತಿಯು ಮೈಸೂರನ್ನು ಸಮತೋಲನದಲ್ಲಿ ಇಡಬೇಕು ಎಂದು ಅನಿಸಿಕೆ ಪಟ್ಟಿದ್ದರು. ಟಿಪ್ಪುವನ್ನು ಅಧಿಕಾರದಲ್ಲಿ ಉಳಿಸಿಕೊಳ್ಳುವುದು ಬ್ರಿಟಿಷ್ ಹಿತಾಸಕ್ತಿಗೆ ಪೂರಕ ಎಂದು ಅವರು ನಂಬಿದ್ದರು.
ಈ ಸ್ಮಾರಕವು ಯಾವುದೇ ಯುದ್ಧದ ವಿಜಯೋತ್ಸವಕ್ಕಾಗಿ ನಿರ್ಮಿಸಿದ್ದಲ್ಲ, ಬದಲಾಗಿ ಒಬ್ಬ ವ್ಯಕ್ತಿಯ ಮೇಲಿದ್ದ ಗೌರವ ಮತ್ತು ಸ್ನೇಹಕ್ಕಾಗಿ ನಿರ್ಮಿಸಲಾದ ಅಪರೂಪದ ಬ್ರಿಟಿಷ್ ಸ್ಮಾರಕವಾಗಿದೆ. ಇಂತಹ ಐತಿಹಾಸಿಕ ವಿಶ್ವದಲ್ಲಿ ಸ್ನೇಹ ಪೂರ್ವಕವಾಗಿ ಸ್ಮಾರಕ ಕಂಬವೊಂದನ್ನು ನಿರ್ಮಿಸಿದ್ದು ಮೊದಲಿನದು ಎಂದು ಇತಿಹಾಸ ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ. ಇಂತಹ ಸ್ಮಾರಕಗಳು ಮುಂದಿನ ತಲೆಮಾರಿಗೆ ಸಂರಕ್ಷಿಸುವುದು ನಮ್ಮೆಲ್ಲರ ಅಗತ್ಯ ಕರ್ತವ್ಯವಾಗಿದೆ ಎಂದು ಶ್ರೀರಂಗಪಟ್ಟಣದ ಸಮರ್ಪಣಾ ಟ್ರಸ್ಟ್‌ ಅಧ್ಯಕ್ಷ ಜಯಶಂಕರ್‌ ಕೆ ಎಸ್‌ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
