ತಮಿಳು ಚಿತ್ರರಂಗದ ಖ್ಯಾತ ನಟ, ನಿರ್ದೇಶಕ, ಬರಹಗಾರ ಹಾಗೂ ಚಿತ್ರಕಥೆಗಾರ ಕೆ. ಭಾಗ್ಯರಾಜ್ (73) ಅವರು ಶನಿವಾರ (ಜೂನ್ 27) ನಿಧನರಾಗಿದ್ದಾರೆ.
ತೀವ್ರ ಹೃದಯಾಘಾತಕ್ಕೊಳಗಾದ ಅವರನ್ನು ತಕ್ಷಣವೇ ಚೆನ್ನೈನ ಅಪೋಲೊ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ವೈದ್ಯರ ಸತತ ಪ್ರಯತ್ನದ ಹೊರತಾಗಿಯೂ ಚಿಕಿತ್ಸೆ ಫಲಕಾರಿಯಾಗದೆ ಅವರು ಕೊನೆಯುಸಿರೆಳೆದಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಅವರು ಪತ್ನಿ ಪೂರ್ಣಿಮಾ ಭಾಗ್ಯರಾಜ್ ಹಾಗೂ ಮಕ್ಕಳಾದ ನಟ ಶಾಂತನು ಮತ್ತು ಶರಣ್ಯಾ ಭಾಗ್ಯರಾಜ್ ಅವರನ್ನು ಅಗಲಿದ್ದಾರೆ.
ಚಿತ್ರಕಥೆ ರಚನೆಯಲ್ಲಿ ಭಾರಿ ಪರಿಣತಿ ಹೊಂದಿದ್ದ ಅವರು, ಭವಿಷ್ಯದ ನಿರ್ದೇಶಕರಿಗೆ ಮಾದರಿಯಾಗುವಂತಹ ಕಥೆ ಹೇಳುವ ನಿರೂಪಣಾ ಶೈಲಿಯನ್ನು ಪರಿಚಯಿಸಿದ್ದರು. ಅವರ ನಿರ್ದೇಶನ, ನಿರ್ಮಾಣ ಹಾಗೂ ನಟನೆಯ ‘ಮೌನ ಗೀತಂಗಳ್’, ‘ಅಂದ 7 ನಾಟ್ಕಳ್’ ಮತ್ತು ‘ಮುಂದಾನೈ ಮುಡಿಚ್ಚು’ ಮುಂತಾದ ಚಿತ್ರಗಳು ತಮ್ಮ ಕಥಾಹಂದರ ಹಾಗೂ ಪಾತ್ರ ಪೋಷಣೆಗಾಗಿ ಇಂದಿಗೂ ಅಧ್ಯಯನ ಯೋಗ್ಯವಾಗಿವೆ. ಕಮಲ್ ಹಾಸನ್ ಹಾಗೂ ರಜನಿಕಾಂತ್ ಅವರಂತಹ ಸೂಪರ್ಸ್ಟಾರ್ಗಳು ಮೆರೆಯುತ್ತಿದ್ದ ಕಾಲಘಟ್ಟದಲ್ಲಿ ತಮ್ಮ ವಿಭಿನ್ನ ಶೈಲಿಯ ಕಥೆಗಳ ಮೂಲಕ ಭಾಗ್ಯರಾಜ್ ಚಿತ್ರರಂಗದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದ್ದರು.
ತಿರುಪ್ಪೂರು ಜಿಲ್ಲೆಯ ವೆಲ್ಲಕೋಯಿಲ್ ಮೂಲದವರಾದ ಭಾಗ್ಯರಾಜ್, ವಿ.ವಿ. ಬಾಲಗುರು ಅವರ ಬಳಿ ಸಹಾಯಕ ನಿರ್ದೇಶಕರಾಗಿ ವೃತ್ತಿಜೀವನ ಆರಂಭಿಸಿದ್ದರು. ನಂತರ ಅಮ್ಮನ್ ಕ್ರಿಯೇಷನ್ಸ್ನ ನಿರ್ಮಾಪಕ ಎಸ್.ಎ. ರಾಜ್ಕಣ್ಣು ಅವರ ಮೂಲಕ ಹಿರಿಯ ನಿರ್ದೇಶಕ ಭಾರತಿರಾಜ ಅವರ ಪರಿಚಯವಾಯಿತು. ಭಾಗ್ಯರಾಜ್ ಅವರ ಕೈಬರಹ ಹಾಗೂ ಕಥೆ ಹೇಳುವ ಶೈಲಿಗೆ ಮಾರುಹೋದ ಭಾರತಿರಾಜ, ತಮ್ಮ ‘ಪುದಿಯ ವಾರ್ಪುಗಳ್’ ಚಿತ್ರದಲ್ಲಿ ಅವರಿಗೆ ಶಾಲಾ ಶಿಕ್ಷಕನ (ನಾಯಕ) ಅವಕಾಶ ನೀಡಿದರು. ಕಾಕತಾಳೀಯವೆಂಬಂತೆ ನಿರ್ದೇಶಕ ಭಾರತಿರಾಜ ಅವರು ಕೂಡ ಇದೇ ತಿಂಗಳ ಆರಂಭದಲ್ಲಿ ವಯೋಸಹಜ ಕಾಯಿಲೆಯಿಂದ ನಿಧನರಾಗಿದ್ದರು.
“ಪ್ರತಿಯೊಂದು ದೃಶ್ಯದ ಹಿನ್ನೆಲೆ ಸಿದ್ಧಪಡಿಸುವಾಗಲೂ ಭಾಗ್ಯರಾಜ್ ಅವರನ್ನು ಅನುಸರಿಸಿ” ಎಂದು ಭಾರತಿರಾಜ ತಮ್ಮ ಸಹಾಯಕರಿಗೆ ಹೇಳುತ್ತಿದ್ದರು ಎಂದು ನಿರ್ದೇಶಕ ಇಳವರಸು ಸ್ಮರಿಸಿದ್ದಾರೆ. ಸಹಾಯಕ ನಿರ್ದೇಶಕರಾಗಿದ್ದ ದಿನಗಳಲ್ಲೇ ಭಾಗ್ಯರಾಜ್ ’16 ವಯದಿನಿಲೆ’ ಮತ್ತು ‘ಸಿಗಪ್ಪು ರೋಜಾಕ್ಕಳ್’ ಚಿತ್ರಗಳಲ್ಲಿ ಸಣ್ಣ ಪಾತ್ರಗಳನ್ನು ಮಾಡಿದ್ದರು. ಅಲ್ಲದೆ ‘ಭಾಗ್ಯ’ ಎಂಬ ಚಲನಚಿತ್ರ ಪತ್ರಿಕೆಯನ್ನೂ ನಡೆಸುತ್ತಿದ್ದ ಅವರು, ಕಮಲ್ ಹಾಸನ್ ಅಭಿನಯದ ‘ಒರು ಕೈದಿಯಿನ್ ಡೈರಿ’ ಚಿತ್ರಕ್ಕೆ ಸಂಭಾಷಣೆ ಬರೆದಿದ್ದರು. ಮೊದಲ ಪತ್ನಿ ಪ್ರವೀಣಾ ಅವರ ನಿಧನದ ನಂತರ, ‘ಡಾರ್ಲಿಂಗ್, ಡಾರ್ಲಿಂಗ್, ಡಾರ್ಲಿಂಗ್’ ಚಿತ್ರದ ತಮ್ಮ ನಾಯಕಿ ಪೂರ್ಣಿಮಾ ಜಯರಾಮ್ ಅವರನ್ನು ವಿವಾಹವಾಗಿದ್ದರು.
ಸಾಂಪ್ರದಾಯಿಕ ನಾಯಕನ ಪರಿಕಲ್ಪನೆ ಬದಲಿಸಿದ ನಟ
ಚಿತ್ರರಂಗದ ಸಾಂಪ್ರದಾಯಿಕ ನಂಬಿಕೆಗಳನ್ನು ಬದಿಗೊತ್ತಿದ್ದ ಅವರು, ‘ಸುವರ್ ಇಲ್ಲಾದ ಚಿತ್ತಿರಂಗಳ್’, ‘ಒರು ಕೈ ಓಸೈ’ ಮತ್ತು ‘ತೂರಲ್ ನಿನ್ನು ಪೋಚ್ಚು’ ಎಂಬ ಭಿನ್ನ ಶೀರ್ಷಿಕೆಗಳನ್ನು ತಮ್ಮ ಆರಂಭಿಕ ಚಿತ್ರಗಳಿಗೆ ಇಟ್ಟಿದ್ದರು. ತಮಿಳು ಚಿತ್ರರಂಗದ ‘ಹೀರೋ’ ಎಂದರೆ ಕೇವಲ ದೈಹಿಕ ಬಲ ಹೊಂದಿರಬೇಕು ಎಂಬ ಗ್ರಹಿಕೆಯನ್ನು ಬದಲಾಯಿಸಿದ ಅವರು; ಬುದ್ಧಿವಂತಿಕೆ, ಹಾಸ್ಯ ಪ್ರಜ್ಞೆ ಮತ್ತು ಸಾಮಾನ್ಯ ಮನುಷ್ಯನ ದೌರ್ಬಲ್ಯಗಳನ್ನು ತೆರೆಯ ಮೇಲೆ ತಂದರು. ಆ ಕಾರಣದಿಂದ ಅವರನ್ನು ತಮಿಳು ಚಿತ್ರರಂಗದ ‘ಮಾಸ್ಟರ್ ಸ್ಟೋರಿ ಟೆಲ್ಲರ್’ ಎಂದು ಕರೆಯಲಾಗುತ್ತಿತ್ತು.
ಇದನ್ನು ಓದಿದ್ದೀರಾ? ‘ಸಚಿನ್ ವೃತ್ತಿಬದುಕನ್ನೇ ನುಂಗುವಂತಿತ್ತು ಆ ಗಾಯ’: ವೈಭವ್ ಸೂರ್ಯವಂಶಿಗೆ ಕಾದಿದೆಯಾ ಕಂಟಕ?
ಅವರ ‘ಇನ್ರು ಪೋಯ್ ನಾಳೈ ವಾ’ ಚಿತ್ರವು ಪ್ರೀತಿಗಾಗಿ ಅವಮಾನ ಸಹಿಸಿಕೊಂಡು ಓಡಾಡುವ ಮೂವರು ಯುವಕರ ಕಥೆಯಾಗಿದ್ದರೆ, ‘ಇದು ನಮ್ಮ ಆಳು’ ಚಿತ್ರವು ಕ್ಷೌರಿಕನ ಮಗ ಮತ್ತು ಬ್ರಾಹ್ಮಣ ಹುಡುಗಿಯ ನಡುವಿನ ಸೂಕ್ಷ್ಮ ಪ್ರೇಮಕಥೆಯ ಮೂಲಕ ಜಾತಿ ಪದ್ಧತಿಯನ್ನು ಅತ್ಯಂತ ಸೂಕ್ಷ್ಮವಾಗಿ ಕಟ್ಟಿಕೊಟ್ಟಿತ್ತು. ತಮಿಳುನಾಡಿನ ಕೊಂಗು ಶೈಲಿಯ ಭಾಷೆಯ ಮೇಲೆ ಅವರಿಗಿದ್ದ ಅಪಾರ ಹಿಡಿತ, ‘ಸುವರ್ ಇಲ್ಲಾದ ಚಿತ್ತಿರಂಗಳ್’ ಚಿತ್ರದಲ್ಲಿ ನಟ ಗೌಂಡಮಣಿ ಅವರ ಟೈಲರ್ ಪಾತ್ರದ ಮೂಲಕ ಅದ್ಭುತವಾಗಿ ಮೂಡಿಬಂದಿತ್ತು.
ಸಂಗೀತದ ಆಯ್ಕೆಯಲ್ಲೂ ಅವರ ನಡೆಗಳು ಕುತೂಹಲಕಾರಿಯಾಗಿದ್ದವು. ಗಂಗೈ ಅಮರನ್ ಅವರ ಸಂಗೀತವಿದ್ದ ‘ಸುವರ್ ಇಲ್ಲಾದ ಚಿತ್ತಿರಂಗಳ್’ ಮತ್ತು ‘ಮೌನ ಗೀತಂಗಳ್’ ಚಿತ್ರದ ‘ಕಾದಲ್ ವೈಭೋಗಮೇ’ ಮತ್ತು ‘ಮೂಕುತಿ ಪೂಮೇಲೆ’ ಹಾಡುಗಳು ಮ್ಯೂಸಿಕ್ ಮಾಂತ್ರಿಕ ಇಳಯರಾಜ ಅವರ ಶೈಲಿಯನ್ನೇ ಹೋಲುತ್ತಿದ್ದವು. ಇಳಯರಾಜ ಅವರ ಜನಪ್ರಿಯತೆಯ ಉತ್ತುಂಗದಲ್ಲಿದ್ದಾಗಲೇ, ‘ಅಂದ 7 ನಾಟ್ಕಳ್’ ಚಿತ್ರಕ್ಕೆ ಹಿರಿಯ ಸಂಗೀತ ನಿರ್ದೇಶಕ ಎಂ.ಎಸ್. ವಿಶ್ವನಾಥನ್ ಅವರನ್ನು ಆರಿಸಿಕೊಂಡು ಆ ಚಿತ್ರದ ಎಲ್ಲಾ ಹಾಡುಗಳೂ ಸೂಪರ್ ಹಿಟ್ ಆಗುವಂತೆ ಮಾಡಿದ್ದರು.
ಮಾಜಿ ಮುಖ್ಯಮಂತ್ರಿ, ಎಐಎಡಿಎಂಕೆ ಸಂಸ್ಥಾಪಕ ಎಂ.ಜಿ. ರಾಮಚಂದ್ರನ್ ಅವರ ಕಟ್ಟಾ ಬೆಂಬಲಿಗರಾಗಿದ್ದ ಭಾಗ್ಯರಾಜ್, ತಮ್ಮ ಚಿತ್ರಗಳಲ್ಲಿ ಅವರ ಉಲ್ಲೇಖವಿರುವಂತೆ ನೋಡಿಕೊಳ್ಳುತ್ತಿದ್ದರು. ಸ್ವತಃ ‘ಎಂಜಿಆರ್ ಮಕ್ಕಳ್ ಮುನ್ನೇತ್ರ ಕಳಗಂ’ ಎಂಬ ರಾಜಕೀಯ ಪಕ್ಷ ಕಟ್ಟಿದರೂ ಅದು ಯಶಸ್ವಿಯಾಗಲಿಲ್ಲ. ತದನಂತರ ಎಐಎಡಿಎಂಕೆ ಸೇರಿದ ಅವರು, 2006ರಲ್ಲಿ ಡಿಎಂಕೆ ಸೇರ್ಪಡೆಯಾಗಿ ಪಕ್ಷದ ಪರ ಪ್ರಚಾರ ನಡೆಸಿದ್ದರು. ಆ ಬಳಿಕ ಅವರು ಆ ಪಕ್ಷದಿಂದಲೂ ಹೊರಬಂದಿದ್ದರು.
