ಇತ್ತೀಚೆಗೆ, ಹಾರ್ವರ್ಡ್ ವಿಶ್ವವಿದ್ಯಾಲಯವು ಅಮೆರಿಕ ಸರ್ಕಾರದೊಂದಿಗೆ ಸಂಧಾನ ಮಾತುಕತೆ ನಡೆದಿದೆ. ಕೆಲವು ರಿಯಾಯಿತಿಗಳನ್ನು ಪಡೆದುಕೊಂಡಿದೆ ಎಂದು ವರದಿಯಾಗಿದೆ. ಈ ಬೆನ್ನಲ್ಲೇ, ತಮ್ಮ ಆಡಳಿತವು ಹಾರ್ವರ್ಡ್ ವಿಶ್ವವಿದ್ಯಾಲಯದಿಂದ 100 ಕೋಟಿ ಡಾಲರ್ (9,000 ಕೋಟಿ ರೂ.) ಪರಿಹಾರವನ್ನು ಕೋರಲಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಿಳಿಸಿದ್ದಾರೆ.
ತಮ್ಮ ಸೋಷಿಯಲ್ ಮೀಡಿಯಾ ವೇದಿಕೆ ‘ಟ್ರುತ್‌’ನಲ್ಲಿ ಪೋಸ್ಟ್ ಮಾಡಿರುವ ಟ್ರಂಪ್, “ನಾವು ಈಗ ಒಂದು ಬಿಲಿಯನ್ ಡಾಲರ್ ಪರಿಹಾರವನ್ನು ಕೇಳುತ್ತೇವೆ. ಅಲ್ಲದೆ, ಭವಿಷ್ಯದಲ್ಲಿ ಹಾರ್ವರ್ಡ್ ವಿಶ್ವವಿದ್ಯಾಲಯದೊಂದಿಗೆ ಯಾವುದೇ ಸಂಬಂಧವನ್ನು ಹೊಂದಲು ಬಯಸುವುದಿಲ್ಲ” ಎಂದು ಹೇಳಿದ್ದಾರೆ.
ಪ್ಯಾಲೆಸ್ತೀನ್ ಪರ ಪ್ರತಿಭಟನೆಗಳ ಸಮಯದಲ್ಲಿ ಯಹೂದಿ ವಿದ್ಯಾರ್ಥಿಗಳನ್ನು ರಕ್ಷಿಸುವಲ್ಲಿ ಹಾರ್ವರ್ಡ್ ಮತ್ತು ಇತರ ಕಾಲೇಜುಗಳು ವಿಫಲವಾಗಿವೆ. ಅವುಗಳು ‘ವೋಕ್’ (woke) ಸಿದ್ಧಾಂತವನ್ನು ಉತ್ತೇಜಿಸುತ್ತಿವೆ” ಎಂದು ಅಮೆರಿಕದ ಅಧಿಕಾರಿಗಳು ಆರೋಪಿಸಿದ್ದಾರೆ. ಇದೇ ಆರೋಪಗಳ ಮೇಲೆ ಕಾನೂನು ದೂರುಗಳನ್ನು ದಾಖಲಿಸಿರುವ ಅಮೆರಿಕ ಸರ್ಕಾರವು ಭಾರೀ ಮೊತ್ತದ ಪರಿಹಾರ ಪಾವತಿಗಾಗಿ ವಿಶ್ವವಿದ್ಯಾಲಯವನ್ನು ಒತ್ತಾಯಿಸಿತ್ತು. ಹಾರ್ವರ್ಡ್ ಜೊತೆ 500 ಮಿಲಿಯನ್ ಡಾಲರ್ (4,500 ಕೋಟಿ ರೂ.) ಮೊತ್ತದ ಪರಿಹಾರ ಬೇಡಿಕೆಯ ಸಂಧಾನಕ್ಕೆ ಮಾತುಕತೆಗಳು ನಡೆಯುತ್ತಿವೆ ಎಂದು 2025ರ ಸೆಪ್ಟೆಂಬರ್‌ನಲ್ಲಿ ಟ್ರಂಪ್ ಹೇಳಿದ್ದರು.
ವಿಮರ್ಶಕರು ಇದನ್ನು ಉದಾರವಾದಿ ವಿಶ್ವವಿದ್ಯಾಲಯಗಳ ಮೇಲೆ ಸರ್ಕಾರ ನಡೆಸುತ್ತಿರುವ ಒತ್ತಡದ ತಂತ್ರ ಎಂದು ಕರೆದಿದ್ದರು.
ಆದಾಗ್ಯೂ, ಅಂದಿನಿಂದ ನಡೆದ ಸುದೀರ್ಘ ಮಾತುಕತೆಗಳ ನಂತರ ಹಾರ್ವರ್ಡ್ ವಿವಿಯು ಪರಿಹಾರ ಪಾವತಿಸಬೇಕೆಂಬ ತಮ್ಮ ಬೇಡಿಕೆಯನ್ನು ಟ್ರಂಪ್ ಆಡಳಿತವು ಕೈಬಿಟ್ಟಿದೆ ಎಂದು ನ್ಯೂಯಾರ್ಕ್ ಟೈಮ್ಸ್ ಸೋಮವಾರ ವರದಿ ಮಾಡಿತ್ತು. ಆದರೆ, ಇದೀಗ, ಮತ್ತೆ ಪರಿಹಾರ ಕೋರುವ ಚರ್ಚೆ ಮುಂದುರೆಯುತ್ತದೆ ಎಂದು ಟ್ರಂಪ್ ಹೇಳಿದ್ದಾರೆ.
“ಹಾರ್ವರ್ಡ್ ವಿಶ್ವವಿದ್ಯಾಲಯವು ಉದ್ಯೋಗ ತರಬೇತಿಯ ಜಟಿಲ ಪರಿಕಲ್ಪನೆಯನ್ನು ತರಲು ಬಯಸಿದೆ. ಆದರೆ ಅದು ಸಂಪೂರ್ಣವಾಗಿ ಅಸಮರ್ಪಕವಾಗಿದ್ದು, ಯಶಸ್ವಿಯಾಗುವುದಿಲ್ಲವೆಂದು ನಮಗೆ ಅನ್ನಿಸಿದ್ದರಿಂದ ಅದನ್ನು ತಿರಸ್ಕರಿಸಿದ್ದೇವೆ. 500 ಮಿಲಿಯನ್ ಡಾಲರ್‌ಗಿಂತ ಹೆಚ್ಚಿನ ನಗದು ಪಾವತಿಯಿಂದ ತಪ್ಪಿಸಿಕೊಳ್ಳಲು ಹಾರ್ವರ್ಡ್ ಹೂಡಿದ ತಂತ್ರವಿದು. ಅವರು ಮಾಡಿರುವ ಗಂಭೀರ ಮತ್ತು ಹೇಯ ಕಾನೂನುಬಾಹಿರ ಕೃತ್ಯಗಳಿಗಾಗಿ ಈ ಮೊತ್ತವು ಇನ್ನೂ ಹೆಚ್ಚಿರಬೇಕಿತ್ತು” ಎಂದು ಟ್ರಂಪ್ ಹೇಳೀದ್ದಾರೆ. ಆದರೆ, ಹಾರ್ವರ್ಡ್ ಯಾವ ಕಾನೂನುಗಳನ್ನು ಉಲ್ಲಂಘಿಸಿದೆ ಎಂಬುದನ್ನು ಟ್ರಂಪ್ ನಿರ್ದಿಷ್ಟವಾಗಿ ತಿಳಿಸಿಲ್ಲ.
ಕಳೆದ ವರ್ಷ, ಮತ್ತೊಂದು ಪ್ರತಿಷ್ಠಿತ ಸಂಸ್ಥೆಯಾದ ಕೊಲಂಬಿಯಾ ವಿಶ್ವವಿದ್ಯಾಲಯದಿಂದಲೂ 200 ಮಿಲಿಯನ್ ಡಾಲರ್ (1,800 ಕೋಟಿ ರೂ.) ಪಾವತಿಸಬೇಕೆಂದು ಟ್ರಂಪ್ ಆಡಳಿತ ಒತ್ತಾಯಿಸಿತ್ತು. ಟ್ರಂಪ್ ಆಡಳಿತದ ಒತ್ತಡಕ್ಕೆ ಮಣಿದ ವಿಶ್ವವಿದ್ಯಾಲಯವು ಆ ಮಪತ್ತವನ್ನು ಪಾವತಿಸುವುದಾಗಿ ಒಪ್ಪಿಕೊಂಡಿತ್ತು. ಅಲ್ಲದೆ, ಪ್ರವೇಶಾತಿ ಅಥವಾ ನೇಮಕಾತಿಯಲ್ಲಿ ಜನಾಂಗವನ್ನು ಪರಿಗಣಿಸುವುದನ್ನು ನಿಷೇಧಿಸುವ ನಿಯಮಗಳನ್ನು ಪಾಲಿಸುವುದಾಗಿ ಭರವಸೆ ನೀಡಿತ್ತು.
