ಸಂವಿಧಾನ ನಮ್ಮ ಜೀವಾಳ. ಸಂವಿಧಾನವನ್ನು ಎಲ್ಲರೂ ಗೌರವಿಸಬೇಕು. ಸಂವಿಧಾನವು ನಮಗೆ ಎಲ್ಲ ರೀತಿಯ ಹಕ್ಕುಗಳನ್ನು ಕೊಟ್ಟಿದೆ. ಅದನ್ನು ಸಮರ್ಪಕವಾಗಿ ಬಳಸಿಕೊಳ್ಳುವ ಕರ್ತವ್ಯ ನಮ್ಮದಾಗಿದೆ ಎಂದು ಕುಮಾರ್ ಇಂಡಿಕರ್ ಐಎಎಸ್ ಹೇಳಿದರು.
ವಿಜಯಪುರ ಜಿಲ್ಲೆಯ ಸಿಂಧಗಿ ತಾಲೂಕಿನ ಸಂಗಮ ಸಂಸ್ಥೆಯಲ್ಲಿ ಹಮ್ಮಿಕೊಂಡಿದ್ದ ಸಂವಿಧಾನ ದಿನಾಚರಣೆ ಕಾರ್ಯಕ್ರಮದಲ್ಲಿ ಮಾತನಾಡಿ, “ಸಂವಿಧಾನದ ಸಾರವನ್ನು ಇವತ್ತಿನ ಯುವಪೀಳಿಗೆಗೆ ತಿಳಿಸುವ ಅಗತ್ಯವಿದೆ. ಸಂವಿಧಾನ ನಮ್ಮ ಭಾರತಕ್ಕೆ ಕೊಟ್ಟು ಇವತ್ತಿಗೆ 72 ವರ್ಷ ಕಳೆದು ಹೋಗಿದೆ. ಇಂದು ಸಂವಿಧಾನ ಓದುವುದು ಮಾತ್ರವಲ್ಲ, ಪ್ರತಿಯೊಬ್ಬರ ಮನಸಲ್ಲಿ ಇರಬೇಕು. ಭಾರತದ ಪ್ರಜೆಗಳಾದ ನಾವು ಅಂದರೆ ಎಲ್ಲ ಜಾತಿ ಧರ್ಮಗಳನ್ನು ಒಳಗೊಂಡಿರುವುದು” ಎಂದು ಹೇಳಿದರು.
“ಪ್ರಶ್ನೆ ಕೇಳಿದರೆ ಯಾವುದೇ ಪ್ರಯೋಜನವಾಗುತ್ತದೆ. ಪ್ರಶ್ನೆ ಕೇಳುವವರನ್ನೇ ನೀವು ದೇಶ ಬಿಟ್ಟು ಬೇರೆ ದೇಶಕ್ಕೆ ಹೋಗಿ ಎನ್ನುವವರೂ ಕೂಡ ನಮ್ಮವರು. ಇದರಿಂದ ತಪ್ಪಿದ್ದರೆ ಕೂಡ ಜನ ಮೌನ ತಾಳಿರುತ್ತಾರೆ. ಆದರೆ ಯಾರೇ ಏನೇ ಅನ್ನಲಿ ನಾವು ಮಾತ್ರ ಸಂವಿಧಾನವನ್ನು ಗೌರಸಬೇಕು. ಅದೇ ರೀತಿ ಪ್ರತಿಯೊಬ್ಬರೂ ಭಾರತದ ಸಂವಿಧಾನವನ್ನು ಗೌರಸಬೇಕು” ಎಂದು ಕಿವಿಮಾತು ಹೇಳಿದರು.
ಸಂಗಮ ಸಂಸ್ಥೆಯ ನಿರ್ದೇಶಕ ಫಾದರ್ ಸಂತೋಷ್ ಮಾತನಾಡಿ, “ಭಾರತದ ದೇಶದಲ್ಲಿ ಡಾ. ಬಾಬಾಸಾಹೇಬ ಅಂಬೇಡ್ಕರ್ವಾರು ಹುಟ್ಟದೇ ಇದ್ದಿದ್ದರೆ, ಇವತ್ತು ಸಂವಿಧಾನ ಬರೆಯದೇ ಇದ್ದಿದ್ದರೆ ನಾವು ನೀವು ಇಲ್ಲಿ ಈ ಕಾರ್ಯಕ್ರಮದಲ್ಲಿ ಕೂರಲು ಸಾಧ್ಯವಿರುತ್ತಿರಲಿಲ್ಲ. ನಾವು ಇಲ್ಲಿ ಸೇರಲು ಅಂಬೇಡ್ಕರ್ ಅವರು ಬರೆದ ಸಂವಿಧಾನ ಅದೇ ರೀತಿ ಉಸಿರಾಡಲು ಗಾಳಿ, ಕುಡಿಯಲು ನೀರು ಎಷ್ಟು ಮುಖ್ಯವೋ ಸಂವಿಧಾನವೂ ಅಷ್ಟೇ ಮುಖ್ಯ” ಎಂದರು.
ಈ ಸುದ್ದಿ ಓದಿದ್ದೀರಾ? ವಿಜಯಪುರ | ಬಿಸಿಯೂಟ ಯೋಜನೆಯ ನಿಧಿ ಹಂಚಿಕೆ; ಪುಡಿಗಾಸಿನ ಏರಿಕೆಗೆ ಎಐಯುಟಿಯುಸಿ ಖಂಡನೆ
“ಭಾರತ ಸಂವಿಧಾನವನ್ನು ಈ ನೆಲದಲ್ಲಿ ಹುಟ್ಟಿರಿವದರಿಂದ ಪ್ರತಿಯೊಬ್ಬರೂ ತಿಳಿದುಕೊಳ್ಳಲೇಬೇಕು. ಸಂವಿಧಾನವೆಂದರೆ ಏನು? ಸಂವಿಧಾನ ಯಾಕೆ ಬರೆದರು? ಸಂವಿಧಾನದಲ್ಲಿ ಏನಿದೆ? ಎಂಬುದನ್ನು ತಿಳಿದುಕೊಳ್ಳದೇ ಇರುವವರು ಈ ಭೂಮಿ ಮೇಲೆ ಇದ್ದೂ ಸತ್ತಂತೆ. ಆದ್ದರಿಂದ ಪ್ರತಿಯೊಬ್ಬರೂ ಸಂವಿಧಾನವನ್ನು ತಿಳಿದುಕೊಳ್ಳಿ, ತಿಳಿಯದಿದ್ದರೆ ನಿಮ್ಮ ಮಕ್ಕಳಿಂದ ಅಥವಾ ಸಂಗಮ ಸಂಸ್ಥೆಯಿಂದ ತಿಳಿದುಕೊಳ್ಳಿ” ಎಂದು ಸಲಹೆ ಹೇಳಿದರು.
ಸಂವಿಧಾನ ದಿನದ ಪ್ರಯುಕ್ತ ನೂರಾರು ಸಂಖ್ಯೆಯಲ್ಲಿ ಶೋಷಿತ ಸಮುದಾಯಗಳು, ಕಾರ್ಯಕರ್ತರು ಸೇರಿ ಸಂವಿಧಾನ ಜಾಥಾ ನಡೆಸಿದರು.
ಕಾರ್ಯಕ್ರಮದಲ್ಲಿ ಡಾ. ದಸ್ತಿಗಿರಿ ಮುಲ್ಲಾ, ಸಂಗಮ ಸಂಸ್ಥೆಯ ಸಹ ನಿರ್ದೇಶಕಿ ಸಿಸ್ಟರ್ ಸಿಂತಿಯ ಡಿ. ಮೇಲ್ಲೋ, ಮಾಲಕಪ್ಪ ಹಲಗಿ, ಶ್ರೀಶೈಲ ಗಣಿಹಾರ, ಉಮೇಶ್ ಹಾಗೂ ಹಳ್ಳಿ ಅಭಿವೃದ್ಧಿ ಸಮಿತಿಗಳ ಜನವೇದಿಕೆ ನಾಯಕರು, ಮಹಿಳಾ ಸಂಘದ ಸದಸ್ಯರು, ಕಟ್ಟಡ ಕಾರ್ಮಿಕರು, ಮನರೇಗಾದಲ್ಲಿ ಕೆಲಸ ಮಾಡುವವರು ಇದ್ದರು.
