ತಮಿಳುನಾಡಿನ 234 ವಿಧಾನಸಭಾ ಕ್ಷೇತ್ರಗಳಿಗೆ ತಮಿಳಿಗ ವೆಟ್ರಿ ಕಳಗಂ (ಟಿವಿಕೆ) ಪಕ್ಷದ ಅಧ್ಯಕ್ಷ ವಿಜಯ್ ಅಭ್ಯರ್ಥಿಗಳನ್ನು ಘೋಷಣೆ ಮಾಡಿದ್ದಾರೆ. ಟಿವಿಕೆ ಪಕ್ಷದಿಂದ ಕಣಕ್ಕಿಳಿದಿರುವ ಒಬ್ಬ ಅಭ್ಯರ್ಥಿಯ ಹೆಸರು ದೇಶವ್ಯಾಪಿ ಶ್ಲಾಘನೆಗೆ ಪಾತ್ರವಾಗುತ್ತಿದೆ.
ಟಿವಿಕೆ ಪಕ್ಷದಿಂದ ದಳಪತಿ ವಿಜಯ್ ತಮ್ಮ ಮೊದಲ ಸಿನೆಮಾದಿಂದಲೂ ಜೊತೆಗಿದ್ದ ರಾಜೇಂದ್ರನ್ ಅವರ ಮಗ ಶಬರಿನಾಥನ್ ಅವರನ್ನು ವಿರುಗಂಬಕ್ಕಂ ವಿಧಾನಸಭಾ ಕ್ಷೇತ್ರದಿಂದ ಅಭ್ಯರ್ಥಿಯಾಗಿ ಕಣಕ್ಕಿಳಿಸಿದ್ದಾರೆ. ಈ ಟಿಕೆಟ್‌ ಘೋಷಣೆ ಮಾಡುವ ಸಂದರ್ಭದಲ್ಲಿ ಅಪ್ಪ ಮಗ ವೇದಿಕೆಯಲ್ಲಿ ಉಪಸ್ಥಿತರಿದ್ದರು. ಅಪ್ಪ-ಮಗನ ಭಾವುಕ ಕ್ಷಣಗಳ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗುತ್ತಿದೆ.
ಇದನ್ನೂ ಓದಿ : ಅಂಬೇಡ್ಕರ್‌ ‘ಸಂವಿಧಾನ ಶಿಲ್ಪಿ’ಯಷ್ಟೇ ಅಲ್ಲ; RBIಗೆ ಅಡಿಪಾಯ ಹಾಕಿದ ಆರ್ಥಿಕತೆಯ ಬಲಭೀಮ
ಅಪ್ಪ ಮತ್ತು ಮಗ ಇಬ್ಬರೂ ಭಾವುಕರಾದಾಗ, ವಿಜಯ್ ಅವರೇ ಖುದ್ದಾಗಿ ಕಣ್ಣೀರು ಒರೆಸಿ ಅಪ್ಪಿಕೊಂಡಿರುವ ದೃಶ್ಯ ಜನರ ಮನ ಕರಗಿಸಿದೆ. ರಾಜೇಂದ್ರನ್ ಅವರು ಮೊದಲಿನಿಂದಲೂ ವಿಜಯ್ ಅವರ ಕಾರು ಚಾಲಕರಾಗಿದ್ದರು. ಇತ್ತೀಚಿಗೆ ಆಪ್ತ ಸಹಾಯಕರನ್ನಾಗಿ ಅವರನ್ನು ವಿಜಯ್ ನೇಮಿಸಿಕೊಂಡಿದ್ದರು.
ಈ ಸಂಬಂಧಿಸಿದಂತೆ ಪ್ರತಿಕ್ರಿಯಿಸಿದ ರಾಜೇಂದ್ರನ್ ಅವರ ಮಗ 30 ವರ್ಷದ ಶಬರಿನಾಥನ್, ಸಾಮಾನ್ಯನೊಬ್ಬ ರಾಜಕಾರಣಿಯಾಗಿ ಬದಲಾಗುತ್ತಿರುವ ಪ್ರಯಾಣಕ್ಕೆ ಇದೊಂದು ಉತ್ತಮ ಆರಂಭ ಎಂದು ಹೇಳಿಕೊಂಡಿದ್ದಾರೆ.
ತಂದೆಯನ್ನು ಒಪ್ಪಿಸಿದ್ದೇ ತಲೈವರ್ :
ʼಎಲ್ಲರಂತೆಯೇ ನಮ್ಮ ತಂದೆ ಕೂಡ ನಾನು ಎಂಜಿನಿಯರ್ ಆಗಬೇಕೆಂದು ಬಯಸಿದ್ದರು. ಸಾಲ ಮಾಡಿ ನನಗೆ ಶಿಕ್ಷಣ ಕೊಡಿಸಿದ್ದರು. ನನ್ನ ರಾಜಕೀಯ ಪ್ರವೇಶ ಸುಲಭವಾಗಿರಲಿಲ್ಲ. ಹೇಳಿಕೊಂಡಿದ್ದಾರೆ.
2021ರಲ್ಲಿ ಕತಾರ್‌ನಲ್ಲಿ ಉದ್ಯೋಗ ಸಿಕ್ಕಾಗ ನನಗಿಂತಲೂ ನಮ್ಮ ತಂದೆಯೇ ಹೆಚ್ಚು ಸಂತೋಷಪಟ್ಟಿದ್ದರು. ಆದರೆ, ಆ ಕೆಲಸ ನನಗೆ ತೃಪ್ತಿ ನೀಡಿರಲಿಲ್ಲ. ನಮ್ಮ ತಲೈವರ್ (ವಿಜಯ್) ರಾಜಕೀಯ ಪಕ್ಷ ಕಟ್ಟಿದ್ದಾರೆ ಎಂದು ಕೇಳಿದಾಗ, ನನಗೆ ಮರಳಿ ಚೆನ್ನೈಗೆ ಬಂದು ಅವರ ಪ್ರಯಾಣದ ಭಾಗವಾಗಬೇಕೆನಿಸಿತ್ತು. ಆದರೆ, ತಂದೆ ಅದಕ್ಕೆ ಒಪ್ಪಿರಲಿಲ್ಲ ಎಂದು ಶಬರಿನಾಥನ್ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ತಂದೆಯ ಮಾತನ್ನು ಮೀರುವಂತಿರಲಿಲ್ಲ. 2024ರಲ್ಲಿ ಕತಾರ್‌ನಿಂದ ಚೆನ್ನೈಗೆ ವಾಪಸ್ ಬಂದಿದ್ದೆ. ನಮ್ಮ ತಂದೆಗೆ ತಿಳಿಯದಂತೆ ನೇರವಾಗಿ ವಿಜಯ್ ಅವರನ್ನೇ ಭೇಟಿಯಾಗಿ ರಾಜಕೀಯಕ್ಕೆ ಬರುವ ಹಂಬಲ ವ್ಯಕ್ತಪಡಿಸಿದ್ದೆ. ಇದಾದ ಬಳಿಕ ವಿಜಯ್ ಅವರು ತಂದೆ ಜತೆ ಮಾತನಾಡಿ ರಾಜಕೀಯ ಪ್ರವೇಶಕ್ಕೆ ಒಪ್ಪುವಂತೆ ಮಾಡಿದರು’ ಮತದಾರರು ಎಮ್‌ಎಲ್‌ಎ ಆಗುವುದಕ್ಕೆ ಅವಕಾಶ ಮಾಡಿಕೊಟ್ಟರೆ, ಕ್ಷೇತ್ರದಲ್ಲಿರುವ ಎಲ್ಲಾ ಸಮಸ್ಯೆಗಳನ್ನು ಪ್ರಾಮಾಣಿಕವಾಗಿ ಸರಿ ಪಡಿಸುವುದಕ್ಕೆ ಯತ್ನಿಸುವೆ ಎಂದು ಹೇಳಿದ್ದಾರೆ.
‘ಮೊದಲು ಟಿವಿಕೆ ಪಕ್ಷದ ಜಿಲ್ಲಾ ಕಾರ್ಯದರ್ಶಿಯಾಗಿದ್ದ ಶಬರಿನಾಥನ್, ಈಗ ಎಂಎಲ್‌ಎ ಅಭ್ಯರ್ಥಿಯಾಗಿದ್ದಾರೆ’.
