ಕನ್ನಡ ನಾಡು-ನುಡಿ, ಸಂಸ್ಕೃತಿ ಮತ್ತು ಜನಪದ ಸೊಗಡನ್ನು ಅಕ್ಷರ ರೂಪಕ್ಕಿಳಿಸಿದ ಆನಂದಕಂದರ ಸಾಹಿತ್ಯವು ಸಾರ್ವಕಾಲಿಕ ಮೌಲ್ಯ ಹೊಂದಿದೆ” ಎಂದು ಕರ್ನಾಟಕ ಸಾಹಿತ್ಯ ಅಕಾಡೆಮಿ ಸದಸ್ಯರು ಡಾ. ಅರ್ಜುನ ಗೋಳಸಂಗಿ ಅವರು ಹೇಳಿದರು.
ಗದಗ ಪಟ್ಟಣದ ಕೆ.ಎಲ್.ಇ. ಸಂಸ್ಥೆಯ ಜಗದ್ಗುರು ತೋಂಟದಾರ್ಯ ಮಹಾವಿದ್ಯಾಲಯದ ಕನ್ನಡ ವಿಭಾಗ, ಐ.ಕ್ಯು.ಎ.ಸಿ. (IQAC) ಹಾಗೂ ಡಾ. ಬೆಟಗೇರಿ ಕೃಷ್ಣಶರ್ಮ ಟ್ರಸ್ಟ್, ಬೆಳಗಾವಿ ಸಂಯುಕ್ತ ಆಶ್ರಯದಲ್ಲಿ ಮಹಾವಿದ್ಯಾಲಯದ ಸಭಾಭವನದಲ್ಲಿ ‘ಡಾ. ಬೆಟಗೇರಿ ಕೃಷ್ಣಶರ್ಮರ ಸಾಹಿತ್ಯ’ ಕುರಿತ ಒಂದು ದಿನದ ವಿಚಾರ ಸಂಕಿರಣವನ್ನುಉದ್ಘಾಟಿಸಿ‌ಮಾತನಾಡಿದರು.
“ಇಂದಿನ ಯುವಸಮುದಾಯ ಇಂತಹ ಮೇರು ಸಾಹಿತಿಗಳ ವಿಚಾರಗಳನ್ನು ಅಧ್ಯಯನ ಮಾಡಿ ತಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು” ಎಂದು ಕರೆ ನೀಡಿದರು.
ಕನ್ನಡ ವಿಭಾಗದ ಮುಖ್ಯಸ್ಥರು ಡಾ. ನಾಗರಾಜ ವಿ. ಬಳಿಗೇರ ಅವರು ಎಲ್ಲರನ್ನು ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿ,”ಬೆಟಗೇರಿಯವರ ಕಥೆ ಮತ್ತು ಕಾವ್ಯಗಳು ಜನಸಾಮಾನ್ಯರ ಬದುಕಿನ ಕನ್ನಡಿಯಾಗಿವೆ. ಇಂದಿನ ಧಾವಂತದ ದಿನಗಳಲ್ಲಿ ಯುವ ಪೀಳಿಗೆಯಲ್ಲಿ ಮಾನವೀಯತೆ, ಸಂವೇದನೆ ಹಾಗೂ ಸಾಹಿತ್ಯಿಕ ಅಭಿರುಚಿ ಬೆಳೆಸುವ ನಿಟ್ಟಿನಲ್ಲಿ ಈ ವಿಚಾರ ಸಂಕಿರಣವನ್ನು ಹಮ್ಮಿಕೊಳ್ಳಲಾಗಿದೆ” ಎಂದು ತಿಳಿಸಿದರು.
ಮೊದಲ ಗೋಷ್ಠಿಯಲ್ಲಿ ಸಹಾಯಕ ಪ್ರಾಧ್ಯಪಕರು ಸರಕಾರಿ ಪ್ರಥಮ ದರ್ಜೆ ಕಾಲೇಜು ಗದಗ ಡಾ. ರೇಖಾ ನೀರಲಗಿ ಅವರು ಮಾತನಾಡಿ, ”ಡಾ. ಬೆಟಗೇರಿ ಕೃಷ್ಣಶರ್ಮರು (ಆನಂದಕಂದ) ಕನ್ನಡ ಸಣ್ಣಕಥಾ ಪ್ರಪಂಚದಲ್ಲಿ ಉತ್ತರ ಕರ್ನಾಟಕದ ಗ್ರಾಮೀಣ ಜನಜೀವನ, ಸಂಸ್ಕೃತಿ ಮತ್ತು ಕೌಟುಂಬಿಕ ಮೌಲ್ಯಗಳನ್ನು ಅತ್ಯಂತ ನೈಜವಾಗಿ ಕಟ್ಟಿಕೊಟ್ಟ ಅಗ್ರಗಣ್ಯರು” ಎಂದು ಹೇಳಿದರು.
ಸಂಬಂಧಗಳ ಗಟ್ಟಿತನ ಹಾಗೂ ಕೌಟುಂಬಿಕ ಪ್ರೇಮ: “ಬೆಟಗೇರಿಯವರ ಕಥೆಗಳಲ್ಲಿ ಅವಿಭಕ್ತ ಕುಟುಂಬದ ಸೊಬಗು, ಅತ್ತೆ-ಸೊಸೆ, ಅಣ್ಣ-ತಮ್ಮಂದಿರ ನಡುವಿನ ಬಾಂಧವ್ಯ, ತ್ಯಾಗ ಮತ್ತು ಪರಸ್ಪರ ಗೌರವದ ಸೂಕ್ಷ್ಮ ಎಳೆಗಳು ಅನಾವರಣಗೊಳ್ಳುತ್ತವೆ. ಇಂದಿನ ಏಕವ್ಯಕ್ತಿ ಅಥವಾ ವಿಭಕ್ತ ಕುಟುಂಬಗಳ ಧಾವಂತದಲ್ಲಿ ಸಡಿಲವಾಗುತ್ತಿರುವ ಮಾನವೀಯ ಸಂಬಂಧಗಳಿಗೆ ಅವರ ಕಥೆಗಳು ಮರುಜೀವ ನೀಡುತ್ತವೆ” ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.
ಗ್ರಾಮೀಣ ಬದುಕಿನ ಮುಗ್ಧತೆ ಮತ್ತು ನೈತಿಕತೆ: “ಹಳ್ಳಿಗಾಡಿನ ಜನರ ಬದುಕಿನ ಸತ್ಯಸಂಧತೆ, ಕಷ್ಟ-ಕಾರ್ಪಣ್ಯಗಳಲ್ಲೂ ಕಳೆದುಹೋಗದ ಪ್ರಾಮಾಣಿಕತೆ, ನಂಬಿಕೆ ಮತ್ತು ಧಾರ್ಮಿಕ-ಸಾಮಾಜಿಕ ಕಟ್ಟುಪಾಡುಗಳ ನೈತಿಕ ನೆಲೆಗಟ್ಟನ್ನು ಅವರ ಕಥೆಗಳು ಎತ್ತಿಹಿಡಿಯುತ್ತವೆ.
ಸಾಮಾಜಿಕ ಕಳಕಳಿ ಹಾಗೂ ಸುಧಾರಣಾವಾದಿ ದೃಷ್ಟಿಕೋನ: ಅಂದಿನ ಸಮಾಜದಲ್ಲಿದ್ದ ಅಸಮಾನತೆ, ಹೆಣ್ಣಿನ ಸಂಕಷ್ಟಗಳು ಹಾಗೂ ಮೂಢನಂಬಿಕೆಗಳನ್ನು ಕೇವಲ ಕಟುವಾಗಿ ಟೀಕಿಸದೆ, ಕರುಣೆ ಮತ್ತು ತಿಳಿವಳಿಕೆಯ ಮೂಲಕ ಸರಿಪಡಿಸುವ ಸೃಜನಶೀಲ ಹಾದಿಯನ್ನು ಅವರು ತೋರಿದ್ದಾರೆ” ಎಂದರು.
ಇಂದಿನ ಪ್ರಸ್ತುತತೆ: “ಯುವಜನತೆಯಲ್ಲಿ ಕೇವಲ ಭೌತಿಕ ಸುಖದ ಬೆನ್ನಟ್ಟುವಿಕೆಯ ಬದಲು, ಬದುಕಿಗೆ ಘನತೆ ತರುವ ನೈತಿಕ ಪ್ರಜ್ಞೆ, ಸಹಾನುಭೂತಿ ಹಾಗೂ ಸಾಮಾಜಿಕ ಜವಾಬ್ದಾರಿಯನ್ನು ಬೆಳೆಸಲು ಬೆಟಗೇರಿಯವರ ಕಥೆಗಳಲ್ಲಿನ ಮೌಲ್ಯಗಳು ಅತ್ಯಂತ ಪ್ರಸ್ತುತವಾಗಿವೆ” ಎಂದರು.
ಎರಡನೇ ಗೋಷ್ಠಿಯಲ್ಲಿ ವಿದ್ವಾಂಸರು, ಸಾಹಿತಿಗಳು ಡಾ. ಎಚ್. ಬಿ. ಕೋಲಕಾರ ಮಾತನಾಡಿ, “ಆನಂದಕಂದರ ಕಾವ್ಯ ಕೇವಲ ಭಾವುಕತೆಯ ಅಭಿವ್ಯಕ್ತಿಯಲ್ಲ; ಅದು ಬದುಕಿನ ನೈಜ ಸತ್ಯಗಳನ್ನು ಒಳಗೊಂಡ ತತ್ವಚಿಂತನೆ ಮತ್ತು ಜೀವನ ವಿವೇಕದ ಗಣಿ” ಎಂದರು.
ಬದುಕನ್ನು ಪ್ರೀತಿಸುವ ಸಕಾರಾತ್ಮಕತೆ (ಆಶಾವಾದ): “ಬಡತನ, ಸಂಕಷ್ಟ ಮತ್ತು ನೋವುಗಳ ನಡುವೆಯೂ ಹತಾಶರಾಗದೆ, ಬದುಕನ್ನು ಮುಕ್ತ ಮನಸ್ಸಿನಿಂದ ಸ್ವೀಕರಿಸುವ ಮತ್ತು ಸಂಭ್ರಮಿಸುವ ಅಪಾರ ಜೀವನೋತ್ಸಾಹ ಅವರ ಕವಿತೆಗಳಲ್ಲಿದೆ. ಕಷ್ಟಗಳನ್ನು ಎದುರಿಸಿ ಮುನ್ನಡೆಯುವ ಧೈರ್ಯ ಅವರ ಸಾಲುಗಳಲ್ಲಿ ಮೇಳೈಸಿದೆ” ಎಂದರು.
ಪ್ರಕೃತಿ ಪ್ರೇಮ ಮತ್ತು ಪರಿಸರ ಪ್ರಜ್ಞೆ: “ಉತ್ತರ ಕರ್ನಾಟಕದ ಬಯಲು ಸೀಮೆಯ ಪ್ರಕೃತಿ, ಬೆಳೆದು ನಿಂತ ಹೊಲಗಳು, ಹರಿಯುವ ನದಿ-ತೊರೆಗಳು ಮತ್ತು ಮಳೆಯ ಸಡಗರವನ್ನು ಬದುಕಿನ ತಾತ್ವಿಕತೆಯೊಂದಿಗೆ ಬೆಸೆದು ಹಾಡಿದ ಕವಿ ಅವರು. ಪ್ರಕೃತಿಯೊಂದಿಗೆ ಸಾಮರಸ್ಯದಿಂದ ಬಾಳುವುದೇ ನಿಜವಾದ ವಿವೇಕ ಎಂಬುದನ್ನು ಅವರ ಕಾವ್ಯ ಸಾರುತ್ತದೆ” ಎಂದರು.
“ನಾಡು-ನುಡಿಯ ಅಭಿಮಾನ ಹಾಗೂ ದೇಶಪ್ರೇಮ: ಕನ್ನಡ ನಾಡಿನ ಏಕೀಕರಣದ ಕಾಲಘಟ್ಟದಲ್ಲಿ ಜನರಲ್ಲಿ ಜಾಗೃತಿ ಮೂಡಿಸಿದ ಅವರ ಕವಿತೆಗಳು ಕೇವಲ ರಾಜಕೀಯ ಸ್ವಾತಂತ್ರ್ಯಕ್ಕಷ್ಟೇ ಸೀಮಿತವಾಗಿರದೆ, ಸಾಂಸ್ಕೃತಿಕ ಸ್ವಾಭಿಮಾನ ಹಾಗೂ ಸಮಗ್ರತೆಯ ಸಂಕೇತವಾಗಿವೆ.
ಸರಳ ನುಡಿಯಲ್ಲಿ ಗಹನವಾದ ದಾರ್ಶನಿಕತೆ: “ಆಡುಮಾತಿನ ಲಯ ಮತ್ತು ಜನಪದ ಛಂದಸ್ಸಿನ ನಾದವನ್ನು ಬಳಸಿಕೊಂಡು, ಸಾಮಾನ್ಯ ಜನರಿಗೂ ನಿಲುಕುವ ರೀತಿಯಲ್ಲಿ ಜೀವನದ ಆಳವಾದ ಸತ್ಯಗಳನ್ನು, ಕರ್ತವ್ಯ ಪ್ರಜ್ಞೆಯನ್ನು ಅವರು ಮನದಟ್ಟು ಮಾಡಿಕೊಟ್ಟಿದ್ದಾರೆ” ಎಂದು ಹೇಳಿದರು.
ಸಮಾರೋಪ ಸಮಾರಂಭದಲ್ಲಿ ಪಿ.ಟಿ.ಜಿ. ಕಾಲೇಜಿನ ಪ್ರಾಚಾರ್ಯರಾದ ಡಾ. ರಾಜಶೇಖರ ದಾನರೆಡ್ಡಿ ಅವರು ಸಮಾರೋಪ ನುಡಿಗಳನ್ನಾಡಿದರು. ಬೆಟಿಗೇರಿ ಕೃಷ್ಣಶರ್ಮದ ಬದುಕು ಮತ್ತು ಬರಹದ ಕುರಿತು ಮಾತನಾಡಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಜೆ.ಟಿ. ಕಾಲೇಜಿನ ಪ್ರಾಚಾರ್ಯರಾದ ಪ್ರೊ. ವಿಶ್ವನಾಥ ಜಿ. ಅವರು ಮಾತನಾಡಿ, “ವಿದ್ಯಾರ್ಥಿಗಳಲ್ಲಿ ಪಠ್ಯದ ಜೊತೆಗೆ ಸಾಹಿತ್ಯಿಕ ಹಾಗೂ ನೈತಿಕ ಪ್ರಜ್ಞೆ ಮೂಡಿಸಲು ಇಂತಹ ಗೋಷ್ಠಿಗಳು ಪೂರಕವಾಗಿವೆ” ಎಂದು ಹರ್ಷ ವ್ಯಕ್ತಪಡಿಸಿದರು. ವೇದಿಕೆಯಲ್ಲಿ ಐ.ಕ್ಯು.ಎ.ಸಿ. ಸಂಯೋಜಕರಾದ ಡಾ. ರಮೇಶ ಜಿ. ಕೆ. ಉಪಸ್ಥಿತರಿದ್ದರು. ಪ್ರಾರಂಭದಲ್ಲಿ ಕುಮಾರಿ ತೇಜಸ್ವಿನಿ ಮಾಗಡಿ ಪ್ರಾರ್ಥನೆ ಹಾಗೂ ಭಾವಗೀತೆ ಹಾಡಿದರು. ಶ್ರೀಮತಿ ಸಂಗೀತ ವಣಗೇರಿ ಕಾರ್ಯಕ್ರಮ ನಿರೂಪಿಸಿದರು. ವಿಭಾಗದ ಡಾ ಸಂಗಮೇಶ ಡಾ. ನೇತ್ರಾವತಿ ಶ್ರೀಮತಿ ಸ್ನೇಹಾ ಶ್ರೀ ವಿವೇಕ ಬಿರಾದಾರ ಉಪಸ್ಥಿತರಿದ್ದರು ಕೊನೆಯಲ್ಲಿ ಕುಮಾರ್ ಸಾತ್ವಿಕ್ ಬೂದಿಹಾಳ ವಂದನಾರ್ಪಣೆ ನೆರವೇರಿಸಿದರು. ಕಾರ್ಯಕ್ರಮದಲ್ಲಿ ಮಹಾವಿದ್ಯಾಲಯದ ಪ್ರಾಧ್ಯಾಪಕರು, ಸಾಹಿತ್ಯಾಸಕ್ತರು ಹಾಗೂವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.
