ತಾಲ್ಲೂಕಿನ ಮಲ್ಲಂಡಹಳ್ಳಿ–ಕೆಂಚಾಪುರ ಮಾರ್ಗದಲ್ಲಿ ಲೋಕೋಪಯೋಗಿ ಇಲಾಖೆಯಿಂದ ಕೈಗೆತ್ತಿಕೊಳ್ಳಲಾಗಿರುವ ರಸ್ತೆ ಅಭಿವೃದ್ಧಿ ಕಾಮಗಾರಿ ತೀರಾ ಕಳಪೆಯಾಗಿದ್ದು, ನಿಯಮಾನುಸಾರ ನಡೆಯುತ್ತಿಲ್ಲ ಎಂದು ಆರೋಪಿಸಿ ಎರಡೂ ಗ್ರಾಮಗಳ ನಿವಾಸಿಗಳು ಆಕ್ರೋಶ ವ್ಯಕ್ತಪಡಿಸಿದರು.
ಕೆಂಚಾಪುರದ ಗ್ರಾಮ ಪಂಚಾಯಿತಿ ಮಾಜಿ ಸದಸ್ಯ ಗಿರೀಶ್ ಮಾತನಾಡಿ ಸುಮಾರು 30 ವರ್ಷಗಳಿಂದ ದುರಸ್ತಿಯಾಗದೆ ಸಂಚಾರಕ್ಕೆ ಯೋಗ್ಯ ಇಲ್ಲದ ಈ ರಸ್ತೆಯ ಅಭಿವೃದ್ಧಿ ಕಾಮಗಾರಿಯನ್ನು ಈಗ ಕೈಗೆತ್ತಿಕೊಳ್ಳಲಾಗಿದೆ. 4 ಮೀಟರ್‌ ಅಗಲದ ರಸ್ತೆಯೊಂದಿಗೆ ಇಕ್ಕೆಲಗಳಲ್ಲಿ 2 ಮೀಟರ್‌ ಪಾದಚಾರಿ ಮಾರ್ಗದೊಂದಿಗೆ ನಿರ್ಮಿಸಲಾಗುತ್ತದೆ ಎಂಬ ಭರವಸೆ ಇತ್ತು. ಆದರೆ, ಪ್ರಸ್ತುತ ನಡೆಯುತ್ತಿರುವ ಕಾಮಗಾರಿಯಲ್ಲಿ ರಸ್ತೆ ಇಕ್ಕೆಲಗಳಲ್ಲಿರುವ ಗಿಡ-ಮರಗಳ ಬೇರುಗಳನ್ನು ತೆರವುಗೊಳಿಸದೆ, ಅವುಗಳ ಮೇಲೆಯೇ ಮಣ್ಣು ಮುಚ್ಚಿ ಕಾಮಗಾರಿ ಮಾಡಲು ಹೊರಟಿದ್ದಾರೆ. ಈಗಾಗಲೇ ಆ ಬೇರುಗಳು ಚಿಗುರಲಾರಂಭಿಸಿದ್ದು, ಮುಂದಿನ ದಿನಗಳಲ್ಲಿ ರಸ್ತೆ ಮತ್ತೆ ಹಾಳಾಗುವ ಭೀತಿ ಇದೆ. ಅಲ್ಲದೆ, ವಿಶಾಲವಾಗಿದ್ದ ರಸ್ತೆಯನ್ನು ಕಿರಿದಾಗಿಸಲಾಗುತ್ತಿದೆ. ಮತ್ತೊಂದು ವಾಹನ ಎದುರು ಬಂದರೆ ಹೋಗಲು ಜಾಗವಿಲ್ಲದಂತಾಗಿದೆ ಎಂದು ಆರೋಪಿಸಿದರು.
ಹನುಮಂತರಾಯ ದೇಗುಲದ ಬಳಿ ತಿರುವಿನಲ್ಲಿ ಮಳೆನೀರು ಹರಿದುಹೋಗಲು ಮೋರಿ ವ್ಯವಸ್ಥೆ ಮಾಡಿಲ್ಲ. ಮಳೆ ಬಂದಾಗ ನೀರು ರಸ್ತೆ ಮೇಲೆಯೇ ನಿಂತು ಹೊಸ ರಸ್ತೆಯೂ ಕಿತ್ತುಹೋಗಲಿದೆ. ಲೋಕೋಪಯೋಗಿ ಇಲಾಖೆಯ ಸಹಾಯಕ ಕಾರ್ಯಪಾಲಕ ಎಂಜಿನಿಯರ್ ಗೋವಿಂದಪ್ಪ ಅವರೊಂದಿಗೆ ಮಾತನಾಡಿದ್ದು, ಸರಿಯಾಗಿ ಕಾಮಗಾರಿ ನಡೆಸಿ ಕೊಡುವುದಾಗಿ ಭರವಸೆ ನೀಡಿದ್ದರು. ಆದರೆ, ಹಲವು ಕಡೆ ಬೇರು ಕೀಳದೆ ಮಣ್ಣು ತುಂಬುತ್ತಿದ್ದಾರೆ. ಮಣ್ಣು ಹಾಕುವ ಮುನ್ನವೇ ಗಿಡಗಳ ಬುಡವನ್ನು ಬುಲ್ಡೋಜರ್ ಮೂಲಕ ತೆರವುಗೊಳಿಸಬೇಕು. ಇಲ್ಲವಾದಲ್ಲಿ ದೊಡ್ಡಮಟ್ಟದಲ್ಲಿ ಹೋರಾಟ ನಡೆಸುತ್ತೇವೆ ಎಂದು ಎಚ್ಚರಿಸಿದರು.
ಮಲ್ಲಂಡಹಳ್ಳಿಯ ನಿವಾಸಿ ಎಸ್.ಕೃಷ್ಣಮೂರ್ತಿ ಮಾತನಾಡಿ, ರಸ್ತೆ ಕಾಮಗಾರಿಯ ಹಲವಾರು ಲೋಪದೋಷಗಳಿಂದ ಕೂಡಿದೆ. ಈ ಕುರಿತು ಎಇಇ ಗೋವಿಂದಪ್ಪ ಅವರಿಗೆ ದೂರು ನೀಡಿದ್ದರೂ, ಸ್ಥಳದಲ್ಲಿದ್ದ ಸಿಬ್ಬಂದಿ ಯಾವುದೇ ಕ್ರಮ ಕೈಗೊಂಡಿಲ್ಲ. ಗಿಡ ಮರ ಕತ್ತರಿಸಿ ಬೇರು ತೆಗೆಯದೆ ಅದರ ಮೇಲೆಯೇ ಮಣ್ಣು ತುಂಬಿಕೊಂಡು ಹೋಗುತ್ತಿದ್ದಾರೆ. ತಕ್ಷಣವೇ ಕಳಪೆ ಕಾಮಗಾರಿಯನ್ನು ತಡೆದು, ಗುಣಮಟ್ಟದ ರಸ್ತೆ ನಿರ್ಮಿಸಿಕೊಡಬೇಕು ಎಂದು ಆಗ್ರಹಿಸಿದರು.
ಇದನ್ನು ಓದಿದ್ದೀರಾ..?ಕೋಲಾರ | ಬಡ ವಿದ್ಯಾರ್ಥಿಗಳ ವಿದ್ಯಾಭ್ಯಾಸಕ್ಕೆ ಶಾಸಕ ಕೊತ್ತೂರು ಮಂಜುನಾಥ್ ನೆರವು
ಮಲ್ಲಂಡಹಳ್ಳಿ ಹಾಗೂ ಕೆಂಚಾಪುರ ಗ್ರಾಮಸ್ಥರಾದ ಗೋಪಾಲ್, ನಂಜುಂಡಪ್ಪ, ರಮೇಶಣ್ಣ, ಬಾಲು, ಗಂಗರಾಜು, ಪ್ರಸನ್ನ, ನಾರಾಯಣಸ್ವಾಮಿ, ಚಲಪತಿ, ಸುದರ್ಶನ್ ಬಾಬು ಹಾಗೂ ಶ್ರೀನಿವಾಸ್ ಇದ್ದರು.
