ಭಾರತೀಯ ರಾಜಕೀಯ ಇತಿಹಾಸ ಹಾಗೂ ಸಾಮಾಜಿಕ ಜಾಲತಾಣಗಳ ಲೋಕದಲ್ಲಿ ಅಚ್ಚರಿಯ ಬೆಳವಣಿಗೆಯೊಂದು ನಡೆದಿದೆ. ನಿರುದ್ಯೋಗಿ ಯುವಜನತೆಯ ಆಕ್ರೋಶದ ಸಂಕೇತವಾಗಿ ಕೇವಲ ಐದು ದಿನಗಳ ಹಿಂದಷ್ಟೇ ಹುಟ್ಟಿಕೊಂಡ ವಿಡಂಬನಾತ್ಮಕ ‘ಕಾಕ್ರೋಚ್ ಜನತಾ ಪಾರ್ಟಿ’ (CJP), ಇನ್‌ಸ್ಟಾಗ್ರಾಮ್‌ನಲ್ಲಿ ಬರೋಬ್ಬರಿ 1 ಕೋಟಿ ಫಾಲೋವರ್ಸ್ ಪಡೆಯುವ ಮೂಲಕ ಆಡಳಿತಾರೂಢ ಬಿಜೆಪಿಯ ಅಧಿಕೃತ ಖಾತೆಯನ್ನೂ ಹಿಂದಿಕ್ಕಿ ಹೊಸ ದಾಖಲೆ ಬರೆದಿದೆ.
ಸುಪ್ರೀಂ ಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಅವರು ಇತ್ತೀಚೆಗೆ ವಿಚಾರಣೆಯೊಂದರ ವೇಳೆ, ನಕಲಿ ಪದವಿ ಹೊಂದಿರುವ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಆರ್‌ಟಿಐ ಕಾರ್ಯಕರ್ತರ ಸೋಗಿನಲ್ಲಿ ಎಲ್ಲರನ್ನೂ ಟೀಕಿಸುವ ನಿರುದ್ಯೋಗಿ ಯುವಕರನ್ನು “ಜಿರಳೆಗಳು” ಮತ್ತು “ಪರಾವಲಂಬಿಗಳು” (Parasites) ಎಂದು ಕರೆದಿದ್ದಾರೆ ಎಂಬ ವರದಿಗಳು ಹರಿದಾಡಿದ್ದವು. (ನಂತರ ತಾವು ಆ ಮಾತನ್ನು ಕೇವಲ ನಕಲಿ ಪದವೀಧರರಿಗೆ ಹೇಳಿದ್ದಾಗಿ ಅವರು ಸ್ಪಷ್ಟನೆ ನೀಡಿದ್ದರು). ಆದರೆ, ಈ ಹೇಳಿಕೆಯನ್ನೇ ತಮ್ಮ ಅಸ್ತ್ರವಾಗಿಸಿಕೊಂಡ ಸಾಮಾಜಿಕ ಜಾಲತಾಣಗಳ ಯುವಪಡೆ, ಮೇ 16ರಂದು ಅಭಿಜೀತ್ ಡಿಪ್ಕೆ ಎಂಬುವವರ ನೇತೃತ್ವದಲ್ಲಿ ‘ಕಾಕ್ರೋಚ್ ಜನತಾ ಪಾರ್ಟಿ’ ಎಂಬ ವಿಡಂಬನಾತ್ಮಕ ಆನ್‌ಲೈನ್ ಪಕ್ಷವನ್ನು ಹುಟ್ಟುಹಾಕಿತು.
ಮೇ 21ರ ವೇಳೆಗೆ @cockroachjantaparty ಇನ್‌ಸ್ಟಾಗ್ರಾಮ್ ಖಾತೆಯು 10 ಮಿಲಿಯನ್ ಬೆಂಬಲಿಗರನ್ನು ಸಂಪಾದಿಸಿದೆ. ಈ ಮೂಲಕ 8.7 ಮಿಲಿಯನ್(87 ಲಕ್ಷ) ಫಾಲೋವರ್ಸ್ ಹೊಂದಿರುವ ಬಿಜೆಪಿಯ ಅಧಿಕೃತ ಇನ್‌ಸ್ಟಾಗ್ರಾಮ್ ಖಾತೆಯನ್ನು (@bjp4india) ಇದು ಹಿಂದಿಕ್ಕಿದೆ. ಸದ್ಯ 13.2 ಮಿಲಿಯನ್ (1.3 ಕೋಟಿ) ಫಾಲೋವರ್ಸ್ ಹೊಂದಿರುವ ಕಾಂಗ್ರೆಸ್ (@incindia) ಮಾತ್ರ ಸಿಜೆಪಿಗಿಂತ ಮುಂದಿದೆ. ಕೇವಲ 5 ದಿನಗಳಲ್ಲಿ ಮೀಮ್‌ಗಳು, ವಿಡಂಬನೆ ಹಾಗೂ ಯುವಕರ ಆಕ್ರೋಶದ ಮೂಲಕವೇ ಈ ಪಕ್ಷ ಇಷ್ಟೊಂದು ದೊಡ್ಡ ಮಟ್ಟದ ಬೆಂಬಲ ಗಳಿಸಿರುವುದು ಎಲ್ಲರ ಹುಬ್ಬೇರಿಸಿದೆ.
ಇದನ್ನು ಓದಿದ್ದೀರಾ? ಜಿಮ್ನಾಸ್ಟಿಕ್ ಹಗ್ಗದ ಕುಣಿಕೆ, ದೇಹದ ಮೇಲೆ ಗಾಯದ ಗುರುತು: ತ್ವಿಶಾ ಸಾವಿನ ಸುತ್ತ ಅನುಮಾನದ ಹುತ್ತ
ತಮ್ಮನ್ನು ತಾವು “ಸೋಮಾರಿಗಳ ಮತ್ತು ನಿರುದ್ಯೋಗಿಗಳ ಧ್ವನಿ” ಎಂದು ಕರೆದುಕೊಂಡಿರುವ ಈ ಪಕ್ಷದ ಉದ್ದೇಶ ಕೇವಲ ಹಾಸ್ಯಕ್ಕಷ್ಟೇ ಸೀಮಿತವಾಗಿಲ್ಲ. ಬದಲಾಗಿ, ನಿರುದ್ಯೋಗ, ಹಣದುಬ್ಬರ, ಎನ್‌ಇಇಟಿ (NEET) ಪರೀಕ್ಷೆಯ ಅಕ್ರಮಗಳು, ಸಿಬಿಎಸ್‌ಇ ಮರುಮೌಲ್ಯಮಾಪನ ಶುಲ್ಕದ ಸುಲಿಗೆ ಹಾಗೂ ವ್ಯವಸ್ಥೆಯಲ್ಲಿನ ಭ್ರಷ್ಟಾಚಾರದ ವಿರುದ್ಧ ತೀಕ್ಷ್ಣವಾಗಿ ಧ್ವನಿ ಎತ್ತುತ್ತಿದೆ.
ಈ ಆನ್‌ಲೈನ್ ಕ್ರಾಂತಿಗೆ ಕೇವಲ ಯುವಜನತೆ ಮಾತ್ರವಲ್ಲದೆ, ಪ್ರಮುಖ ರಾಜಕೀಯ ನಾಯಕರು ಕೂಡ ಧ್ವನಿಗೂಡಿಸಿದ್ದಾರೆ. ತೃಣಮೂಲ ಕಾಂಗ್ರೆಸ್ ಸಂಸದರಾದ ಮಹುವಾ ಮೊಯಿತ್ರಾ ಮತ್ತು ಕೀರ್ತಿ ಆಜಾದ್ ಅವರು ಈ ವಿಡಂಬನಾತ್ಮಕ ಪಕ್ಷದ ಸದಸ್ಯರಾಗಲು ಸಾಮಾಜಿಕ ಜಾಲತಾಣಗಳಲ್ಲೇ ಬಹಿರಂಗವಾಗಿ ಇಚ್ಛೆ ವ್ಯಕ್ತಪಡಿಸಿದ್ದು, ಈ ಚಳವಳಿಗೆ ಮತ್ತಷ್ಟು ಬಲ ತುಂಬಿದೆ.
