ಕನೇರಿ ಶ್ರೀಗಳ ನೇತೃತ್ವದಲ್ಲಿ ಬಸವಕಲ್ಯಾಣದಲ್ಲಿ ಭಾನುವಾರ ಆಯೋಜಿಸಿರುವ ‘ಬಸವಾದಿ ಶಿವ ಶರಣರ ಬೃಹತ್ ಹಿಂದೂ ಸಮಾವೇಶ’ ವಿರೋಧಿಸಿ ಚಲೋ ಬಸವಕಲ್ಯಾಣ ಹೋರಾಟ ಸಮಿತಿ, ಸೌಹಾರ್ದ ಕರ್ನಾಟಕ ವೇದಿಕೆ ನೇತೃತ್ವದಲ್ಲಿ ಪ್ರತಿಭಟನೆ ನಡೆಯುತ್ತಿದೆ.
ಬಸವಕಲ್ಯಾಣದ ಬಂಗ್ಲಾದ ರಾಷ್ಟ್ರೀಯ ಹೆದ್ದಾರಿ ಸಮೀಪ ಬೆಳಿಗ್ಗೆ 10:30 ಗಂಟೆಗೆ ಜಮಾಯಿಸಿದ ಬಸವ ಅನುಯಾಯಿಗಳು ಬಸವಾದಿ ಶರಣರ ಹಿಂದೂ ಸಮಾವೇಶ ವಿರುದ್ಧ ಘೋಷಣೆ ಕೂಗಿ ಆಕ್ರೋಶ ವ್ಯಕ್ತಪಡಿಸಿದರು.
ಬಳಿಕ ಬಸವ ಮಹಾದ್ವಾರ ಸಮೀಪದ ಸಾಂಸ್ಕೃತಿಕ ನಾಯಕ ಬಸವಣ್ಣನವರ ಪುತ್ಥಳಿಗೆ ಮಾಲಾರ್ಪಣೆ ಮಾಡಿ ಪ್ರತಿಭಟನೆ ಶುರುವಾಗಿದೆ.
ಬಸವಾದಿ ಶರಣರು ಅವೈದಿಕ ಸಿದ್ಧಾಂತ ಪ್ರತಿಪಾದಕರು. ಹಿಂದೂ ಸಮಾವೇಶಕ್ಕೂ ಶರಣರಿಗೆ ಯಾವುದೇ ಸಂಬಂಧವಿಲ್ಲ. ಕೇವಲ ಹಿಂದೂ ಸಮಾವೇಶ ನಡೆಸಲು ನಮ್ಮ ಅಭ್ಯಂತರವಿಲ್ಲ. ಆದರೆ, ಬಸವಾದಿ ಶರಣರ ಹೆಸರಿನೊಂದಿಗೆ ಹಿಂದೂ ಪದ ಹೋಲಿಸುವುದು ನಾವು ಒಪ್ಪುವುದಿಲ್ಲ. ಇದು ಹಿಂದೂ ಸಮಾವೇಶ ಅಲ್ಲ. ಮನುವಾದ ಸಮಾವೇಶ ಆಗಿದೆ. ಈ ತಂತ್ರಗಾರಿಕೆ ಹಿಂದೆ ಸಂಘ ಪರಿವಾರವಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಪ್ರತಿಭಟನೆಯಲ್ಲಿ ಸೌಹಾರ್ದ ಕರ್ನಾಟಕ ವೇದಿಕೆಯ ಪ್ರಮುಖರಾದ ಆರ್.ಕೆ.ಹುಡಗಿ, ಕೆ.ನೀಲಾ, ಮೀನಾಕ್ಷಿ ಬಾಳಿ, ಮಾರುತಿ ಗೋಖಲೆ, ಕಾಶಿನಾಥ್ ಅಂಬುಲಗಿ ಸೇರಿದಂತೆ ಚಲೋ ಬಸವಕಲ್ಯಾಣ ಸಮಿತಿಯ ಸಿದ್ದಪ್ಪ ಮೂಲಗೆ, ರವಿ ಪಾಪಡೆ, ಸಿದ್ರಾಮ ಶೆಟಕಾರ್, ಬಸವ ಪಾಟೀಲ್, ಬಸವರಾಜ ಬುಳ್ಳಾ, ವಿಜಯಲಕ್ಷ್ಮಿ ಗಡ್ಡೆ, ಆರ್.ಜಿ.ಶೆಟಗಾರ್, ರವೀಂದ್ರ ಕೋಳಕೂರ್ ಸೇರಿದಂತೆ ಬೀದರ್, ಕಲಬುರಗಿ, ಯಾದಗಿರಿ, ಕೊಪ್ಪಳ ಸೇರಿದಂತೆ ನಾನಾ ಭಾಗಗಳಿಂದ ಬಸವ ಅನುಯಾಯಿಗಳು ಪಾಲ್ಗೊಂಡಿದ್ದಾರೆ.
ಸಂಜೆ ಬಸವಾದಿ ಶಿವಶರಣರ ಬೃಹತ್ ಹಿಂದೂ ಸಮಾವೇಶ
ಇಲ್ಲಿನ ಅಕ್ಕಮಹಾದೇವಿ ಕಾಲೇಜು ಆವರಣದಲ್ಲಿ ಸಂಜೆ ಬಸವಾದಿ ಶಿವ ಶರಣರ ಬೃಹತ್ ಹಿಂದೂ ಸಮಾವೇಶ ನಡೆಯಲಿದೆ.ಕನೇರಿ ಕಾಡ ಸಿದ್ದೇಶ್ವರ ಮಠದ ಸ್ವಾಮೀಜಿ ನೇತೃತ್ವದಲ್ಲಿ ಸಮಾವೇಶ ನಡೆಯಲಿದ್ದು, ನೂರಾರು ಜನರಿಗೆ ಆಸನ ಕುಳಿತುಕೊಳ್ಳಲು ಬೃಹತ್ ವೇದಿಕೆ ಸಿದ್ಧಗೊಂಡಿದೆ.
ಇದನ್ನೂ ಓದಿ: ಚದುರಿದ ಚಿತ್ರ | ಡಿಜಿಟಲ್ ಸಂತೆಯಲ್ಲಿ ಮಹಿಳಾ ಸುರಕ್ಷತೆಯ ಬಿಕರಿ
ಕನೇರಿ ಸ್ವಾಮೀಜಿ ಸಮಾವೇಶದಲ್ಲಿ ಭಾಗವಹಿಸಬಹುದು. ಆದರೆ ಮಾತನಾಡಬಾರದು. ಸಮಾವೇಶದಲ್ಲಿ 2,500ಕ್ಕೂ ಅಧಿಕ ಜನರಿಗೆ ಸೇರಿಸಬಾರದು ಎಂದು ಕೋರ್ಟ್ ನೀಡಿದ ಅನುಮತಿಯಂತೆ ಕಾರ್ಯಕ್ರಮ ನಡೆಯಲಿದೆ.
