ವಿಜಯನಗರ ಜಿಲ್ಲೆಯ ಹೂವಿನ ಹಡಗಲಿಯಲ್ಲಿ ಶಾಸಕ ಕೃಷ್ಣಾ ನಾಯಕ್ ಅವರ ನೇತೃತ್ವದಲ್ಲಿ ಸಾರ್ವಜನಿಕ ಅಹವಾಲು ಸ್ವೀಕಾರ ಕಾರ್ಯಕ್ರಮ ನಡೆಯಿತು. ಈ. ವೇಳ ವಿವಿಧ ಬೇಡಿಕೆಗಳನ್ನು ಈಡೇರಿಸುವಂತೆ ಆಗ್ರಹಿಸಿ ರೈತರು ಅಲ್ಲಿನ ಶಾಸಕರಿಗೆ ಮನವಿ ಸಲ್ಲಿಸಿದರು.
ರೈತರ ಹಕ್ಕೊತ್ತಾಯಗಳು :
“ರಸಗೊಬ್ಬರಗಳ ರೇಟ್ ಪಾಯಿಂಟ್ ಜಿಲ್ಲೆಯಿಂದ 200-300 ಕಿಲೋಮೀಟರ್ ದೂರ ಇರುವ ಕಾರಣ ಕೊಟ್ಟೂರು ಪಟ್ಟಣದಲ್ಲಿ ಸ್ಥಾಪನೆ ಮಾಡಿ ಜಿಲ್ಲೆಯ ರೈತರಿಗೆ ಅನುಕೂಲ ಮಾಡಿಕೊಡುವುದರ ಜೊತೆಗೆ ಕೃಷಿ ವಿಶ್ವವಿದ್ಯಾಲಯ ರಾಯಚೂರು ಹೂವಿನ ಹಡಗಲಿಯಿಂದ 200ರಿಂದ 300 ಕಿಲೋಮೀಟರ್ ದೂರದಲ್ಲಿದೆ, ಆದಕಾರಣ ತಾಲ್ಲೂಕಿನ ಕೊಯಿಲಾರಗಟ್ಟಿ ಗ್ರಾಮದಲ್ಲಿ ಕೃಷಿ ಸಂಶೋಧನ ಕೇಂದ್ರ ಸ್ಥಾಪನೆ ಮಾಡಬೇಕು” ಎಂದು ಆಗ್ರಹಿಸಿದ್ದಾರೆ.
“ಸರ್ಕಾರ ಯೂರಿಯಾ ಗೊಬ್ಬರಕ್ಕೆ FID (ಫಾರ್ಮರ್ ಐಡಿ) ಜಾರಿ ಮಾಡಿದೆ. ಕಂಪನಿಯವರು ಯೂರಿಯಾ ಗೊಬ್ಬರಕ್ಕೆ ಲಿಂಕ್ (ಬೈಪ್ರಾಡೆಕ್ಟ್ ಉಪ ಉತ್ಪನ್ನ)ಗಳನ್ನು ಜಾರಿ ಮಾಡಿದೆ. ಈ ಎರಡನ್ನು ರದ್ದು ಗೊಳಿಸಿ ರೈತರಿಗೆ ನೆರವಾಗಬೇಕು ಮತ್ತು ಕೃಷಿ ಇಲಾಖೆಯಲ್ಲಿ ರೈತ ವಂತಿಕೆಯಿಂದ ನೀಡುವ ಕೃಷಿ ಯಂತ್ರೋಪಕರಣಗಳ ಅನುದಾನದ ಕೊರತೆ ನೀಗಿಸಬೇಕು” ಎಂದು ಮನವಿ ಮಾಡಲಾಗಿದೆ.
“ಗದಗ ಹರಪನಹಳ್ಳಿ ಮಾರ್ಗವಾಗಿ ರೈಲ್ವೆ ಕಾರ್ಯವನ್ನು ಬೇಗ ಪೂರ್ಣ ಗೊಳಿಸಬೇಕು. ಹೂವಿನ ಹಡಗಲಿ ಪಟ್ಟಣದಲ್ಲಿ ಅಂಚೆ ಕಛೇರಿಯ ಖಾಸಗಿ ಕಛೇರಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದು ಸಕಾಲದ ಸರ್ಕಾರಿ ಸ್ವಂತ ಕಟ್ಟಡ ನಿರ್ಮಾಣಕ್ಕೆ ಚಾಲನೆ ನೀಡಲು ಅನುಮತಿಸುವ ಜೊತೆಗೆ ಪೊಲೀಸ್ ತರಬೇತಿ ಕೇಂದ್ರ ಹುಲಿಗುಡ್ಡದ ಎಂಜಿನಿಯರ್ ಕಾಲೇಜ್ ಹಿಂಭಾಗದಲ್ಲಿ 100 ಎಕರೆ ಪ್ರದೇಶ ಪೊಲೀಸ್ ಇಲಾಖೆಯ ಹೆಸರಿನಲ್ಲಿ ಇದ್ದು ತರಬೇತಿ ಕೇಂದ್ರ ಸ್ಥಾಪನೆ ಮಾಡಬೇಕು” ಎಂದು ಆಗ್ರಹಿಸಿದ್ದಾರೆ.
“ಜೆಸ್ಕಾಂ ಇಲಾಖೆಯು ಅಕ್ರಮ ಸಕ್ರಮ ಯೋಜನೆಯನ್ನು ದಿನಾಂಕ 29-9-23 ನೇ ಸಾಲಿನಲ್ಲಿ ರದ್ದು ಗೊಳಿಸಿದ್ದು ಈ ಯೋಜನೆಯನ್ನೂ ಮರು ಜಾರಿಗೊಳಿಸಬೇಕು. ಜೆಸ್ಕಾಂ ಇಲಾಖೆ ಪ್ರೀ ಪೆಯ್ಡ್ ಮೀಟರ್ ಗೃಹ ಬಳಕೆ ಅಳವಡಿಸುವಂತೆ ಹಾಗೂ ಹೊಸದಾಗಿ ವಿದ್ಯುತ್ ಪಡೆಯುವವರಿಗೆ ಪ್ರೀ ಪೇಯ್ಡ್ ಮೀಟರ್ ಕಡ್ಡಾಯಗೊಳಿಸಿದ್ದು ಈ ನಿಯಮವನ್ನು ರದ್ದುಗೊಳಿಸಬೇಕು” ಎಂದು ಮನವಿ ಮಾಡಲಾಗಿದೆ.
“ಕೇಂದ್ರ ಸರ್ಕಾರ ವಿವಿಧ ಬೆಳೆಗಳಿಗೆ ಬೆಂಬಲ ಬೆಲೆ ಘೋಷಣೆ ಮಾಡಿದ್ದು, ರೈತರ ಬೆಳೆ ಬಂದಾಗ ಸಕಾಲಕ್ಕೆ ಖರೀದಿ ಕೇಂದ್ರ ತೆರೆಯದೆ ಇರುವುದರಿಂದ ರೈತರಿಗೆ ಅನ್ಯಾಯವಾಗುತ್ತಿದ್ದು, ಪ್ರತಿ 12 ತಿಂಗಳಿಗೊಮ್ಮೆ ಖರೀದಿ ಕೇಂದ್ರವನ್ನು ತೆರೆಯಬೇಕು” ಎಂದು ರೈತರು ಒತ್ತಾಯಿಸಿದ್ದಾರೆ.
“ಸಿಂಗಟಾಲೂರು ಏತ ನೀರಾವರಿ ಯೋಜನೆ 13 ವರ್ಷ ಕಳೆದರು ಇನ್ನೂ ರೈತರಿಗೆ ಭೂ ಪರಿಹಾರ ಬಾಕಿ 850 ಎಕರೆ 83 ಸೆಂಟ್ಸ್ ಗೆ ಭೂ ಸ್ವಾಧೀನ ಮೊತ್ತ 5.633ಕೋಟಿ ಪರಿಹಾರ ನೀಡಿಲ್ಲ, ಪಿಎಂ ಕಿಸಾನ್ ಯೋಜನೆಯಡಿ ರೈತರಿಗೆ ಹಣ ಖಾತೆಗೆ ಜಮಾ ಆಗುತ್ತಿಲ್ಲ ಬಳ್ಳಾರಿಯಿಂದ ವಿಜಯನಗರ ವಿಭಜನೆಗೊಂಡು ಹೊಸ ಜಿಲ್ಲೆಯಾಗಿರುವುದರಿಂದ ಹಲವು ಸಮಸ್ಯೆಗಳು ಉಂಟಾಗಿವೆ, ಆದ್ದರಿಂದ ಸಕಾಲದಲ್ಲಿ ಜಿಲ್ಲಾಡಳಿತ ಪರಿಹಾರ ಕಂಡುಕೊಳ್ಳಬೇಕು” ಎಂದು ಆಗ್ರಹಿಸಲಾಗಿದೆ.
ಇಂತಹ ಹಲವು ಬೇಡಿಕೆಗಳುಳ್ಳ ಮನವಿ ಪತ್ರವನ್ನು ಶಾಸಕರು, ಡಿಸಿ ಕವಿತಾ ಮನ್ನಿಕೇರಿ ಅವರಿಗೆ ಸಲ್ಲಿಸಲಾಯಿತು. ಈ ಸಂದರ್ಭದಲ್ಲಿ ತಾಲ್ಲೂಕು ಅಧ್ಯಕ್ಷ ಸಿದ್ದಪ್ಪ ಹೊಸಮನಿ, ಉಪಾಧ್ಯಕ್ಷರು ವಿಠಲ್ ನಾಯ್ಕ್ , ಚನ್ನಬಸಪ್ಪ, ಪ್ರಧಾನ ಕಾರ್ಯದರ್ಶಿ ಶಿವರಾಜ ಎಂ ಹೊಳಗುಂದಿ, ಜಿಲ್ಲಾ ಉಪಾಧ್ಯಕ್ಷರು ಗನಿಸಾಬ್ ಮಂಜುನಾಥ್ ಕೆ. ಭೋಜ ನಾಯ್ಕ್ ಸೇರಿದಂತೆ ಹಲವರು ಇದ್ದರು.
