2026ರ ಟಿ-20 ವಿಶ್ವಕಪ್‌ಗೆ ಕ್ಷಣಗಣನೆ ಆರಂಭವಾಗಿರುವ ಬೆನ್ನಲ್ಲೇ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಮಹತ್ವದ ಮತ್ತು ಕಠಿಣ ನಿರ್ಧಾರವೊಂದನ್ನು ಕೈಗೊಂಡಿದೆ. ಭದ್ರತಾ ಕಾರಣಗಳನ್ನು ಮುಂದಿಟ್ಟು ಭಾರತಕ್ಕೆ ಪ್ರಯಾಣಿಸಲು ನಿರಾಕರಿಸಿದ ಬಾಂಗ್ಲಾದೇಶ ತಂಡವನ್ನು ವಿಶ್ವಕಪ್ ಟೂರ್ನಿಯಿಂದ ಐಸಿಸಿ ಅಧಿಕೃತವಾಗಿ ಹೊರಹಾಕಿದೆ. ಬಾಂಗ್ಲಾ ಬದಲಿಗೆ ಸ್ಕಾಟ್ಲೆಂಡ್ ತಂಡವನ್ನು ಟೂರ್ನಿಗೆ ಸೇರ್ಪಡೆಗೊಳಿಸಿ ಐಸಿಸಿ ಆದೇಶ ಹೊರಡಿಸಿದೆ.
ಶುಕ್ರವಾರ (ಜ.23) ದುಬೈನಲ್ಲಿ ಐಸಿಸಿ ಅಧ್ಯಕ್ಷ ಜಯ್ ಶಾ ಅವರ ನೇತೃತ್ವದಲ್ಲಿ ನಡೆದ ಉನ್ನತ ಮಟ್ಟದ ಸಭೆಯಲ್ಲಿ ಈ ನಿರ್ಣಾಯಕ ತೀರ್ಮಾನವನ್ನು ತೆಗೆದುಕೊಳ್ಳಲಾಗಿದೆ.
ಭಾರತದಲ್ಲಿ ನಡೆಯಲಿರುವ ಟೂರ್ನಿಯಲ್ಲಿ ಪಾಲ್ಗೊಳ್ಳಲು ತಮಗೆ ಭದ್ರತಾ ಆತಂಕವಿದ್ದು, ಈ ಕುರಿತು ಐಸಿಸಿ ಸೂಕ್ತ ಭರವಸೆ ನೀಡಿಲ್ಲ ಎಂದು ಆರೋಪಿಸಿ ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ (ಬಿಸಿಬಿ) ತಕರಾರು ತೆಗೆದಿತ್ತು. ಗುರುವಾರ ಆಟಗಾರರೊಂದಿಗೆ ಸಭೆ ನಡೆಸಿದ ನಂತರ, ಬಿಸಿಬಿ ಪತ್ರಿಕಾಗೋಷ್ಠಿ ನಡೆಸಿ ಟೂರ್ನಿಯನ್ನು ಬಹಿಷ್ಕರಿಸುವುದಾಗಿ ಘೋಷಿಸಿತ್ತು.
ವಿವಾದವನ್ನು ಇತ್ಯರ್ಥಪಡಿಸಲು ‘ವ್ಯಾಜ್ಯ ಪರಿಹಾರ ಸಮಿತಿ’ಗೆ ವಿಷಯವನ್ನು ವರ್ಗಾಯಿಸುವಂತೆ ಬಾಂಗ್ಲಾದೇಶ ಕೊನೆಯ ಪ್ರಯತ್ನವಾಗಿ ಪತ್ರ ಬರೆದಿತ್ತಾದರೂ, ಮೇಲ್ಮನವಿ ವೇದಿಕೆಯಾಗಿ ಕಾರ್ಯನಿರ್ವಹಿಸಲು ಸಾಧ್ಯವಿಲ್ಲ ಎಂದು ಸಮಿತಿ ಸ್ಪಷ್ಟಪಡಿಸಿದೆ. ಐಸಿಸಿ ನೀಡಿದ್ದ ಅಂತಿಮ ಗಡುವಿನೊಳಗೆ ಬಿಸಿಬಿ ತನ್ನ ನಿಲುವು ಬದಲಿಸದ ಕಾರಣ, ಅಂತಿಮವಾಗಿ ಬಾಂಗ್ಲಾದೇಶವನ್ನು ಕೈಬಿಟ್ಟು ಸ್ಕಾಟ್ಲೆಂಡ್ ತಂಡವನ್ನು ಆಯ್ಕೆ ಮಾಡಲಾಗಿದೆ.
ಇದನ್ನು ಓದಿದ್ದೀರಾ? ಗೌತಮ್‌ ಗಂಭೀರ್; ತಂಡವನ್ನು ಗೆಲ್ಲಿಸುತ್ತಿಲ್ಲ, ತಾವೂ ಬದಲಾಗುತ್ತಿಲ್ಲ
ಯುರೋಪಿಯನ್ ಅರ್ಹತಾ ಸುತ್ತಿನಲ್ಲಿ ಇಟಲಿ, ನೆದರ್ಲೆಂಡ್ಸ್ ಮತ್ತು ಜೆರ್ಸಿ ತಂಡಗಳಿಗಿಂತ ಹಿಂದಿದ್ದರೂ, ಐಸಿಸಿ ಶ್ರೇಯಾಂಕದ ಆಧಾರದ ಮೇಲೆ ಸ್ಕಾಟ್ಲೆಂಡ್ ತಂಡಕ್ಕೆ ವಿಶ್ವಕಪ್ ಟಿಕೆಟ್ ಲಭಿಸಿದೆ. ಸ್ಕಾಟ್ಲೆಂಡ್ ಇದುವರೆಗೆ ಐದು ಟಿ20 ವಿಶ್ವಕಪ್‌ಗಳಲ್ಲಿ ಭಾಗವಹಿಸಿದ್ದು, ಕಳೆದ 2024ರ ಆವೃತ್ತಿಯಲ್ಲಿ ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ತಂಡಗಳಿಗೆ ಪ್ರಬಲ ಪೈಪೋಟಿ ನೀಡಿ ಗಮನ ಸೆಳೆದಿತ್ತು.
ಸ್ಕಾಟ್ಲೆಂಡ್ ಪಂದ್ಯಗಳ ವೇಳಾಪಟ್ಟಿ:
ಬಾಂಗ್ಲಾದೇಶದ ಬದಲಿಯಾಗಿ ‘ಸಿ’ ಗುಂಪಿನಲ್ಲಿ ಸ್ಥಾನ ಪಡೆದಿರುವ ಸ್ಕಾಟ್ಲೆಂಡ್; ಇಂಗ್ಲೆಂಡ್, ವೆಸ್ಟ್ ಇಂಡೀಸ್, ಇಟಲಿ ಮತ್ತು ನೇಪಾಳದೊಂದಿಗೆ ಸೆಣಸಲಿದೆ.
ಫೆಬ್ರವರಿ 7: ವೆಸ್ಟ್ ಇಂಡೀಸ್ ವಿರುದ್ಧ (ಸ್ಥಳ: ಕೋಲ್ಕತ್ತಾ)
ಫೆಬ್ರವರಿ 9: ಇಟಲಿ ವಿರುದ್ಧ (ಸ್ಥಳ: ಈಡನ್ ಗಾರ್ಡನ್ಸ್, ಕೋಲ್ಕತ್ತಾ)
ಫೆಬ್ರವರಿ 14: ಇಂಗ್ಲೆಂಡ್ ವಿರುದ್ಧ (ಸ್ಥಳ: ಈಡನ್ ಗಾರ್ಡನ್ಸ್, ಕೋಲ್ಕತ್ತಾ)
ಫೆಬ್ರವರಿ 17: ನೇಪಾಳ ವಿರುದ್ಧ (ಸ್ಥಳ: ಮುಂಬೈ)
