2013ರಲ್ಲಿ ಯುನೈಟೆಡ್ ಕಿಂಗ್‌ಡಮ್‌ಗೆ (ಬ್ರಿಟನ್) ವಲಸೆ ಹೋಗಿದ್ದ ಭಾರತೀಯ ಮೂಲದ ಕುಟುಂಬವು ಇಂದು ಸಂಭ್ರಮಿಸುತ್ತಿದೆ. ಹರಿಯಾಣದ ರೋಹ್ಟಕ್ ಮೂಲದ ಮಹಿಳೆ ಪರ್ವೀನ್ ರಾಣಿ ಮತ್ತು ಆಕೆಯ ಮಗ ತುಷಾರ್ ಕುಮಾರ್ – ಇಬ್ಬರೂ ಬ್ರಿಟನ್‌ನಲ್ಲಿ ಮೇಯರ್‌ಗಳಾಗಿ ಆಯ್ಕೆಯಾಗಿದ್ದಾರೆ. ಹೊಸ ಇತಿಹಾಸ ಸೃಷ್ಟಿಸಿದ್ದಾರೆ.
ವಿಶೇಷವೆಂದರೆ, ಕೇವಲ 23 ವರ್ಷದ ಯುವಕ ತುಷಾರ್ ಕುಮಾರ್ ಅವರು ಬ್ರಿಟನ್‌ನಲ್ಲಿ ಅತ್ಯಂತ ಕಿರಿಯ ವಯಸ್ಸಿನ ಭಾರತೀಯ ಮೂಲದ ಮೇಯರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ತುಷಾರ್ ಅವರು ಎಲ್‌ಸ್ಟ್ರೀ ಅಂಡ್‌ ಬೋರ್‌ಹ್ಯಾಮ್‌ವುಡ್ ಟೌನ್ ಕೌನ್ಸಿಲ್‌ನ ಅತ್ಯಂತ ಕಿರಿಯ ಮೇಯರ್ ಆಗಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಅವರ ತಾಯಿ ಪರ್ವೀನ್ ರಾಣಿ ಅವರು ಹೆರ್ಟ್ಸ್‌ಮಿಯರ್ ಬರೋ ಕೌನ್ಸಿಲ್‌ನ ಮೊದಲ ಭಾರತೀಯ ಮೂಲದ ಮಹಿಳಾ ಮೇಯರ್ ಆಗಿ ಆಯ್ಕೆಯಾಗಿದ್ದಾರೆ.
ಪರ್ವೀನ್ ಅವರ ಪತಿ ಸುನಿಲ್ ದಹಿಯಾ ಅವರು ಉದ್ಯಮಿಯಾಗಿದ್ದು, ಈ ಕುಟುಂಬವು ಬ್ರಿಟನ್ ದೇಶಕ್ಕೆ ತೆರಳುವ ಮುನ್ನ ದೀರ್ಘಕಾಲದವರೆಗೆ ರೋಹ್ಟಕ್‌ನಲ್ಲಿ ವಾಸವಾಗಿದ್ದರು. 2013ರಲ್ಲಿ ಸುನಿಲ್ ದಹಿಯಾ ಅವರು ತಮ್ಮ ಪತ್ನಿ ಪರ್ವೀನ್ ಮತ್ತು ಇಬ್ಬರು ಮಕ್ಕಳೊಂದಿಗೆ ಬ್ರಿಟನ್‌ಗೆ ವಲಸೆ ಹೋದರು. ಆ ಸಮಯದಲ್ಲಿ ಅವರ ಮನಸ್ಸಿನಲ್ಲಿ ಯಾವುದೇ ನಿರ್ದಿಷ್ಟ ಗುರಿ ಅಥವಾ ದೊಡ್ಡ ಆಕಾಂಕ್ಷೆಗಳು ಇರಲಿಲ್ಲ. ಆಗ ಅವರ ಹಿರಿಯ ಮಗ ತುಷಾರ್‌ಗೆ ಕೇವಲ 10 ವರ್ಷ ವಯಸ್ಸಾಗಿತ್ತು. ಆದರೆ, ಇಂದು ಒಂದೇ ಕುಟುಂಬದ ತಾಯಿ ಮತ್ತು ಮಗ ಒಟ್ಟಿಗೆ ಏಕಕಾಲದಲ್ಲಿ ಬ್ರಿಟನ್‌ನ ಪ್ರಮುಖ ನಗರಗಳ ಮೇಯರ್‌ಗಳಾಗಿದ್ದಾರೆ.
ಈ ಬಗ್ಗೆ ಮಾತನಾಡಿರುವ ಸುನಿಲ್, “ಇಬ್ಬರೂ ಮೇಯರ್‌ಗಳಾಗಿರುವುದು ಇಡೀ ಭಾರತೀಯ ಮೂಲದ ಸಮುದಾಯಕ್ಕೆ ಅತ್ಯಂತ ಹೆಮ್ಮೆಯ ವಿಷಯವಾಗಿದೆ” ಎಂದು ಸಂತಸ ಹಂಚಿಕೊಂಡಿದ್ದಾರೆ.
ಪರ್ವಿಲ್ ಮತ್ತು ತುಷಾರ್ ಮೊದಲಿನಿಂದಲೂ ಸಮಾಜಿಕ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದರು. ಸ್ಥಳೀಯ ಸಮುದಾಯಗಳಿಗೆ ಸಹಾಯ ಮಾಡುವುದರಲ್ಲಿ ತೀವ್ರ ಆಸಕ್ತಿ ಹೊಂದಿದ್ದರು. ತುಷಾರ್ ಅವರು ಲಂಡನ್‌ನ ಕಾಲೇಜೊಂದರಲ್ಲಿ ವ್ಯಾಸಂಗ ಮಾಡುತ್ತಿರುವಾಗಲೇ, ತಮ್ಮ 20ನೇ ವಯಸ್ಸಿಗೆ ನಗರಸಭೆ ಸದಸ್ಯರಾಗಿ ಆಯ್ಕೆಯಾಗುವ ಮೂಲಕ ಸಾರ್ವಜನಿಕ ಜೀವನಕ್ಕೆ ಪ್ರವೇಶಿಸಿದ್ದರು.
ಈ ಲೇಖನ ಓದಿದ್ದೀರಾ?: ಕನ್ನಡಿಗರೇ ಎಚ್ಚರ: ಎಸ್ಐಆರ್ – ಮತಪಟ್ಟಿ ಪರಿಶೀಲನೆಯಲ್ಲ, ಪೌರತ್ವ ಪರೀಕ್ಷೆ!
ಲೇಬರ್ ಪಾರ್ಟಿಯಿಂದ ತುಷಾರ್ ಕೌನ್ಸಿಲರ್ ಆಗಿ ಆಯ್ಕೆಯಾದಾಗ ಅವರು ಲಂಡನ್‌ನ ಪ್ರತಿಷ್ಠಿತ ಕಿಂಗ್ಸ್ ಕಾಲೇಜಿನಲ್ಲಿ ರಾಜ್ಯಶಾಸ್ತ್ರ ವಿಷಯದಲ್ಲಿ ದ್ವಿತೀಯ ವರ್ಷದ ಪದವಿ ವಿದ್ಯಾರ್ಥಿಯಾಗಿದ್ದರು. ಅವರು ಮುಂಬರುವ ಸೆಪ್ಟೆಂಬರ್ ತಿಂಗಳಿನಿಂದ ತಮ್ಮ ಸ್ನಾತಕೋತ್ತರ ಪದವಿ ವ್ಯಾಸಂಗವನ್ನು ಆರಂಭಿಸಲಿದ್ದಾರೆ. ಪರ್ವೀನ್ ರಾಣಿ ಅವರು ಸಮಾಜ ಸೇವೆ, ಶಿಕ್ಷಣ, ಸಂಸ್ಕೃತಿ ಮತ್ತು ಎಲ್ಲ ವರ್ಗದ ಹಾಗೂ ಎಲ್ಲಾ ತಲೆಮಾರಿನ ಜನರನ್ನು ಒಟ್ಟಿಗೆ ಜೋಡಿಸುವ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದಾರೆ.
ಪರ್ವೀನ್ ರಾಣಿ ಅವರ ಕಿರಿಯ ಮಗ ಕೂಡ ಸದ್ಯ ಅದೇ ಕಿಂಗ್ಸ್ ಕಾಲೇಜಿನಲ್ಲಿ ಪದವಿ ವ್ಯಾಸಂಗ ಮಾಡುತ್ತಿದ್ದು, ಅಲ್ಲಿನ ವಿದ್ಯಾರ್ಥಿ ಸಂಘದ ಟ್ರಸ್ಟಿಯಾಗಿಯೂ ಕಾರ್ಯನಿರ್ವಹಿಸುತ್ತಿದ್ದಾರೆ.
