ದಕ್ಷಿಣ ಅಮೆರಿಕದ ವೆನೆಜುವೆಲಾ ದೇಶ ಇತಿಹಾಸದಲ್ಲೇ ಅತ್ಯಂತ ಭೀಕರ ನೈಸರ್ಗಿಕ ವಿಕೋಪಕ್ಕೆ ತುತ್ತಾಗಿದೆ. ಕಳೆದ ಬುಧವಾರ ಸಂಭವಿಸಿದ ಅವಳಿ ಭೂಕಂಪಗಳ ಬಳಿಕ, ಶುಕ್ರವಾರ ಮತ್ತೊಂದು ಪ್ರಬಲ ಕಂಪನ ಉಂಟಾಗಿದ್ದು, ಸಾವಿನ ಸಂಖ್ಯೆ 920 ಕ್ಕೆ ಏರಿದೆ. ಸುಮಾರು 50 ಸಾವಿರ ಮಂದಿ ನಾಪತ್ತೆಯಾಗಿರುವುದಾಗಿ ವರದಿಯಾಗಿದೆ.
ಬುಧವಾರ ಸಂಜೆ 7.2 ಮತ್ತು 7.5 ತೀವ್ರತೆಯ ಎರಡು ಭೀಕರ ಭೂಕಂಪಗಳು ದೇಶವನ್ನೇ ಅಲುಗಾಡಿಸಿದ್ದವು. ನಿನ್ನೆ (ಜೂ.26) ಶುಕ್ರವಾರ ಮಧ್ಯಾಹ್ನ 4.9 ತೀವ್ರತೆಯ ಮತ್ತೊಂದು ಭೂಕಂಪ ಸಂಭವಿಸಿದ್ದು, ರಕ್ಷಾಣಾ ಕಾರ್ಯಕ್ಕೆ ಭಾರೀ ಅಡಚಣೆ ಉಂಟಾಗಿದೆ. ಉತ್ತರ ಕರಾವಳಿ ಭಾಗಗಳಾದ ಕಾರಕಾಸ್ ಮತ್ತು ಲಾ ಗುಯಿರಾ ಸಂಪೂರ್ಣ ಅವಶೇಷಗಳ ರಾಶಿಯಾಗಿ ಬದಲಾಗಿವೆ. ನೂರಾರು ಕಟ್ಟಡಗಳು, ಸೇತುವೆಗಳು ಮತ್ತು ಆಸ್ಪತ್ರೆಗಳು ನೆಲಸಮವಾಗಿದ್ದು, ಕಳೆದ ನೂರು ವರ್ಷಗಳಲ್ಲಿ ವೆನೆಜುವೆಲಾ ಇಂತಹ ದುರಂತವನ್ನು ಕಂಡಿರಲಿಲ್ಲ ಎಂದು ಭೂವಿಜ್ಞಾನಿಗಳು ತಿಳಿಸಿದ್ದಾರೆ.
ರಾಷ್ಟ್ರೀಯ ಅಸೆಂಬ್ಲಿ ಅಧ್ಯಕ್ಷ ಜಾರ್ಜ್ ರೋಡ್ರಿಗಸ್ ನೀಡಿರುವ ಇತ್ತೀಚಿನ ಮಾಹಿತಿಯಂತೆ, ಸಾವಿನ ಸಂಖ್ಯೆ 920ಕ್ಕೆ ಏರಿಕೆಯಾಗಿದೆ. ಇನ್ನು 50,000ಕ್ಕೂ ಹೆಚ್ಚು ಜನರು ನಾಪತ್ತೆಯಾಗಿದ್ದು, ಅವಶೇಷಗಳಡಿ ಸಿಲುಕಿರುವವರ ಸಂಖ್ಯೆ ಇನ್ನೂ ಹೆಚ್ಚಿರಬಹುದು ಎಂದು ಅಂದಾಜಿಸಲಾಗಿದೆ. ಅಂತಾರಾಷ್ಟ್ರೀಯ ವಲಸೆ ಸಂಸ್ಥೆಯ ಪ್ರಕಾರ, ಒಟ್ಟು 67.6 ಲಕ್ಷ ಜನರು ಈ ಭೂಕಂಪದಿಂದ ಸಂತ್ರಸ್ತರಾಗಿದ್ದಾರೆ.
ಇದನ್ನೂ ಓದಿ: ʼಡಬ್ಲೆಟ್ʼಗಳಿಂದ ನಡುಗಿದ ವೆನೆಜುವೆಲಾ; ಏನಿದು ಅವಳಿ ಭೂಕಂಪ? ಯಾಕಿಷ್ಟು ಅಪಾಯಕಾರಿ?
ಮಾನವೀಯತೆಯ ದೃಷ್ಟಿಯಿಂದ ಹಲವು ದೇಶಗಳು ವೆನೆಜುವೆಲಾ ನೆರವಿಗೆ ಮುಂದೆ ಬಂದಿವೆ. ಅಮೆರಿಕವು ತನ್ನ ವಿಶೇಷ ರಕ್ಷಣಾ ತಂಡಗಳು, ವೈದ್ಯರು ಮತ್ತು ಶೋಧನಾ ಶ್ವಾನಗಳನ್ನು ವೆನೆಜುವೆಲಾಗೆ ರವಾನಿಸಿದೆ. ‘ಆಪರೇಷನ್ ಅಮಿಸ್ತಾದ್’ ಅಡಿಯಲ್ಲಿ ಭಾರತೀಯ ವಾಯುಪಡೆಯ ಎರಡು ಸಿ-17 ಗ್ಲೋಬ್ಮಾಸ್ಟರ್ ವಿಮಾನಗಳನ್ನು ಕಳುಹಿಸಲಾಗಿದೆ. ಇದರಲ್ಲಿ ಭಾರತೀಯ ಸೇನೆಯ ಫೀಲ್ಡ್ ಆಸ್ಪತ್ರೆ, 35 ಟನ್ಗೂ ಅಧಿಕ ವೈದ್ಯಕೀಯ ಸಾಮಗ್ರಿಗಳು ಮತ್ತು ತುರ್ತು ಚಿಕಿತ್ಸೆಗಾಗಿ ಎರಡು ‘ಭೀಷ್ಮ ಕ್ಯೂಬ್’ಗಳನ್ನು (BHISHM Cubes) ಕಳುಹಿಸಿ ಕೊಡಲಾಗಿದೆ.
