ಅಬ್ಬಬ್ಬಾ ಬಿಸಿಲು! ಬೆಳಗ್ಗೆ ಹತ್ತು ಗಂಟೆ ಆದರೆ ಸಾಕು ಸೆಕೆ ಸೆಕೆ. ಸಂಜೆ ಐದು ಗಂಟೆ ಮುಗಿದರೂ ಧಗೆ ತಣಿಯದು. ಲೀಟರ್ ಗಟ್ಟಲೇ ನೀರು ಕುಡಿದರೂ ತೀರದ ದಾಹ. ಮ‌ನೆಯೊಳಗೆ ಇದ್ದರೂ ಝಳ, ನೆರಳಲ್ಲಿದ್ದರೂ ಸೆಕೆ. ಸುಡು ಬಿಸಿಲಿನಲ್ಲಿ ಬೆಂದ ಜೀವಕ್ಕೆ ತೊಟ್ಟು ತಣ್ಣನೆಯ ನೀರು ಬೇಡ್ವೆ.? ಬಿಸಿಲ ಧಗೆಯಿಂದ ರೋಸಿ ಹೋದ ಜನ ಜೀವ ತಂಪರಿಸಲು ಮಣ್ಣಿನ ಮಡಕೆಗಳ ಮೊರೆ ಹೋಗುತ್ತಿದ್ದಾರೆ.
ವಿಜಯನಗರ ಜಿಲ್ಲೆಯಲ್ಲಿ ಬಿಸಿಲಿನ ತಾಪ ತೀವ್ರಗೊಂಡಿದೆ. ಇಂದು 40 ಡಿಗ್ರಿಯಷ್ಟು ತಾಪಮಾನ ದಾಖಲಾಗಿದ್ದು, ಜನರು ಪರದಾಡುವಂತಾಗಿದೆ. ತಂಪು ಪಾನೀಯಗಳ ಮೊರೆ ಹೋಗುವ ದೃಶ್ಯಗಳ ಸರ್ವೆ ಸಾಮಾನ್ಯವಾಗಿದೆ. ಅದರಲ್ಲೂ ಜನರು ಮಣ್ಣಿನ ಮಡಕೆಗಳ ಮೊರೆ ಹೋಗ್ತಿದ್ದಾರೆ. ಮಡಕೆಗಳಲ್ಲಿ ಸಂಗ್ರಹಿಸಿಟ್ಟ ನೀರು ಫ್ರಿಡ್ಜ್ ನಲ್ಲಿ ಇಟ್ಟ ನೀರಿನಷ್ಟೇ ತಂಪಾಗಿರುತ್ತದೆ. ಆರೋಗ್ಯದ ದೃಷ್ಟಿಯಿಂದಲೂ ಮಡಿಕೆ ನೀರು ಫ್ರಿಡ್ಜ್‌ನಲ್ಲಿ ತಂಪಾಗಿಸಿದ ನೀರಿಗಿಂತ ಉತ್ತಮ. ಹಾಗಾಗಿ ಹೊಸಪೇಟೆಯಲ್ಲಿ ಮಣ್ಣಿನ ಮಡಕೆಗಳ ಖರೀದಿ ಜೋರಾಗಿದೆ. ವ್ಯಾಪಾರಸ್ಥರು ಭರಪೂರ ಆದಾಯ ಗಳಿಸುತ್ತಿದ್ದಾರೆ.
ಬೇಸಿಗೆ ಶುರುವಾದಾಗಿನಿಂದ ಮಡಕೆ ವ್ಯಾಪಾರಸ್ಥರ ದಿಲ್ ಖುಷ್ ಆಗಿದೆ. ಒಂದೊಂದು ಮಡಕೆ 250 ರಿಂದ 300 ರೂಪಾಯಿವರೆಗೆ ಮಾರಾಟವಾಗುತ್ತಿದೆ. 10 ಲೀಟರ್ ಕೊಳಾಯಿ ಇರುವ ಮಡಕೆಗಳೇ ಹೆಚ್ಚಾಗಿ ಸೇಲ್ ಆಗ್ತಿದ್ದು, ದಿನಕ್ಕೆ ಸರಾಸರಿ 5 ರಿಂದ 6 ಸಾವಿರ ರೂಪಾಯಿ ವಹಿವಾಟು ಆಗುತ್ತಿದೆ. ಇದು ವ್ಯಾಪಾರಸ್ಥರಿಗೆ ಹೊಸ ಭರವಸೆ ಹುಟ್ಟಿಸಿದೆ.
ಇದನ್ನೂ ಓದಿ> ವಿಜಯನಗರ | ಬಸವಣ್ಣನ ವಚನ, ಸಂವಿಧಾನ ಸಾಕ್ಷಿಯಾಗಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟ ಜೋಡಿ
“ದೂರದ ಊರುಗಳಿಂದ ಮಣ್ಣಿನ ಮಡಕೆಗಳನ್ನು ತರಿಸಿಕೊಳ್ಳಲಾಗುತ್ತಿದ್ದು, ಕೂಡ್ಲಿಗಿ, ಖಾನಾಹೊಸಹಳ್ಳಿ, ಇಮ್ಮಡಾಪುರ ಸೇರಿದಂತೆ ವಿವಿಧೆಡೆಯಿಂದ ಮಣ್ಣಿನ ಮಡಕೆಗಳು ಬರುತ್ತವೆ. ಹೊಸಪೇಟೆಗೆ ಬಂದು ತಲುಪುವಷ್ಟರಲ್ಲಿ ಬಾಡಿಗೆ ಇನ್ನಿತರೆ ಖರ್ಚು ಸೇರಿ 200 ರೂಪಾಯಿ ತಗುಲುತ್ತದೆ. ಇಷ್ಟು ವೆಚ್ಚ ಭರಿಸಿ ತಂದು ಮಾರಾಟ ಮಾಡಿದರೂ ಹೇಳಿಕೊಳ್ಳುವಂತಹ ಲಾಭವಿಲ್ಲ” ಎಂದು ವ್ಯಾಪಾರಸ್ಥರು ಬೇಸರ ವ್ಯಕ್ತಪಡಿಸುತ್ತಿದ್ದಾರೆ.
ಬೇಸಿಗೆ ಶುರುವಾದಾಗಿಂದ ಸೆಕೆ ಕಾಟವನ್ನ ಜನರಿಗೆ ತಡೆಯಲು ಆಗುತ್ತಿಲ್ಲ. ಎಷ್ಟೇ ನೀರು ಕುಡಿದರೂ, ತಂಪು ಪಾನೀಯ ಕುಡಿದರೂ ದಾಹ ತಣಿಯುತ್ತಿಲ್ಲ. ಬಿಸಿಲ ಬೇಗೆಯಿಂದ ಬೇಸತ್ತಿರುವ ಜನ ಮಳೆ ಬರುವುದನ್ನು ಕಾಯುತ್ತ ಮುಗಿಲಿನತ್ತ ಮುಖ ಮಾಡಿದ್ದಾರೆ.
ವಿಜಯಕುಮಾರ್ ಎಂ
ವಿಜಯನಗರ ಕೋಆರ್ಡಿನೇಟರ್‌
