ಒಂದು ತಿಂಗಳ ಗಂಡು ಮಗುವನ್ನು ಬಿಟ್ಟು ತಾಯಿ ನಾಪತ್ತೆಯಾದ ಘಟನೆ ಚಿಟಗುಪ್ಪ ತಾಲೂಕಿನ ಮನ್ನಾಏಖೇಳಿ ಬಸ್ ನಿಲ್ದಾಣದಲ್ಲಿ ಏ.2ರಂದು ಜರುಗಿದ್ದು ಈ ಸಂಬಂಧ ಮನ್ನಾಏಖೇಳಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಕಲಬುರಗಿ ಜಿಲ್ಲೆಯ ಚಿಂಚೋಳಿ ತಾಲೂಕಿನ ಹೇಮಲಾ ನಾಯಕ ತಾಂಡಾದ ಕೂಲಿ ಕೆಲಸ ಮಾಡುವ ಕರುಣಾಬಾಯಿ ಗಂಡ ಹೀರಾಸಿಂಗ್ ರಾಥೋಡ್ ನಾಪತ್ತೆಯಾದ ಮಹಿಳೆಯಾಗಿದ್ದಾಳೆ. ಕರುಣಾಬಾಯಿ ತನ್ನ ಗಂಡ ಹೀರಾಸಿಂಗ್ ಕೂಲಿಕೆಲಸ ಮಾಡಲು 15 ದಿನಗಳ ಹಿಂದೆ ತೆಲಂಗಾಣಾದ ಜಹೀರಾಬಾದ್‌ಗೆ ಹೋಗಿ ಅಲ್ಲಿಯೇ ನೆಲೆಸಿದ್ದರು.
ಅಲ್ಲಿಂದ ಕರುಣಾಬಾಯಿ ಗಂಡನಿಗೆ ಹೇಳದೇ ಮನೆ ಬಿಟ್ಟು ಹೋಗಿದ್ದಾಳೆ. ಬಳಿಕ ಗಂಡ ಹಾಗೂ ಹೆಂಡತಿಯ ಪೋಷಕರು ಸೇರಿ ಮಹಿಳೆಯನ್ನು ಸಿಕಿಂದ್ರಾಬಾದ್ ರೇಲ್ವೆ ನಿಲ್ದಾಣದಲ್ಲಿ ಪತ್ತೆಹಚ್ಚಿ ಮರಳಿ ವಾಪಸ್ ಊರಿಗೆ ಹೋಗಬೇಕೆಂದು ಬಸ್‌ನಲ್ಲಿ ಬಂದು ಏ.2ರಂದು ತಡ ರಾತ್ರಿ ಮನ್ನಾಏಖೇಳಿ ಬಸ್ ನಿಲ್ದಾಣದಲ್ಲಿ ಇಳಿದು ಅಲ್ಲೇ ತಂಗಿದರು.
ಬೆಳಿಗ್ಗೆ ಊರಿಗೆ ಹೋಗುವ ಸಂಬಂಧ ಬಸ್ ನಿಲ್ದಾಣದ ಎದುರಿನ ಆಟೋ ನಿಲ್ದಾಣದ ಬಳಿ ಬೆಳ್ಳಿಗೆ 7ಗಂಟೆ ಸುಮಾರಿಗೆ ನಿಂತಿದ್ದ ವೇಳೆ ಯಾರಿಗೂ ಹೇಳದೇ ಒಂದು ತಿಂಗಳ ಗಂಡು ಮಗುವನ್ನು ಬಿಟ್ಟು 27 ವರ್ಷದ ಮಹಿಳೆ ನಾಪತ್ತೆಯಾಗಿದ್ದಾಳೆ.
ಎಲ್ಲಾ ಕಡೆ ಹುಡುಕಿದರೂ ಪತ್ತೆಯಾಗದ ಹಿನ್ನೆಲೆ ಕರುಣಾಬಾಯಿ ಗಂಡ ಹೀರಾಸಿಂಗ್ ಠಾಣೆಯಲ್ಲಿ ನಾಪತ್ತೆ ಪ್ರಕರಣ ದಾಖಲಿಸಿದ್ದಾರೆ.
ಇದನ್ನೂ ಓದಿ : ಬೀದರ್ | ಏ.11, 12ರಂದು ಪತ್ರಕರ್ತರ ರಾಜ್ಯ ಸಮ್ಮೇಳನ : 5 ಸಾವಿರ ಪತ್ರಕರ್ತರು ಭಾಗಿ
