“ಭೂಮಿಯ ಮೇಲೆ ಸ್ವರ್ಗ ಎಲ್ಲಿದೆ?” ಎಂದರೆ, ನಮ್ಮ ಸುತ್ತಮುತ್ತಲಿನ ಪುಟ್ಟ ಮಕ್ಕಳು ಓದುತ್ತಿರುವ ಶಾಲೆಗಳೇ ಅದು. ಬೇಸಿಗೆ ರಜೆ ಮುಗಿದು ಹೊಸ ಶೈಕ್ಷಣಿಕ ವರ್ಷ ಆರಂಭವಾಗಿದೆ. ಹೊಸ ಸಮವಸ್ತ್ರ, ಪುಸ್ತಕಗಳು, ಪೆನ್ ಮತ್ತು ಸ್ಕೂಲ್ ಬ್ಯಾಗ್‌ಗಳ ಜೊತೆಗೆ ಹೊಸ ಉತ್ಸಾಹ, ಹುಮ್ಮಸ್ಸು ಮತ್ತು ಜ್ಞಾನದ ಕಾತುರದಿಂದ ಮಕ್ಕಳು ತಮ್ಮ ಪುಟ್ಟ ಹೆಜ್ಜೆಗಳನ್ನು ಶಾಲೆಗಳತ್ತ ಇಡುತ್ತಿದ್ದಾರೆ. ಈ ಶಕ್ತಿಯನ್ನು ಪ್ರೋತ್ಸಾಹಿಸುವುದು ಶಿಕ್ಷಕರ ಪ್ರಮುಖ ಹೊಣೆಗಾರಿಕೆ.
ಶಾಲೆಗಳು ಮಕ್ಕಳ ಮುಗ್ಧತೆಯನ್ನು ಕಾಪಾಡುವ, ಜ್ಞಾನದ ಬೆಳಕನ್ನು ಹರಡುವ ಮತ್ತು ಮೌಲ್ಯಗಳನ್ನು ಬೆಳೆಸುವ ಪವಿತ್ರ ಕೇಂದ್ರಗಳಾಗಿವೆ. ಶಾಲೆಯು ಕೇವಲ ಶಿಕ್ಷಣದ ಸ್ಥಳವಷ್ಟೇ ಅಲ್ಲ, ಬದಲಿಗೆ ಮಕ್ಕಳ ಭವಿಷ್ಯವನ್ನು ರೂಪಿಸುವ, ಅವರ ಚಿಂತನೆಯನ್ನು ಸಕಾರಾತ್ಮಕವಾಗಿ ಮಾರ್ಗದರ್ಶಿಸುವ ಮತ್ತು ಸಮಾಜಕ್ಕೆ ಒಳಿತಾದ ವ್ಯಕ್ತಿಗಳನ್ನು ತಯಾರುಮಾಡುವ ಕಾರ್ಖಾನೆಯಾಗಿದೆ. ಈ ಸ್ವರ್ಗದ ರಕ್ಷಣೆಯ ಜವಾಬ್ದಾರಿಯು ಶಿಕ್ಷಕರು ಮತ್ತು ಪೋಷಕರ ಭುಜದ ಮೇಲೆ ಬೀಳುತ್ತದೆ.
ಮಕ್ಕಳ ಮುಗ್ಧತೆಯು ಅತ್ಯಂತ ಅಮೂಲ್ಯವಾದ ಆಸ್ತಿಯಾಗಿದೆ. ಶಾಲೆಯಲ್ಲಿ ಮಕ್ಕಳು ಕೇವಲ ಪಠ್ಯಪುಸ್ತಕದ ಜ್ಞಾನವನ್ನು ಮಾತ್ರವಲ್ಲ, ಸತ್ಯ, ಸಹಾನುಭೂತಿ, ಸಹಿಷ್ಣುತೆ, ಸಹಕಾರ ಮತ್ತು ಗೌರವದಂತಹ ಮೌಲ್ಯಗಳನ್ನು ಕಲಿಯುತ್ತಾರೆ. ಶಿಕ್ಷಕರು ಈ ಮೌಲ್ಯಗಳನ್ನು ತಮ್ಮ ಬೋಧನೆಯ ಮೂಲಕ ಮತ್ತು ತಮ್ಮ ವರ್ತನೆಯಿಂದ ಮಕ್ಕಳಿಗೆ ತಿಳಿಸುವ ಮಾದರಿಯಾಗಿರುತ್ತಾರೆ. ಶಿಕ್ಷಕರ ಪಾತ್ರವು ಕೇವಲ ಶೈಕ್ಷಣಿಕ ಜ್ಞಾನವನ್ನು ನೀಡುವುದಕ್ಕಿಂತಲೂ ಹೆಚ್ಚಿನದು; ಅವರು ಮಕ್ಕಳಿಗೆ ಜೀವನದಲ್ಲಿ ಸರಿಯಾದ ದಾರಿಯನ್ನು ಆಯ್ಕೆ ಮಾಡಲು ಸ್ಫೂರ್ತಿಯಾಗುತ್ತಾರೆ.
ಪೋಷಕರೂ ಸಹ ಈ ಜವಾಬ್ದಾರಿಯಲ್ಲಿ ಸಮಾನ ಪಾತ್ರವನ್ನು ವಹಿಸುತ್ತಾರೆ. ಮನೆಯಲ್ಲಿ ಮಕ್ಕಳಿಗೆ ನೀಡುವ ಸಂಸ್ಕಾರ, ಪ್ರೀತಿ, ಮತ್ತು ಮಾರ್ಗದರ್ಶನವು ಶಾಲೆಯ ಶಿಕ್ಷಣವನ್ನು ಪೂರಕಗೊಳಿಸುತ್ತದೆ. ಪೋಷಕರು ತಮ್ಮ ಮಕ್ಕಳಿಗೆ ಒಳ್ಳೆಯ ಆದರ್ಶವಾಗಿದ್ದಾಗ, ಮಕ್ಕಳು ಸಮಾಜದಲ್ಲಿ ಒಳ್ಳೆಯ ವ್ಯಕ್ತಿಗಳಾಗಿ ಬೆಳೆಯುವ ಸಾಧ್ಯತೆ ಹೆಚ್ಚಿರುತ್ತದೆ. ಶಿಕ್ಷಕರು ಮತ್ತು ಪೋಷಕರು ಒಟ್ಟಾಗಿ ಕೆಲಸ ಮಾಡಿದಾಗ, ಮಕ್ಕಳಿಗೆ ಸರಿಯಾದ ವಾತಾವರಣವನ್ನು ಸೃಷ್ಟಿಸಲು ಸಾಧ್ಯವಾಗುತ್ತದೆ, ಇದರಿಂದ ಅವರ ಮುಗ್ಧತೆ ಕಾಪಾಡಲ್ಪಡುತ್ತದೆ ಮತ್ತು ಮೌಲ್ಯಗಳು ದೃಢವಾಗುತ್ತವೆ.
ಇಂದಿನ ಆಧುನಿಕ ಯುಗದಲ್ಲಿ, ತಂತ್ರಜ್ಞಾನದ ಪ್ರಭಾವ, ಸಾಮಾಜಿಕ ಮಾಧ್ಯಮ, ಮತ್ತು ಇತರ ಬಾಹ್ಯ ಪ್ರಭಾವಗಳಿಂದ ಮಕ್ಕಳ ಮುಗ್ಧತೆಯ ಮೇಲೆ ಒತ್ತಡ ಬೀಳುತ್ತಿದೆ. ಈ ಸವಾಲುಗಳನ್ನು ಎದುರಿಸಲು ಶಿಕ್ಷಕರು ಮತ್ತು ಪೋಷಕರು ಒಗ್ಗಟ್ಟಿನಿಂದ ಕೆಲಸ ಮಾಡಬೇಕು. ಶಾಲೆಗಳು ಮಕ್ಕಳಿಗೆ ಸುರಕ್ಷಿತ ಮತ್ತು ಸಕಾರಾತ್ಮಕ ವಾತಾವರಣವನ್ನು ಒದಗಿಸಿದರೆ, ಪೋಷಕರು ಮನೆಯಲ್ಲಿ ಆ ವಾತಾವರಣವನ್ನು ಬೆಂಬಲಿಸಬೇಕು. ಇದರಿಂದ ಮಕ್ಕಳು ತಮ್ಮ ಮೌಲ್ಯಗಳನ್ನು ಕಾಪಾಡಿಕೊಂಡು, ಜವಾಬ್ದಾರಿಯುತ ಮತ್ತು ಸೃಜನಶೀಲ ವ್ಯಕ್ತಿಗಳಾಗಿ ಬೆಳೆಯಬಹುದು.
ಆಧುನಿಕ ತಾಂತ್ರಿಕ ಯುಗದಲ್ಲಿ ಮಕ್ಕಳು ಮೊಬೈಲ್ ಮತ್ತು ವೀಡಿಯೊ ಗೇಮ್‌ಗಳಿಗೆ ಮಾರು ಹೋಗುತ್ತಿದ್ದಾರೆ. ಇದರ ಪರಿಣಾಮವಾಗಿ ನೈತಿಕ, ಸಾಮಾಜಿಕ, ಬೌದ್ಧಿಕ ಹಾಗೂ ಆಧ್ಯಾತ್ಮಿಕ ಮೌಲ್ಯಗಳಿಂದ ಅವರು ದೂರ ಸರಿದು, ಆತ್ಮವಿಶ್ವಾಸ ಮತ್ತು ಸ್ವಯಂಸ್ಫೂರ್ತಿ ಕಳೆದುಕೊಳ್ಳುತ್ತಿದ್ದಾರೆ.
ಪಠ್ಯೇತರ ಚಟುವಟಿಕೆಗಳಲ್ಲಿ ಆಸಕ್ತಿ ಕುಗ್ಗಿದೆ. ಇದನ್ನು ತಿದ್ದಲು, ಮಕ್ಕಳನ್ನು ಮತ್ತೆ ಪ್ರಕೃತಿಯತ್ತ ಒಲಿಸುವುದು ಅಗತ್ಯ. “ಮಗು ಪ್ರಕೃತಿಯ ಪ್ರತೀಕ” ಎಂಬುದನ್ನು ನೆನಪಿಡಬೇಕು. ಶಿಕ್ಷಣ ತಜ್ಞ ಪ್ರೋಬೆಲ್ಲೊ ಹೇಳಿದಂತೆ, “ಮಗುವನ್ನು ಬೆಳೆಯುತ್ತಿರುವ ಸಸ್ಯಕ್ಕೆ ಹೋಲಿಸಬಹುದು”. ಸಸ್ಯವು ಬೆಳೆದು ಹೂವಾಗಿ, ಹಣ್ಣಾಗುವಂತೆ, ಮಗುವಿನ ದೈಹಿಕ, ಬೌದ್ಧಿಕ, ಸಾಮಾಜಿಕ ಹಾಗೂ ಆಧ್ಯಾತ್ಮಿಕ ಬೆಳವಣಿಗೆಯೂ ಒಂದೇ ಸೂತ್ರದಲ್ಲಿ ಬಿಗಿಯಾಗಿ ಹೆಣೆದುಕೊಂಡಿದೆ. ಶಿಕ್ಷಕರು ಈ ಐಕ್ಯತೆಯ ದೃಷ್ಟಿಯಿಂದ ವಿದ್ಯಾರ್ಥಿಗಳ ಸರ್ವತೋಮುಖ ಬೆಳವಣಿಗೆಗೆ ನೇತೃತ್ವ ನೀಡಬೇಕು.
ಸಮತೋಲಿತ ವ್ಯಕ್ತಿತ್ವವಿಲ್ಲದೆ ಸಮಾಜದಲ್ಲಿ ನೆಮ್ಮದಿಯ ಬಾಳು ಅಸಾಧ್ಯ. ಈ ಸಾಮರ್ಥ್ಯ ಹುಟ್ಟಿನಿಂದ ಬರದೆ, ಪರಿಸರ ಮತ್ತು ಶಿಕ್ಷಣದ ಮೂಲಕ ಹಂತಹಂತವಾಗಿ ರೂಪುಗೊಳ್ಳುತ್ತದೆ. ಆದರೆ ಇಂದಿನ ಸಮಾಜದಲ್ಲಿ, ಕೆಲವರು ಸ್ವಾರ್ಥ ಮತ್ತು ಅಧಿಕಾರಕ್ಕಾಗಿ ಧಾರ್ಮಿಕ ಅಸಮಾನತೆ, ತಾರತಮ್ಯ ಮತ್ತು ದ್ವೇಷವನ್ನು ಬಿತ್ತುತ್ತಿದ್ದಾರೆ. ಇದರಿಂದ ಸಾಮಾಜಿಕ ಅಸಮತೋಲನ ಮತ್ತು ಅಪನಂಬಿಕೆಯ ವಾತಾವರಣ ಸೃಷ್ಟಿಯಾಗಿದೆ. ಇದಕ್ಕೆ ವಿರುದ್ಧವಾಗಿ, ಶಾಲೆಯ ತರಗತಿಯೊಂದರಲ್ಲಿ ನಾವು ಸಮಾಜದ ಸುಂದರ ಪರಿಕಲ್ಪನೆಯನ್ನು ಕಾಣಬಹುದು. ಅಲ್ಲಿ ಜಾತಿ, ಧರ್ಮ, ಮೇಲು-ಕೀಳಿನ ಭಾವನೆ ಇಲ್ಲದೆ ಎಲ್ಲಾ ಮಕ್ಕಳು ಮುಗ್ಧ ಹೃದಯದಿಂದ ಪರಸ್ಪರ ಅನೋನ್ಯವಾಗಿ ಬಾಳುತ್ತಾರೆ. ಈ ಶುದ್ಧ ಭಾವನೆಗಳನ್ನು ನಾವು ಕಿತ್ತುಕೊಳ್ಳಬಾರದು. ಬದಲಿಗೆ, ಈ “ಶಾಲಾ ಸೂಕ್ಷ್ಮ-ಸಮಾಜ” ಭಾರತದ ಎಲ್ಲೆಡೆ ವಿಸ್ತರಿಸಬೇಕು. ಎಲ್ಲಾ ರೀತಿಯ ಹೂವುಗಳ ತೋಟವಾಗಿ ಉಳಿಯುವ ನಮ್ಮ ಸಂಸ್ಕೃತಿಯನ್ನು ಮಕ್ಕಳಲ್ಲಿ ಬೆಳೆಸುವ ಹೊಣೆ ಶಿಕ್ಷಕರು ಮತ್ತು ಪೋಷಕರದ್ದಾಗಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಕರಾವಳಿಯ ʼಸಜ್ಜನʼರು ಇನ್ನಾದರೂ ಮೌನ ಮುರಿಯಬೇಕು
ಮಕ್ಕಳ ಮುಗ್ಧ ಮನಸ್ಸು ಮೊಬೈಲ್, ವೀಡಿಯೊ ಗೇಮ್‌ಗಳಂಥ ತಾಂತ್ರಿಕ ಕಲ್ಮಷಗಳಿಂದ ಮಾಲಿನ್ಯಗೊಳ್ಳದಂತೆ ಕಾಪಾಡಬೇಕು. ಇಂದಿನ ಮಕ್ಕಳನ್ನು ನಾಳೆಯ ಉತ್ತಮ ನಾಗರಿಕರು ಮತ್ತು ಮಾನವ ಸಂಪನ್ಮೂಲವಾಗಿ ರೂಪಿಸುವುದು ನಮ್ಮ ಕರ್ತವ್ಯ. ಇದರಲ್ಲಿ ಶಿಕ್ಷಕರ ಪಾತ್ರ ಅನನ್ಯ : “ಮಗು ಬೆಳೆದು ಒಳ್ಳೆಯ ನಾಯಕನಾಗಲಿ” ಎಂಬ ನಿಸ್ವಾರ್ಥ ಬಯಕೆಯುಳ್ಳವನೇ ನಿಜವಾದ ಗುರು. ಪೋಷಕರು ಇಂತಹ ಶಿಕ್ಷಕರಿಗೆ ಬೆಂಬಲ ನೀಡಿ, ಭಾರತವನ್ನು ‘ಶಾಂತಿಯ ತೋಟ’ವಾಗಿ ಮಾಡಲು ಸಹಕರಿಸಬೇಕು.
ಕೊನೆಯದಾಗಿ, ಶಾಲೆಗಳು ಭೂಮಿಯ ಮೇಲಿನ ಸ್ವರ್ಗವಾಗಿರಲು, ಶಿಕ್ಷಕರು ಮತ್ತು ಪೋಷಕರು ಒಂದಾಗಿ ಕೆಲಸ ಮಾಡಬೇಕು. ಈ ಜಂಟಿ ಪ್ರಯತ್ನವು ಮಕ್ಕಳ ಮುಗ್ಧತೆಯನ್ನು ರಕ್ಷಿಸುವುದಲ್ಲದೆ, ಒಂದು ಉತ್ತಮ ಸಮಾಜದ ನಿರ್ಮಾಣಕ್ಕೆ ದಾರಿ ಮಾಡಿಕೊಡುತ್ತದೆ. ಶಾಲೆಯ ಸ್ವರ್ಗೀಯ ವಾತಾವರಣದಲ್ಲಿ ಮಕ್ಕಳು ಬೆಳೆದಾಗ, ಅವರು ಜಗತ್ತಿಗೆ ಒಳಿತನ್ನು ತರುವ ಶಕ್ತಿಯಾಗಿ ಪರಿವರ್ತನೆಗೊಳ್ಳುತ್ತಾರೆ.
ಬರಹ: ಸೈಯದಾ ಖುದ್ಸಿಯಾ ಬಾನು,
ಎಂ.ಎ (ಇತಿಹಾಸ), ಬಿ.ಎಡ್
