“ಮುಷ್ಠಿಯಲ್ಲಿ ಇರುವ ಮೊಬೈಲ್ ಜೀವನ ಪಾಠವನ್ನ್ನು ಕಲಿಸುವುದಕ್ಕಿಂತ ದಾರಿ ತಪ್ಪಿಸುವ ಕೆಲಸ ಮಾಡುತ್ತಿವೆ. ಹಾಗಾಗಿ ಪುಸ್ತಕ ಓದಿನ ಪರಂಪರೆಯನ್ನು ಮರು ಕಟ್ಟಬೇಕಾಗಿದೆ” ಎಂದು ಮುನ್ಸಿಪಲ್ ಹೈಸ್ಕೂಲಿನ ಪ್ರಧಾನ ಗುರುಮಾತೆ ಶೋಭಾ ಜಾಗಟಗೇರಿ ನುಡಿದರು.
ಹಾವೇರಿ ಪಟ್ಟಣದ ಶಿವಯೋಗೀಶ್ವರ ನಗರದಲ್ಲಿ ಲೇಖಕ, ಶಿಕ್ಷಕ ಜಿ.ಎಂ.ಓಂಕಾರಣ್ಣನವರ ಅವರ ಮೆನೆಯಲ್ಲಿ ಮನೆಗೊಂದು ಗ್ರಂಥಾಲಯ ಜಿಲ್ಲಾ ಜಾಗೃತಿ ಸಮಿತಿ ವತಿಯಿಂದ ಪುಸ್ತಕ ಪ್ರಾಧಿಕಾರದ ೫೩ನೇ ಗ್ರಂಥಾಲಯವನ್ನು ಉದ್ಘಾಟಿಸಿ ಶ್ರೀಮತಿ ಜಾಗಟಗೇರಿ ಮೇಲಿನಂತೆ ನುಡಿದರು.
“ಪುಸ್ತಕದ ಓದು ಕ್ಷೀಣಿಸುತ್ತಿರುವ ಸಂದಿಗ್ಧ ಸ್ಥಿತಿಯಲ್ಲಿ ಗ್ರಂಥಾಲಯಗಳ ಅವಶ್ಯಕತೆ ಇದೆ. ಐದು ಸಾವಿರ ಪುಸ್ತಕಗಳು ಒಂದು ಕಾಲದಲ್ಲಿ ಮುನ್ಸಿಪಲ್ ಹೈಸ್ಕೂಲಿನಲ್ಲಿ ಓದಲು ಸಿಗುತ್ತಿದ್ದವು. ಅದಕ್ಕಾಗಿ ಸಾರ್ವಜನಿಕ ಸದಸ್ಯತ್ವವನ್ನೂ ಮಾಡಿದ ಕೀರ್ತಿ ಹೈಸ್ಕೂಲಿಗಿದೆ. ಈ ಪರಂಪರೆಯನ್ನು ಮತ್ತೆ ಕಟ್ಟಬೇಕು” ಎಂದರು.
ಅಧ್ಯಕ್ಷತೆಯನ್ನು ವಹಿಸಿದ್ದ ಕರುನಾಡ ಕನ್ನಡ ಸಾಂಸ್ಕೃತಿಕ ವೇದಿಕೆಯ ರಾಜ್ಯಾಧ್ಯಕ್ಷರಾದ ಎಸ್.ಬಿ. ಮುಡೆಣ್ಣವರ ಮಾತನಾಡಿ, “ಪುಸ್ತಕ ಮರೆಯಾದರೆ ಜ್ಞಾನವೂ ಮರೆಯಾದಂತೆ, ಪುಸ್ತಕಗಳೆಂದರೆ, ಕಾಗದದ ಮುದ್ದೆಗಳಲ್ಲ, ಓದುಗರನ್ನು ಸೃಷ್ಟಿ ಮಾಡುವು ಜವಾಬ್ದಾರಿ ನಮ್ಮೆಲ್ಲರ ಮೇಲಿದೆ. ಮನೆಗೊಂದು ಗ್ರಂಥಾಲಯ ಯೋಜನೆ ಈ ದಿಕ್ಕಿನಲ್ಲಿ ಶ್ರಮಿಸುವಂತಗಲಿ” ಎಂದರು.
ಈ ಸಂದರ್ಭದಲ್ಲಿ ದಯಾನಂದ ಮಲಗುಂದ ಮತ್ತು ನೇಹಾ ಅವರುಗಳನ್ನು ಜಾಗೃತಿ ಸಮಿತಿ ವತಿಯಿಂದ ಸನ್ಮಾನಿಸಲಾಯಿತು. ಜಿಲ್ಲಾ ಸಂಚಾಲಕ ಎಸ್. ಆರ್. ಹಿರೇಮಠ ಪ್ರಾಸ್ತಾವಿಕ ನುಡಿಗಳನ್ನಾಡಿದರು.
ಕಾರ್ಯಕ್ರಮದಲ್ಲಿ ಕುಮಾರ ಅಭಿನವ ಭಟ್ಟ ಪ್ರಾರ್ಥನೆ ಮಾಡಿದರೆ, ಶಿಕ್ಷಕಿ ರಂಜನಾ ಭಟ್ಟ ಕಾರ್ಯಕ್ರಮ ನಿರೂಪಿಸಿದರು. ಕೊನೆಯಲ್ಲಿ ಜಿ.ಎಂ. ಓಂಕಾರಣ್ಣನವರ ಎಲ್ಲರನ್ನು ವಂದಿಸಿದರು. ಸರ್ವಶ್ರಿ ವಿರೂಪಾಕ್ಷ ಹಾವನೂರ, ಎಂ.ಜಿ.ಓಲೇಕಾರ, ಅಶೋಕ ಉಪಲಿ, ಉಡಚಪ್ಪ ಮಾಳಗಿ, ಶ್ರೀಮತಿ ಎಸ್.ಬಿ. ಬಾರ್ಕಿ, ಅನಿತಾ ಹರನಗಿರಿ, ರೇಣುಕಾ ಗುಡಿಮನಿ ಮುಂತಾದವರು ಉಪಸ್ಥಿತರಿದ್ದರು.
