ಸೌದಿ ಅರೇಬಿಯಾದ ರಾಷ್ಟ್ರೀಯ ಅನಿಲ ಮತ್ತು ಕೈಗಾರಿಕೀಕರಣ ಕಂಪನಿ (GASCO)ಯು ಗೃಹಬಳಕೆಯ ಅನಿಲ ಸಿಲಿಂಡರ್‌ಗಳು ಸೇರಿದಂತೆ ಎಲ್ಲ ಎಲ್‌ಪಿಜಿ ಸೇವೆಗೆ ಏಕರೂಪದ ದರ ನಿಗದಿಪಡಿಸಿದ್ದು, ಇಂದಿನಿಂದಲೇ(ಜನವರಿ 1,2026) ಜಾರಿಗೆ ತರುವುದಾಗಿ ಘೋಷಿಸಿದೆ.
ನಿಗದಿ ಪಡಿಸಿರುವ ಹೊಸ ಬೆಲೆಯ ಪ್ರಕಾರ, 11 ಕೆಜಿ ಗ್ಯಾಸ್ ಸಿಲಿಂಡರ್ ಬೆಲೆಯು ಇನ್ನು ಮುಂದೆ ಸೌದಿ ರಿಯಾಲ್ 26.23(630 ರೂಪಾಯಿ) ಆಗಿದ್ದರೆ, 5 ಕೆಜಿ ಸಿಲಿಂಡರ್ ಬೆಲೆ 11.93(286 ರೂಪಾಯಿ) ಆಗಲಿದೆ ಎಂದು ಗ್ಯಾಸ್ಕೊ ತಿಳಿಸಿದೆ.
ಸೆಂಟ್ರಲ್ ಅನಿಲ ಟ್ಯಾಂಕ್‌ಗಳಿಗೆ ಭರ್ತಿ ಮಾಡುವ ಸುಂಕವನ್ನು ಲೀಟರ್‌ಗೆ 1.1770 ಎಂದು ನಿಗದಿಪಡಿಸಲಾಗಿದೆ. ಎಲ್ಲಾ ಬೆಲೆಗಳು ಸಾರಿಗೆ ವೆಚ್ಚಗಳು ಮತ್ತು ಮೌಲ್ಯವರ್ಧಿತ ತೆರಿಗೆ (ವ್ಯಾಟ್) ಅನ್ನು ಒಳಗೊಂಡಿವೆ ಎಂದು ಗ್ಯಾಸ್ಕೊ ದೃಢಪಡಿಸಿದೆ.
ಇದನ್ನು ಓದಿದ್ದೀರಾ? ಹೊಸ ವರ್ಷದ ಸಂಭ್ರಮಕ್ಕೆ ಕತ್ತಲೆ ಆವರಿಸಿದ ದುರಂತ: ಸ್ವಿಟ್ಜರ್ಲೆಂಡ್‌ನ ಬಾರ್‌ನಲ್ಲಿ ಸ್ಫೋಟ, ಹಲವರ ಸಾವು
ಪ್ರಾದೇಶಿಕ ಬೆಲೆ ಅಂತರವನ್ನು ಕಡಿಮೆ ಮಾಡುವುದು ಈ ಹೊಸ ನಿರ್ಧಾರದ ಉದ್ದೇಶವಾಗಿದೆ. ಈ ನೂತನ ಕ್ರಮವು ರಾಜ್ಯದ ವಿವಿಧ ಪ್ರದೇಶಗಳ ನಡುವಿನ ಬೆಲೆ ಅಸಮಾನತೆಗಳನ್ನು ನಿವಾರಿಸುವ ಮತ್ತು ಗ್ರಾಹಕರಿಗೆ ಒದಗಿಸುವ ಸೇವೆಗಳ ಗುಣಮಟ್ಟ ಮತ್ತು ಸ್ಥಿರತೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ ಎಂದು ಗ್ಯಾಸ್ಕೊ ಮಾಹಿತಿ ನೀಡಿದೆ.
