ಕೇರಳದ ಕೋಝಿಕೋಡ್ ಜಿಲ್ಲೆಯ 43 ವರ್ಷದ ವ್ಯಕ್ತಿಯೊಬ್ಬರಲ್ಲಿ ಮಾರಣಾಂತಿಕ ‘ನಿಫಾ ವೈರಸ್’ (NiV) ಸೋಂಕು ಇರುವುದು ಪ್ರಾಥಮಿಕ ತಪಾಸಣೆಯಲ್ಲಿ ದೃಢಪಟ್ಟಿದೆ ಎಂದು ರಾಜ್ಯ ಆರೋಗ್ಯ ಅಧಿಕಾರಿಗಳು ಖಚಿತಪಡಿಸಿದ್ದಾರೆ. ಸದ್ಯ ರೋಗಿಗೆ ಕೋಝಿಕ್ಕೋಡ್ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದ್ದು, ಆರೋಗ್ಯ ಇಲಾಖೆಯು ಮುನ್ನೆಚ್ಚರಿಕೆ ಕ್ರಮವಾಗಿ ಸೋಂಕಿತ ವ್ಯಕ್ತಿಯ ಸಂಪರ್ಕಕ್ಕೆ ಬಂದವರನ್ನು ಪತ್ತೆಹಚ್ಚುವ ಪ್ರಕ್ರಿಯೆ ಆರಂಭಿಸಿದೆ.
ವಿಶ್ವ ಆರೋಗ್ಯ ಸಂಸ್ಥೆ (WHO) ನೀಡಿರುವ ಮಾಹಿತಿಯ ಪ್ರಕಾರ, ನಿಫಾ ವೈರಸ್ ಪ್ರಾಣಿಗಳಿಂದ ಮನುಷ್ಯರಿಗೆ ಹರಡುವ ಅತ್ಯಂತ ಅಪಾಯಕಾರಿ ಮತ್ತು ಪ್ರಾಣಾಂತಿಕ ಸೋಂಕಾಗಿದೆ. ಇದು ಮನುಷ್ಯರಲ್ಲಿ ತೀವ್ರ ಉಸಿರಾಟದ ತೊಂದರೆ ಮತ್ತು ನರರೋಗದ ಲಕ್ಷಣಗಳನ್ನು ಉಂಟುಮಾಡುತ್ತದೆ. ಅಲ್ಲದೆ, ಈ ಸೋಂಕು ತಗುಲಿದರೆ ಮೆದುಳಿನಲ್ಲಿ ತೀವ್ರ ಊತ ಉಂಟಾಗಿ ತಕ್ಷಣವೇ ಸಾವು ಸಂಭವಿಸುವ ಸಾಧ್ಯತೆ ಇರುತ್ತದೆ. ಈ ವೈರಸ್‌ನ ಮರಣ ಪ್ರಮಾಣವು ಶೇಕಡಾ 40% ರಿಂದ 75% ರಷ್ಟು ಇರುವುದರಿಂದ, ಜಾಗತಿಕ ಆರೋಗ್ಯ ಸಂಸ್ಥೆಯು ಇದನ್ನು ಅತ್ಯಂತ ಗಂಭೀರವಾದ ಆರೋಗ್ಯ ಆದ್ಯತೆಯಾಗಿ ಪರಿಗಣಿಸಿದೆ.
ಈ ವೈರಸ್ ಮೊದಲ ಬಾರಿಗೆ 1999 ರಲ್ಲಿ ಮಲೇಷ್ಯಾ ಮತ್ತು ಸಿಂಗಾಪುರದಲ್ಲಿ ಹಂದಿಗಳು ಹಾಗೂ ಮನುಷ್ಯರಲ್ಲಿ ಪತ್ತೆಯಾಗಿತ್ತು. ‘ಪ್ಯಾರಾಮಿಕ್ಸೋವಿರಿಡೆ’ ಸಂತತಿಯ ‘ಹೆನಿಪಾವೈರಸ್’ ಜಾತಿಗೆ ಸೇರಿದ ಈ ಮಾರಕ ವೈರಸ್ ಅನ್ನು ಹರಡುವ ಪ್ರಮುಖ ವಾಹಕಗಳೆಂದರೆ ‘ಫ್ರೂಟ್ ಬ್ಯಾಟ್ಸ್’ ಅಥವಾ ‘ಫ್ಲೈಯಿಂಗ್ ಫಾಕ್ಸಸ್’ ಎಂದು ಕರೆಯಲಾಗುವ ಹಣ್ಣು ತಿನ್ನುವ ಬಾವಲಿಗಳು.
ಇದನ್ನೂ ಓದಿ: ಕಾಂಗ್ರೆಸ್‌ನ ಹಿರಿಯ ನಾಯಕರ ‘ತುರ್ತು ಸಭೆ’ ಕರೆದ ಮಲ್ಲಿಕಾರ್ಜುನ ಖರ್ಗೆ
ಈ ಬಾವಲಿಗಳು ಕಚ್ಚಿದ ಅಥವಾ ಅವುಗಳ ಲಾಲಾರಸ ತಗುಲಿದ ಹಣ್ಣುಗಳನ್ನು ಮನುಷ್ಯರು ಸೇವಿಸುವುದರಿಂದ ಮತ್ತು ಸೋಂಕಿತ ವ್ಯಕ್ತಿಯ ಸ್ರವಿಸುವಿಕೆಗಳ (ಲಾಲಾರಸ, ಸೀನು) ನೇರ ಸಂಪರ್ಕಕ್ಕೆ ಬರುವುದರಿಂದ ಇದು ಒಬ್ಬರಿಂದ ಒಬ್ಬರಿಗೆ ವೇಗವಾಗಿ ಹರಡುತ್ತದೆ. ಸಾರ್ವಜನಿಕರು ಬಾವಲಿಗಳು ಕಚ್ಚಿದ ಹಣ್ಣುಗಳನ್ನು ತಿನ್ನಬಾರದು ಮತ್ತು ಜ್ವರ, ತಲೆನೋವಿನ ಲಕ್ಷಣಗಳಿದ್ದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಬೇಕು ಎಂದು ಆರೋಗ್ಯ ತಜ್ಞರು ಸಲಹೆ ನೀಡಿದ್ದಾರೆ.
