ನಮ್ಮ ದೇಶದ ತಳ ಸಮುದಾಯಗಳ, ಸಮಾಜದ ಅಂಚಿನಲ್ಲಿರುವ ಜನರಿಗೆ ಅಸ್ಮಿತೆಯನ್ನು ತಂದು ಕೊಟ್ಟಿದ್ದು ಸಂವಿಧಾನ ಶಿಲ್ಪಿ ಡಾ.ಬಾಬಾಸಾಹೇಬ್ ಅಂಬೇಡ್ಕರ್ ಅವರು ಎಂದು ಕಲಬುರ್ಗಿಯ ನೂತನ ವಿದ್ಯಾಲಯ ಪಿಯು ಕಾಲೇಜು ಅಧ್ಯಾಪಕ ಡಾ.ಶಿವಾಜಿ ಮೇತ್ರೆ ಹೇಳಿದರು.
ಬಸವಕಲ್ಯಾಣದ ಶ್ರೀ ಬಸವೇಶ್ವರ ಪದವಿ ಕಾಲೇಜಿನಲ್ಲಿ ಮಂಗಳವಾರ ಸಂವಿಧಾನ ಶಿಲ್ಪಿ ಡಾ ಬಿ.ಆರ್.ಅಂಬೇಡ್ಕರ್ ಅವರ 135ನೇ ಜನ್ಮದಿನದ ಪ್ರಯುಕ್ತ ಹಮ್ಮಿಕೊಂಡಿದ್ದ ಅಂಬೇಡ್ಕರ್ ಚಿಂತನೆಯ ಆಯಾಮಗಳು ಕುರಿತ ಉಪನ್ಯಾಸ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.
“ಡಾ.ಬಿ.ಆರ್.ಅಂಬೇಡ್ಕರ್ ಅವರು ಶಿಕ್ಷಣಕ್ಕೆ ಮಹತ್ವ ನೀಡಿ, ಆರ್ಥಿಕ ಸ್ವಾವಲಂಬನೆಗೆ ಆದ್ಯತೆ ಕೊಟ್ಟು, ಮಾನವೀಯತೆಯ ಪಾಠ ಕಲಿಸಿದ ಪ್ರಖರ ಚಿಂತಕರು. ಸಂವಿಧಾನದ ಮೂಲಕ ಜಾತ್ಯತೀತ, ಸಮಸಮಾಜ, ಸ್ವಾತಂತ್ರ್ಯ ಮನೋಧರ್ಮದ ಜಗತ್ತಿನ ನಿರ್ಮಾಣ ಮಾಡಿದ್ದಾರೆ. ಜಗತ್ತಿನ ಪ್ರಖ್ಯಾತ ಜ್ಞಾನಿಗಳಲ್ಲಿ ಅಂಬೇಡ್ಕರ್ ಅವರೂ ಒಬ್ಬರು. ಜಗತ್ತಿನ ಬಹುದೊಡ್ಡ ಬೌದ್ಧಿಕ ಚಿಂತಕರಾಗಿದ್ದರು” ಎಂದು ಹೇಳಿದರು.
ಅಧ್ಯಕ್ಷತೆ ವಹಿಸಿದ್ದ ಕಾಲೇಜಿನ ಪ್ರಾಂಶುಪಾಲ ಡಾ.ಭೀಮಾಶಂಕರ ಬಿರಾದಾರ ಮಾತನಾಡಿ, ʼಭಾರತ ರತ್ನ ಡಾ. ಬಿ. ಆರ್. ಅಂಬೇಡ್ಕರ್ ಅವರು ಸಾಮಾಜಿಕ, ರಾಜಕೀಯ, ಸಾಂಸ್ಕೃತಿಕ ಸಂಗತಿಗಳಿಗೆ ತಮ್ಮ ಚಿಂತನೆಗಳನ್ನು ಲೋಕಕ್ಕೆ ನೀಡುವ ಮೂಲಕ ಇಡೀ ಯುಗವನ್ನು ಪ್ರಜ್ಞಾಪೂರ್ವಕವಾಗಿ ಇಟ್ಟಿದ್ದಾರೆʼ ಎಂದರು.
ʼಅಂಬೇಡ್ಕರ್ ಅವರ ಬರಹಗಳ ಅನುಸಂಧಾನ ಸದ್ಯದ ಸಂದರ್ಭದಲ್ಲಿ ಹೆಚ್ಚು ಅಗತ್ಯವಾಗಿದೆ. ಈ ದೇಶದ ಸಾಮಾಜಿಕ, ರಾಜಕೀಯ, ಸಾಂಸ್ಕೃತಿಕ ಬಿಕ್ಕಟ್ಟುಗಳನ್ನು ಅರಿಯಲು ಅಂಬೇಡ್ಕರ್ ಅವರ ತತ್ವ ಸಿದ್ಧಾಂತಗಳನ್ನು ವೈಧಾನಿಕತೆಯಾಗಿ ಬೆಳೆಸಿಕೊಳ್ಳಬೇಕು. ಅವರು ಸಂವಿಧಾನದ ಮೂಲಕ ಮಾತನಾಡುವ, ಸಮಾನತೆಯ, ಸ್ವಾತಂತ್ರ್ಯದ ಹಕ್ಕನ್ನು ನೀಡಿದ ದಾರ್ಶನಿಕ. ಅವರು ಪ್ರಬುದ್ಧ ಭಾರತ ರೂಪಿಸಿದ ಶಿಲ್ಪಿʼ ಎಂದರು.
ಶ್ರೀ ಬಸವೇಶ್ವರ ಪಿಜಿ ಕಾಲೇಜು ಪ್ರಾಚಾರ್ಯೆ ಡಾ.ಶಾಂತಲಾ ಪಾಟೀಲ ಮಾತನಾಡಿ, ʼಡಾ.ಅಂಬೇಡ್ಕರ್ ಅವರು ಈ ಜಗದ ಬೆಳಕು. ಪ್ರಖರ ವೈಚಾರಿಕ ಚಿಂತಕರು. ಇಡೀ ಜಗತ್ತಿಗೆ ಮಾದರಿಯಾದವರು. ಅಸ್ಪೃಶ್ಯತಾ ವಿರೋಧಿ ಚಿಂತನೆ ಗಟ್ಟಿಯಾಗಿ ಹೇಳಿದವರುʼ ಎಂದರು.
ಜೀವ ವಿಜ್ಞಾನ ವಿಭಾಗದ ಮುಖ್ಯಸ್ಥ ಪ್ರೊ. ಅಶೋಕ ರೆಡ್ಡಿ ಗದಲೇಗಾಂವ ಮಾತನಾಡಿ, ʼಬಾಬಾಸಾಹೇಬ್ ಅಂಬೇಡ್ಕರ್ ಅವರು ಬೌದ್ಧ ಚಿಂತನೆಯನ್ನು ಶಾಂತಿ, ಕಾರುಣ್ಯ ಮತ್ತು ಅಂತಃಕರಣದ ತತ್ವದಿಂದಾಗಿ ಒಪ್ಪಿ ಅಪ್ಪಿಕೊಂಡರು. ಮನುಷ್ಯತ್ವದ ಹುಡುಕಾಟ ಅವರ ಆಲೋಚನೆಗಳಲ್ಲಿ ಅಡಗಿದೆʼ ಎಂದರು.
ಇದನ್ನೂ ಓದಿ : ಭಾಲ್ಕಿ | ಅಂಬೇಡ್ಕರ್ ವಿಚಾರಧಾರೆ ಸಮಾಜಕ್ಕೆ ದಾರಿದೀಪ : ಬಸವರಾಜ ಮೊಳಕೀರೆ
ಕಾರ್ಯಕ್ರಮದಲ್ಲಿ ಶ್ರೀನಿವಾಸ ಉಮಾಪುರೆ, ವಿವೇಕಾನಂದ ಶಿಂಧೆ, ರೋಷನ್ ಬಿ, ಪ್ರಭಾಕರ ನೌವಗಿರೆ, ನಾಗರಾಜ್ ನಾಸೆ, ಪ್ರೇಮಲಾ ತಾಂಬೋಳೆ, ನೀಲಮ್ಮ ಮೊದಲಾದವರು ಇದ್ದರು. ಡಾ. ಬಸವರಾಜ ಖಂಡಾಳೆ ನಿರೂಪಿಸಿ ಸ್ವಾಗತಿಸಿದರು. ಗಂಗಾಧರ ಸಾಲಿಮಠ ವಂದಿಸಿದರು.
