ಕೇಟರಿಂಗ್ ಸಿಬ್ಬಂದಿಯೊಬ್ಬರು ಅಸ್ವಸ್ಥಗೊಂಡಿರುವುದನ್ನು ತಿಳಿದು ತನ್ನ ಮದುವೆ ನಿಲ್ಲಿಸಿ ಕೇಟರಿಂಗ್ ಸಿಬ್ಬಂದಿಗೆ ನವವಿವಾಹಿತ ವೈದ್ಯೆಯೊಬ್ಬರು ಪ್ರಥಮ ಚಿಕಿತ್ಸೆ ನೀಡಿರುವ ಘಟನೆ ಕೇರಳದ ಕಣ್ಣೂರಿನಲ್ಲಿ ನಡೆದಿದೆ. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ತೀವ್ರ ವೈರಲ್ ಆಗಿದೆ.
ಕಣ್ಣೂರಿನ ಪಾನೂರ್ ಮೂಲದ ಡಾ. ಶಿರಿನ್ ಸುಬೈರ್ ಅವರು ಡಾ. ರಿಜಾಜ್ ಅವರೊಂದಿಗೆ ಮದುವೆ ಆಗಿದ್ದಾರೆ. ಮದುವೆ ಸಮಾರಂಭದಲ್ಲಿ ಕೇಟರಿಂಗ್ ಮಹಿಳೆರು ಅಸ್ವಸ್ಥರಾಗಿದ್ದಾರೆ. ಒಬ್ಬರ ಮೂಗಿನಿಂದ ರಕ್ತಸ್ರಾವವಾದರೆ, ಇನ್ನೊಬ್ಬರು ತಲೆತಿರುಗಿ ಬಿದ್ದಿದ್ದಾರೆ. ಈ ಮಾಹಿತಿ ತಿಳಿದ ಶಿರಿನ್ ಕೂಡಲೇ ಪ್ರಥಮ ಚಿಕಿತ್ಸೆ ನೀಡಿದ್ದಾರೆ.
ಇದನ್ನೂ ಓದಿ: ಚಿಂತಾಮಣಿ | ಕರ್ತವ್ಯನಿರತ ವೈದ್ಯೆಯ ನಿಂದನೆ; ಎಫ್ಐಆರ್ ದಾಖಲು
“ನಾನು ವೈದ್ಯ ಎಂದು ಎಲ್ಲರಿಗೂ ತಿಳಿದಿತ್ತು. ಆದ್ದರಿಂದ ಯಾರೋ ಒಬ್ಬರು ನನ್ನ ಬಳಿ ನೋಡುವಂತೆ ಹೇಳಿದರು. ನಾನು ವೈದ್ಯೆಯಾಗಿ ಏನು ಅಗತ್ಯವಿರುವುದನ್ನು ಮಾಡಬೇಕೋ ಅದನ್ನು ಮಾಡಿದ್ದೇನೆ ಅಷ್ಟೇ” ಎಂದು ಶಿರಿನ್ ಮಾಧ್ಯಮವೊಂದಕ್ಕೆ ತಿಳಿಸಿದ್ದಾರೆ.
“ಇಂತಹ ಸಂದರ್ಭದಲ್ಲಿ ಪ್ರಥಮ ಚಿಕಿತ್ಸೆ ನೀಡುವುದು ಮತ್ತು ನಂತರ ಆಸ್ಪತ್ರೆಗೆ ಕರೆದೊಯ್ಯುವುದು ಅತ್ಯಗತ್ಯ, ಇದು ನಮ್ಮ ಕರ್ತವ್ಯ. ಇದು ಖಂಡಿತವಾಗಿಯೂ ದೊಡ್ಡ ವಿಷಯವಲ್ಲ. ಯಾರಾದರೂ ರಸ್ತೆಯಲ್ಲಿ ಕುಸಿದು ಬೀಳುವುದನ್ನು ಅಥವಾ ಮೂರ್ಛೆ ಹೋಗುವುದನ್ನು ನಾವು ನೋಡಿದರೆ, ಪ್ರತಿಕ್ರಿಯಿಸುವುದು ನಮ್ಮ ಕರ್ತವ್ಯ. ಅದು ನಮ್ಮ ಕೆಲಸ. ನಾವು ಎಲ್ಲಿಯಾದರೂ ಈ ಕೆಲಸ ಮಾಡಲೇಬೇಕು. ನಂತರ ಅಸ್ವಸ್ಥರನ್ನು ಆಸ್ಪತ್ರೆಗೆ ಸಾಗಿಸಬೇಕು” ಎಂದು ಶಿರಿನ್ ಹೇಳಿದ್ದಾರೆ.
ಶಿರಿನ್ ಒಟ್ಟಪಾಲಂನ ವಲ್ಲುವನಾಡ್ ಆಸ್ಪತ್ರೆಯಲ್ಲಿ ತುರ್ತು ವೈದ್ಯಕೀಯ ಘಟಕದಲ್ಲಿ ವರ್ಷದ ಎಂಡಿ ವ್ಯಾಸಂಗ ಮಾಡುತ್ತಿದ್ದಾರೆ. ಮೂಗಿನಿಂದ ರಕ್ತಸ್ರಾವವಾಗುತ್ತಿದ್ದ ಮಹಿಳೆಗೆ, ಶಿರಿನ್ ಮುಂದಕ್ಕೆ ಬಾಗಿ ಮೂಗಿನ ಮೃದುವಾದ ಭಾಗವನ್ನು 10 ರಿಂದ 15 ನಿಮಿಷಗಳ ಕಾಲ ಬಟ್ಟೆಯಿಂದ ಹಿಡಿದಿದ್ದು, ಬಾಯಿಯ ಮೂಲಕ ಉಸಿರಾಡುವಂತೆ ಸೂಚಿಸಿದ್ದಾರೆ. ಮೂರ್ಛೆ ಹೋಗುತ್ತಿದ್ದ ಎರಡನೇ ಮಹಿಳೆಯ ಕಾಲುಗಳನ್ನು ಮೇಲಕ್ಕೆತ್ತಿ ಮಲಗಿಸಿದ್ದಾರೆ.
