ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ತಂಡದ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ ತಮ್ಮನ್ನು ‘ವಿದೇಶಿ ಆಟಗಾರ’ ಎಂದು ಜರಿಯುತ್ತಿರುವ ಟ್ರೋಲಿಗರಿಗೆ ತಮ್ಮದೇ ಶೈಲಿಯಲ್ಲಿ ಉತ್ತರ ನೀಡಿದ್ದಾರೆ.
37 ವರ್ಷದ ವಿರಾಟ್ ಕೊಹ್ಲಿ ಅವರು ಕಳೆದ ಕೆಲವು ವರ್ಷಗಳಿಂದ ತಮ್ಮ ಕುಟುಂಬದೊಂದಿಗೆ ಇಂಗ್ಲೆಂಡ್‌ನಲ್ಲಿ ವಾಸಿಸುತ್ತಿದ್ದಾರೆ. ಭಾರತದಲ್ಲಿ ಸದಾ ಇರುವ ಮಾಧ್ಯಮಗಳ ಗಮನ ಮತ್ತು ಒತ್ತಡದಿಂದ ದೂರ ಉಳಿಯಲು ಅವರು ಲಂಡನ್‌ಗೆ ಸ್ಥಳಾಂತರಗೊಂಡಿದ್ದಾರೆ. ಅವರು ಈಗಾಗಲೇ ಟೆಸ್ಟ್ ಮತ್ತು ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದು, ಕೇವಲ ಏಕದಿನ ಮತ್ತು ಐಪಿಎಲ್ ಸಮಯದಲ್ಲಿ ಮಾತ್ರ ಭಾರತಕ್ಕೆ ಆಗಮಿಸುತ್ತಾರೆ. ಅವರು ಹೆಚ್ಚು ಸಮಯ ಲಂಡನ್‌ನಲ್ಲಿ ಕಳೆಯುತ್ತಿರುವ ಕಾರಣಕ್ಕಾಗಿ, ಸಾಮಾಜಿಕ ಜಾಲತಾಣಗಳಲ್ಲಿ ಕೆಲವರು ಅವರನ್ನು ‘ವಿದೇಶಿ ಆಟಗಾರ’ ಎಂದು ಟ್ರೋಲ್ ಮಾಡುತ್ತಿದ್ದರು.
ಕೊಹ್ಲಿ ಉತ್ತರ ಕೊಟ್ಟಿದ್ದೇನು?
ಆರ್‌ಸಿಬಿಯ ಹೊಸ ವಿಡಿಯೋ ಒಂದರಲ್ಲಿ, ತಂಡದ ನಿರೂಪಕ ದಾನಿಶ್ ಸೇಟ್ (ಮಿಸ್ಟರ್ ನಾಗ್ಸ್) ಅವರು, “ಜನರು ಆರ್‌ಸಿಬಿ ಈಗ ಐದು ಜನ ವಿದೇಶಿ ಆಟಗಾರರನ್ನು ಆಡಿಸುತ್ತಿದೆ ಎಂದು ಹೇಳುತ್ತಿದ್ದಾರೆ, ಇದರ ಅರ್ಥ ನನಗೆ ಆಗುತ್ತಿಲ್ಲ” ಎಂದು ತಮಾಷೆಯಾಗಿ ಕೇಳಿದರು (ಐಪಿಎಲ್ ನಿಯಮದ ಪ್ರಕಾರ ಒಂದು ಪಂದ್ಯದಲ್ಲಿ ಗರಿಷ್ಠ 4 ವಿದೇಶಿ ಆಟಗಾರರಿಗೆ ಮಾತ್ರ ಅವಕಾಶವಿರುತ್ತದೆ).
ಇದಕ್ಕೆ ನಗುತ್ತಲೇ ಉತ್ತರಿಸಿದ ಕೊಹ್ಲಿ, “ನನ್ನನ್ನು ಯಾಕೆ ಕೇಳುತ್ತಿದ್ದೀರಾ? ವಿದೇಶಿ ಆಟಗಾರರನ್ನೇ ಕೇಳಿ. ನಾನು ವಿದೇಶಿ ಆಟಗಾರನಾ? ಅಲ್ಲ” ಎಂದು ವ್ಯಂಗ್ಯವಾಗಿಯೇ ಹೇಳಿದರು. ಅವರ ಉತ್ತರದಲ್ಲೂ ಸಲ್ಪ ನಾಚಿಕೆಯಿತ್ತು.
ಇದನ್ನು ಓದಿದ್ದೀರಾ? IPL | ಒಂದೆಡೆ ಮನರಂಜನೆಯ ಮಹಾಪೂರ, ಮತ್ತೊಂದೆಡೆ ಜೂಜಾಟದ ಕರಾಳ ಘೋರ
ಈ ಸಂದರ್ಭದಲ್ಲಿ ಕಳೆದ ವರ್ಷ ಆರ್‌ಸಿಬಿ 18 ವರ್ಷಗಳ ನಂತರ ಮೊದಲ ಬಾರಿ ಪ್ರಶಸ್ತಿ ಗೆದ್ದಿದ್ದರ ಬಗ್ಗೆ ಮಾತನಾಡಿದ ಅವರು, “ಆ ರಾತ್ರಿ ಮನಸ್ಸು ತುಂಬಾ ಹಗುರವಾಯಿತು. ಗೆಲುವು ಎಂಬುದು ಕಠಿಣಶ್ರಮ ಮತ್ತು ತ್ಯಾಗದ ಪ್ರತಿಫಲ. ಅದು ನಾವು ಕ್ರೀಡೆಗೆ ನೀಡಿದ ಬದ್ಧತೆಯನ್ನು ತೋರಿಸುತ್ತದೆ. ಇದು ನಾವು ಪಟ್ಟ ಶ್ರಮಕ್ಕೆ ನ್ಯಾಯ ಒದಗಿಸುತ್ತದೆ ಮತ್ತು ಮುಂದೆ ಇನ್ನಷ್ಟು ಕಠಿಣವಾಗಿ ಕೆಲಸ ಮಾಡಲು ಪ್ರೇರಣೆಯಾಗುತ್ತದೆ,” ಎಂದರು.
ಎಸ್‌ಆರ್‌ಹೆಚ್ ವಿರುದ್ಧ ಕೊಹ್ಲಿ ದಾಖಲೆ
ಹಾಲಿ ಚಾಂಪಿಯನ್ ಆಗಿ 2026ರ ಐಪಿಎಲ್‌ಗೆ ಪಾದಾರ್ಪಣೆ ಮಾಡಿದ ಆರ್‌ಸಿಬಿ, ತವರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧ ಅಮೋಘ ಗೆಲುವು ಸಾಧಿಸಿದೆ. 202 ರನ್‌ಗಳ ಬೃಹತ್ ಗುರಿ ಬೆನ್ನಟ್ಟಿದ ಆರ್‌ಸಿಬಿ, ಕೇವಲ 15.4 ಓವರ್‌ಗಳಲ್ಲಿ ಗುರಿ ತಲುಪಿ ‘ಐಪಿಎಲ್ ಇತಿಹಾಸದಲ್ಲಿಯೇ ಅತ್ಯಂತ ವೇಗದ 200 ಕ್ಕೂ ರನ್ ಬೆನ್ನಟ್ಟಿ ದಾಖಲೆ ಬರೆದಿದೆ. ಈ ಪಂದ್ಯದಲ್ಲಿ ಕೊಹ್ಲಿ 38 ಎಸೆತಗಳಲ್ಲಿ ಅಜೇಯ 69 ರನ್ (5 ಸಿಕ್ಸರ್, 5 ಬೌಂಡರಿ) ಸಿಡಿಸಿ ಜಯ ತಂದುಕೊಟ್ಟರು.
