ಸಂಘ ಪರಿವಾರಗಳು ಡಾ. ಬಿ ಆರ್ ಅಂಬೇಡ್ಕರ್ ಅವರ ವಿಚಾರಧಾರೆಗಳನ್ನು ಒಪ್ಪಿಕೊಂಡಂತೆ ನಾಟಕವಾಡಿ, ಅವುಗಳಿಗೆ ಸಂಘ ದೀಕ್ಷೆ ಕೊಡುವ ಮೂಲಕ ಅವರ ಚಿಂತನೆಗಳನ್ನು ವ್ಯವಸ್ಥಿತವಾಗಿ ಬ್ರಾಹ್ಮಣೀಕರಿಸುವ ಮತ್ತು ಕೊಲ್ಲುವ ಷಡ್ಯಂತ್ರ ನಡೆಸುತ್ತಿವೆ ಎಂದು ಪ್ರಗತಿಪರ ಚಿಂತಕ ಶಿವಸುಂದರ್ ಆತಂಕ ವ್ಯಕ್ತಪಡಿಸಿದರು.
ವಿಜಯಪುರ ನಗರದ ದರ್ಬಾರ್ ಮೈದಾನದಲ್ಲಿ ಮೇ ಸಾಹಿತ್ಯ ಮೇಳ ಬಳಗ, ದಲಿತ ಮತ್ತು ಪ್ರಗತಿಪರ ಸಂಘಟನೆಯ ಆಶ್ರಯದಲ್ಲಿ ಹಮ್ಮಿಕೊಂಡಿರುವ ಬುದ್ಧ, ಬಸವ, ಅಂಬೇಡ್ಕರ್ ಪುಸ್ತಕ ಮೇಳದ ಸಮಾರೋಪ ಸಮಾರಂಭದಲ್ಲಿ ಮಾತನಾಡಿದರು.
“ಡಾ. ಬಿ ಆರ್ ಅಂಬೇಡ್ಕರ್ ಇಂದು ಎಲ್ಲರಿಗೂ ಒಂದು ರೀತಿ ಫ್ಯಾಷನ್ ಆಗತೊಡಗಿದ್ದಾರೆ. ಎಲ್ಲರೂ ಅವರನ್ನು ಒಪ್ಪಿಕೊಂಡಂತೆ ನಾಟಕವಾಡುತ್ತಿದ್ದಾರೆ. ನಮ್ಮ ತಲೆಯಲ್ಲಿ ಅಂಬೇಡ್ಕರ್ ಚಿಂತನೆಗಳ ಬದಲಿಗೆ ಸಂಘ ಪರಿವಾರದ ಪಿತಾಮಹ ಸಾವರ್ಕರ್ ಚಿಂತನೆಗಳನ್ನು ಬಿತ್ತತೊಡಗಿದ್ದಾರೆ. ಅಂಬೇಡ್ಕರ್ ಅವರನ್ನು ಸೈದ್ಧಾಂತಿಕವಾಗಿ ಬ್ರಾಹ್ಮಣೀಕರಿಸುವ ಹುನ್ನಾರ ನಡೆಯುತ್ತಿದೆ ಎಂದು ಆರೋಪಿಸಿದರು.
“ಎಸ್ಐಆರ್ ಕುರಿತ ವಿಷಯಗಳನ್ನು ಚುನಾವಣೆ ಬಳಿಕ ಚರ್ಚಿಸಲಾಗುವುದೆಂದು ಹೇಳುವ ಮೂಲಕ ಚುನಾವಣೆ ಆಯೋಗದಂತೆಯೇ ಸುಪ್ರೀಂ ಕೋರ್ಟ್ ಕೂಡ ಬಿಜೆಪಿ ಜತೆಗೆ ಕೈಜೋಡಿಸದಂತೆ ಭಾಸವಾಗುತ್ತಿದೆ” ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.
ಇದನ್ನೂ ಓದಿ>ಪ್ರಸ್ತುತ ಭಾರತಕ್ಕೆ ಡಾ. ಬಿ ಆರ್ ಅಂಬೇಡ್ಕರ್ ಅವರು ಏಕೆ ಅನಿವಾರ್ಯ?
“ಡಾ. ಬಿ ಆರ್ ಅಂಬೇಡ್ಕರ್ ಸಂವಿಧಾನ ಬದ್ಧವಾಗಿ ನೀಡಿರುವ ಮತದಾನದ ಹಕ್ಕನ್ನು ದಮನಿಸುವ ನಿಟ್ಟಿನಲ್ಲಿ ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ(ಎಸ್ಐಆರ್) ಹೆಸರಿನಲ್ಲಿ ಮೋದಿ ಸರ್ಕಾರ ದೇಶದ ಪ್ರಜೆಗಳ ಹಕ್ಕುಗಳ ಮೇಲೆ ಆಕ್ರಮಣ ಮಾಡಿದೆ. ಲಕ್ಷಾಂತರ ಜನರ ಮತದಾನದ ಹಕ್ಕನ್ನೇ ನಿರಾಕರಿಸುವ ತಂತ್ರ ಮಾಡುತ್ತಿದೆ” ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಪುಸ್ತಕ ಮೇಳದ ಬಸವರಾಜ ಸೂಳಿಬಾವಿ, ಹಿರಿಯ ಪತ್ರಕರ್ತ ಅನಿಲ ಹೊಸಮನಿ, ಚಿಂತಕ ಅವಿನಾಶ ಟಿ ಜಿ, ಎಸ್‌ಪಿಟಿ ಪರಮೇಶ್ವರ ನಾಯಕ, ಧರ್ಮರಾಜ ನಾಯಕ, ಈಶ್ವರ ತೊರವಿ, ಎಸ್ ಎಲ್ ಇಂಗಳೇಶ್ವರ, ಮೋಹನ ಮೇಟಿ, ಪವನ ತೊರವಿ, ತುಕಾರಾಮ ಚಂಚಲಕರ, ಸಿದ್ದಲಿಂಗ ಬಾಗೇವಾಡಿ, ಲಕ್ಷ್ಮಣ ಹಂದ್ರಾಳ, ಸಾಹೇಬ ಲಾಲ ನದಾಫ್, ಶರಣು ಶಿಂಧೆ, ವಿನಾಯಕ ಗುಣಸಾಗರ ಇದ್ದರು.
