ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆಗೆ ಕೆಲವೇ ತಿಂಗಳುಗಳು ಬಾಕಿ ಇವೆ. ರಾಜಕೀಯ ಪಕ್ಷಗಳು ಚುನಾವಣಾ ಪ್ರಚಾರ ಆರಂಭಿಸಿವೆ, ತಂತ್ರ-ಪ್ರತಿತಂತ್ರಗಳನ್ನು ಹೆಣೆಯುತ್ತಿವೆ. ಸಾಮಾಜಿಕ ಜಾಲತಾಣದಲ್ಲಿ ಪಕ್ಷಗಳ ಪ್ರಚಾರ ಮತ್ತು ಯುದ್ಧಗಳೇ ನಡೆಯುತ್ತಿವೆ. ಮೆಟಾ ಮತ್ತು ಗೂಗಲ್‌ನ ರಾಜಕೀಯ ಜಾಹೀರಾತುಗಳ ದತ್ತಾಂಶದ ಪ್ರಕಾರ, ಕೇವಲ ಒಂದು ತಿಂಗಳ ಅವಧಿಯಲ್ಲಿ ಪಕ್ಷಗಳು ಸುಮಾರು 6 ಕೋಟಿ ರೂ.ಗಳಿಗೂ ಹೆಚ್ಚು ಖರ್ಚು ಮಾಡಿವೆ ಎಂಬುದು ಕಂಡುಬಂದಿದೆ. ಜಾಹೀರಾತು ವೆಚ್ಚದಲ್ಲಿ ಬಿಜೆಪಿಗಿಂತ ಆಡಳಿತಾರೂಢ ಟಿಎಂಸಿ ಮುಂದಿದೆ ಎಂದು ಹೇಳಿದೆ.
ಚುನಾವಣಾ ಆಯೋಗವು ಇನ್ನೂ ಚುನಾವಣೆಯ ಅಧಿಕೃತ ವೇಳಾಪಟ್ಟಿಯನ್ನು ಘೋಷಿಸಿಲ್ಲ. ಆದರೆ, ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆ 2026ರ ಮಾರ್ಚ್-ಏಪ್ರಿಲ್‌ನಲ್ಲಿ ನಡೆಯುವ ನಿರೀಕ್ಷೆಯಿದೆ. ಈಗಾಗಲೇ, ಪಕ್ಷಗಳು ಪ್ರಚಾರವನ್ನು ಆರಂಭಿಸಿವೆ. ಮೆಟಾ ಮತ್ತು ಗೂಗಲ್‌ನಿಂದ ಬಂಗಾಳ ರಾಜಕೀಯ ಜಾಹೀರಾತುಗಳಿಗೆ ಸಂಬಂಧಿಸಿದ ದತ್ತಾಂಶಗಳನ್ನು ಪಡೆದು ಇಂಡಿಯಾ ಟುಡೇ ಸುದ್ದಿಸಂಸ್ಥೆ ವಿಶ್ಲೇಷಿಸಿ, ವರದಿ ಬಿಡುಗಡೆ ಮಾಡಿದೆ.
ವರದಿ ಪ್ರಕಾರ, ಡಿಸೆಂಬರ್ 18ರಿಂದ ಜನವರಿ 16ರವರೆಗೆ ಬಂಗಾಳದ ರಾಜಕೀಯ ಜಾಹೀರಾತುದಾರರು ಸಾವಿರಾರು ಜಾಹೀರಾತುಗಳನ್ನು ನೀಡಿದ್ದಾರೆ. ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್, ಗೂಗಲ್ ಹಾಗೂ ಯೂಟ್ಯೂಬ್‌ನಲ್ಲಿ ಜಾಹೀರಾತು ಪ್ರಕಟಣೆಗೆ ಒಟ್ಟು 6.38 ಕೋಟಿ ರೂ.ಗಳನ್ನು ಖರ್ಚು ಮಾಡಿದ್ದಾರೆ.
ಒಟ್ಟು ಖರ್ಚಿನಲ್ಲಿ ಸುಮಾರು 2.4 ಕೋಟಿ ರೂ.ಗಳನ್ನು ಮೆಟಾ ಪ್ಲಾಟ್‌ಫಾರ್ಮ್‌ಗಳಿಗೆ ಖರ್ಚು ಮಾಡಲಾಗಿದೆ.ಸುಮಾರು 3.9 ಕೋಟಿ ರೂ.ಗಳನ್ನು ಗೂಗಲ್ ಮತ್ತು ಯೂಟ್ಯೂಬ್ ಜಾಹೀರಾತುಗಳಿಗೆ ಖರ್ಚು ಮಾಡಲಾಗಿದೆ ಎಂದು ವರದಿ ವಿವರಿಸಿದೆ.
ಮೆಟಾ ಮತ್ತು ಗೂಗಲ್‌ನಲ್ಲಿ, ಟಿಎಂಸಿ ಮತ್ತು ಅದರ ರಾಜಕೀಯ ಸಲಹೆಗಾರ ಸಂಸ್ಥೆ ಐ-ಪ್ಯಾಕ್ ಒಟ್ಟು ಸುಮಾರು 2.4 ಕೋಟಿ ರೂ.ಗಳನ್ನು ಖರ್ಚು ಮಾಡಿವೆ. ಅಂತೆಯೇ, ಅಬರ್ ಜಿತ್ಬೆ ಬಾಂಗ್ಲಾ, ತೃಣಮೂಲೆ ನಬೋ ಜೋವರ್, ಅಮಿ ಬಾಂಗ್ಲಾರ್ ಡಿಜಿಟಲ್ ಜೋಧಾ, ಎಬಿ ಕನೆಕ್ಟ್ಸ್‌ ಹಾಗೂ ಮನುಶೇರ್ ಮಮತಾ ಮುಂತಾದ ಪರ್ಯಾಯ ಪುಟಗಳ (ಪೇಜ್‌) ಜಾಲಗಳಿಗಾಗಿ 32 ಲಕ್ಷ ರೂ.ಗಳನ್ನು ಖರ್ಚು ಮಾಡಿದೆ. ಈ ಪುಟಗಳು ಔಪಚಾರಿಕ ಪಕ್ಷದ ಬ್ರ್ಯಾಂಡಿಂಗ್ ಅನ್ನು ಹೊಂದಿಲ್ಲದಿದ್ದರೂ, ಟಿಎಂಸಿ ಪರ ನಿರೂಪಣೆಯನ್ನು ಪ್ರಚಾರ ಮಾಡಿವೆ.
ಕಳೆದ ವರ್ಷ ನವೆಂಬರ್‌ನಲ್ಲಿ ರಚಿಸಲಾದ ‘ಬೋಲ್ಚೆ ಬಾಂಗ್ಲಾ’ ಪೇಜ್‌ ಕೂಡ ಟಿಎಂಸಿ ಪರವಾಗಿ ನಿರೂಪಣೆಗಳನ್ನು ಪ್ರಸಾರ ಮಾಡಿದೆ. ಜೊತೆಗೆ, ಬಿಜೆಪಿ ವಿರುದ್ಧ ನಿರಂತರ ದಾಳಿಯನ್ನೂ ಮಾಡಿದೆ. ಅದು, ಬಿಜೆಪಿಯನ್ನು ‘ಹಿಂದು ವಿರೋಧಿ’ ಪಕ್ಷವೆಂದು ಬಿಂಬಿಸಲು, ಪ್ರಯಾಗರಾಜ್ ಮಾಘ ಮೇಳದಲ್ಲಿ ಪೊಲೀಸರು ಸಂತ ಅವಿಮುಕ್ತೇಶ್ವರಾನಂದರನ್ನು ತಡೆದ ವಿಡಿಯೋದ ತುಣುಕುಗಳನ್ನು ಬಳಸಿಕೊಂಡಿದೆ. ಇತರ ಕೆಲವು ವೀಡಿಯೊಗಳು ಮಮತಾ ಬ್ಯಾನರ್ಜಿ ಸರ್ಕಾರವನ್ನು ನಾಗಾ ಸಾಧುಗಳು ಹೊಗಳುತ್ತಿರುವುದನ್ನು ಹೈಲೈಟ್ ಮಾಡಿವೆ.
ಈ ಲೇಖನ ಓದಿದ್ದೀರಾ?: ಪ್ರಾದೇಶಿಕ ಪಕ್ಷಗಳನ್ನು ನುಂಗುವ ಬಿಜೆಪಿ ತಂತ್ರ ಅರಿಯಲು ಜೆಡಿಎಸ್‌ಗೆ ಸಕಾಲ!
ಇನ್ನೊಂದು ಕಡೆ, ಬಂಗಾಳ ಬಿಜೆಪಿ ಘಟಕವು ಮೆಟಾ ಪ್ಲಾಟ್‌ಫಾರ್ಮ್‌ಗಳಲ್ಲಿ ಸುಮಾರು 72 ಲಕ್ಷ ರೂ.ಗಳನ್ನು ಮತ್ತು ಗೂಗಲ್‌ನಲ್ಲಿ 63 ಲಕ್ಷ ರೂ.ಗಳನ್ನು ಖರ್ಚು ಮಾಡಿದೆ. ಹಿಂದಿನ ಚುನಾವಣೆಗಳಿಗಿಂತ ಭಿನ್ನವಾಗಿ, ಬಿಜೆಪಿ ಇಲ್ಲಿಯವರೆಗೆ ರಾಜ್ಯದಲ್ಲಿ ತನ್ನ ಡಿಜಿಟಲ್ ಪ್ರಚಾರಕ್ಕಾಗಿ ಈವರೆಗೆ ಯಾವುದೇ ಪರ್ಯಾಯ ಪೇಜ್‌ಗಳನ್ನು ಬಳಸಿಕೊಂಡಿಲ್ಲ.
ಇನ್ನು, ಸರ್ಕಾರಿ ಸಾರ್ವಜನಿಕ ಸಂಪರ್ಕ ಇಲಾಖೆಗಳೂ ಕೂಡ ಜಾಹೀರಾತಿಗಾಗಿ ರಾಜಕೀಯ ಪಕ್ಷಗಳಷ್ಟೇ ಸಮಾನ ಖರ್ಚು ಮಾಡಿವೆ. ಬಂಗಾಳ ಸರ್ಕಾರದ ಮಾಹಿತಿ ಮತ್ತು ಸಾಂಸ್ಕೃತಿಕ ವ್ಯವಹಾರಗಳ ಇಲಾಖೆಯು ಡಿಜಿಟಲ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ರಾಜ್ಯ ಕಲ್ಯಾಣ ಯೋಜನೆಗಳನ್ನು ಪ್ರಚಾರ ಮಾಡಲು ಒಂದೇ ತಿಂಗಳಲ್ಲಿ ಸುಮಾರು 2.1 ಕೋಟಿ ರೂ.ಗಳನ್ನು ಖರ್ಚು ಮಾಡಿದೆ ಎಂದು ದತ್ತಾಂಶ ತೋರಿಸುತ್ತದೆ.
ಏತನ್ಮಧ್ಯೆ, ಇದೇ ಅವಧಿಯಲ್ಲಿ ಕೇಂದ್ರ ಸರ್ಕಾರದ ಯೋಜನೆಗಳನ್ನು ಪ್ರಚಾರ ಮಾಡಲು ಕೇಂದ್ರ ಸಂವಹನ ಬ್ಯೂರೋ ಕೂಡ ಬಂಗಾಳದಲ್ಲಿ ಸುಮಾರು 19 ಲಕ್ಷ ರೂ.ಗಳನ್ನು ಖರ್ಚು ಮಾಡಿದೆ.
