ವಿಶ್ವದಾದ್ಯಂತ ಕೋಟ್ಯಂತರ ಜನರು ನಂಬಿ ಬಳಸುತ್ತಿರುವ ವಾಟ್ಸಾಪ್‌ನ ‘ಎಂಡ್-ಟು-ಎಂಡ್ ಎನ್ಕ್ರಿಪ್ಷನ್’ ಸುರಕ್ಷತಾ ವ್ಯವಸ್ಥೆಯ ಬಗ್ಗೆ ಗಂಭೀರ ಪ್ರಶ್ನೆಗಳು ಎದ್ದಿವೆ. ವಾಟ್ಸಾಪ್‌ನಲ್ಲಿನ ಅತ್ಯಂತ ಖಾಸಗಿ ಸಂದೇಶಗಳನ್ನು ಮಾತೃಸಂಸ್ಥೆಯಾದ ಮೆಟಾ ಓದಬಲ್ಲದು ಎಂದು ಆರೋಪಿಸಿ ಅಂತಾರಾಷ್ಟ್ರೀಯ ಬಳಕೆದಾರರ ಗುಂಪೊಂದು ಅಮೆರಿಕದ ಸ್ಯಾನ್ ಫ್ರಾನ್ಸಿಸ್ಕೋ ನ್ಯಾಯಾಲಯದಲ್ಲಿ ದಾವೆ ಹೂಡಿದ್ದು, ತಂತ್ರಜ್ಞಾನ ವಲಯದಲ್ಲಿ ಸಂಚಲನ ಮೂಡಿಸಿದೆ.
ಜನವರಿ 23 ರಂದು ಆಸ್ಟ್ರೇಲಿಯಾ, ದಕ್ಷಿಣ ಆಫ್ರಿಕಾ ಮತ್ತು ಮೆಕ್ಸಿಕೋ ಮೂಲದ ಅರ್ಜಿದಾರರು ಸಲ್ಲಿಸಿರುವ 51 ಪುಟಗಳ ಈ ದಾವೆಯಲ್ಲಿ, ವಾಟ್ಸಾಪ್‌ನ ಗೌಪ್ಯತಾ ವೈಶಿಷ್ಟ್ಯವು ಕೇವಲ ಒಂದು “ಶ್ಯಾಮ್” (Sham) ಅಥವಾ ನಾಟಕ ಎಂದು ಆರೋಪಿಸಲಾಗಿದೆ. ಮೆಟಾ ಸಂಸ್ಥೆಯ ಉದ್ಯೋಗಿಗಳು ಕೇವಲ ಒಂದು ‘ಟಾಸ್ಕ್’ (Task) ಮೂಲಕ ಎಂಜಿನಿಯರಿಂಗ್ ತಂಡಕ್ಕೆ ಮನವಿ ಸಲ್ಲಿಸಿ, ಯಾವುದೇ ಕಠಿಣ ಪರಿಶೀಲನೆಯಿಲ್ಲದೆ ಬಳಕೆದಾರರ ಸಂದೇಶಗಳನ್ನು ನೋಡಲು ಅನುಮತಿ ಪಡೆಯುತ್ತಾರೆ ಎಂದು ದೂರಿನಲ್ಲಿ ವಿವರಿಸಲಾಗಿದೆ.
ಬಳಕೆದಾರರ ‘ಯೂನಿಕ್ ಐಡಿ’ (Unique ID) ಬಳಸಿಕೊಂಡು ವಿಶೇಷ ವಿಜೆಟ್ ಮೂಲಕ ನೈಜ ಸಮಯದಲ್ಲಿ ಸಂದೇಶಗಳನ್ನು ವೀಕ್ಷಿಸಬಹುದು, ಅಷ್ಟೇ ಅಲ್ಲದೆ ಬಳಕೆದಾರರು ಡಿಲೀಟ್ ಮಾಡಿದ್ದಾರೆ ಎಂದು ಭಾವಿಸುವ ಸಂದೇಶಗಳನ್ನೂ ಸಹ ಸಂಸ್ಥೆಯು ಯಾವುದೇ ಸಮಯದ ಮಿತಿಯಿಲ್ಲದೆ ನೋಡಬಹುದಾಗಿದೆ ಎಂಬ ಗಂಭೀರ ಆರೋಪವನ್ನು ಅರ್ಜಿದಾರರು ಮಾಡಿದ್ದಾರೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಗುಣಮಟ್ಟ ಕುರಿತು ಮಾತಾಡಲು ಮೋದೀಜಿಗೆ ನೈತಿಕ ಹಕ್ಕು ಇಲ್ಲವೇ ಇಲ್ಲ!
ಆದರೆ, ಈ ಎಲ್ಲ ಆರೋಪಗಳನ್ನು ಮೆಟಾ ಸಂಸ್ಥೆಯು “ಸಂಪೂರ್ಣ ಸುಳ್ಳು ಮತ್ತು ಅಸಂಬದ್ಧ” ಎಂದು ತಳ್ಳಿಹಾಕಿದೆ. ವಾಟ್ಸಾಪ್‌ನ ಎನ್ಕ್ರಿಪ್ಷನ್ ವ್ಯವಸ್ಥೆಯು ಸಂದೇಶಗಳನ್ನು ಕಳುಹಿಸಿದವರು ಮತ್ತು ಸ್ವೀಕರಿಸಿದವರು ಮಾತ್ರ ಓದಲು ಸಾಧ್ಯವಾಗುವಂತೆ ವಿನ್ಯಾಸಗೊಳಿಸಲಾಗಿದೆ. ಸ್ವತಃ ವಾಟ್ಸಾಪ್ ಅಥವಾ ಮೆಟಾ ಕೂಡ ಈ ಸಂದೇಶಗಳನ್ನು ಡಿಕ್ರಿಪ್ಟ್ (Decrypt) ಮಾಡಲು ಸಾಧ್ಯವಿಲ್ಲ, ಏಕೆಂದರೆ ಎನ್ಕ್ರಿಪ್ಷನ್ ಕೀಗಳು (Keys) ಕೇವಲ ಬಳಕೆದಾರರ ಸಾಧನಗಳಲ್ಲಿ ಮಾತ್ರ ಇರುತ್ತವೆ ಎಂದು ಸಂಸ್ಥೆ ಸ್ಪಷ್ಟನೆ ನೀಡಿದೆ. ಸದ್ಯಕ್ಕೆ ದಾಖಲಾಗಿರುವ ದಾವೆಯಲ್ಲಿ ಮೆಟಾ ಎಂಜಿನಿಯರ್‌ಗಳು ಎನ್ಕ್ರಿಪ್ಷನ್ ಅನ್ನು ಹೇಗೆ ಭೇದಿಸುತ್ತಾರೆ ಎಂಬುದಕ್ಕೆ ಯಾವುದೇ ದೃಢವಾದ ತಾಂತ್ರಿಕ ಸಾಕ್ಷ್ಯಗಳನ್ನು ಒದಗಿಸಲಾಗಿಲ್ಲ ಎಂದು ವರದಿಗಳು ತಿಳಿಸಿವೆ.
ಈ ಬೆಳವಣಿಗೆಯ ನಡುವೆ, ಎಕ್ಸ್ (X) ಮಾಲೀಕ ಎಲಾನ್ ಮಸ್ಕ್ ಸಾಮಾಜಿಕ ಜಾಲತಾಣದಲ್ಲಿ ಪ್ರತಿಕ್ರಿಯಿಸಿ, “ವಾಟ್ಸಾಪ್ ಸುರಕ್ಷಿತವಲ್ಲ ಮತ್ತು ಸಿಗ್ನಲ್ ಆ್ಯಪ್ ಕೂಡ ಸಂಶಯಾಸ್ಪದವಾಗಿದೆ,” ಎಂದು ಟೀಕಿಸಿದ್ದಾರೆ. ಬದಲಿಗೆ, ಕಳೆದ ವರ್ಷದ ನವೆಂಬರ್‌ನಲ್ಲಿ ತಮ್ಮ xAI ಸಂಸ್ಥೆ ಬಿಡುಗಡೆ ಮಾಡಿರುವ ಗೌಪ್ಯತಾ-ಕೇಂದ್ರಿತ ‘ಎಕ್ಸ್ ಚಾಟ್’ (X Chat) ಬಳಸುವಂತೆ ಬಳಕೆದಾರರಿಗೆ ಕರೆ ನೀಡಿದ್ದಾರೆ. ಗೌಪ್ಯತೆಯೇ ವಾಟ್ಸಾಪ್‌ನ ಪ್ರಮುಖ ಬಂಡವಾಳವಾಗಿರುವುದರಿಂದ, ನ್ಯಾಯಾಲಯದಲ್ಲಿ ಈ ಆರೋಪಗಳು ಸಾಬೀತಾದರೆ ಸಂಸ್ಥೆಯು ಭಾರಿ ದಂಡದ ಜೊತೆಗೆ ಬಳಕೆದಾರರ ವಿಶ್ವಾಸವನ್ನೂ ಕಳೆದುಕೊಳ್ಳುವ ಸಾಧ್ಯತೆಯಿದೆ.
