ಗಗನಚುಂಬಿ ಕಟ್ಟಡಗಳು, ವಿಲಾಸಿ ಜೀವನ, ಐಷಾರಾಮಿ ಕಾರುಗಳಿಗೆ ಹೆಸರುವಾಸಿಯಾಗಿರುವ ದುಬೈ ನಗರ ಇದೀಗ ಮತ್ತೊಂದು ವಿಶ್ವದಾಖಲೆಯ ಮೂಲಕ ಸುದ್ದಿಯಾಗಿದೆ.
ದುಬೈನ ಜುಮೇರಾದಲ್ಲಿನ ಫೋರ್ ಸೀಸನ್ಸ್ ಹೋಟೆಲ್‌ನಲ್ಲಿ ಶನಿವಾರ ರಾತ್ರಿ ನಡೆದ ‘ಮೋಸ್ಟ್ ನೋಬಲ್ ನಂಬರ್ಸ್’ ಚಾರಿಟಿ ಹರಾಜಿನಲ್ಲಿ ʻದುಬೈ P 7′ ನಂಬರ್ ಪ್ಲೇಟ್‌ ಬರೋಬ್ಬರಿ 55 ಮಿಲಿಯನ್ ದಿರ್ಹಮ್‌ಗಳಿಗೆ (ಅಂದಾಜು ₹1,22,61,44,700) ಮಾರಾಟವಾಗಿದೆ. ಆದರೆ ಈ ಗಿನ್ನಿಸ್ ದಾಖಲೆ ಮೊತ್ತಕ್ಕೆ ಬಿಡ್ ಮಾಡಿದ ವ್ಯಕ್ತಿ ತಮ್ಮ ಹೆಸರನ್ನು ಇನ್ನೂ ಬಹಿರಂಗಪಡಿಸಿಲ್ಲ.
15 ಮಿಲಿಯನ್ ದಿರ್ಹಮ್ ಮೊತ್ತದಿಂದ ಬಿಡ್ಡಿಂಗ್ ಪ್ರಾರಂಭವಾಗಿತ್ತು. ಆದರೆ ಕೆಲ ಸೆಕೆಂಡುಗಳಲ್ಲೇ 35 ಮಿಲಿಯನ್ ದಿರ್ಹಮ್ ತಲುಪಿದ ಕಾರಣ ಕೆಲಕಾಲ ಬಿಡ್ಡಿಂಗ್ ನಿಲ್ಲಿಸಲಾಗಿತ್ತು. ಈ ವೇಳೆ ಟೆಲಿಗ್ರಾಮ್ ಅಪ್ಲಿಕೇಶನ್‌ನ ಸಂಸ್ಥಾಪಕ ಮತ್ತು ಮಾಲೀಕರಾದ ಫ್ರೆಂಚ್ ಮೂಲದ ಉದ್ಯಮಿ ಪಾವೆಲ್ ವ್ಯಾಲೆರಿವಿಚ್ ಡುರೊವ್ 35 ಮಿಲಿಯನ್ ದಿರ್ಹಮ್‌ಗೆ ಬಿಡ್ ಮಾಡಿದ್ದರು. ಬಳಿಕ ಬಿಡ್ಡಿಂಗ್ ಪ್ರಕ್ರಿಯೆ ಪುನಾರಂಭವಾದಾಗ ʻದುಬೈ P 7′ ಹರಾಜು ಬೆಲೆ 55 ಮಿಲಿಯನ್ ದಿರ್ಹಮ್ ತಲುಪಿತು.
ಈ ಸುದ್ದಿ ಓದಿದ್ದೀರಾ?: ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬಂಧನ
ಯುಎಇ ಸರ್ಕಾರದ ʻ1 ಬಿಲಿಯನ್ ಮೀಲ್ಸ್ʼ (ನೂರು ಕೋಟಿ ಜನರಿಗೆ ಆಹಾರ) ಪದ್ಧತಿಯ ಭಾಗವಾಗಿ ಹರಾಜು ಪ್ರಕ್ರಿಯೆ ಆಯೋಜಿಸಲಾಗಿತ್ತು.
ʻದುಬೈ P 7’ ಜೊತೆಗೆ H 31, W 78, N41, AA 19, AA 22, X 36, Z 37, AA 80 ಸೇರಿದಂತೆ ಹಲವು ವಿಐಪಿ ನಂಬರ್ ಪ್ಲೇಟ್‌ಗಳು ಮತ್ತು ದೂರಸಂಪರ್ಕ ಕಂಪನಿಗಳಾದ ಎತ್ತಿಸಲಾತ್‌ನ 11 ಮತ್ತು DUನ 10 ಫ್ಯಾನ್ಸಿ ಫೋನ್ ಸಂಖ್ಯೆಗಳನ್ನು ಸಹ ಹರಾಜು ಮಾಡಲಾಯಿತು. ಹರಾಜಿನಿಂದ ಸುಮಾರು 100 ಮಿಲಿಯನ್ ದಿರ್ಹಮ್ ($27 ಮಿಲಿಯನ್) ಸಂಗ್ರಹಿಸಲಾಗಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ಈ ಎಲ್ಲಾ ಮೊತ್ತವನ್ನೂ ಜಾಗತಿಕ ಹಸಿವು ನೀಗಿಸುವ ಉದ್ದೇಶದಿಂದ ಆರಂಭಿಸಲಾಗಿರುವ ‘ಒನ್‌ ಬಿಲಿಯನ್ ಮೀಲ್ಸ್’ ಅಭಿಯಾನಕ್ಕೆ ಹಸ್ತಾಂತರಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
2008ರಲ್ಲಿ ಅಬುಧಾಬಿಯಲ್ಲಿ ನಡೆದ ಹರಾಜಿನಲ್ಲಿ ʻನಂಬರ್-1ʼ ಪ್ಲೇಟ್‌ 52.22 ಮಿಲಿಯನ್ ದಿರ್ಹಮ್‌ಗೆ ಮಾರಾಟವಾಗಿತ್ತು, ಇದು ಈವರೆಗಿನ ಅತಿಹೆಚ್ಚು ಮೊತ್ತ ಬಿಡ್ ಮಾಡಲಾದ ನಂಬರ್ ಪ್ಲೇಟ್‌ ಎಂಬ ದಾಖಲೆ ಹೊಂದಿತ್ತು.
