ಅಮೆರಿಕದ ಮಧ್ಯಂತರ ಚುನಾವಣೆ ಸಮೀಪಿಸುತ್ತಿರುವ ಬೆನ್ನಲ್ಲೇ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬೆಂಬಲಿಸುತ್ತಿರುವ ‘SAVE America Act’ (Safeguard American Voter Eligibility Act) ಚರ್ಚೆಯ ಕೇಂದ್ರಬಿಂದುವಾಗಿದೆ. ಚುನಾವಣಾ ಅಕ್ರಮ ತಡೆಯುವ ಹೆಸರಿನಲ್ಲಿ ತರಲಾಗುತ್ತಿರುವ ಈ ಮಸೂದೆಯನ್ನು ರಿಪಬ್ಲಿಕನ್ ಪಕ್ಷ ಬೆಂಬಲಿಸುತ್ತಿದ್ದರೆ, ಡೆಮಾಕ್ರಟಿಕ್ ಪಕ್ಷ ಮತ್ತು ನಾಗರಿಕ ಹಕ್ಕುಗಳ ಸಂಘಟನೆಗಳು ಇದು ಲಕ್ಷಾಂತರ ನಾಗರಿಕರ ಮತದಾನದ ಹಕ್ಕಿಗೆ ಅಡ್ಡಿಯಾಗಬಹುದು ಎಂದು ಎಚ್ಚರಿಸುತ್ತಿವೆ.
ಅಮೆರಿಕದಲ್ಲಿ 2026ರ ನವೆಂಬರ್ 3ರಂದು ಮಧ್ಯಂತರ ಚುನಾವಣೆ (Midterm Elections) ನಡೆಯಲಿದ್ದು, ಇದೇ ದಿನ ದೇಶಾದ್ಯಂತ ನೇರ ಮತದಾನ ನಡೆಯಲಿದೆ. ಕೆಲವು ರಾಜ್ಯಗಳಲ್ಲಿ ಮುಂಗಡ ಮತದಾನಕ್ಕೂ ಅವಕಾಶ ಕಲ್ಪಿಸಲಾಗಿದೆ. ಈ ಚುನಾವಣೆಯಲ್ಲಿ ಅಧ್ಯಕ್ಷರ ಹುದ್ದೆಗೆ ಚುನಾವಣೆ ನಡೆಯುವುದಿಲ್ಲ. ಬದಲಾಗಿ, ಪ್ರತಿನಿಧಿ ಸಭೆಯ (House of Representatives) ಎಲ್ಲ 435 ಸ್ಥಾನಗಳು, ಸೆನೆಟ್‌ನ 100 ಸ್ಥಾನಗಳ ಪೈಕಿ 35 ಸ್ಥಾನಗಳು ಹಾಗೂ 39 ರಾಜ್ಯಗಳ ಗವರ್ನರ್ ಹುದ್ದೆಗಳಿಗೆ ಮತದಾನ ನಡೆಯಲಿದೆ. ಜೊತೆಗೆ ಹಲವು ರಾಜ್ಯಗಳಲ್ಲಿ ಸ್ಥಳೀಯ ಸಂಸ್ಥೆಗಳ ಚುನಾವಣೆ ಮತ್ತು ವಿವಿಧ ಜನಾಭಿಪ್ರಾಯ ಸಂಗ್ರಹ (Ballot Initiatives) ಕೂಡ ನಡೆಯಲಿವೆ.
ಅಮೆರಿಕದಲ್ಲಿ ಅಧ್ಯಕ್ಷೀಯ ಚುನಾವಣೆಗಳು 4 ವರ್ಷಗಳಿಗೊಮ್ಮೆ ನಡೆಯುತ್ತವೆ. ಮಧ್ಯಂತರ ಚುನಾವಣೆಗಳು (Midterm Elections) ಪ್ರತಿ 2 ವರ್ಷಗಳಿಗೊಮ್ಮೆ ನಡೆಯುತ್ತವೆ. ಅಧ್ಯಕ್ಷರ 4 ವರ್ಷದ ಅಧಿಕಾರಾವಧಿಯ ಮಧ್ಯದಲ್ಲಿ ನಡೆಯುವುದರಿಂದ ಇದನ್ನು ‘ಮಿಡ್‌ಟರ್ಮ್‌ ಚುನಾವಣೆ’ ಎನ್ನಲಾಗುತ್ತದೆ. ಈ ಚುನಾವಣೆಯಲ್ಲಿ ಅಧ್ಯಕ್ಷರ ಆಯ್ಕೆ ನಡೆಯುವುದಿಲ್ಲ. ಬದಲಾಗಿ, ಪ್ರತಿನಿಧಿ ಸಭೆಯ (House of Representatives) ಎಲ್ಲ ಸದಸ್ಯರು, ಸೆನೆಟ್‌ನ ಮೂರನೇ ಒಂದು ಭಾಗದ ಸದಸ್ಯರು ಹಾಗೂ ಹಲವು ರಾಜ್ಯಗಳ ಗವರ್ನರ್‌ಗಳು ಮತ್ತು ಸ್ಥಳೀಯ ಪ್ರತಿನಿಧಿಗಳ ಆಯ್ಕೆ ನಡೆಯುತ್ತದೆ. ಹೀಗಾಗಿ, ಅಧಿಕಾರದಲ್ಲಿರುವ ಅಧ್ಯಕ್ಷ ಮತ್ತು ಅವರ ಪಕ್ಷದ ಜನಪ್ರಿಯತೆ, ಆಡಳಿತದ ಮೇಲಿನ ಜನರ ಅಭಿಪ್ರಾಯ ಹಾಗೂ ಮುಂದಿನ ಅಧ್ಯಕ್ಷೀಯ ಚುನಾವಣೆಯ ರಾಜಕೀಯ ದಿಕ್ಕನ್ನು ಅಳೆಯುವ ಪ್ರಮುಖ ರಾಜಕೀಯ ಪರೀಕ್ಷೆಯಾಗಿ ಮಿಡ್‌ಟರ್ಮ್‌ ಚುನಾವಣೆಯನ್ನ ಪರಿಗಣಿಸಲಾಗುತ್ತದೆ.
ಈಗ ಇದೇ ಚುನಾವಣೆಯ ತಯಾರಿಯ ಭಾಗವಾಗಿ ಟ್ರಂಪ್ ಹೊಸ ಅಸ್ತ್ರವೊಂದರ ಪ್ರಯೋಗಕ್ಕೆ ಮುಂದಾಗಿದ್ದಾರೆ. ಅದೇ ‘SAVE America Act’ (Safeguard American Voter Eligibility Act). ಮತ್ತೊಂದೆಡೆ, ಡೆಮಾಕ್ರಟಿಕ್ ಪಕ್ಷವನ್ನು “ಅಪಾಯಕಾರಿ ಕಮ್ಯೂನಿಸ್ಟ್‌ಗಳು” ಎಂದಿರುವ ಟ್ರಂಪ್ ತಮ್ಮ ಬೆಂಬಲಿಗರನ್ನು ಒಗ್ಗೂಡಿಸಲು ಪ್ರಯತ್ನಿಸುತ್ತಿದ್ದಾರೆ. ಇದರಿಂದ ಅಮೆರಿಕದ ರಾಜಕೀಯ ಮತ್ತಷ್ಟು ಧ್ರುವೀಕರಣದತ್ತ ಸಾಗುತ್ತಿರುವ ಲಕ್ಷಣಗಳು ಗೋಚರಿಸುತ್ತಿವೆ.
ಏನಿದು ‘ಸೇವ್ ಅಮೆರಿಕ’ ಮಸೂದೆ?
ಈ ಮಸೂದೆಯ ಮುಖ್ಯ ಉದ್ದೇಶ ಅಮೆರಿಕದ ನಾಗರಿಕರಲ್ಲದವರು ಮತದಾರರ ಪಟ್ಟಿಗೆ ಸೇರುವುದನ್ನು ತಡೆಯುವುದು ಎಂದು ರಿಪಬ್ಲಿಕನ್ ಪಕ್ಷ ಹೇಳಿಕೊಳ್ಳುತ್ತದೆ. ಮಸೂದೆಯ ಪ್ರಕಾರ ಮತದಾರರಾಗಿ ನೋಂದಣಿ ಮಾಡಿಸಿಕೊಳ್ಳುವವರು ಅಮೆರಿಕದ ನಾಗರಿಕರು ಎಂಬುದಕ್ಕೆ ಜನನ ಪ್ರಮಾಣಪತ್ರ, ಪಾಸ್‌ಪೋರ್ಟ್ ಅಥವಾ ಇತರೆ ಅಧಿಕೃತ ದಾಖಲೆಗಳನ್ನು ಕಡ್ಡಾಯವಾಗಿ ಸಲ್ಲಿಸಬೇಕಾಗುತ್ತದೆ. ಚುನಾವಣಾ ಅಧಿಕಾರಿಗಳು ದಾಖಲೆಗಳನ್ನು ಪರಿಶೀಲಿಸಿದ ನಂತರವೇ ಮತದಾರರ ಪಟ್ಟಿಗೆ ಹೆಸರು ಸೇರಿಸಬೇಕೆಂದು ಮಸೂದೆ ಸೂಚಿಸುತ್ತದೆ. ಜೊತೆಗೆ, ಮತದಾರರ ಪಟ್ಟಿಯನ್ನು ನಿಯಮಿತವಾಗಿ ಪರಿಶೀಲಿಸುವುದು, ನಾಗರಿಕರಲ್ಲದವರ ಹೆಸರನ್ನು ತೆಗೆದುಹಾಕುವುದು ಮತ್ತು ಮತದಾನ ವ್ಯವಸ್ಥೆಯಲ್ಲಿ ಕಟ್ಟುನಿಟ್ಟಿನ ದಾಖಲೆ ಪರಿಶೀಲನೆ ಜಾರಿಗೊಳಿಸುವ ಪ್ರಸ್ತಾವಗಳೂ ಇದರಲ್ಲಿವೆ. ಪ್ರಮುಖ ಅಂಶಗಳನ್ನು ಪಟ್ಟಿ ಮಾಡುವುದಾದರೆ,
- ಅಮೆರಿಕದ ನಾಗರಿಕರಿಗೆ ಮಾತ್ರ ಮತದಾನದ ಹಕ್ಕು: ಮತದಾರರ ನೋಂದಣಿಗೆ ನಾಗರಿಕತ್ವದ ದಾಖಲೆ ಕಡ್ಡಾಯ.
- ದಾಖಲೆ ಪರಿಶೀಲನೆ ಕಡ್ಡಾಯ: ಪಾಸ್‌ಪೋರ್ಟ್, ಜನನ ಪ್ರಮಾಣಪತ್ರ ಅಥವಾ ನಾಗರಿಕತ್ವ ಸಾಬೀತುಪಡಿಸುವ ದಾಖಲೆ ಸಲ್ಲಿಸಬೇಕು.
- ಮತದಾರರ ಪಟ್ಟಿಯ ಮರುಪರಿಶೀಲನೆ: ನಾಗರಿಕರಲ್ಲದವರ ಹೆಸರುಗಳನ್ನು ಪಟ್ಟಿಯಿಂದ ತೆಗೆದುಹಾಕಲಾಗುವುದು.
- ಚುನಾವಣಾಧಿಕಾರಿಗಳಿಗೆ ಹೆಚ್ಚಿನ ಅಧಿಕಾರ: ದಾಖಲೆಗಳನ್ನು ಪರಿಶೀಲಿಸಿ ಅನುಮಾನಾಸ್ಪದ ಅರ್ಜಿಗಳನ್ನು ತಿರಸ್ಕರಿಸುವ ಅವಕಾಶ ಚುನಾವಣಾಧಿಕಾರಿಗೆ ಇರುತ್ತದೆ.
- ಫೆಡರಲ್ ಚುನಾವಣೆಯಲ್ಲಿ ಕಟ್ಟುನಿಟ್ಟಿನ ನಿಯಮಗಳು: ಎಲ್ಲ ರಾಜ್ಯಗಳಲ್ಲಿ ಒಂದೇ ಮಾದರಿಯ ನಾಗರಿಕತ್ವ ಪರಿಶೀಲನೆಗೆ ಒತ್ತು.
- ನಿಯಮ ಉಲ್ಲಂಘಿಸಿದರೆ ಶಿಕ್ಷೆ: ಕಾನೂನುಬಾಹಿರವಾಗಿ ಮತದಾರರ ನೋಂದಣಿ ಅಥವಾ ಸಹಾಯ ಮಾಡಿದವರಿಗೆ ದಂಡ ಹಾಗೂ ಶಿಕ್ಷೆಯ ಅವಕಾಶ.
- ರಾಜ್ಯಗಳಿಗೆ ಫೆಡರಲ್ ಮಾರ್ಗಸೂಚಿ: ಮತದಾರರ ನೋಂದಣಿಯಲ್ಲಿ ನಾಗರಿಕತ್ವ ಪರಿಶೀಲನೆ ಕಡ್ಡಾಯಗೊಳಿಸಲು ಒತ್ತಾಯ.
ವಿರೋಧ ಯಾಕೆ?
ಡೆಮಾಕ್ರಟಿಕ್ ಪಕ್ಷ ಹಾಗೂ ನಾಗರಿಕ ಹಕ್ಕುಗಳ ಸಂಘಟನೆಗಳು ಈ ಮಸೂದೆಯನ್ನು ತೀವ್ರವಾಗಿ ವಿರೋಧಿಸುತ್ತಿವೆ. ಅಮೆರಿಕದಲ್ಲಿ ಈಗಾಗಲೇ ನಾಗರಿಕರಲ್ಲದವರು ಫೆಡರಲ್ ಚುನಾವಣೆಯಲ್ಲಿ ಮತ ಚಲಾಯಿಸುವುದು ಕಾನೂನುಬಾಹಿರವಾಗಿದ್ದು, ಅದನ್ನು ತಡೆಯಲು ಈಗಿನ ಕಾನೂನುಗಳೇ ಸಾಕಷ್ಟಿವೆ ಎಂಬುದು ಅವರ ವಾದ. ಹೊಸ ದಾಖಲೆ ಕಡ್ಡಾಯದಿಂದ ಲಕ್ಷಾಂತರ ಮತದಾರರಿಗೆ ತೊಂದರೆಯಾಗಬಹುದು ಎಂದು ಅವರು ಹೇಳುತ್ತಿದ್ದಾರೆ. ವಿಶೇಷವಾಗಿ ವಿವಾಹದ ಬಳಿಕ ಹೆಸರು ಬದಲಾಯಿಸಿರುವ ಮಹಿಳೆಯರು, ಕಡಿಮೆ ಆದಾಯದ ನಾಗರಿಕರು, ಗ್ರಾಮೀಣ ಪ್ರದೇಶದ ಜನರು ಹಾಗೂ ಅಗತ್ಯ ದಾಖಲೆಗಳನ್ನು ಸುಲಭವಾಗಿ ಪಡೆಯಲು ಸಾಧ್ಯವಾಗದವರಿಗೆ ಇದು ಮತದಾನದ ಹಕ್ಕಿನ ಮೇಲಿನ ಹೊಸ ಅಡೆತಡೆಯಾಗಬಹುದು ಎಂಬ ಆತಂಕ ವ್ಯಕ್ತವಾಗಿದೆ.
ವಿರೋಧಕ್ಕಿರುವ ಪ್ರಮುಖ ಕಾರಣಗಳು
- ವಿವಾಹದ ಬಳಿಕ ಹೆಸರು ಬದಲಾಯಿಸಿರುವ ಮಹಿಳೆಯರಿಗೆ ದಾಖಲೆ ತೊಂದರೆ ಉಂಟಾಗುವ ಸಾಧ್ಯತೆ.
- ಪಾಸ್‌ಪೋರ್ಟ್ ಅಥವಾ ಜನನ ಪ್ರಮಾಣಪತ್ರ ಇಲ್ಲದ ಲಕ್ಷಾಂತರ ನಾಗರಿಕರಿಗೆ ಮತದಾನ ಕಷ್ಟವಾಗಬಹುದು ಎಂಬ ಆತಂಕ.
- ಮತದಾನದ ಹಕ್ಕನ್ನು ಪರೋಕ್ಷವಾಗಿ ಸೀಮಿತಗೊಳಿಸುವ ಪ್ರಯತ್ನ ಎಂದು ಡೆಮಾಕ್ರಟಿಕ್ ಪಕ್ಷ ಹಾಗೂ ನಾಗರಿಕ ಹಕ್ಕುಗಳ ಸಂಘಟನೆಗಳ ಆರೋಪ.
- ಈಗಾಗಲೇ ನಾಗರಿಕರಲ್ಲದವರು ಫೆಡರಲ್ ಚುನಾವಣೆಯಲ್ಲಿ ಮತ ಚಲಾಯಿಸುವುದು ಕಾನೂನುಬಾಹಿರವಾಗಿರುವುದರಿಂದ ಹೊಸ ಕಾನೂನಿನ ಅಗತ್ಯವಿಲ್ಲ ಎಂಬ ವಾದ.
ಇದೀಗ ಅಮೆರಿಕದ ರಾಜಕೀಯದಲ್ಲಿ ಇದೇ ಬಹು ದೊಡ್ಡ ಪ್ರಶ್ನೆಯಾಗಿದೆ. ಬೆಂಬಲಿಗರ ಪ್ರಕಾರ, ಮತದಾನ ಪ್ರಕ್ರಿಯೆಯಲ್ಲಿ ನಾಗರಿಕತ್ವದ ದೃಢೀಕರಣ ಕಡ್ಡಾಯವಾದರೆ ಚುನಾವಣೆಯ ಮೇಲಿನ ಸಾರ್ವಜನಿಕ ವಿಶ್ವಾಸ ಹೆಚ್ಚುತ್ತದೆ. ಆದರೆ ವಿರೋಧಿಗಳ ಪ್ರಕಾರ, ಅಪರೂಪದ ಸಮಸ್ಯೆಯನ್ನು ದೊಡ್ಡದಾಗಿ ಬಿಂಬಿಸಿ ಮತದಾನದ ಹಕ್ಕಿನ ಮೇಲೆಯೇ ನಿರ್ಬಂಧ ಹೇರುವ ಪ್ರಯತ್ನ ಇದಾಗಿದೆ.
ಇದನ್ನೂ ಓದಿ: 15 ವರ್ಷಗಳಿಂದ ಪ್ರತ್ಯೇಕ ವಾಸ: ಸಿಎಂ ಒಮರ್ ಅಬ್ದುಲ್ಲಾಗೆ ವಿಚ್ಛೇದನ ಮಂಜೂರು ಮಾಡಿದ ಸುಪ್ರೀಂ
ಅಮೆರಿಕದ ಯಾವುದೇ ಚುನಾವಣಾ ಸುಧಾರಣೆ ಜಾಗತಿಕ ಮಟ್ಟದಲ್ಲಿಯೂ ಚರ್ಚೆಗೆ ಗ್ರಾಸವಾಗುತ್ತದೆ. ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವಗಳಲ್ಲಿ ಒಂದಾದ ಅಮೆರಿಕದಲ್ಲಿ ಚುನಾವಣಾ ನಿಯಮಗಳು ಇನ್ನಷ್ಟು ಕಠಿಣವಾಗುವುದಾದರೆ, ಇತರ ದೇಶಗಳಲ್ಲಿಯೂ ಇದೇ ಮಾದರಿಯ ಬೇಡಿಕೆಗಳು ಕೇಳಿಬರುವ ಸಾಧ್ಯತೆ ಇದೆ. ಭಾರತದಲ್ಲಿ ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ (SIR) ಪ್ರಕ್ರಿಯೆ ಚುನಾವಣಾ ಪಾರದರ್ಶಕತೆ, ಮತದಾರರ ಅರ್ಹತೆ ಮತ್ತು ಮತದಾನದ ಹಕ್ಕಿನ ಕುರಿತು ದೇಶವ್ಯಾಪಿ ಚರ್ಚೆಗೆ ಕಾರಣವಾದಂತೆಯೇ, ಅಮೆರಿಕದಲ್ಲಿಯೂ ‘SAVE America Act’ ಇದೇ ರೀತಿಯ ರಾಜಕೀಯ ಮತ್ತು ಕಾನೂನು ಚರ್ಚೆಯನ್ನು ಹುಟ್ಟುಹಾಕಿದೆ. ಚುನಾವಣಾ ಅಕ್ರಮಗಳನ್ನು ತಡೆಗಟ್ಟುವ ಹೆಸರಿನಲ್ಲಿ ಮತದಾರರ ನೋಂದಣಿಗೆ ಕಠಿಣ ದಾಖಲೆಗಳನ್ನು ಕಡ್ಡಾಯಗೊಳಿಸಬೇಕೇ, ಅಥವಾ ಅಂತಹ ನಿಯಮಗಳು ಅರ್ಹ ನಾಗರಿಕರ ಮತದಾನದ ಹಕ್ಕಿನ ಮೇಲೆಯೇ ಪರೋಕ್ಷ ನಿರ್ಬಂಧವಾಗಬಹುದೇ ಎಂಬ ಪ್ರಶ್ನೆ ಎರಡೂ ದೇಶಗಳಲ್ಲಿ ಚರ್ಚೆ ಹುಟ್ಟುಹಾಕಿವೆ.
ಅಮೆರಿಕದಲ್ಲಿ ಚುನಾವಣಾ ಭದ್ರತೆ ಮತ್ತು ಮತದಾನದ ಹಕ್ಕಿನ ನಡುವಿನ ಚರ್ಚೆ ಹೊಸದೇನಲ್ಲ. ಆದರೆ ‘SAVE America Act’ ಆ ಚರ್ಚೆಯನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದೆ. ಒಂದು ಕಡೆ ಚುನಾವಣಾ ಅಕ್ರಮಗಳನ್ನು ತಡೆಯುವ ಅಗತ್ಯವನ್ನು ಪ್ರತಿಪಾದಿಸಲಾಗುತ್ತಿದ್ದರೆ, ಮತ್ತೊಂದೆಡೆ ಪ್ರಜಾಪ್ರಭುತ್ವದ ಮೂಲವಾದ ಮತದಾನದ ಹಕ್ಕಿಗೆ ಯಾವುದೇ ಅಡ್ಡಿ ಉಂಟಾಗಬಾರದು ಎಂಬ ವಾದವೂ ಸಮಾನವಾಗಿ ಕೇಳಿಬರುತ್ತಿದೆ. ಅಂತಿಮವಾಗಿ ಈ ಮಸೂದೆ ಕಾನೂನಾಗುತ್ತದೆಯೇ, ಅದರ ಪರಿಣಾಮ ಏನಾಗಲಿದೆ ಎಂಬುದಕ್ಕಿಂತ ಹೆಚ್ಚಾಗಿ, ಅದು ಅಮೆರಿಕದ ರಾಜಕೀಯ ಧ್ರುವೀಕರಣವನ್ನು ಎಷ್ಟು ಪ್ರಭಾವಿಸುತ್ತದೆ ಎಂಬುದು ಕುತೂಹಲದ ವಿಷಯವಾಗಿದೆ.
