ಕಾವೇರಿ ಜಲಾನಯನ ಪ್ರದೇಶದಲ್ಲಿ ಮಳೆ ಕೊರತೆ ಮತ್ತು ನೀರಿನ ಮಟ್ಟ ಕುಸಿತದಿಂದ ಕೃಷಿ ಚಟುವಟಿಕೆ ವಿಳಂಬಗೊಂಡು ರೈತರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ದುರ್ಬಲ ಮಾನ್ಸೂನ್‌ ಮಾರುತದ ಕಾರಣ ಪ್ರಮುಖ ಅಣೆಕಟ್ಟುಗಳಲ್ಲಿ ನೀರು ಸಂಗ್ರಹ ಇಳಿಕೆಯಾಗಿರುವುದು ಬರದ ಪರಿಸ್ಥಿತಿಗೆ ಕಾರಣವಾಗಿದೆ.
ಕೆರೆ, ಹಳ್ಳಗಳು ಸಣ್ಣಪುಟ್ಟ ಜಲಮೂಲಗಳು ಸಂಪೂರ್ಣ ಬತ್ತಿ ಹೋಗಿವೆ. ಮಂಡ್ಯದಲ್ಲೂ ಮಳೆ ಕೊರತೆಯಿಂದ ಕೇವಲ 5% ಬಿತ್ತನೆಯ ಗುರಿಯನ್ನು ಮಾತ್ರ ಸಾಧಿಸಲಾಗಿದೆ. ಮಳೆಯ ಕೊರತೆ ಮತ್ತು ಸದ್ಯದ ಪರಿಸ್ಥಿತಿಯನ್ನು ಅವಲೋಕಿಸಿ ಸೂಕ್ತ ಬೆಳೆಗಳನ್ನು ಮಾತ್ರ ಬೆಳೆಯಲು ಸರ್ಕಾರ ನಿರ್ದೇಶಿಸಿದೆ.
ಭತ್ತದ ಬದಲಿಗೆ ಜೋಳ ಮತ್ತು ರಾಗಿಯಂತಹ ಕಡಿಮೆ ನೀರಿನಲ್ಲಿ ಬೆಳೆಯಲಾಗುವ ಬೆಳೆಗಳನ್ನು ಆರಿಸಿಕೊಳ್ಳಲು ಸಲಹೆ ನೀಡುತ್ತಿರುವ ಸರ್ಕಾರ ಇಳುವರಿ ಕೊರತೆ, ಬೆಳೆ ನಷ್ಟದ ಸಾಧ್ಯತೆಗಳ ಕುರಿತು ಯೋಚಿಸಬೇಕು ಎಂದು ರೈತರು ಅಭಿಪ್ರಾಯಿಸಿದ್ದಾರೆ.
ಕಬಿನಿ ಅಣೆಕಟ್ಟಿನಲ್ಲಿಯೂ ನೀರಿನ ಸಂಗ್ರಹ ಮಟ್ಟದಲ್ಲಿ ಭಾರೀ ಕುಸಿತ ಉಂಟಾಗಿದ್ದು, ಕೇರಳದಲ್ಲಿ ದುರ್ಬಲಗೊಂಡ ಮಾನ್ಸೂನ್‌ ಪರಿಣಾಮದಿಂದಾಗಿ ಅಗತ್ಯ ಪ್ರಮಾಣದ ನೀರು ಶೇಖರಣೆಯಾಗಿಲ್ಲ. ಮಳೆ ಕೊರತೆಯಿಂದ ಅಂತರ್ಜಲ ಮಟ್ಟವೂ ಕುಸಿತವಾಗಿದ್ದು ಕೊಳವೆ ಬಾವಿಗಳು ಇಂಗಿ ಹೋಗಿದ್ದು, ಬರದ ಛಾಯೆ ಆವರಿಸಿರುವುದರಿಂದ ಬಿತ್ತನೆಯನ್ನೇ ಕೈ ಬಿಡುವ ಸ್ಥಿತಿ ನಿರ್ಮಾಣವಾದಂತಿದೆ.
