ರಾಜ್ಯದಲ್ಲಿ ಪರಿಶಿಷ್ಟ ಜಾತಿ ಒಳಮೀಸಲಾತಿ ಹಂಚಿಕೆಯನ್ನು ಮುಖ್ಯಮಂತ್ರಿ ಸಿದ್ದರಾಮಯ್ಯ ಇಂದು ಘೋಷಣೆ ಮಾಡಿದ್ದಾರೆ. ಶೇ.15 ಮೀಸಲಾತಿಯಲ್ಲಿ ಎಡಗೈ, ಬಲಗೈ, ಸ್ಪೃಶ್ಯ ಸಮುದಾಯಕ್ಕೆ ಮೂರು ಸೂತ್ರಗಳನ್ನು ಫೈನಲ್ ಮಾಡಲಾಗಿದೆ.
ವಿಶೇಷ ಸಚಿವ ಸಂಪುಟ ಸಭೆಯ ಬಳಿಕ ಪತ್ರಿಕಾಗೋಷ್ಠಿ ನಡೆಸಿ ಮಾತನಾಡಿದ ಸಿಎಂ, “ಇದು ಸರ್ವಾನುಮತದ ತೀರ್ಮಾನ. ಸಂಪೂರ್ಣ ಸಚಿವ ಸಂಪುಟವು ಈ ಒಳ ಮೀಸಲಾತಿ ಹಂಚಿಕೆಗೆ ಒಪ್ಪಿಕೊಂಡಿದೆ. ಹೈಕೋರ್ಟ್ ತೀರ್ಪಿಗೆ ಅನುಗುಣವಾಗಿ ಈ ಮಾರ್ಪಾಡು ಮಾಡಲಾಗಿದೆ” ಎಂದು ತಿಳಿಸಿದ್ದಾರೆ.
ಇದನ್ನು ಓದಿದ್ದೀರಾ? ಇಂದು ಒಳಮೀಸಲಾತಿ ಭವಿಷ್ಯ; ಮೂರು ದಶಕಗಳ ‘ಒಳ’ ಬೇಗುದಿಗೆ ಇಂದು ಮುಕ್ತಿ?
ಪರಿಶಿಷ್ಟ ಜಾತಿಯ ಎಡ ಸಮುದಾಯಕ್ಕೆ ಶೇ.5.25, ಬಲ ಸಮುದಾಯಕ್ಕೆ 5.25 ಮತ್ತು ಸ್ಪೃಶ್ಯ ಸಮುದಾಯಕ್ಕೆ ಶೇ.4.5 ಹಂಚಿಕೆ ಮಾಡಲಾಗಿದೆ. ಸ್ಪೃಶ್ಯ ಸಮುದಾಯದ ಮೀಸಲಾತಿಯಲ್ಲಿ ಶೇ.20 ಅನ್ನು ಅಲೆಮಾರಿ ಸಮುದಾಯಕ್ಕೆ ಮೀಸಲಿಡಲಾಗಿದೆ. 400 ರೋಸ್ಟರ್ ಪಾಯಿಂಟ್ ನಿಗದಿ ಮಾಡಲಾಗಿದೆ.
ಸರ್ಕಾರದ ಮುಖ್ಯ ಕಾರ್ಯದರ್ಶಿ ಶಾಲಿನಿ ರಜನೀಶ್ ನೇತೃತ್ವದ ತಾಂತ್ರಿಕ ಸಮಿತಿಯಲ್ಲಿ, ಲಭ್ಯವಿರುವ ಶೇ.15ರ ಮೀಸಲಾತಿಯಲ್ಲಿ ಪರಿಶಿಷ್ಟ ಜಾತಿ ‘ಎ’ (ಎಡಗೈ)ಗೆ ಶೇ.5.3, ಪರಿಶಿಷ್ಟ ಜಾತಿ ‘ಬಿ’ (ಬಲಗೈ)ಗೆ ಶೇ.5.3 ಹಾಗೂ ಪರಿಶಿಷ್ಟ ಜಾತಿ ‘ಸಿ’ (ಸ್ಪೃಶ್ಯ, ಅಲೆಮಾರಿ ಹಾಗೂ ಇತರರು)ಗೆ ಶೇ.4.4 ಮೀಸಲಾತಿ ನಿಗದಿ ಮಾಡಲು ಸಲಹೆ ನೀಡಲಾಗಿತ್ತು.
ಪರಿಶಿಷ್ಟ ಜಾತಿಯಲ್ಲಿ ಒಟ್ಟು 101 ಜಾತಿಗಳಿವೆ. ಈ ಪೈಕಿ ಬಲ ಸಮುದಾಯದಲ್ಲಿ 20, ಸ್ಪೃಶ್ಯ ಸಮುದಾಯದಲ್ಲಿ 63, ಎಡ ಸಮುದಾಯದಲ್ಲಿ 18 ಜಾತಿಗಳಿವೆ.
