ಅಹಮದಾಬಾದ್ ಏರ್ ಇಂಡಿಯಾ (AI-171) ವಿಮಾನ ದುರಂತದ ಅಂತಿಮ ತನಿಖಾ ವರದಿ ಬಿಡುಗಡೆಯು ಒಂದು ವರ್ಷದ ಗಡುವನ್ನು ಮೀರಲಿದೆ. ಅಧಿಕೃತವಾಗಿ ವಿಳಂಬವಾಗಿದೆ ಎಂದು Bloomberg News ವರದಿ ಮಾಡಿದೆ. ಅಪಘಾತಕ್ಕೀಡಾದ ವಿಮಾನದ ಎಂಜಿನ್‌ಗಳ ಪೂರ್ಣ ಪ್ರಮಾಣದ ತಾಂತ್ರಿಕ ಪರೀಕ್ಷೆ ಇನ್ನೂ ಬಾಕಿ ಇರುವುದರಿಂದ ದುರಂತದ ವರದಿ ಇನ್ನೂ ವಿಳಂಬವಾಗುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ.
ಅಂತಾರಾಷ್ಟ್ರೀಯ ವಿಮಾನಯಾನ ನಿಯಮಗಳ ಪ್ರಕಾರ, ಅಪಘಾತ ನಡೆದ ಒಂದು ವರ್ಷದೊಳಗೆ ಅಂದರೆ ಜೂನ್ 12ರ ಒಳಗೆ ಅಂತಿಮ ವರದಿ ಬರಬೇಕಿತ್ತು. ಆದರೆ ತಾಂತ್ರಿಕ ಸಂಕೀರ್ಣತೆಗಳಿಂದಾಗಿ ಈ ಗಡುವಿನ ಒಳಗೆ ವರದಿ ಬಿಡುಗಡೆಯಾಗಲ್ಲ. ವಿಮಾನ ಅಪಘಾತ ತನಿಖಾ ಬ್ಯೂರೋ (ಎಎಐಬಿ) ಈ ವಾರ ತನಿಖೆ ವಿಳಂಬಕ್ಕೆ ಕಾರಣಗಳ ಕುರಿತು ಸ್ಥಿತಿ ವರದಿಯನ್ನು ಬಿಡುಗಡೆ ಮಾಡುವ ಸಾಧ್ಯತೆಯಿದೆ.
ಇದನ್ನು ಓದಿದ್ದೀರಾ? ಏರ್ ಇಂಡಿಯಾ ದುರಂತ: ಶೀಘ್ರ ವಿಚಾರಣೆಗೆ ಸುಪ್ರೀಂ ಸಮ್ಮತಿ
ಎಂಜಿನ್‌ನಲ್ಲಿ ಯಾವುದೇ ಯಾಂತ್ರಿಕ ದೋಷವಿತ್ತೇ, ಹಕ್ಕಿ ಡಿಕ್ಕಿ ಹೊಡೆದಿತ್ತೇ, ಅಥವಾ ಅಪಘಾತದ ಮುನ್ನವೇ ಎಂಜಿನ್ ನಿಷ್ಕ್ರಿಯಗೊಂಡಿತ್ತೇ ಎಂಬುದನ್ನು ಪತ್ತೆಹಚ್ಚಲು ಅತ್ಯಾಧುನಿಕ ಲ್ಯಾಬ್‌ಗಳಲ್ಲಿ ಬಿಡಿಭಾಗಗಳನ್ನು ಬಿಚ್ಚಿ ಪರೀಕ್ಷಿಸಬೇಕಾಗುತ್ತದೆ. ಹಾಗೆಯೇ ಸಾಮಾನ್ಯವಾಗಿ ಬೋಯಿಂಗ್ ಅಥವಾ ಏರ್‌ಬಸ್ ವಿಮಾನಗಳ ಎಂಜಿನ್‌ಗಳನ್ನು ತಯಾರಿಸುವ ಸಂಸ್ಥೆಗಳು ವಿದೇಶಗಳಲ್ಲಿರುತ್ತವೆ. ಹಾಗಾಗಿ, ಎಂಜಿನ್ ಪರೀಕ್ಷೆಗಾಗಿ ಜಾಗತಿಕ ತನಿಖಾ ಸಂಸ್ಥೆಗಳು ಮತ್ತು ತಯಾರಕರ ಲಭ್ಯತೆಯ ಮೇಲೆ ಭಾರತೀಯ ತನಿಖಾಧಿಕಾರಿಗಳು ಅವಲಂಬಿತರಾಗಬೇಕಾಗುತ್ತದೆ. ಇದೇ ತನಿಖೆಯ ವರದಿ ತಡವಾಗುವುದಕ್ಕೆ ಕಾರಣ ಎಂದು ವರದಿಯಾಗಿದೆ.
2025ರ ಜೂನ್‌ನಲ್ಲಿ ಅಹಮದಾಬಾದ್‌ನಲ್ಲಿ ನಡೆದ ಏರ್ ಇಂಡಿಯಾ ಫ್ಲೈಟ್ 171 (Boeing 787 Dreamliner) ದುರಂತವು ಇತ್ತೀಚಿನ ವರ್ಷಗಳ ಅತ್ಯಂತ ಭೀಕರ ವಿಮಾನ ಅಪಘಾತಗಳಲ್ಲಿ ಒಂದಾಗಿದೆ. ಲಂಡನ್‌ಗೆ ಹೊರಟಿದ್ದ ಈ ವಿಮಾನ ಟೇಕಾಫ್ ಆದ ಕೆಲವೇ ಸೆಕೆಂಡುಗಳಲ್ಲಿ ವೈದ್ಯಕೀಯ ಕಾಲೇಜು ಹಾಸ್ಟೆಲ್ ಕಟ್ಟಡಕ್ಕೆ ಡಿಕ್ಕಿ ಹೊಡೆದು ಪತನಗೊಂಡಿತ್ತು. ಈ ಅಪಘಾತದಲ್ಲಿ ವಿಮಾನದಲ್ಲಿದ್ದ 241 ಮತ್ತು ನೆಲದ ಮೇಲಿದ್ದ 19 ಮಂದಿ ಸೇರಿ ಒಟ್ಟು 260 ಮಂದಿ ಪ್ರಾಣ ಕಳೆದುಕೊಂಡಿದ್ದರು.
ಈ ದುರಂತದ ಬಳಿಕ ಭಾರತದ ವಿಮಾನ ಅಪಘಾತ ತನಿಖಾ ಬ್ಯೂರೋ (AAIB) ಬಿಡುಗಡೆ ಮಾಡಿದ್ದ ಪ್ರಾಥಮಿಕ ತನಿಖಾ ವರದಿ ಇಡೀ ವಿಮಾನಯಾನ ಲೋಕವೇ ಬೆಚ್ಚಿಬೀಳುವಂತಹ ಆಘಾತಕಾರಿ ಸಂಗತಿಗಳನ್ನು ಬಹಿರಂಗಪಡಿಸಿತ್ತು. ವರದಿ ಪ್ರಕಾರ ಎಂಜಿನ್ ಬಲವಿಲ್ಲದೆ ನಿಯಂತ್ರಣ ಕಳೆದುಕೊಂಡ ವಿಮಾನ ಕೇವಲ 32 ಸೆಕೆಂಡುಗಳ ಕಾಲ ಗಾಳಿಯಲ್ಲಿದ್ದು, ನೇರವಾಗಿ ವೈದ್ಯಕೀಯ ಕಾಲೇಜು ಹಾಸ್ಟೆಲ್ ಕಟ್ಟಡಕ್ಕೆ ಡಿಕ್ಕಿ ಹೊಡೆದಿತ್ತು. ಅಂದರೆ ವಿಮಾನ ರನ್‌ವೇಯಿಂದ ಗಾಳಿಯಲ್ಲಿ ಮೇಲಕ್ಕೆದ್ದ ಕೇವಲ 35 ಸೆಕೆಂಡು ಆಗುವಷ್ಟರಲ್ಲಿ ಈ ಅಪಘಾತ ನಡೆದಿತ್ತು.
ಮೊದಲ ವರದಿಯಲ್ಲಿ ವಿಮಾನದ ಬ್ಲಾಕ್ ಬಾಕ್ಸ್‌ನಲ್ಲಿದ್ದ ಆಡಿಯೋ ಸಂಭಾಷಣೆಯ ಅತ್ಯಂತ ಗಂಭೀರವಾದ ಭಾಗವನ್ನು ಉಲ್ಲೇಖಿಸಲಾಗಿತ್ತು. ಎಂಜಿನ್ ಬಂದ್ ಆದ ತಕ್ಷಣ ಓರ್ವ ಪೈಲಟ್ “ನೀನು ಸ್ವಿಚ್ ಯಾಕೆ ಕಟ್-ಆಫ್ ಮಾಡಿದೆ?” ಎಂದು ಕೇಳಿದರೆ ಇನ್ನೋರ್ವ ಪೈಲಟ್ “ನಾನು ಮಾಡಿಲ್ಲ, ನಾನು ಯಾವುದನ್ನೂ ಮುಟ್ಟಿಲ್ಲ!” ಎಂದು ಹೇಳುವುದು ಕೇಳಿಬಂದಿತ್ತು. ಇಬ್ಬರೂ ಪೈಲಟ್‌ಗಳು ಅನುಭವಿಗಳಾಗಿದ್ದರಿಂದ ಅವರು ಪ್ರಜ್ಞಾಪೂರ್ವಕವಾಗಿ ಈ ತಪ್ಪು ಮಾಡಲು ಸಾಧ್ಯವಿಲ್ಲ ಎಂಬುದು ಸ್ಪಷ್ಟವಾಗಿತ್ತು. ಆದರೆ ಸ್ವಿಚ್‌ಗಳು ಆಫ್ ಆಗಿದ್ದು ಹೇಗೆ ಎಂಬುದು ಮೊದಲ ವರದಿಯಲ್ಲಿ ಬಗೆಹರಿಯದ ಒಗಟಾಗಿಯೇ ಉಳಿಯಿತು.
