ಎಲಾನ್ ಮಸ್ಕ್ ಒಡೆತನದ ಅಮೆರಿಕನ್‌ ತಂತ್ರಜ್ಞಾನ ಕಂಪನಿ ಟೆಸ್ಲಾದ ಮಾಜಿ AI ನಿರ್ದೇಶಕ ಆಂಡ್ರೆಜ್ ಕಾರ್ಪತಿ, ಟೆಸ್ಲಾ ಹಾಗೂ ಗೂಗಲ್‌ನ ವೇಮೊದ ಸ್ವಯಂಚಾಲಿತ ಚಾಲನಾ ತಂತ್ರಜ್ಞಾನಗಳ ನಡುವಿನ ಕೆಲ ಮೂಲಭೂತ ವ್ಯತ್ಯಾಸಗಳ ಬಗ್ಗೆ ಮಹತ್ವದ ಹೇಳಿಕೆ ನೀಡಿದ್ದಾರೆ. ಟೆಸ್ಲಾ ಸಾಧಿಸಿದ ಕರಾವಳಿ–ಕರಾವಳಿ (coast-to-coast) ಸ್ವಯಂಚಾಲಿತ ಚಾಲನಾ ಸಾಧನೆಯನ್ನು ವೇಮೊ ಸಾಧಿಸಲು ಸಾಧ್ಯವಿಲ್ಲ ಎಂದಿದ್ದಾರೆ.
ಕಂಪನಿಯ AI ಸಾಮರ್ಥ್ಯಗಳ ಕುರಿತು ಕಾರ್ಪತಿಯ ತಿಳಿವಳಿಕೆಗಳು ʼಹಳೆಯದಾಗಿವೆʼ ಹಾಗೂ 2022ರಲ್ಲಿ ಅವರು ಹೊರನಡೆದಾಗ ಕಂಪನಿಯ AI ತಂತ್ರಜ್ಞಾನವು ಇದ್ದಕ್ಕಿದ್ದಂತೆ ಹೆಚ್ಚಿನ ಪ್ರಗತಿ ಸಾಧಿಸಿದೆ ಎಂದು ಎಲಾನ್ ಮಸ್ಕ್ ಸಾರ್ವಜನಿಕವಾಗಿ ಟೀಕಿಸಿದ ಕೆಲವೇ ದಿನಗಳಲ್ಲಿ ಕಾರ್ಪತಿ ಈ ಹೇಳಿಕೆ ನೀಡಿರುವುದು ಹೈಪ್‌ ಸೃಷ್ಟಿಸಿದೆ.
ಇತ್ತೀಚೆಗೆ ಟೆಸ್ಲಾ ಬಳಕೆದಾರ ಡೇವಿಡ್ ಮೊಸ್ ಅವರು ಟೆಸ್ಲಾದ ಫುಲ್ ಸೆಲ್ಫ್ ಡ್ರೈವಿಂಗ್ (FSD V14.2) ಬಳಸಿ ಅಮೆರಿಕದ ಒಂದು ಕರಾವಳಿಯಿಂದ ಇನ್ನೊಂದು ಕರಾವಳಿವರೆಗೆ ಸುಮಾರು 2,732 ಮೈಲುಗಳ ಪ್ರಯಾಣವನ್ನು ಸ್ವಯಂಚಾಲಿತವಾಗಿ ಪೂರ್ಣಗೊಳಿಸಿದ್ದರು. ಈ ಸಾಧನೆ ಕುರಿತು ಸಾಮಾಜಿಕ ಜಾಲತಾಣ Xನಲ್ಲಿ ಕೇಳಲಾದ ಪ್ರಶ್ನೆಗೆ ಪ್ರತಿಕ್ರಿಯಿಸಿರುವ ಕಾರ್ಪತಿ, “ನನ್ನ ತಿಳಿವಳಿಕೆಯ ಪ್ರಕಾರ ವೇಮೊಗೆ ಇಂತಹ ಪ್ರಯಾಣ ಸಾಧ್ಯವಿಲ್ಲ” ಎಂದು ಹೇಳಿದ್ದಾರೆ.
ಕಾರ್ಪತಿಯ ಪ್ರಕಾರ, ವೇಮೊ ಮಾಡ್ಯೂಲರ್ ವ್ಯವಸ್ಥೆಯ ಮೇಲೆ ಅವಲಂಬಿತವಾಗಿದೆ. ಅಂದರೆ, ಹೈ ಡೆಫಿನಿಷನ್ ನಕ್ಷೆಗಳು, ಲೈಡಾರ್ ಸೆನ್ಸರ್‌ಗಳು, 5ಜಿ ಸಂಪರ್ಕ ಮತ್ತು ವಿವಿಧ ನ್ಯೂರಲ್ ನೆಟ್‌ವರ್ಕ್‌ಗಳ ಸಂಯೋಜನೆಯ ಮೂಲಕ ಅದರ ಸ್ವಯಂಚಾಲಿತ ಚಾಲನೆ ಕಾರ್ಯನಿರ್ವಹಿಸುತ್ತದೆ. ಈ ವ್ಯವಸ್ಥೆ ಕೆಲವು ಸಂದರ್ಭಗಳಲ್ಲಿ ದುರ್ಬಲವಾಗಿ ಕೆಲಸ ಮಾಡದೇ ಹೋಗಬಹುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಸಾನ್ ಫ್ರಾನ್ಸಿಸ್ಕೋದಲ್ಲಿ ವಿದ್ಯುತ್ ಕಡಿತವಾದಾಗ ಟ್ರಾಫಿಕ್ ಸಿಗ್ನಲ್‌ಗಳು ಕಾರ್ಯನಿರ್ವಹಿಸದ ಹಿನ್ನೆಲೆಯಲ್ಲಿ ವೇಮೊ ಕಾರುಗಳು ರಸ್ತೆಯಲ್ಲೇ ಸಿಲುಕಿಕೊಂಡ ಘಟನೆಯನ್ನೂ ಅವರು ಉದಾಹರಣೆ ನೀಡಿದ್ದಾರೆ.
ಇದಕ್ಕೆ ವಿರುದ್ಧವಾಗಿ, ಟೆಸ್ಲಾ ಒಂದೇ ದೊಡ್ಡ ನ್ಯೂರಲ್ ನೆಟ್‌ವರ್ಕ್ ಆಧಾರಿತ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುತ್ತಿದೆ. ಕ್ಯಾಮೆರಾಗಳಿಂದ ಬಂದ ದೃಶ್ಯ ಮಾಹಿತಿಯನ್ನು ನೇರವಾಗಿ ಚಾಲನಾ ನಿರ್ಧಾರಗಳಿಗೆ ಪರಿವರ್ತಿಸುವ ಈ ತಂತ್ರಜ್ಞಾನ, ಕೋಟಿ ಕೋಟಿ ಮೈಲುಗಳ ಮಾನವ ಚಾಲನಾ ಅನುಭವದಿಂದ ತರಬೇತಿ ಪಡೆಯುತ್ತದೆ. ಇದು ಕಾರ್ಪತಿ ವಿವರಿಸಿದ ʼಸಾಫ್ಟ್‌ವೇರ್ 2.0ʼ ದೃಷ್ಟಿಕೋನಕ್ಕೆ ಹೊಂದಿಕೆಯಾಗುತ್ತದೆ.
ಇದನ್ನೂ ಓದಿ: 2025ರಲ್ಲಿ AI ಪ್ರಭಾವ; ತಂತ್ರಜ್ಞಾನದಡಿ ಕಲಿಕೆ-ಆರೈಕೆ!
ಎಲಾನ್ ಮಸ್ಕ್ ಅವರ ಟೀಕೆಯ ನಡುವೆಯೂ ಕಾರ್ಪತಿ ಟೆಸ್ಲಾದ coast-to-coast ಸಾಧನೆಯನ್ನು ಶ್ಲಾಘಿಸಿದ್ದಾರೆ. ʼಕರಾವಳಿ–ಕರಾವಳಿ ಸ್ವಯಂಚಾಲಿತ ಚಾಲನೆ ಆಟೋಪೈಲಟ್ ತಂಡದ ಆರಂಭಿಕ ಗುರಿಯಾಗಿತ್ತು. ಇದಕ್ಕಾಗಿ ರಾತ್ರಿಯೆಲ್ಲಾ ವಿಡಿಯೋ ಕ್ಲಿಪ್‌ಗಳನ್ನು ಪರಿಶೀಲಿಸಿ, ಮಧ್ಯೆ ಮಧ್ಯೆ ಆಗುವ ಸಮಸ್ಯೆಗಳನ್ನು ಸಂಪೂರ್ಣವಾಗಿ ತೆಗೆದುಹಾಕುವ ಕೆಲಸ ಮಾಡುತ್ತಿದ್ದೆವುʼ ಎಂದು ಅವರು ನೆನಪಿಸಿಕೊಂಡಿದ್ದಾರೆ.
ಮಸ್ಕ್, ʼಆಂಡ್ರೇಜ್, ನನ್ನ ಹಳೆಯ ಸಹೋದರ, ಮತ್ತೆ ಒಟ್ಟಿಗೆ ಕೆಲಸ ಮಾಡೋಣʼ ಎಂದು ಆಹ್ವಾನಿಸಿದರೂ, ಕಾರ್ಪತಿ ಮತ್ತೆ ಟೆಸ್ಲಾಗೆ ಮರಳುವ ಯಾವುದೇ ಸೂಚನೆ ನೀಡಿಲ್ಲ ಎಂದು Times Of India ವರದಿ ಮಾಡಿದೆ.
ಮಾಹಿತಿ ಕೃಪೆ: TOI
