ಯಾವುದೋ ಒಂದು ದೇಶದಲ್ಲಿ ಸಿಡಿಯುವ ಕ್ಷಿಪಣಿ, ಸಾವಿರಾರು ಕಿಲೋಮೀಟರ್ ದೂರದಲ್ಲಿರುವ ಮತ್ತೊಂದು ದೇಶದ ಪೆಟ್ರೋಲ್ ಬಂಕ್‌ನಲ್ಲಿ ತೈಲ ಬೆಲೆ ಏರಿಕೆಗೆ ಕಾರಣವಾಗಬಹುದೇ? ಉತ್ತರ ಹೌದು! ರಷ್ಯಾ-ಉಕ್ರೇನ್ ಯುದ್ಧದ ಪರಿಣಾಮ ಭಾರತದಲ್ಲಿ ಅಡುಗೆ ಎಣ್ಣೆಯಿಂದ ಹಿಡಿದು ಇಂಧನದ ಬೆಲೆಯವರೆಗೆ ಏರಿಕೆ ಕಂಡಿದ್ದನ್ನು ನಾವು ನೋಡಿದ್ದೇವೆ. ಈಗ ಪಶ್ಚಿಮ ಏಷ್ಯಾದ ಕೆಂಪು ಸಮುದ್ರ ಪ್ರದೇಶದಲ್ಲಿ ಹೌತಿ ಪಡೆಗಳು ಮತ್ತು ಆಕ್ರಮಣಕಾರಿ ಅಮೆರಿಕ ನೇತೃತ್ವದ ಮೈತ್ರಿಕೂಟದ ನಡುವೆ ಮುಂದುವರಿದಿರುವ ಸಂಘರ್ಷವು ಜಾಗತಿಕ ಇಂಧನ ಮಾರುಕಟ್ಟೆ ಮತ್ತು ಸಮುದ್ರ ವ್ಯಾಪಾರದ ಮೇಲೆ ಹೊಸ ಆತಂಕಗಳನ್ನು ಹುಟ್ಟುಹಾಕಿದೆ.
ಇತ್ತೀಚೆಗೆ ಕೆಂಪು ಸಮುದ್ರದಲ್ಲಿ ಸೌದಿ ಅರೇಬಿಯಾಕ್ಕೆ ಸಂಬಂಧಿಸಿದ ಹಡಗುಗಳು ಸೇರಿದಂತೆ ಹಲವು ವಾಣಿಜ್ಯ ಹಡಗುಗಳನ್ನು ಗುರಿಯಾಗಿಸಿ ಹೌತಿ ಪಡೆಗಳು ದಾಳಿ ನಡೆಸುತ್ತಿವೆ. ಅಮೆರಿಕದ ಆಕ್ರಮಣಕಾರಿ ಧೋರಣೆ ಪ್ರತಿಕಾರವಾಗಿ ಈ ದಾಳಿಗಳು ನಡೆಯುತ್ತಿವೆ. ಅಧಿಕಾರ ದಾಹಿ ಅಮೆರಿಕ ವಿರುದ್ಧದ ಹೌತಿಗಳ ಹೋರಾಟವು ಜಾಗತಿಕ ವ್ಯಾಪಾರ ವಹಿವಾಟಿನ ಮೇಲೂ ಪರಿಣಾಮ ಬೀರುತ್ತಿದೆ. ಮೇಲ್ನೋಟಕ್ಕೆ ಇದು ಮಧ್ಯಪ್ರಾಚ್ಯದ ಮತ್ತೊಂದು ಯುದ್ಧದಂತೆಯೇ ಕಾಣಿಸಿದರೂ, ಇದರ ಪರಿಣಾಮ ವಿಶ್ವದ ತೈಲ ಮಾರುಕಟ್ಟೆ, ಸರಕು ಸಾಗಣೆ ಮತ್ತು ಭಾರತದಂತಹ ತೈಲ ಆಮದು ಅವಲಂಬಿತ ರಾಷ್ಟ್ರಗಳ ಆರ್ಥಿಕತೆಯ ಮೇಲೂ ನೇರವಾಗಿ ಬೀಳುವ ಸಾಧ್ಯತೆಯಿದೆ. ಈ ಆತಂಕದ ಕೇಂದ್ರಬಿಂದುವೇ ‘ಬಾಬ್ ಎಲ್-ಮಂದೆಬ್‘ ಎಂಬ ಕಿರಿದಾದ ಜಲಸಂಧಿ.
ಕೆಂಪು ಸಮುದ್ರದ ದಕ್ಷಿಣ ತುದಿಯಲ್ಲಿ ಯೆಮೆನ್, ಜಿಬೂಟಿ ಮತ್ತು ಎರಿಟ್ರಿಯಾ ನಡುವೆ ಇರುವ ಬಾಬ್ ಎಲ್-ಮಂದೆಬ್ ಜಲಸಂಧಿಯು ವಿಶ್ವದ ಅತ್ಯಂತ ಪ್ರಮುಖ ಸಮುದ್ರ ವ್ಯಾಪಾರ ಮಾರ್ಗಗಳಲ್ಲಿ ಒಂದಾಗಿದೆ. ಯೆಮೆನ್‌ನ ಪಶ್ಚಿಮ ಕರಾವಳಿಯನ್ನು ನಿಯಂತ್ರಿಸುವ ಹೌತಿ ಬಂಡುಕೋರರು ಈ ಜಲಮಾರ್ಗದಲ್ಲಿ ಸಂಚರಿಸುವ ವಾಣಿಜ್ಯ ಹಡಗುಗಳನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸುತ್ತಿರುವುದರಿಂದ ಜಾಗತಿಕ ತೈಲ ಮತ್ತು ಸರಕು ಸಾಗಣೆ ವ್ಯವಸ್ಥೆಯ ಮೇಲೆ ನೇರ ಪರಿಣಾಮ ಬೀಳುತ್ತಿದೆ.
ಹೌತಿಗಳು ಯಾರು?
ಹೌತಿಗಳು ಯೆಮೆನ್‌ನ ಉತ್ತರ ಭಾಗದಲ್ಲಿ ವಾಸಿಸುವ ಝೈದಿ ಶಿಯಾ ಸಮುದಾಯದಿಂದ ಹೊರಹೊಮ್ಮಿದ ಸಶಸ್ತ್ರ ಸಂಘಟನೆ. 1990ರ ದಶಕದಲ್ಲಿ ಹುಸೇನ್ ಬದ್ರುದ್ದೀನ್ ಅಲ್-ಹೌತಿ ನೇತೃತ್ವದಲ್ಲಿ ಧಾರ್ಮಿಕ ಮತ್ತು ಸಾಮಾಜಿಕ ಹಕ್ಕುಗಳಿಗಾಗಿ ಆರಂಭವಾದ ಈ ಚಳವಳಿ, ನಂತರ ರಾಜಕೀಯ ಹಾಗೂ ಸಶಸ್ತ್ರ ಹೋರಾಟವಾಗಿ ರೂಪಾಂತರಗೊಂಡಿತು.
2014ರಲ್ಲಿ ಹೌತಿಗಳು ಯೆಮೆನ್ ರಾಜಧಾನಿ ಸನಾ ನಗರವನ್ನು ವಶಪಡಿಸಿಕೊಂಡ ನಂತರ ದೇಶ ಅಂತರ್ಯುದ್ಧಕ್ಕೆ ತಳ್ಳಲ್ಪಟ್ಟಿತು. ಸೌದಿ ಅರೇಬಿಯಾ ಬೆಂಬಲಿತ ಸರ್ಕಾರದ ವಿರುದ್ಧ ಹೌತಿಗಳು ಹೋರಾಟ ಮುಂದುವರಿಸಿದರು. ಈ ಸಂಘಟನೆಗೆ ಇರಾನ್ ಬೆಂಬಲ ನೀಡುತ್ತಿದೆ ಎಂದು ಅಮೆರಿಕ, ಸೌದಿ ಅರೇಬಿಯಾ ಮತ್ತು ಪಾಶ್ಚಾತ್ಯ ರಾಷ್ಟ್ರಗಳು ಆರೋಪಿಸುತ್ತವೆ. ಇರಾನ್ ಇದನ್ನು ಅಧಿಕೃತವಾಗಿ ನಿರಾಕರಿಸುತ್ತಿದ್ದರೂ, ಹೌತಿಗಳ ಕ್ಷಿಪಣಿ ಮತ್ತು ಡ್ರೋನ್ ಸಾಮರ್ಥ್ಯ ಹೆಚ್ಚುತ್ತಿರುವುದು ಈ ಅನುಮಾನಗಳಿಗೆ ಇನ್ನಷ್ಟು ಬಲ ನೀಡಿದೆ.
ಗಾಜಾ ಯುದ್ಧದ ನಂತರ ಬದಲಾದ ಹೌತಿ ವ್ಯಾಪ್ತಿ
2023ರಲ್ಲಿ ಇಸ್ರೇಲ್-ಹಮಾಸ್ ಯುದ್ಧ ಆರಂಭವಾದ ನಂತರ ಹೌತಿಗಳು ತಮ್ಮ ಹೋರಾಟದ ವ್ಯಾಪ್ತಿಯನ್ನು ಯೆಮೆನ್‌ನಿಂದ ಹೊರಗೂ ವಿಸ್ತರಿಸಿದರು. ಗಾಜಾ ಪಟ್ಟಿಯಲ್ಲಿನ ಪ್ಯಾಲೆಸ್ತೀನಿಯರ ಬೆಂಬಲದ ಹೆಸರಿನಲ್ಲಿ, ಇಸ್ರೇಲ್ ಅಥವಾ ಅದರ ಮಿತ್ರ ರಾಷ್ಟ್ರಗಳಿಗೆ ಸಂಬಂಧಿಸಿದ ಹಡಗುಗಳನ್ನು ಗುರಿಯಾಗಿಸಲು ಆರಂಭಿಸಿದರು. ಆದರೆ ವಾಸ್ತವದಲ್ಲಿ ಹಲವು ದೇಶಗಳ ವಾಣಿಜ್ಯ ಹಡಗುಗಳೂ ದಾಳಿಗೆ ಒಳಗಾದವು. ಇದರಿಂದ ವಿಶ್ವದ ಪ್ರಮುಖ ಹಡಗು ಕಂಪನಿಗಳು ಕೆಂಪು ಸಮುದ್ರ ಮಾರ್ಗವನ್ನು ಬಳಸಲು ಹಿಂದೇಟು ಹಾಕಿದವು.
ಬಾಬ್ ಎಲ್-ಮಂದೆಬ್ ಎಂದರೇನು?
ಅರಬ್ಬಿ ಭಾಷೆಯಲ್ಲಿ ‘ಬಾಬ್ ಎಲ್-ಮಂದೆಬ್’ ಎಂದರೆ ‘ಕಣ್ಣೀರಿನ ದ್ವಾರ’ (Gate of Tears) ಎಂದರ್ಥ. ಇತಿಹಾಸಕಾರರ ಪ್ರಕಾರ, ಈ ಜಲಸಂಧಿಯಲ್ಲಿ ಹಿಂದೆ ಅನೇಕ ಹಡಗುಗಳು ಮುಳುಗಿದ್ದರಿಂದ ಅಥವಾ ಇದು ಅಪಾಯಕಾರಿ ಸಮುದ್ರಮಾರ್ಗವಾಗಿರುವುದರಿಂದ ಈ ಹೆಸರು ಬಂದಿದೆ ಎನ್ನಲಾಗುತ್ತದೆ.
ಭೌಗೋಳಿಕವಾಗಿ ನೋಡಿದರೆ, ಒಂದು ಕಡೆ ಯೆಮೆನ್, ಮತ್ತೊಂದು ಕಡೆ ಜಿಬೂಟಿ ಮತ್ತು ಎರಿಟ್ರಿಯಾ ದೇಶಗಳ ನಡುವೆ ಇರುವ ಈ ಕಿರಿದಾದ ಜಲಸಂಧಿ ಕೆಂಪು ಸಮುದ್ರವನ್ನು ಏಡನ್ ಕೊಲ್ಲಿಯೊಂದಿಗೆ ಸಂಪರ್ಕಿಸುತ್ತದೆ. ಇಲ್ಲಿಂದ ಮುಂದೆ ಹಡಗುಗಳು ಸೂಯೆಜ್ ಕಾಲುವೆ ಮೂಲಕ ಮೆಡಿಟರೇನಿಯನ್ ಸಮುದ್ರವನ್ನು ಪ್ರವೇಶಿಸಿ ಯುರೋಪ್ ತಲುಪುತ್ತವೆ. ನಕ್ಷೆಯಲ್ಲಿ ಬೇರೆ ಜಲಸಂಧಿಗಳಂತೆ ಇದೂ ಕೂಡ ಒಂದು ಸಣ್ಣ ಜಲಮಾರ್ಗದಂತೆ ಕಾಣಬಹುದು. ಆದರೆ ವಿಶ್ವ ವ್ಯಾಪಾರದ ದೃಷ್ಟಿಯಿಂದ ಇದನ್ನು ಜಾಗತಿಕ ಆರ್ಥಿಕತೆಯ ಕಂಠನಾಡಿ ಎಂದೇ ಇದನ್ನ ಪರಿಗಣಿಸಲಾಗುತ್ತದೆ.
ಜಗತ್ತಿನ ತೈಲ ‘ಕಂಠನಾಡಿ’ ಯಾಕೆ?
ಪ್ರತಿದಿನ ಲಕ್ಷಾಂತರ ಬ್ಯಾರೆಲ್ ಕಚ್ಚಾ ತೈಲ, ಎಲ್‌ಎನ್‌ಜಿ (LNG), ರಾಸಾಯನಿಕಗಳು, ಆಹಾರ ಧಾನ್ಯಗಳು ಮತ್ತು ಸಾವಿರಾರು ಕಂಟೇನರ್‌ಗಳು ಈ ಮಾರ್ಗದ ಮೂಲಕ ಸಂಚರಿಸುತ್ತವೆ. ಪರ್ಷಿಯನ್ ಕೊಲ್ಲಿಯಿಂದ ಯುರೋಪ್ ಹಾಗೂ ಉತ್ತರ ಅಮೆರಿಕಕ್ಕೆ ಸಾಗುವ ಅನೇಕ ತೈಲ ಹಡಗುಗಳಿಗೆ ಇದು ಅತ್ಯಂತ ವೇಗವಾದ ಮಾರ್ಗ. ಅಂತಾರಾಷ್ಟ್ರೀಯ ಇಂಧನ ಸಂಸ್ಥೆಗಳ ಅಂದಾಜಿನ ಪ್ರಕಾರ, ಪ್ರತಿದಿನ ಸುಮಾರು 80ರಿಂದ 90 ಲಕ್ಷ ಬ್ಯಾರೆಲ್ ಕಚ್ಚಾ ತೈಲ ಮತ್ತು ಪೆಟ್ರೋಲಿಯಂ ಉತ್ಪನ್ನಗಳು ಈ ಜಲಸಂಧಿಯನ್ನು ದಾಟುತ್ತವೆ. ಜತೆಗೆ ಜಾಗತಿಕ ಕಂಟೇನರ್ ಸಾಗಣೆಯ ಗಮನಾರ್ಹ ಭಾಗವೂ ಇದೇ ಮಾರ್ಗವನ್ನು ಬಳಸುತ್ತದೆ. ಅಂದರೆ, ಈ ಜಲಸಂಧಿಯಲ್ಲಿ ಒಂದು ವಾರ ಸಂಚಾರ ಸ್ಥಗಿತಗೊಂಡರೂ ಜಾಗತಿಕ ವ್ಯಾಪಾರ ವ್ಯವಸ್ಥೆಯ ಮೇಲೆ ಅದರ ಪರಿಣಾಮ ತಕ್ಷಣವೇ ಗೋಚರಿಸುತ್ತದೆ.
ಈ ಮಾರ್ಗ ಮುಚ್ಚಿದರೆ ಏನಾಗಲಿದೆ?
ಹೌತಿ ದಾಳಿಗಳ ಭಯದಿಂದ ಹಡಗುಗಳು ಬಾಬ್ ಎಲ್-ಮಂದೆಬ್ ಮಾರ್ಗವನ್ನು ತಪ್ಪಿಸಿದರೆ ಅವು ಆಫ್ರಿಕಾದ ದಕ್ಷಿಣ ತುದಿಯ ಕೇಪ್ ಆಫ್ ಗುಡ್ ಹೋಪ್ ಮೂಲಕ ಸಾಗಬೇಕಾಗುತ್ತದೆ. ಇದರಿಂದ, ಸುಮಾರು 5,000ರಿಂದ 6,000 ಕಿಲೋಮೀಟರ್ ಹೆಚ್ಚುವರಿ ಪ್ರಯಾಣ ಮಾಡಬೇಕಾಗುತ್ತದೆ. 10ರಿಂದ 15 ದಿನಗಳವರೆಗೆ ಹೆಚ್ಚುವರಿ ಸಮಯ ಬೇಕಾಗಬಹುದು. ಇಂಧನ ಬಳಕೆ ಹೆಚ್ಚುತ್ತದೆ. ಹಡಗುಗಳ ವಿಮಾ ಪ್ರೀಮಿಯಂ ಏರಿಕೆಯಾಗುತ್ತದೆ. ಸರಕು ಸಾಗಣೆ ವೆಚ್ಚ ಗಣನೀಯವಾಗಿ ಹೆಚ್ಚುತ್ತದೆ. ಈ ಹೆಚ್ಚುವರಿ ವೆಚ್ಚ ಅಂತಿಮವಾಗಿ ಗ್ರಾಹಕರ ಮೇಲೆಯೇ ಬೀಳುತ್ತದೆ.
ಇದರಿಂದ ಭಾರತದ ಮೇಲಾಗುವ ಪರಿಣಾಮವೇನು?
ಭಾರತ ತನ್ನ ಕಚ್ಚಾ ತೈಲದ ಸುಮಾರು 85 ಪ್ರತಿಶತಕ್ಕಿಂತ ಹೆಚ್ಚು ಅಗತ್ಯವನ್ನು ಆಮದು ಮಾಡಿಕೊಳ್ಳುತ್ತದೆ. ಮಧ್ಯಪ್ರಾಚ್ಯ ಭಾರತದ ಪ್ರಮುಖ ತೈಲ ಪೂರೈಕೆ ಪ್ರದೇಶವಾಗಿದೆ. ತೈಲ ಬೆಲೆಗಳಲ್ಲಿ ಕೆಲವೇ ಡಾಲರ್ ಏರಿಕೆಯಾದರೂ ಭಾರತದ ವಾರ್ಷಿಕ ಆಮದು ವೆಚ್ಚ ಸಾವಿರಾರು ಕೋಟಿ ರೂಪಾಯಿಗಳಷ್ಟು ಹೆಚ್ಚಾಗಬಹುದು. ಅದರ ಪರಿಣಾಮವಾಗಿ:
- ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳ ಮೇಲೆ ಒತ್ತಡ ಉಂಟಾಗಬಹುದು.
- ವಿಮಾನ ಇಂಧನ ದುಬಾರಿಯಾಗಬಹುದು.
- ಸಾರಿಗೆ ವೆಚ್ಚ ಹೆಚ್ಚಬಹುದು.
- ಆಹಾರ ಮತ್ತು ಅಗತ್ಯ ವಸ್ತುಗಳ ಬೆಲೆ ಏರಬಹುದು.
- ಹಣದುಬ್ಬರ ನಿಯಂತ್ರಣ ಸರ್ಕಾರಕ್ಕೆ ಸವಾಲಾಗಬಹುದು.
ಅಷ್ಟೇ ಅಲ್ಲ, ಭಾರತದ ಯುರೋಪ್ ವ್ಯಾಪಾರದಲ್ಲೂ ಪರಿಣಾಮ ಉಂಟಾಗಬಹುದು. ಕೆಂಪು ಸಮುದ್ರದ ಮೂಲಕ ಸಾಗುವ ಭಾರತೀಯ ರಫ್ತು ಸರಕುಗಳು ವಿಳಂಬವಾಗುವ ಸಾಧ್ಯತೆಯನ್ನೂ ತಳ್ಳಿಹಾಕುವಂತಿಲ್ಲ.
ವಿಶ್ವದ ವಾಣಿಜ್ಯ ಹಡಗುಗಳಲ್ಲಿ ಕೆಲಸ ಮಾಡುವ ನಾವಿಕರಲ್ಲಿ ಭಾರತೀಯರ ಪ್ರಮಾಣ ಗಮನಾರ್ಹವಾಗಿರುವುದು ಗೊತ್ತೇ ಇದೆ. ಕೆಂಪು ಸಮುದ್ರದಲ್ಲಿ ಹಡಗುಗಳ ಮೇಲೆ ನಡೆಯುತ್ತಿರುವ ಕ್ಷಿಪಣಿ ಮತ್ತು ಡ್ರೋನ್ ದಾಳಿಗಳು ಭಾರತೀಯ ನಾವಿಕರ ಸುರಕ್ಷತೆಯ ಮೇಲೂ ನೇರ ಪರಿಣಾಮ ಬೀರುತ್ತವೆ. ಕಳೆದ ಕೆಲವು ತಿಂಗಳುಗಳಲ್ಲಿ ಹಲವು ಭಾರತೀಯ ಸಿಬ್ಬಂದಿ ಇದ್ದ ಹಡಗುಗಳು ಅಪಾಯದ ಪರಿಸ್ಥಿತಿಯನ್ನು ಎದುರಿಸಿದ್ದವು.
ಈ ಹೌತಿ ದಾಳಿಗಳ ಉಪಟಳ ಹೆಚ್ಚಾದಂತೆ ಅಮೆರಿಕ, ಬ್ರಿಟನ್ ಹಾಗೂ ಕೆಲವು ಮಿತ್ರ ರಾಷ್ಟ್ರಗಳು ಕೆಂಪು ಸಮುದ್ರದಲ್ಲಿ ವಿಶೇಷ ನೌಕಾ ಕಾರ್ಯಾಚರಣೆ ಆರಂಭಿಸಿವೆ. ವಾಣಿಜ್ಯ ಹಡಗುಗಳಿಗೆ ಭದ್ರತೆ ಒದಗಿಸುವುದು, ಹೌತಿ ಕ್ಷಿಪಣಿ ಉಡಾವಣಾ ಕೇಂದ್ರಗಳನ್ನು ಗುರಿಯಾಗಿಸುವುದು ಮತ್ತು ಸಮುದ್ರ ಮಾರ್ಗವನ್ನು ಸುರಕ್ಷಿತವಾಗಿಡುವುದು ಈ ಕಾರ್ಯಾಚರಣೆಯ ಉದ್ದೇಶ ಎಂದು ಅಮೆರಿಕ ಹೇಳಿಕೊಳ್ಳುತ್ತಿದೆ. ಆದರೆ ಇದರಿಂದ ಮತ್ತೊಂದು ಅಪಾಯವೂ ಇದೆ. ಹೌತಿಗಳ ವಿರುದ್ಧದ ಕ್ರಮಗಳು ಇರಾನ್‌ನೊಂದಿಗೆ ಉದ್ವಿಗ್ನತೆಯನ್ನು ಮತ್ತಷ್ಟು ಹೆಚ್ಚಿಸಿದರೆ, ಅದು ಮಧ್ಯಪ್ರಾಚ್ಯದ ವ್ಯಾಪಕ ಸಂಘರ್ಷವಾಗಿ ಬೆಳೆಯುವ ಸಾಧ್ಯತೆಯನ್ನು ಕಡೆಗಣಿಸಲಾಗದು ಎನ್ನುತ್ತಿದ್ದಾರೆ ವಿಶ್ಲೇಷಕರು.
ವಿಶ್ವದ ಅತಿದೊಡ್ಡ ತೈಲ ರಫ್ತುದಾರ ರಾಷ್ಟ್ರಗಳಲ್ಲಿ ಒಂದಾದ ಸೌದಿ ಅರೇಬಿಯಾ ತನ್ನ ಆರ್ಥಿಕತೆಯ ಬಹುಪಾಲು ತೈಲ ರಫ್ತಿನ ಮೇಲೆ ಅವಲಂಬಿತವಾಗಿದೆ. ಹಡಗುಗಳ ಮೇಲಿನ ದಾಳಿಗಳು ಹೆಚ್ಚಾದರೆ ತೈಲ ಸಾಗಣೆ ವೆಚ್ಚ ಮಾತ್ರವಲ್ಲ, ಜಾಗತಿಕ ಮಾರುಕಟ್ಟೆಯಲ್ಲಿ ಸೌದಿ ಪೂರೈಕೆಯ ಮೇಲೂ ಸಾಕಷ್ಟು ಅನುಮಾನ ಮೂಡಬಹುದು. ಇದರ ಪರಿಣಾಮ ಕಚ್ಚಾ ತೈಲದ ಅಂತಾರಾಷ್ಟ್ರೀಯ ಬೆಲೆಗಳಲ್ಲಿ ತಕ್ಷಣದ ಏರಿಳಿತ ಕಾಣಿಸಿಕೊಳ್ಳುತ್ತದೆ. ಇದರ ಪರಿಣಾಮವನ್ನು ಭಾರತವೂ ಎದುರಿಸಬೇಕಾಗುತ್ತದೆ.
ಇದನ್ನೂ ಓದಿ: ಮಾಂತ್ರಿಕನ ಪಂಜರದಿಂದ ಬಿಡಿಸಿಕೊಂಡು ಹದ್ದಿನ ಪರಿವಾರದ ನೆರವಿಗೆ ಬಿದ್ದ ಕನ್ನಡಿಗರ ಪಾಡು
ಹೌತಿ ದಾಳಿಗಳು ಮುಂದುವರಿದರೆ, ಕೆಂಪು ಸಮುದ್ರದಲ್ಲಿ ಸೇನಾ ಹಾಜರಾತಿ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ. ಒಂದೆಡೆ ಹೌತಿಗಳ ದಾಳಿಗಳು, ಮತ್ತೊಂದೆಡೆ ಅಮೆರಿಕ ಮತ್ತು ಅದರ ಮಿತ್ರ ರಾಷ್ಟ್ರಗಳ ಪ್ರತಿದಾಳಿಗಳು.. ಈ ಎರಡರ ನಡುವೆ ವಿಶ್ವದ ಅತ್ಯಂತ ಪ್ರಮುಖ ಸಾಗರ ಮಾರ್ಗವೊಂದು ಸಿಲುಕಿ, ಇದರಿಂದ ಇತರೆ ದೇಶಗಳೂ ತೊಂದರೆ ಅನುಭವಿಸುವಂತಾಗಿದೆ.
ಭಾರತದ ದೃಷ್ಟಿಯಿಂದ ನೋಡಿದರೆ, ಇದು ವಿದೇಶಾಂಗ ಅಥವಾ ಭದ್ರತಾ ವಿಚಾರದ ಜತೆಗೆ ಆರ್ಥಿಕ ಸ್ಥಿರತೆ, ಇಂಧನ ಭದ್ರತೆ ಮತ್ತು ಹಣದುಬ್ಬರದ ಪ್ರಶ್ನೆಯೂ ಹೌದು. ಯೆಮೆನ್‌ನಲ್ಲಿ ಸಿಡಿಯುವ ಒಂದು ಕ್ಷಿಪಣಿ, ದೆಹಲಿಯಲ್ಲಿ ತೈಲ ಆಮದು ಬಿಲ್ ಹೆಚ್ಚಿಸಬಹುದು, ಬೆಂಗಳೂರಿನಲ್ಲಿ ಡೀಸೆಲ್ ಬೆಲೆ ಏರಿಸಬಹುದು, ನಮ್ಮ ನಿಮ್ಮ ಮನೆಯ ಮಾಸಿಕ ಬಜೆಟ್‌ ಮೇಲೂ ಪರಿಣಾಮ ಬೀರಬಹುದು. ಒಟ್ಟಿನಲ್ಲಿ, ಹೌತಿ ದಾಳಿಗಳು ಯೆಮೆನ್‌ನ ಗಡಿಗೆ ಸೀಮಿತವಾದ ಭದ್ರತಾ ಸಮಸ್ಯೆಗಳಲ್ಲ. ಜಾಗತಿಕ ವ್ಯಾಪಾರದ ಜೀವನಾಡಿಯಾಗಿರುವ ಬಾಬ್ ಎಲ್-ಮಂದೆಬ್ ಜಲಸಂಧಿಯಲ್ಲಿ ಉಂಟಾಗುವ ಪ್ರತಿಯೊಂದು ಉದ್ವಿಗ್ನತೆಯೂ ವಿಶ್ವ ಆರ್ಥಿಕತೆಯ ಮೇಲೆ ಪರಿಣಾಮ ಬೀರುತ್ತದೆ. ತೈಲ ಆಮದು ಮೇಲೆ ಹೆಚ್ಚಿನ ಅವಲಂಬನೆ ಹೊಂದಿರುವ ಭಾರತದಂತಹ ದೇಶಗಳಿಗೆ ಇದು ಆರ್ಥಿಕ ಭದ್ರತೆ ಮತ್ತು ಜನಜೀವನಕ್ಕೂ ಸಂಬಂಧಿಸಿದ ಪ್ರಶ್ನೆಯಾಗಿದೆ. ಇದೇ ಕಾರಣಕ್ಕೆ ಹೌತಿ ದಾಳಿಗಳು, ಬಾಬ್ ಎಲ್-ಮಂದೆಬ್ ಜಲಸಂಧಿ ಮತ್ತು ಕೆಂಪು ಸಮುದ್ರದ ಬೆಳವಣಿಗೆಗಳ ಮೇಲೆ ಭಾರತ ಸೇರಿದಂತೆ ಇಡೀ ಜಗತ್ತು ತೀವ್ರ ನಿಗಾ ಇರಿಸಿದೆ.
