ಅತ್ಯಂತ ಹಳೆಯ ಕಲ್ಲಿದ್ದಲು ಹಗರಣದ ಪ್ರಕರಣವೊಂದರಲ್ಲಿ ಐವರು ಆರೋಪಿಗಳನ್ನು ದೆಹಲಿ ನ್ಯಾಯಾಲಯವು ಖುಲಾಸೆಗೊಳಿಸಿದೆ. ಪ್ರಕರಣ ಸಂಬಂಧಿಸಿದಂತೆ ಎಳ್ಳಷ್ಟೂ ಸಾಕ್ಷ್ಯಗಳನ್ನು ಸಿಬಿಐ ಒಸಗಿಸಿಲ್ಲವೆಂದು ಟೀಕಿಸಿದೆ.
2012ರಲ್ಲಿ ದಾಖಲಾಗಿದ್ದ ಮಹಾರಾಷ್ಟ್ರದ ಬಾಂದರ್ ಕಲ್ಲಿದ್ದಲು ಬ್ಲಾಕ್ ಹಂಚಿಕೆಗೆ ಸಂಬಂಧಿಸಿದ ಹಗರಣ ಪ್ರಕರಣದಲ್ಲಿ ದೆಹಲಿಯ ರೌಸ್ ಅವೆನ್ಯೂ ನ್ಯಾಯಾಲಯದ ವಿಶೇಷ ನ್ಯಾಯಾಧೀಶೆ (ಪಿಸಿ ಕಾಯ್ದೆ) ಸುನೈನಾ ಶರ್ಮಾ ತೀರ್ಪು ನೀಡಿದ್ದಾರೆ. ಪ್ರಕರಣದಲ್ಲಿ ಆರೋಪಿಗಳೆಂದು ಹೆಸರಿಸಲಾಗಿದ್ದ ಮಾಜಿ ಸಂಸದ ವಿಜಯ್ ದರ್ದಾ, ಅವರ ಪುತ್ರ ದೇವೇಂದ್ರ ದರ್ದಾ, ಮಾಜಿ ಕಲ್ಲಿದ್ದಲು ಕಾರ್ಯದರ್ಶಿ ಹೆಚ್.ಸಿ. ಗುಪ್ತಾ, ಎಎಂಆರ್ ಐರನ್ ಅಂಡ್ ಸ್ಟೀಲ್ ಪ್ರೈವೇಟ್ ಲಿಮಿಟೆಡ್ ಕಂಪನಿ ಹಾಗೂ ಅದರ ನಿರ್ದೇಶಕ ಮನೋಜ್ ಕುಮಾರ್ ಜೈಸ್ವಾಲ್ ಅವರನ್ನು ಖುಲಾಸೆಗೊಳಿಸಿದ್ದಾರೆ. ಪ್ರಕರಣದಲ್ಲಿ ಆರೋಪಿಗಳ ವಿರುದ್ಧದ ಆರೋಪಗಳನ್ನು ಸಾಬೀತುಪಡಿಸುವಲ್ಲಿ ಸಿಬಿಐ ‘ಬಹಳ ಹೀನಾಯವಾಗಿ ವಿಫಲವಾಗಿದೆ’ ಎಂದು ನ್ಯಾಯಾಧೀಶರು ಟೀಕಿಸಿದ್ದಾರೆ.
ಆರೋಪಿಗಳ ನಡುವೆ ಕ್ರಿಮಿನಲ್ ಪಿತೂರಿ ನಡೆದಿದೆ ಎಂಬುದನ್ನು ಸಾಬೀತುಪಡಿಸಲು ನೇರ ಅಥವಾ ಪರೋಕ್ಷವಾದ ‘ಒಂದು ಕಣದಷ್ಟು ಸಾಕ್ಷ್ಯವೂ ಇಲ್ಲ’ ಎಂದು ನ್ಯಾಯಾಧೀಶೆ ಶರ್ಮಾ ಹೇಳಿದ್ದಾರೆ.
“ಸಾಕ್ಷ್ಯಗಳಿಲ್ಲದ ಕಾರಣ, ಐಪಿಸಿ ಸೆಕ್ಷನ್ 120-ಬಿ, ಸೆಕ್ಷನ್ 420, ಪಿಸಿ ಕಾಯ್ದೆ-1988ರ ಸೆಕ್ಷನ್ 9 ಮತ್ತು ಸೆಕ್ಷನ್ 13(1)(ಡಿ) ಅಡಿಯ ಕ್ರಿಮಿನಲ್ ಪಿತೂರಿ ಅಪರಾಧದಿಂದ ಎಲ್ಲ ಆರೋಪಿಗಳನ್ನು ಖುಲಾಸೆಗೊಳಿಸಲಾಗಿದೆ” ಎಂದು ನ್ಯಾಯಾಲಯ ತೀರ್ಪು ನೀಡಿದೆ.
ಈ ಪ್ರಕರಣದಲ್ಲಿ 2012ರಲ್ಲಿ ಎಫ್ಐಆರ್ ದಾಖಲಿಸಲಾಗಿತ್ತು. ತನಿಖೆಯನ್ನು ಸಿಬಿಐಗೆ ವರ್ಗಾಯಿಸಲಾಗಿತ್ತು. 2014ರಲ್ಲಿಯೇ ಸಿಬಿಐ ತನ್ನ ಮೊದಲ ಚಾರ್ಜ್ಶೀಟ್ಅನ್ನೂ ಸಲ್ಲಿಸಿತ್ತು.
ಪ್ರಕರಣದಲ್ಲಿ ವಾದ ಮಂಡಿಸಿದ್ದ ಪ್ರಾಸಿಕ್ಯೂಷನ್, “ಎಎಂಆರ್ ಕಂಪನಿ ಮತ್ತು ಅದರ ನಿರ್ದೇಶಕರು ಕಲ್ಲಿದ್ದಲು ಸಚಿವಾಲಯಕ್ಕೆ ಸಲ್ಲಿಸಿದ ಅರ್ಜಿಯಲ್ಲಿ ಪ್ರಮುಖ ಸತ್ಯಗಳನ್ನು ತಪ್ಪಾಗಿ ಬಿಂಬಿಸಿದ್ದರು. ಕಂಪನಿಯು ತನ್ನ ಸಹ ಕಂಪನಿಗಳಿಗೆ ಈ ಹಿಂದೆ ನೀಡಲಾಗಿದ್ದ ಕಲ್ಲಿದ್ದಲು ಬ್ಲಾಕ್ ಹಂಚಿಕೆಗಳನ್ನು ಮರೆಮಾಚಿದೆ. ಲೋಕಮತ್ ಗ್ರೂಪ್ ಹಾಗೂ ಐಎಲ್ ಅಂಡ್ ಎಫ್ಎಸ್ನೊಂದಿಗೆ ಸಂಬಂಧ ಹೊಂದಿದೆ ಎಂದು ಸುಳ್ಳು ಹೇಳುವ ಮೂಲಕ ತನ್ನ ಆರ್ಥಿಕ ಬಲವನ್ನು ಅತಿಯಾಗಿ ಬಿಂಬಿಸಿದೆ” ಎಂದು ಆರೋಪಿಸಿತ್ತು.
ಈ ಲೇಖನ ಓದಿದ್ದೀರಾ?: ‘ವಿಶ್ವಗುರು’ವಿನ ನಿಜ ಬಣ್ಣ ಬಯಲು ಮಾಡಿದ ಮಧು ಕಿಶ್ವರ್: ಸುದ್ದಿ ಮಾಡದ ಮಡಿಲ ಮಾಧ್ಯಮಗಳು
“ಕಲ್ಲಿದ್ದಲು ಬ್ಲಾಕ್ ಹಂಚಿಕೆಗಳನ್ನು ಶಿಫಾರಸು ಮಾಡುವ ಜವಾಬ್ದಾರಿಯನ್ನು ಹೊಂದಿದ್ದ 36ನೇ ಸ್ಕ್ರೀನಿಂಗ್ ಕಮಿಟಿಯ ಮುಂದೆ ದಾರಿತಪ್ಪಿಸುವ ಮಾಹಿತಿಯನ್ನು ಪ್ರಸ್ತುತಪಡಿಸಲಾಗಿದೆ. ಹಂಚಿಕೆ ಪ್ರಕ್ರಿಯೆಯ ಮೇಲೆ ಪ್ರಭಾವ ಬೀರಲು ದರ್ದಾ ಕುಟುಂಬದವರು ಯತ್ನಿಸಿದ್ದರು. ಎಎಂಆರ್ ಕಂಪನಿಯು ಅಪೂರ್ಣ ಮಾಹಿತಿ ನೀಡಿದ್ದರೂ ಹೆಚ್.ಸಿ ಗುಪ್ತಾ ಅವರು ಅದನ್ನು ನಿರ್ಲಕ್ಷಿಸಿದ್ದರು” ಎಂದು ಸಿಬಿಐ ಆರೋಪಿಸಿತ್ತು.
ಪ್ರಕರಣವನ್ನು ದೀರ್ಘಕಾಲ ವಿಚಾರಣೆ ನಡೆಸಿರುವ ನ್ಯಾಯಾಲಯವು, “ಕಲ್ಲಿದ್ದಲು ಬ್ಲಾಕ್ ಹಂಚಿಕೆಯಾದ ಎಎಂಆರ್ ಕಂಪನಿ ಮತ್ತು ಸಾರ್ವಜನಿಕ ಸೇವಕರ (ಸರ್ಕಾರಿ ಅಧಿಕಾರಿಗಳ) ನಡುವೆ ಯಾವುದೇ ಸಂವಹನ ನಡೆದಿದೆ ಎಂಬುದನ್ನು ತೋರಿಸಲು ಪುರಾವೆಗಳ ಸಂಪೂರ್ಣ ಕೊರತೆಯಿದೆ. ಯಾವ ಸಂದರ್ಭಗಳ ಮೂಲಕ ಪ್ರಾಸಿಕ್ಯೂಷನ್ ಕ್ರಿಮಿನಲ್ ಪಿತೂರಿಯ ಆರೋಪವನ್ನು ಸಾಬೀತುಪಡಿಸಲು ಪ್ರಯತ್ನಿಸಿದೆಯೋ, ಅವು ಯಾವುದೇ ಬಲವಾದ ಮತ್ತು ವಿಶ್ವಾಸಾರ್ಹ ಪುರಾವೆಗಳನ್ನು ಹೊಂದಿಲ್ಲ” ಎಂದು ಹೇಳಿದೆ. ಆದ್ದರಿಂದ, ಎಲ್ಲ ಆರೋಪಿಗಳನ್ನು ಖುಲಾಸೆಗೊಳಿಸಿದೆ.
