92ಕ್ಕೂ ಅಧಿಕ ಸ್ಲಂ ಕುಟುಂಬಗಳ ಬದುಕು ಕೇವಲ ಜಮೀನಿನ ಹಕ್ಕಿನ ಪ್ರಶ್ನೆಯಲ್ಲ; ಅವರ ಸುರಕ್ಷಿತ ಓಡಾಟ, ಕುಡಿಯುವ ನೀರು ಹಾಗೂ ನಿತ್ಯದ ಬದುಕಿನ ಹಕ್ಕಿನ ಪ್ರಶ್ನೆಯೂ ಹೌದು. ನ್ಯಾಯಾಲಯದ ವಿಚಾರಣೆ ಅಂತಿಮಗೊಳ್ಳುವವರೆಗೆ ಯಾವುದೇ ಕ್ರಮದಿಂದ ನಿವಾಸಿಗಳ ಮೂಲಭೂತ ಜೀವನಕ್ಕೆ ತೊಂದರೆಯಾಗದಂತೆ ಆಡಳಿತಾತ್ಮಕ ವ್ಯವಸ್ಥೆ ಕಲ್ಪಿಸುವುದು ಈಗ ಪ್ರಮುಖ ಸವಾಲಾಗಿದೆ.
ಒಂದು ಕಡೆ ನ್ಯಾಯಾಲಯದ ಮೆಟ್ಟಿಲೇರಿರುವ ವಾಸಸ್ಥಳದ ಹಕ್ಕಿನ ಹೋರಾಟ; ಮತ್ತೊಂದೆಡೆ ಬದುಕಿನ ಮೂಲಭೂತ ಅವಶ್ಯಕತೆಗಳಾದ ರಸ್ತೆ, ಕುಡಿಯುವ ನೀರು ಮತ್ತು ದಿನಸಿ ಪಡೆಯುವ ದಾರಿಯೇ ಬಂದ್ ಆಗಿದ್ದು, ಕಲಬುರಗಿಯ ಹುಮನಾಬಾದ್ ರಿಂಗ್ ರಸ್ತೆಯ ಕೆ ಕೆ ನಗರ ಸಮೀಪದ ಸಿದ್ದೇಶ್ವರ ಕಾಲನಿ ಮತ್ತು ರಾಮನಗರ ಸ್ಲಂ ವಿಭಾಗ–2ರ ಸರ್ವೇ ನಂ.137ರಲ್ಲಿ ವಾಸಿಸುತ್ತಿರುವ 92ಕ್ಕೂ ಅಧಿಕ ಸ್ಲಂ ನಿವಾಸಿಗಳ ಬದುಕು ಇದೀಗ ಆತಂಕದ ನಡುವೆ ಸಿಲುಕಿದೆ.
“ಗುಡಿಸಲು ತೆರವುಗೊಳಿಸದಂತೆ ಹೈಕೋರ್ಟ್ನಲ್ಲಿ ತಡೆಯಾಜ್ಞೆ ಇದ್ದರೂ, ಜಮೀನಿನ ಸುತ್ತ ಜೆಸಿಬಿ ಮೂಲಕ ತಗ್ಗು ತೋಡಿ ತಂತಿ ಬೇಲಿ ಅಳವಡಿಸುವ ಕಾಮಗಾರಿ ಕೈಗೊಳ್ಳಲಾಗಿದೆ. ಇದರಿಂದ ತಮ್ಮ ಓಡಾಟದ ದಾರಿ ಹಾಗೂ ನೀರು ತರಲು ಬಳಸುತ್ತಿದ್ದ ಮಾರ್ಗ ಬಂದ್ ಆಗಿದೆ” ಎಂಬುದು ನಿವಾಸಿಗಳ ಆರೋಪವಾಗಿದೆ.
ಬದುಕಿನ ದಾರಿಗೆ ಅಡ್ಡಿಯಾದ ತಗ್ಗು
“ಸ್ಲಂ ಪ್ರದೇಶದಲ್ಲಿ ವಾಸಿಸುವ ಕುಟುಂಬಗಳಿಗೆ ಮುಖ್ಯ ರಸ್ತೆಗೆ ಸಂಪರ್ಕ ಕಲ್ಪಿಸುವ ದಾರಿ ಅತ್ಯಂತ ಅಗತ್ಯ. ಆದರೆ ಜಮೀನಿನ ಸುತ್ತ ತಗ್ಗು ತೋಡಿರುವುದರಿಂದ ಓಡಾಡಲು ತೊಂದರೆಯಾಗಿದ್ದು, ವೃದ್ಧರು, ಮಹಿಳೆಯರು ಮತ್ತು ಮಕ್ಕಳು ಅಪಾಯ ಎದುರಿಸುವಂತಾಗಿದೆ” ಎಂದು ನಿವಾಸಿಗಳು ದೂರಿದ್ದಾರೆ.
“ರಸ್ತೆ ಇಲ್ಲದೆ ಹೊರಗೆ ಹೋಗುವುದೇ ಸವಾಲಾಗಿದೆ. ಕುಡಿಯುವ ನೀರು, ದಿನಸಿ ಹಾಗೂ ರೇಷನ್ ತರುವುದಕ್ಕೂ ತೊಂದರೆಯಾಗುತ್ತಿದೆ” ಎಂಬುದು ನಿವಾಸಿಗಳ ಅಳಲು.
“ತಗ್ಗು ತೋಡಿರುವ ಸ್ಥಳದಲ್ಲಿ ವ್ಯಕ್ತಿಯೊಬ್ಬರು ಬಿದ್ದು ಗಾಯಗೊಂಡಿದ್ದಾರೆಂಬ ಆರೋಪವೂ ಕೇಳಿಬಂದಿದೆ. ಹೀಗಾಗಿ ಭದ್ರತೆ ಹೆಸರಿನಲ್ಲಿ ಕೈಗೊಳ್ಳಲಾಗುತ್ತಿರುವ ಕಾಮಗಾರಿ ತಮ್ಮ ಪಾಲಿಗೆ ಮತ್ತಷ್ಟು ಅಪಾಯ ತಂದಿದೆ” ಎಂದು ನಿವಾಸಿಗಳು ಆತಂಕ ವ್ಯಕ್ತಪಡಿಸಿದ್ದಾರೆ.
ʼನ್ಯಾಯಾಲಯದ ಆದೇಶವಿದ್ದರೂ ಏಕೆ ಈ ಕಾರ್ಯಾಚರಣೆ?ʼ
ಸ್ಲಂ ಜನಾಂದೋಲನ ಕರ್ನಾಟಕದ ಸಂಚಾಲಕಿ ರೇಣುಕಾ ಸರಡಗಿ ಮಾತನಾಡಿ, “ಸರ್ವೇ ನಂ.137ರಲ್ಲಿ ವಾಸಿಸುತ್ತಿರುವ 92 ಕುಟುಂಬಗಳಿಗೆ ತೊಂದರೆ ನೀಡದಂತೆ ಹೈಕೋರ್ಟ್ ಜುಲೈ 29ರಂದು ತಡೆಯಾಜ್ಞೆ ನೀಡಿದೆ. ನ್ಯಾಯಾಲಯದ ತಡೆಯಾಜ್ಞೆ ಜಾರಿಯಲ್ಲಿರುವಾಗಲೇ ಗುಡಿಸಲುಗಳ ಸುತ್ತ ತಗ್ಗು ತೋಡಿ ಫೆನ್ಸಿಂಗ್ ಮಾಡಲಾಗುತ್ತಿದೆ. ಯಾವುದೇ ಮುನ್ನೋಟಿಸ್ ನೀಡದೆ ದಿಢೀರ್ ಕಾರ್ಯಾಚರಣೆ ನಡೆಸಲಾಗಿದೆ. ನಿವಾಸಿಗಳ ಓಡಾಟದ ದಾರಿ ಹಾಗೂ ನೀರು ತರಲು ಬಳಸುವ ಮಾರ್ಗವನ್ನು ಬಂದ್ ಮಾಡಲಾಗಿದೆ” ಎಂದು ಆರೋಪಿಸಿದ್ದಾರೆ.
“ನಿವಾಸಿಗಳನ್ನು ಅವಾಚ್ಯವಾಗಿ ನಿಂದಿಸಿ ಬೆದರಿಕೆ ಹಾಕಲಾಗಿದೆ ಎಂಬ ಆರೋಪಗಳ ಬಗ್ಗೆಯೂ ತನಿಖೆ ನಡೆಸಿ, ತಪ್ಪಿತಸ್ಥರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು” ಎಂದು ಒತ್ತಾಯಿಸಿದ್ದಾರೆ.
ʼನಾವು ಬಡವರು, ಎಲ್ಲಿ ಹೋಗಬೇಕು?’
ಸ್ಲಂ ನಿವಾಸಿ ಲಕ್ಷ್ಮೀ ಅವರು “ನಾವು ಬಡವರು, ಎಲ್ಲಿಗೆ ಹೋಗಬೇಕು?” ಎಂದು ಅಸಹಾಯಕತೆಯಿಂದ ಪ್ರಶ್ನಿಸಿ, “ನಮ್ಮ ಓಡಾಟಕ್ಕೆ ಜಾಗ ಬಿಡದೆ ಸುತ್ತಲೂ ಬೇಲಿ ಹಾಕಲಾಗುತ್ತಿದೆ. ಇದರಿಂದ ರಸ್ತೆ, ನೀರು, ದಿನಸಿ ಮತ್ತು ರೇಷನ್ ಪಡೆಯಲು ತೊಂದರೆಯಾಗುತ್ತಿದೆ. ನಮ್ಮ ಬದುಕಿನ ದಾರಿಯನ್ನೇ ಬಂದ್ ಮಾಡಿದಂತಾಗಿದೆ” ಎಂದು ಅಳಲು ತೋಡಿಕೊಂಡರು.
ವೃದ್ಧೆ ಲಕ್ಷ್ಮೀಬಾಯಿ ಅವರು ಮತ್ತಷ್ಟು ನೋವಿನಿಂದ, “ಗುಡಿಸಲುಗಳ ಸುತ್ತ ತೋಡಿರುವ ತಗ್ಗಿನಿಂದ ರಾತ್ರಿಯಲ್ಲಿ ವ್ಯಕ್ತಿಯೊಬ್ಬರು ಬಿದ್ದು ಕಾಲಿಗೆ ಗಾಯ ಮಾಡಿಕೊಂಡಿದ್ದಾರೆ. ನಮಗೆ ಹೀಗೆ ತೊಂದರೆ ಕೊಡುವ ಬದಲು ಈ ತಗ್ಗನ್ನೇ ಮುಚ್ಚಿ. ಸಮಸ್ಯೆ ಬಗೆಹರಿಯುವವರೆಗೆ ನಾವು ಈ ಜಾಗ ಬಿಟ್ಟು ಹೋಗುವುದಿಲ್ಲ” ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಇಲಾಖೆಯ ಸ್ಪಷ್ಟನೆ ಏನು?
ನಿವಾಸಿಗಳ ಆರೋಪಕ್ಕೆ ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆಯ ಕಲಬುರಗಿ ಜಿಲ್ಲಾ ವ್ಯವಸ್ಥಾಪಕಿ ಸಿದ್ದಮ್ಮ ಆರ್ ಎನ್ ಅವರು ಪ್ರತಿಕ್ರಿಯೆ ನೀಡಿದ್ದು, “ಜಮೀನಿನಲ್ಲಿ ಟ್ರಕ್ ಹಾಗೂ ಲಾರಿಗಳ ಸಂಚಾರ ಹೆಚ್ಚಾಗಿದೆ. ಸಾರ್ವಜನಿಕರ ಓಡಾಟವೂ ಹೆಚ್ಚಾಗಿದೆ. ಜಮೀನಿನಲ್ಲಿರುವ ಗುಡಿಸಲುಗಳಿಗೆ ಯಾವುದೇ ತೊಂದರೆ ನೀಡಬಾರದೆಂದು ನ್ಯಾಯಾಲಯದ ತಡೆಯಾಜ್ಞೆ ಇರುವುದರಿಂದ ಅವುಗಳನ್ನು ತೆರವುಗೊಳಿಸದೇ ಸುರಕ್ಷಿತವಾಗಿ ಕಾಯ್ದುಕೊಳ್ಳಲಾಗಿದೆ” ಎಂದು ತಿಳಿಸಿದ್ದಾರೆ.
“ಹಿರಿಯ ಅಧಿಕಾರಿಗಳ ಆದೇಶದಂತೆ ಜಮೀನಿನ ಸುತ್ತ ತಂತಿಬೇಲಿ ಅಳವಡಿಸುವ ಭದ್ರತಾ ಕಾರ್ಯವನ್ನು ಜೆಸಿಬಿ ಮೂಲಕ ಕೈಗೊಳ್ಳಲಾಗುತ್ತಿದೆ. ಗುಡಿಸಲುಗಳನ್ನು ತೆರವುಗೊಳಿಸುವ ಯಾವುದೇ ಕಾರ್ಯಾಚರಣೆ ನಡೆಸುತ್ತಿಲ್ಲ” ಎಂದು ತಿಳಿಸಿದ್ದಾರೆ.
ಆದೇಶ, ಅಧಿಕಾರ, ಬದುಕಿನ ನಡುವೆ ಸಿಲುಕಿದ ಬಡವರು
ಇಲ್ಲಿ ಎರಡು ವಿಭಿನ್ನ ಹೇಳಿಕೆಗಳು ಎದುರಾಗುತ್ತಿದ್ದು, ಒಂದು ಕಡೆ, ನ್ಯಾಯಾಲಯದ ತಡೆಯಾಜ್ಞೆ ಇರುವುದರಿಂದ ಗುಡಿಸಲುಗಳನ್ನು ತೆರವುಗೊಳಿಸುತ್ತಿಲ್ಲ ಎಂದು ಇಲಾಖೆಯು ಸ್ಪಷ್ಟನೆ ನೀಡಿದೆ. ಮತ್ತೊಂದೆಡೆ, ತಡೆಯಾಜ್ಞೆಯ ನಡುವೆಯೇ ಕೈಗೊಂಡಿರುವ ಕಾಮಗಾರಿಯಿಂದ ತಮ್ಮ ಓಡಾಟ ಹಾಗೂ ನೀರಿನ ದಾರಿ ಬಂದ್ ಆಗಿದೆ ಎಂದು ನಿವಾಸಿಗಳು ಆರೋಪಿಸುತ್ತಿದ್ದಾರೆ.
ಇದನ್ನೂ ಓದಿದ್ದೀರಾ? History Repeats | ರೋಮ್ ಉರಿಯುತ್ತಿದ್ದಾಗ ಪಿಟೀಲು ನುಡಿಸಿದ ʼನೀರೋʼ; ಭಾರತ ಉರಿಯುತ್ತಿರುವಾಗ ಭಜನೆ…
ನ್ಯಾಯಾಲಯದ ಆದೇಶದ ವ್ಯಾಪ್ತಿ, ಫೆನ್ಸಿಂಗ್ ಕಾಮಗಾರಿಯ ಸ್ವರೂಪ ಹಾಗೂ ನಿವಾಸಿಗಳ ಮೂಲಭೂತ ಸೌಲಭ್ಯಗಳಿಗೆ ತೊಂದರೆಯಾಗಿದೆಯೇ ಎಂಬ ಪ್ರಶ್ನೆಗಳಿಗೆ ಸಂಬಂಧಪಟ್ಟ ಅಧಿಕಾರಿಗಳಿಂದ ಸ್ಪಷ್ಟತೆ ಅಗತ್ಯವಾಗಿದೆ.
92ಕ್ಕೂ ಅಧಿಕ ಸ್ಲಂ ಕುಟುಂಬಗಳ ಬದುಕು ಕೇವಲ ಜಮೀನಿನ ಹಕ್ಕಿನ ಪ್ರಶ್ನೆಯಲ್ಲ; ಅವರ ಸುರಕ್ಷಿತ ಓಡಾಟ, ಕುಡಿಯುವ ನೀರು ಹಾಗೂ ನಿತ್ಯದ ಬದುಕಿನ ಹಕ್ಕಿನ ಪ್ರಶ್ನೆಯೂ ಹೌದು. ನ್ಯಾಯಾಲಯದ ವಿಚಾರಣೆ ಅಂತಿಮಗೊಳ್ಳುವವರೆಗೆ ಯಾವುದೇ ಕ್ರಮದಿಂದ ನಿವಾಸಿಗಳ ಮೂಲಭೂತ ಜೀವನಕ್ಕೆ ತೊಂದರೆಯಾಗದಂತೆ ಆಡಳಿತಾತ್ಮಕ ವ್ಯವಸ್ಥೆ ಕಲ್ಪಿಸುವುದು ಈಗ ಪ್ರಮುಖ ಸವಾಲಾಗಿದೆ.
