ಕಳೆದ ಎರಡು ವರ್ಷಗಳಲ್ಲಿ ಸರ್ಕಾರಿ ಸ್ವಾಮ್ಯದ ವಿಮಾನಗಳು ಮತ್ತು ಹೆಲಿಕಾಪ್ಟರ್‌ಗಳ ನಿರ್ವಹಣೆ, ಗುತ್ತಿಗೆ, ಇಂಧನ ಮತ್ತು ಸಿಬ್ಬಂದಿಗಾಗಿ ಗುಜರಾತ್ ಸರ್ಕಾರ 58 ಕೋಟಿ ರೂಪಾಯಿಗಳನ್ನು ಖರ್ಚು ಮಾಡಿದೆ ಎಂದು ಸರ್ಕಾರವೇ ಹೇಳಿಕೊಂಡಿದೆ.
ಗುಜರಾತ್ ವಿಧಾನಸಭೆಯಲ್ಲಿ, ಕಳೆದ ಎರಡು ವರ್ಷಗಳಲ್ಲಿ ಸರ್ಕಾರಿ ಸ್ವಾಮ್ಯದ ವಿಮಾನಗಳು ಮತ್ತು ಹೆಲಿಕಾಪ್ಟರ್‌ಗಳಿಗಾಗಿ ಗುಜರಾತ್ ಸರ್ಕಾರವು ನಿರ್ವಹಣೆ, ಗುತ್ತಿಗೆ, ಇಂಧನ, ಪೈಲಟ್‌ಗಳು ಮತ್ತು ಇತರ ಸಿಬ್ಬಂದಿಗೆ ಮಾಡಿದ ವೆಚ್ಚದ ಬಗ್ಗೆ ಕಾಂಗ್ರೆಸ್ ಶಾಸಕ ಅರವಿಂದ್ ಲಡಾನಿ ಪ್ರಶ್ನೆ ಕೇಳಿದ್ದರು.
ಅವರ ಪ್ರಶ್ನೆಗೆ ಉತ್ತರಿಸಿರುವ ಸರ್ಕಾರ, “2021ರ ಜನವರಿ 1ರಿಂದ 2022ರ ಡಿಸೆಂಬರ್ 31ರವರೆಗೆ ನಿರ್ವಹಣೆ, ಗುತ್ತಿಗೆ, ಇಂಧನ, ಪೈಲಟ್‌ಗಳು ಮತ್ತು ಇತರ ಸಿಬ್ಬಂದಿಗಳಿಗಾಗಿ ವಿಮಾನಗಳು ಮತ್ತು ಹೆಲಿಕಾಪ್ಟರ್‌ಗಳಿಗೆ 34,26,65,295 ರೂ. ವೆಚ್ಚ ಮಾಡಲಾಗಿದೆ. ಹೆಚ್ಚುವರಿಯಾಗಿ, 2022ರ ಜನವರಿ 1ರಿಂದ 2023ರ ಡಿಸೆಂಬರ್ 31ರವರೆಗೆ 24,24,55,209 ರೂ. ವ್ಯಯಿಸಲಾಗಿದೆ. ಕೇವಲ ಎರಡು ವರ್ಷಗಳಲ್ಲಿ ಒಟ್ಟು 58,51,20,504 ರೂ. ಖರ್ಚು ಮಾಡಲಾಗಿದೆ” ಎಂದು ಹೇಳಿದೆ.
ಆದಾಗ್ಯೂ, ವಿಮಾನಗಳು ಮತ್ತು ಹೆಲಿಕಾಪ್ಟರ್‌ಗಳ ನಿರ್ವಹಣೆಗೆ ಜವಾಬ್ದಾರಿ ಹೊತ್ತಿರುವ ಗುತ್ತಿಗೆದಾರ ಕಂಪನಿಯ ಗುರುತನ್ನು ಬಹಿರಂಗಪಡಿಸಲು ಸರ್ಕಾರ ನಿರಾಕರಿಸಿದೆ. ಕಂಪನಿಯ ಗುರುತಿನ ಮಾಹಿತಿಯು ಉನ್ನತ ಮಟ್ಟದ ರಾಜ್ಯ ಭದ್ರತೆಗೆ ಸಂಬಂಧಿಸಿದೆ ಎಂದು ಉಲ್ಲೇಖಿಸಿದೆ.
ಸರ್ಕಾರಿ ವಿಮಾನಗಳಲ್ಲಿ ಗಮನಾರ್ಹ ಹೂಡಿಕೆಯ ಹೊರತಾಗಿಯೂ, ಸಾರ್ವಜನಿಕರಿಗಾಗಿ ಪ್ರಾರಂಭವಾದ ಭಾರತದ ಮೊದಲ ಸೀಪ್ಲೇನ್ ಸೇವೆಯ ಭವಿಷ್ಯವು ಅತಂತ್ರವಾಗಿಯೇ ಉಳಿದಿದೆ.
2024ರ ಫೆಬ್ರವರಿ 13ರಂದು, ಗುಜರಾತ್ ಸರ್ಕಾರವು ಅಹಮದಾಬಾದ್‌ನ ಸಬರಮತಿ ಮತ್ತು ನರ್ಮದಾ ಜಿಲ್ಲೆಯ ಏಕತಾ ಪ್ರತಿಮೆ ನಡುವಿನ ಸೀಪ್ಲೇನ್ ಸೇವೆಯನ್ನು ಪುನರಾರಂಭಿಸಲು ಕಳೆದ ವರ್ಷ ಮೇನಲ್ಲಿ ಟೆಂಟರ್‌ ಕರೆದಿತ್ತು. ಆದರೆ, ಯಾವುದೇ ಸಂಸ್ಥೆ ಸೇವೆ ಒದಗಿಸಲು ಆಸಕ್ತಿ ತೋರಿಸಿಲ್ಲ ಎಂದು ಹೇಳಲಾಗಿದೆ.
ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು 2020ರ ಅಕ್ಟೋಬರ್‌ನಲ್ಲಿ ಸೀಪ್ಲೇನ್ ಸೇವೆಯನ್ನು ಉದ್ವಾಟಿಸಿದ್ದರು. ಆದರೆ, 2021ರ ಏಪ್ರಿಲ್‌ನಲ್ಲಿ ಸೇವೆ ಸ್ಥಗಿತಗೊಂಡಿತು.
