ಮಣಿಪಾಲ್ ಆಸ್ಪತ್ರೆ ಜಂಕ್ಷನ್ ಬಳಿ ನಿರ್ಮಾಣವಾಗುತ್ತಿರುವ ಮೇಲ್ಸೇತುವೆಗೆ ಅನುಕೂಲವಾಗುವಂತೆ 278 ಮರಗಳನ್ನು ಸ್ಥಳಾಂತರಿಸುವ ಪ್ರಕ್ರಿಯೆಗೆ ಸಂಬಂಧಿಸಿದಂತೆ ಸಾರ್ವಜನಿಕರು ಹಾಗೂ ಪರಿಸರ ಹೋರಾಟಗಾರರಲ್ಲಿ ಉಂಟಾಗಿರುವ ಗೊಂದಲಗಳನ್ನು ನಿವಾರಿಸಲು ಅರಣ್ಯ ಇಲಾಖೆ ಮತ್ತು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳು ತಕ್ಷಣವೇ ತಜ್ಞರು, ಸ್ಥಳೀಯರು ಹಾಗೂ ಪರಿಸರ ಹೋರಾಟಗಾರರೊಂದಿಗೆ ಸಭೆ ನಡೆಸಬೇಕು ಎಂದು ಒತ್ತಾಯಿಸಲಾಗಿದೆ.
ಸಭೆಯಲ್ಲಿ ಮಾತನಾಡಿದ ಪರಿಸರ ಹೋರಾಟಗಾರ ರವಿ ಬಳೆ, 278 ಮರಗಳನ್ನು ಎಲ್ಲಿ ಸ್ಥಳಾಂತರಿಸಲಾಗುತ್ತದೆ, ಅದಕ್ಕಾಗಿ ಯಾವ ರೀತಿಯ ಪೂರ್ವಸಿದ್ಧತೆಗಳನ್ನು ಮಾಡಲಾಗಿದೆ, ಸ್ಥಳಾಂತರಿಸಿದ ಬಳಿಕ ಅವು ಬದುಕುಳಿಯುವಂತೆ ನೋಡಿಕೊಳ್ಳುವ ಜವಾಬ್ದಾರಿ ಯಾರದು ಎಂಬ ಕುರಿತು ಇದುವರೆಗೆ ಯಾವುದೇ ಸ್ಪಷ್ಟ ಮಾಹಿತಿ ಸಾರ್ವಜನಿಕರಿಗೆ ಲಭ್ಯವಾಗಿಲ್ಲ ಎಂದು ಹೇಳಿದರು. ಮರಗಳ ಸ್ಥಳಾಂತರವು ಅತ್ಯಂತ ಸಂಕೀರ್ಣ ಮತ್ತು ವೈಜ್ಞಾನಿಕ ವಿಧಾನಗಳನ್ನು ಅನುಸರಿಸಬೇಕಾದ ಪ್ರಕ್ರಿಯೆಯಾಗಿದ್ದು, ಅಗತ್ಯ ಪೂರ್ವಸಿದ್ಧತೆಗಳ ಬಗ್ಗೆ ಅಧಿಕಾರಿಗಳು ಸಾರ್ವಜನಿಕರಿಗೆ ಮಾಹಿತಿ ನೀಡಬೇಕು ಎಂದು ಒತ್ತಾಯಿಸಿದರು.
ಸ್ಥಳೀಯ ಪರಿಸರ ಹೋರಾಟಗಾರ ಮನ್ಸೂರ್ ಅಹ್ಮದ್ ಮಾತನಾಡಿ, 278 ಮರಗಳ ಸ್ಥಳಾಂತರ ಹಾಗೂ 1,000 ಗಿಡಗಳನ್ನು ನೆಟ್ಟು ಬೆಳೆಸುವ ಯೋಜನೆ ಕುರಿತು ಅರಣ್ಯ ಇಲಾಖೆ ಮತ್ತು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು ತಜ್ಞರು, ಸ್ಥಳೀಯರು ಹಾಗೂ ಪರಿಸರ ಕಾರ್ಯಕರ್ತರೊಂದಿಗೆ ಪ್ರತ್ಯೇಕ ಸಭೆ ನಡೆಸಬೇಕು ಎಂದು ಆಗ್ರಹಿಸಿದರು. ಸ್ಥಳಾಂತರದ ವಿಧಾನ, ಗಿಡ ನೆಡುವ ಯೋಜನೆ ಹಾಗೂ ನಿರ್ವಹಣೆಯ ಸಂಪೂರ್ಣ ವಿವರಗಳನ್ನು ಲಿಖಿತ ರೂಪದಲ್ಲಿ ಸಭೆಗೆ ಒದಗಿಸಬೇಕು ಎಂದ ಅವರು, ಈ ವಿಚಾರದಲ್ಲಿ ಸ್ಥಳೀಯ ಶಾಸಕರು ಜವಾಬ್ದಾರಿ ವಹಿಸಿ ಸಮನ್ವಯ ಸಭೆ ನಡೆಸುವಂತೆ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದರು.
ಸಿದ್ದಿಕಿ ನಗರದ ಮದರಸಾದ ಅಧ್ಯಾಪಕರಾದ ಮೌಲಾನಾ ಸಿದ್ದಿಕಿ ಮಾತನಾಡಿ, ಮರಗಳನ್ನು ಕಡಿದು ಪರಿಸರ ಹಾನಿ ಮಾಡಿದರೆ ವಾಯು ಮಾಲಿನ್ಯ ಮತ್ತು ಧೂಳಿನ ಪ್ರಮಾಣ ಹೆಚ್ಚಾಗಿ ಸ್ಥಳೀಯರ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತದೆ. ಮರಗಳ ಸಂರಕ್ಷಣೆಗಾಗಿ ನಡೆಯುತ್ತಿರುವ ಹೋರಾಟಕ್ಕೆ ತಮ್ಮ ಮದರಸಾದ ಸಂಪೂರ್ಣ ಬೆಂಬಲವಿದೆ ಎಂದು ಘೋಷಿಸಿದರು.
ಮದರಸಾದ ವಿದ್ಯಾರ್ಥಿ ಸಮೀವುಲ್ಲ ಮಾತನಾಡಿ, ‘ಕಾಡು ಬೆಳೆಸಿ-ನಾಡು ಉಳಿಸಿ’ ಎಂಬುದು ಕೇವಲ ಘೋಷಣೆಯಾಗಬಾರದು. ಪರಿಸರ ಸಂರಕ್ಷಣೆಗೆ ನಡೆಯುವ ಹೋರಾಟಗಳಿಗೆ ವಿದ್ಯಾರ್ಥಿಗಳು ಕೈಜೋಡಿಸಲಿದ್ದಾರೆ ಎಂದು ಭರವಸೆ ನೀಡಿದರು.
ಜಲ ತಜ್ಞ ಯು.ಎನ್. ರವಿಕುಮಾರ್ ಮಾತನಾಡಿ, ಇಂದಿನ ಆಧುನಿಕ ತಂತ್ರಜ್ಞಾನದ ನೆರವಿನಿಂದ ಮರಗಳನ್ನು ಉಳಿಸಿಕೊಂಡೇ ಅಭಿವೃದ್ಧಿ ಯೋಜನೆಗಳ ವಿನ್ಯಾಸ ರೂಪಿಸಬಹುದಾಗಿದೆ. ಅಭಿವೃದ್ಧಿಯ ಹೆಸರಿನಲ್ಲಿ ನಿರಂತರವಾಗಿ ಮರಗಳನ್ನು ತೆರವುಗೊಳಿಸಿದರೆ ಮೈಸೂರು ನಗರದಲ್ಲಿ ‘ಹೀಟ್ ಐಲ್ಯಾಂಡ್’ ಪರಿಣಾಮ ಹೆಚ್ಚುವುದರ ಜೊತೆಗೆ ಕಾಂಕ್ರೀಟೀಕರಣದಿಂದ ಮಳೆನೀರು ನೆಲಕ್ಕೆ ಇಂಗುವ ಪ್ರಮಾಣವೂ ಕುಸಿಯಲಿದೆ ಎಂದು ಕಳವಳ ವ್ಯಕ್ತಪಡಿಸಿದರು. ಪರಿಸರ ಸ್ನೇಹಿ ಅಭಿವೃದ್ಧಿ ಮಾದರಿಗಳನ್ನು ಸರ್ಕಾರಗಳು ತಕ್ಷಣ ಅನುಸರಿಸಬೇಕು ಎಂದು ಅವರು ಸಲಹೆ ನೀಡಿದರು.
ಸಭೆಯಲ್ಲಿ 278 ಮರಗಳ ಸ್ಥಳಾಂತರ ಹಾಗೂ 1,000 ಗಿಡಗಳನ್ನು ನೆಡುವ ಯೋಜನೆ ಕುರಿತು ಸ್ಥಳೀಯರು, ತಜ್ಞರು ಮತ್ತು ಪರಿಸರ ಹೋರಾಟಗಾರರೊಂದಿಗೆ ತುರ್ತು ಸಮಾಲೋಚನಾ ಸಭೆ ಕರೆಯುವಂತೆ ಮೈಸೂರು–ಕೊಡಗು ಸಂಸದರು, ಎನ್.ಆರ್. ಕ್ಷೇತ್ರದ ಶಾಸಕರು, ಅರಣ್ಯ ಇಲಾಖೆ ಹಾಗೂ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರಕ್ಕೆ ಪತ್ರ ಬರೆಯಲು ಸರ್ವಾನುಮತದಿಂದ ತೀರ್ಮಾನಿಸಲಾಯಿತು.
ಈ ವಿಶೇಷ ಸುದ್ದಿ ಓದಿದ್ದೀರಾ?SIR ಪ್ರಕ್ರಿಯೆಯೇ ಗೊಂದಲದ ಗೂಡು: ಮತದಾರರ ಪಟ್ಟಿಯೇ ಒಂದು, ನೆಲಮಟ್ಟದ ವಾಸ್ತವವೇ ಇನ್ನೊಂದು!
ಸಭೆಯಲ್ಲಿ ನಿವೃತ್ತ ಮೇಜರ್ ಜನರಲ್ ಸುಧೀರ್ ಒಂಬತ್ಕೆರೆ, ಪರಂಪರೆ ತಜ್ಞ ಎನ್.ಎಸ್. ರಂಗರಾಜು, ಸಾಮಾಜಿಕ ಹೋರಾಟಗಾರ ಕೆ. ಕಾಳಚನ್ನೇಗೌಡ, ಪರಿಸರ ಹೋರಾಟಗಾರ್ತಿ ಭಾನು ಮೋಹನ್, ‘ಪರಿಸರಕ್ಕಾಗಿ ನಾವು’ ಸಂಘಟನೆಯ ನಬಿಜಾನ್, ನಸ್ರುಲ್ಲಾ ಖಾನ್, ಪ್ರಭಾ, ಅಂಜನಾ, ಶೋಭಾ, ಸ್ಮಿತಾ, ಶಶಿಕಲಾ, ಬಾನು ಪ್ರಶಾಂತ್, ವಿಶ್ವನಾಥ್, ಫಯಾಜ್ ಮಲ್ಲಿಕ್, ಗಣೇಶ್, ಸಂಜಯ್, ಅಕ್ಬರ್, ಓಂ ಶಿವಚರಣ್, ಸೃಷ್ಟಿ, ಸಾರ್ಥಕ್, ಮಹಾಂತೇಶ್, ಲಿಖಿತ್, ಹರ್ಷಿತ್, ಕರಿಘಟ್ಟ ರಮೇಶ್, ಬಂಗಾರ ನಾಯಕ ಸೇರಿದಂತೆ ಸ್ಥಳೀಯರಾದ ಮೊಹಮ್ಮದ್ ಜಮೀಲ್, ಅಬ್ದುಲ್ ಜಬ್ಬಾರ್, ಫಜಲೂರ್ ರಹಮಾನ್, ಮೌಲಾನಾ ರಫಿಯುದ್ದೀನ್, ಫಯಾಜ್ ಪಾಷಾ, ಮೊಹಮ್ಮದ್ ಮುದಸ್ಸಿರ್, ಹನೀಫ್, ಅತ್ಯೆಬ್ ಅಹ್ಮದ್, ಜಮೀಲ್ ಅಹಮದ್, ಮೌಲಾನಾ ಶುಜೌದ್ದೀನ್, ರೆಹಾನ್ ದುರಾನಿ ಸೇರಿದಂತೆ ಅನೇಕ ಪರಿಸರ ಹೋರಾಟಗಾರರು ಮತ್ತು ಸಾರ್ವಜನಿಕರು ಇದ್ದರು.
