ಬೆಳಗಾವಿ ಜಿಲ್ಲೆಯ ರಾಜಕೀಯದಲ್ಲಿ ಮಹತ್ವದ ತಿರುವು ತಂದಿರುವ ಹುಕ್ಕೇರಿ ಗ್ರಾಮೀಣ ವಿದ್ಯುತ್ ಸಹಕಾರಿ ಸಂಘದ ಚುನಾವಣೆ, ಇತ್ತೀಚಿನ ದಿನಗಳಲ್ಲಿ ಜಾರಕಿಹೊಳಿ ಸಹೋದರರು ಹಾಗೂ ಮಾಜಿ ಸಂಸದ ರಮೇಶ ಕತ್ತಿ ನಡುವಿನ ಶಕ್ತಿ ಪರೀಕ್ಷೆಯಂತಾಗಿತ್ತು. ಈ ಪೈಪೋಟಿಯಲ್ಲಿ ರಮೇಶ ಕತ್ತಿ ಪ್ಯಾನೆಲ್ 15ಕ್ಕೆ 15 ಸ್ಥಾನಗಳನ್ನು ಗೆದ್ದು ಕ್ಲೀನ್ ಸ್ವೀಪ್ ಸಾಧಿಸಿರುವುದು ಜಿಲ್ಲೆಯ ರಾಜಕೀಯ ಸಮೀಕರಣಗಳ ಮೇಲೆ ದೊಡ್ಡ ಪರಿಣಾಮ ಬೀರಿದೆ.
- Advertisement -
ಜಾರಕಿಹೊಳಿ ಸಹೋದರರು ಬೆಳಗಾವಿ ಜಿಲ್ಲೆಯಲ್ಲಿ ಹಲವು ಸಹಕಾರಿ ಸಂಘಗಳ ಮೇಲೆ ಪ್ರಭಾವ ಬೀರಿದ್ದರೆ, ಹುಕ್ಕೇರಿಯ ಕೋಟೆಯಲ್ಲಿ ಕತ್ತಿ ಕುಟುಂಬದ ಪಾದಾರ್ಪಣೆ ಹಳೆಯದು. ಈ ಚುನಾವಣೆಯು ಕೇವಲ ಸಹಕಾರಿ ಸಂಘದ ಕಣಕ್ಕಷ್ಟೇ ಸೀಮಿತವಾಗಿರದೆ ಎರಡು ಪ್ರಭಾವಿ ಬಣಗಳ ಪ್ರತಿಷ್ಠೆಯ ಕಣವಾಗಿ ಪರಿಣಮಿಸಿತ್ತು.
ರಮೇಶ ಕತ್ತಿಯವರು ಈ ಗೆಲುವಿನಿಂದ “ನಮ್ಮ ಬಲ ಇನ್ನೂ ಅಚಲವಾಗಿದೆ” ಎಂಬ ಸಂದೇಶವನ್ನು ಕಳಿಸಿದ್ದಾರೆ. ಇದರಿಂದ ಜಾರಕಿಹೊಳಿ ಸಹೋದರರ ಜಿಲ್ಲಾ ರಾಜಕಾರಣದ ಮೇಲಿನ ಹಿಡಿತದ ಕುರಿತ ಕಲ್ಪನೆಗೆ ಬಿರುಕು ಬಿದ್ದಿದೆ ಎನ್ನಬಹುದು.
