ಹೆಣ್ಣಿಗೆ ಸ್ವತಂತ್ರವಾಗಿ ಆಲೋಚಿಸುವ ಶಕ್ತಿಯಿದ್ದರೂ ಪುರುಷ ರಾಜಕಾರಣಕ್ಕೆ ದಾಳವಾಗಿದ್ದಾಳೆ ಎಂದು ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷ ಕೆ.ಎಸ್. ಸಿದ್ಧಲಿಂಗಪ್ಪ ಅಭಿಪ್ರಾಯಪಟ್ಟರು.
ತುಮಕೂರಿನ ಝೆನ್ ಟೀಮ್, ಜಿಲ್ಲಾ ಕನ್ನಡ ಪರಿಷತ್ ಸಹಯೋಗ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಕಾರದೊಂದಿಗೆ ಕನ್ನಡ ಭವನದಲ್ಲಿ ಆಯೋಜಿಸಿದ್ದ ಪಂಚವರ್ಣೆ' ಎಂಬ ಏಕ ವ್ಯಕ್ತಿ ನಾಟಕ ಪ್ರದರ್ಶನಕ್ಕೆ ಚಾಲನೆ ನೀಡಿ ಮಾತನಾಡಿದರು. ಅಡುಗೆ ಮನೆಯಿಂದ ಅಂತರಿಕ್ಷದವರೆಗೂ ಆಕೆಯದ್ದು ದೃಢವಾದ ಹೆಜ್ಜೆಗಳಾದರೂ ಒಲೆಗಳು ಬದಲಾಗಿವೆಯೇ ಹೊರೆತು ಬಿಸಿ, ಶಾಖ, ಝಳ ಇತ್ಯಾದಿಗಳಲ್ಲಿ ಅಂತಹ ವ್ಯತ್ಯಾಸವಾಗಿಲ್ಲ. ಈಗಲೂ ಆಕೆ ಅತಂತ್ರಳೆ ಎಂದು ತಿಳಿಸಿದರು. ಡಾ. ಮೀರಾ ಹೆಚ್.ಎನ್. ಅವರುಪಂಚವರ್ಣೆ’ ನಾಟಕದ ಮೂಲಕ ಮಹಾಭಾರತವನ್ನು ಮಹಿಳಾ ಭಾರತದ ಕಣ್ಣಿನಲ್ಲಿ ತೋರಿಸಿರುವುದು ಅತ್ಯಂತ ವಿಶಿಷ್ಟವಾದದ್ದು ಎಂದರು.
ದ್ರೌಪದಿಯನ್ನು ರೂಪಕವಾಗಿಸಿ ಅವಳ ಅಂತರಂಗ, ವನವಾಸದ ಪಡಿಪಾಟಲು, ಅವಳ ಬದುಕು ಅವಳದಾಗದ, ಆಯ್ಕೆಗಳೇ ಇಲ್ಲದ ರಾಜಕುಮಾರಿಯ ಮನೋಕಲಾಪವನ್ನು ಮೀರಾ ಅವರು ಪಂಚವರ್ಣೆ' ಏಕ ವ್ಯಕ್ತಿ ನಾಟಕದ ಮೂಲಕ ರಂಗದ ಮೇಲೆ ಅನಾವರಣಗೊಳಿಸಿದರು ತುಮಕೂರಿನಲ್ಲಿ ಹಲವಾರು ಏಕ ವ್ಯಕ್ತಿ ನಾಟಕ ಪ್ರದರ್ಶನಗಳು ಪ್ರದರ್ಶನಗೊಂಡಿದೆ ಎಂದ ಅವರು ಕೆಲ ತಿಂಗಳ ಹಿಂದೆ ಉಮಾಶ್ರೀ ಅಭಿನಯದಶರ್ಮಿಷ್ಟೆ’ ಎಂಬ ಏಕ ವ್ಯಕ್ತಿ ಪ್ರದರ್ಶನವನ್ನು ಮೆಲಕು ಹಾಕಿದರು. ಒಂದರಿAದ ಒಂದೂವರೆ ಗಂಟೆಗಳ ಕಾಲ ರಂಗಮಂದಿರದಲ್ಲಿ ಅಭಿನಯಿಸುವುದು ಸುಲಭದ ವಿಚಾರವಲ್ಲ. ಅಂತಹ ಸವಾಲನ್ನು ಮೀರಾ ಅವರು ಸ್ವೀಕರಿಸಿ ಗೆದ್ದಿದ್ದಾರೆ ಎಂದರು.
ಡಾ. ಮೀರಾ ಅವರು ಮೂಲತಃ ತುಮಕೂರಿನವರು. ಯಯಾತಿ',ಮಡಿವಾಳ ಮಾಚಿದೇವ’, ಹೆಣದ ಬಟ್ಟೆ',ನಾ ಕೊಂದ ಹುಡುಗಿ’ ಸೇರಿದಂತೆ ಹಲವಾರು ರಂಗ ಪ್ರಯೋಗಗಳಲ್ಲಿ ಅಭಿನಯಿಸಿರುವ ಇವರು 13 ವರ್ಷಗಳ ಕೂಚುಪುಡಿ ನೃತ್ಯಾಭ್ಯಾಸ ಮಾಡಿದ್ದಾರೆ ಎಂದ ಅವರು ಹಲವಾರು ಧಾರವಾಹಿಗಳಲ್ಲೂ ಅಭಿನಯಿಸಿದ್ದಾರೆ ಎಂದರು.
ಅಧ್ಯಕ್ಷತೆ ವಹಿಸಿದ್ದ ನಿವೃತ್ತ ಪ್ರಾಚಾರ್ಯರಾದ ಪ್ರಭಾವತಿ ಅವರು ಮೀರಾ ಅವರು ಹಾವಾಭಾವ, ಅಭಿನಯ ಎಲ್ಲದರಲ್ಲೂ ವಿಶೇಷತೆ ಮೆರೆದಿದ್ದಾರೆ. ರಂಗ ಸ್ಥಳದಲ್ಲೇ ಒಬ್ಬರೇ ನಿಂತು ಒಂದು ಗಂಟೆಗಳ ಕಾಲ ದ್ರೌಪದಿಯ ಕಥೆಯನ್ನು ಅನಾವರಣೊಳಿಸಿದ್ದಾರೆ ಎಂದರು.
ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕ ಈಶ್ವರ್ ಕು ಮಿರ್ಜಿ ಮಾತನಾಡಿ ತುಮಕೂರಿನಲ್ಲಿ ಸಾಕಷ್ಟು ರಂಗ ಪ್ರಯೋಗಗಳು ನಡೆಯುತ್ತಿವೆ. ಏಕ ವ್ಯಕ್ತಿ ಪ್ರದರ್ಶನಗಳು ಕೂಡ ಹೊಸತಲ್ಲ. ಆದರೆ ಹೊಸ ರೀತಿಯಲ್ಲಿ ರಂಗದ ಮೇಲೆ ತರುತ್ತಿರುವುದು ವಿಶೇಷವಾದದ್ದು ಎಂದರು.
ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಸದಸ್ಯ ಡಾ. ರವಿಕುಮಾರ್ ನೀಹಾ, ಕರ್ನಾಟಕ ನಾಟಕ ಅಕಾಡೆಮಿ ಸದಸ್ಯ ಹಾಗೂ ಝೆನ್ ಟೀಮ್ ನ ಉಗಮ ಶ್ರೀನಿವಾಸ್ ವೇದಿಕೆಯಲ್ಲಿದ್ದರು. ಬಳಿಕ ಡಾ. ಹೆಚ್.ಎನ್. ಮೀರಾ ಅಭಿನಯದ `ಪಂಚವರ್ಣೆ’ ನಾಟಕ ಪ್ರದರ್ಶನಗೊಂಡಿತು.
