ವಿಶ್ವವಿಖ್ಯಾತ ಮೇಲುಕೋಟೆ ಚೆಲುವನಾರಾಯಣ ಸ್ವಾಮಿಯ ವೈರಮುಡಿ ಬ್ರಹ್ಮೋತ್ಸವದ ಸಡಗರ ಗರಿಗೆದರಿದೆ. ಆದರೆ, ಶ್ರೀರಂಗಪಟ್ಟಣದಿಂದ ಮೇಲುಕೋಟೆಗೆ ಸಾಗುವ ಮಾರ್ಗಮಧ್ಯೆ ಇರುವ ದರಸಗುಪ್ಪೆ ಬಳಿಯ ಚಾರಿತ್ರಿಕ ‘ಅರವಟ್ಟಿಗೆ ಮಂಟಪ’ವು ಜಿಲ್ಲಾಡಳಿತದ ನಿರ್ಲಕ್ಷ್ಯಕ್ಕೆ ಒಳಗಾಗಿ ಶಿಥಿಲಾವಸ್ಥೆ ತಲುಪಿದೆ.
ಶ್ರೀರಂಗಪಟ್ಟಣದ ಕಿರಗೂರಿನಿಂದ ವೈರಮುಡಿ ಮತ್ತು ರಾಜಮುಡಿ ವಜ್ರಖಚಿತ ಕಿರೀಟಗಳ ಮೆರವಣಿಗೆಗೆ ಸಕಲ ಸಿದ್ಧತೆಗಳು ನಡೆದಿವೆ. ಶನಿವಾರ ಕಿರೀಟಗಳನ್ನು ಸ್ವಾಗತಿಸಿ ವಿಶೇಷ ಪೂಜೆ ಸಲ್ಲಿಸಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಮಾರ್ಗದುದ್ದಕ್ಕೂ ಇರುವ ಬಹುತೇಕ ಅರವಟ್ಟಿಗೆ ಮಂಟಪಗಳನ್ನು ಭಕ್ತರು ಸುಣ್ಣ-ಬಣ್ಣ ಬಳಿದು ಶೃಂಗರಿಸುತ್ತಾರೆ. ಕಿರೀಟಗಳು ಬಂದಾಗ ಸಡಗರ ಸಂಭ್ರಮದಿಂದ ಸ್ವಾಗತಿಸಿಕೊಂಡು, ಪೂಜೆ ಸಲ್ಲಿಸಿ ಬಳಿಕ ಮೇಲುಕೋಟೆಗೆ ಕಳಿಸಿಕೊಡುತ್ತಾರೆ. ಆದರೆ, ದರಸಗುಪ್ಪೆ ಗ್ರಾಮದ ಅರವಟ್ಟಿಗೆ ಮಂಟಪವನ್ನು ಮಾತ್ರ ಶುಚಿಗೊಳಿಸದೇ ಇರುವುದುರಿಂದ ಪಾಳುಬಿದ್ದ ಸ್ಥಿತಿಯಲ್ಲಿದೆ.
1610ರಲ್ಲಿ ರಾಜ ಒಡೆಯರ್ ಅವರ ಕಾಲದಲ್ಲಿ ಶ್ರೀರಂಗಪಟ್ಟಣ ಮೈಸೂರು ಸಂಸ್ಥಾನದ ರಾಜಧಾನಿಯಾಗಿತ್ತು. ಮೇಲುಕೋಟೆಯ ಚೆಲುವನಾರಾಯಣ ಸ್ವಾಮಿಯನ್ನು ತಮ್ಮ ಆರಾಧ್ಯ ದೈವವನ್ನಾಗಿ ಮಾಡಿಕೊಂಡಿದ್ದ ರಾಜ ಒಡೆಯರ್, ಪ್ರತಿವರ್ಷ ನಡೆಯುತ್ತಿದ್ದ ವೈರಮುಡಿ ಬ್ರಹ್ಮೋತ್ಸವದಲ್ಲಿ ಖುದ್ದಾಗಿ ಪಾಲ್ಗೊಳ್ಳುತ್ತಿದ್ದರು. ವಜ್ರದ ವೈರಮುಡಿ ಮತ್ತು ರಾಜಮುಡಿ ಕಿರೀಟ ಧಾರಣೆಯೊಂದಿಗೆ ಕಂಗೊಳಿಸುವ ಸ್ವಾಮಿಯ ಉತ್ಸವವನ್ನು ನೋಡಿ ಕಣ್ತುಂಬಿಕೊಳ್ಳುತ್ತಿದ್ದರು. ನಂತರ 1617ರಲ್ಲಿ ಅವರು ಮೇಲುಕೋಟೆಯಲ್ಲೇ ಇಹಲೋಕ ತ್ಯಜಿಸಿದರು.
ಈ ಸುದ್ದಿ ಓದಿದ್ದೀರಾ? ತುಮಕೂರು | ಮೇ 3 ರಿಂದ ತುಮಕೂರು ಮಹಿಳಾ ಓಪನ್ ಟೆನಿಸ್ ಚಾಂಪಿಯನ್ ಷಿಪ್ : ಸಚಿವ ಡಾ. ಜಿ.ಪರಮೇಶ್ವರ
ಉತ್ಸವದ ಸಮಯದಲ್ಲಿ ಶ್ರೀರಂಗಪಟ್ಟಣದಿಂದ ಪಾಂಡವಪುರ ಮಾರ್ಗವಾಗಿ ಮೇಲುಕೋಟೆಗೆ ಈ ವಜ್ರದ ಕಿರೀಟಗಳನ್ನು ತೀವ್ರ ಭದ್ರತೆಯೊಂದಿಗೆ ಕೊಂಡೊಯ್ಯಲಾಗುತ್ತಿತ್ತು. ದಾರಿಯುದ್ದಕ್ಕೂ ಕಿರೀಟಗಳ ವಿಶ್ರಾಂತಿ ಹಾಗೂ ಭದ್ರತೆಗಾಗಿ ರಾಜ ಒಡೆಯರ್ ಅವರು ಅಲ್ಲಲ್ಲಿ ಈ ‘ಅರವಟ್ಟಿಗೆ ಮಂಟಪ'(ವೈರಮುಡಿ ಮಂಟಪ)ಗಳನ್ನು ನಿರ್ಮಿಸಿದ್ದರು. ಇಂತಹ ಭವ್ಯ ಇತಿಹಾಸವಿರುವ ದರಸಗುಪ್ಪೆ ಗ್ರಾಮದ ಮಂಟಪವು ಇಂದು ಜಿಲ್ಲಾಡಳಿತದ ಕಣ್ತಪ್ಪಿ ದುಃಸ್ಥಿತಿಗೆ ತಲುಪಿದೆ. “ಇಂತಹ ಐತಿಹಾಸಿಕ ಮಂಟಪಗಳ ಸಂರಕ್ಷಣೆ ಅತ್ಯಗತ್ಯವಾಗಿದೆ. ಸಂಬಂಧಪಟ್ಟವರು ಕೂಡಲೇ ಎಚ್ಚೆತ್ತುಕೊಂಡು ಮಂಟಪವನ್ನು ಜೀರ್ಣೋದ್ಧಾರ ಮಾಡಬೇಕು” ಎಂದು ಸಮರ್ಪಣಾ ಟ್ರಸ್ಟ್ನ ಕೆ ಎಸ್ ಜಯಶಂಕರ್ ಒತ್ತಾಯಿಸಿದ್ದಾರೆ.
ವರದಿ : ಜಗದೀಶ್ ನಗರಕೆರೆ
