ಅಗ್ನಿಶಾಮಕ ಠಾಣೆ ಸಮಸ್ಯೆಯನ್ನು ತ್ವರಿತವಾಗಿ ನಿವಾರಿಸಿದರೆ ಬೆಂಕಿ ಅವಘಡಗಳಲ್ಲಿ ಜೀವ ಹಾನಿ ಮತ್ತು ಆಸ್ತಿ ನಷ್ಟ ಕಡಿಮೆಯಾಗಬಹುದು.
ವಿಜಯಪುರ ಜಿಲ್ಲೆಯ 13 ತಾಲೂಕುಗಳಲ್ಲಿ ಆರು ಕಡೆ ಮಾತ್ರ ಅಗ್ನಿಶಾಮಕ ಠಾಣೆಗಳು ಕಾರ್ಯನಿರ್ವಹಿಸುತ್ತಿವೆ. ಇನ್ನು ಏಳು ಕಡೆ ಅಗ್ನಿಶಾಮಕ ಠಾಣೆ ಇಲ್ಲದಿರುವ ಕಾರಣ ಜನಸಾಮಾನ್ಯರು ಹಲವು ಸಮಸ್ಯೆಗಳಿಂದ ಬಳಲುವಂತಾಗಿದೆ.
ಜಿಲ್ಲೆಯಲ್ಲಿ ಎಂಟು ಹೊಸ ತಾಲೂಕುಗಳು ಸೇರಿ ಒಟ್ಟಾರೆ 13 ತಾಲೂಕುಗಳಿವೆ. ವಿಜಯಪುರ, ಇಂಡಿ, ಸಿಂದಗಿ, ಬಸವನಬಾಗೇವಾಡಿ, ಮುದ್ದೇಬಿಹಾಳ ಹಾಗೂ ತಾಳಿಕೋಟೆಯಲ್ಲಿ ಅಗ್ನಿಶಾಮಕ ಠಾಣೆಗಳಿವೆ. ನಗರೀಕರಣ, ಜನಸಂಖ್ಯೆ ಹೆಚ್ಚಳ ಹೀಗೆ ನಾನಾ ಕಾರಣಗಳಿಂದ ಆಕಸ್ಮಿಕ ಬೆಂಕಿ ಅವಘಡಗಳ ಜತೆಗೆ ದ್ವೇಷದಿಂದಲೂ ಸಾರ್ವಜನಿಕ/ಖಾಸಗಿ ಆಸ್ತಿ ಪಾಸ್ತಿಗಳಿಗೆ ಬೆಂಕಿ ಹೊತ್ತಿಕೊಂಡ ಪ್ರಕರಣಗಳು ಹೆಚ್ಚುತ್ತಿವೆ. ಜಿಲ್ಲೆಯಲ್ಲಿ ಈಗಿರುವ ಅಗ್ನಿಶಾಮಕ ಠಾಣೆಗಳು ಹಾಗೂ ಸಿಬ್ಬಂದಿಯಿಂದ ಉತ್ತಮ ಕಾರ್ಯಚರಣೆ ಮೂಲಕ ಬೆಂಕಿ ನಂದಿಸುವ ಕಾರ್ಯ ನಡೆದಿದ್ದರೂ ಘಟನಾ ಸ್ಥಳದ ಅಂತರ, ಒಂದೇ ಸಮಯದಲ್ಲಿ ಒಂದಕ್ಕಿಂತ ಹೆಚ್ಚು ಕಡೆ ಬೆಂಕಿ ಅನಾಹುತಗಳು ಸಂಭವಿಸಿದರೆ ತ್ವರಿತ ಗತಿಯಲ್ಲಿ ಬೆಂಕಿ ಶಮನ ಕಾರ್ಯಕಷ್ಟವಾಗುತ್ತಿದೆ.
ಸದ್ಯ ಸುಡು ಬಿಸಿಲು ಇರುವುದರಿಂದ ಬೀಡಿ, ಸಿಗರೇಟ್ ಸೇದಿ ಬಿಸಾಕಿದ ಕಿಡಿಯು ಅಗ್ನಿ ಅನಾಹುತವನ್ನು ಸೃಷ್ಟಿಸುತ್ತದೆ. ಕಬ್ಬಿನ ಗದ್ದೆ, ಕಣಿಕೆ ಮೆದುಗೆ ಬೆಂಕಿ, ವಿದ್ಯುತ್ ಶಾರ್ಟ್ ಸರ್ಕ್ಯೂಟ್ನಿಂದ ಕಟ್ಟಡದಲ್ಲಿ ಬೆಂಕಿ ಜ್ವಾಲೆಯಂತಹ ಅಗ್ನಿ ಅವಘಡ ಪ್ರಕರಣಗಳು ಜಿಲ್ಲಾದ್ಯಂತ ಆಗಾಗ್ಗೆ ವರದಿಯಾಗುತ್ತಿವೆ.
ಹೊಸ ತಾಲೂಕುಗಳಲ್ಲಿ ಅಗ್ನಿಶಾಮಕ ಠಾಣೆ ಇಲ್ಲದ್ದರಿಂದ ಬೆಂಕಿ ಅವಘಡ ಸಂಭವಿಸಿದಾಗ ತ್ವರಿತಗತಿಯ ಕಾರ್ಯಾಚರಣೆ ನಡೆಸಲು ಕಷ್ಟ ಸಾಧ್ಯವಾಗುತ್ತಿದೆ. ಹೀಗಾಗಿ ತುರ್ತಾಗಿ ಅಗ್ನಿಶಾಮಕ ಠಾಣೆ ಸ್ಥಾಪಿಸಬೇಕೆಂಬ ಬೇಡಿಕೆ ಹಲವು ತಾಲೂಕಿನ ಜನಸಾಮಾನ್ಯರ ಪ್ರಭಲ ಬೇಡಿಕೆಯಾಗಿದೆ.
ತಾಳಿಕೋಟಿ ಭಾಗದಲ್ಲಿ ಅಗ್ನಿ ಅವಘಡ ಸಂಭವಿಸಿದರೆ ಮುದ್ದೇಬಿಹಾಳ ಅಥವಾ ಜಿಲ್ಲಾ ಕೇಂದ್ರ ವಿಜಯಪುರದಿಂದ ರಕ್ಷಣಾ ತಂಡ, ಫೈಯರ್ ಫೈಟರ್ ಆಗಮಿಸಬೇಕು. ಆಲಮೇಲ, ದೇವರಹಿಪ್ಪರಗಿ ತಾಲೂಕಿಗೆ ಸಿಂದಗಿಯಿಂದ ಅಗ್ನಿಶಾಮಕ ದಳ ಬರಬೇಕು. ಅದೇ ರೀತಿ ನಿಡಗುಂದಿ, ಕೊಲ್ಹಾರ ಭಾಗಕ್ಕೆ ಬಸವನಬಾಗೇವಾಡಿ ಅಥವಾ ವಿಜಯಪುರದಿಂದ ಬರಬೇಕು. ತಿಕೋಟ ಹಾಗೂ ಬಬಲೇಶ್ವರ ಭಾಗಕ್ಕೆ ವಿಜಯಪುರದಿಂದ ಅಗ್ನಿಶಾಮಕ ದಳ ಆಗಮಿಸಬೇಕು. ಕೆಲವರು ತುಂಬಾ ದೂರದಲ್ಲಿರುವುದರಿಂದ ಅಗ್ನಿಶಾಮಕ ತಂಡ ಬರುವಷ್ಟರಲ್ಲಿ ಬೆಂಕಿಯು ನಿಯಂತ್ರಣಕ್ಕೆ ಬಾರದಷ್ಟು ಅಥವಾ ಅಪಾರ ಹಾನಿಯ ಹಂತ ತಲುಪಿರುತ್ತದೆ. ಹೀಗಾಗಿ ಹೊಸ ತಾಲೂಕುಗಳಿಗೆ ಅಗ್ನಿಶಾಮಕ ಠಾಣೆ ಸ್ಥಾಪಿಸಬೇಕು ಎಂಬುದು ಜನಸಾಮಾನ್ಯರ ಬೇಡಿಕೆಯಾಗಿದೆ.
“ಮಾರ್ಗಸೂಚಿ ಪ್ರಕಾರ 40 ಕಿ.ಮೀ ವ್ಯಾಪ್ತಿಯನ್ನು ಒಳಗೊಂಡು ಅಗ್ನಿಶಾಮಕ ಠಾಣೆ ಇರಬೇಕು. ಹಾಗೆಯೇ ಪ್ರತಿ ಠಾಣೆಗೆ 24 ಮಂದಿ ಸಿಬ್ಬಂದಿ ಇರಬೇಕು. ಜಿಲ್ಲೆಯಲ್ಲಿ ಹೆಚ್ಚುವರಿ ಅಗ್ನಿಶಾಮಕ ಠಾಣೆಗಳ ಸ್ಥಾಪನೆ ಜತೆಗೆ ಹೀಗಿರುವ ತಾಣಗಳಿಗೆ ಕೆಲ ಸಿಬ್ಬಂದಿಗಳ ನಿಯೋಜನೆಯೂ ಆಗಬೇಕಿದೆ. ಇಲಾಖೆಯಿಂದಲೂ ಹೆಚ್ಚುವರಿ ಠಾಣೆಗಳ ಸ್ಥಾಪನೆಗೆ ಪ್ರಯತ್ನ ನಡೆದಿದೆ. ಆದರೆ, ಕೆಲವು ಕಡೆ ಹೊಸ ಅಗ್ನಿಶಾಮಕ ಠಾಣೆಗಳ ಸ್ಥಾಪನೆಗೆ ಜಾಗದ ಕೊರತೆ ಅಡ್ಡಿಯಾಗಿದ್ದರೆ, ಇನ್ನು ಕೆಲವು ಕಡೆ ಅನುದಾನದ ಅಲಭ್ಯತೆಯ ತೊಡಕಾಗಿದೆ. ಜಿಲ್ಲೆಯ ಜನಪ್ರತಿನಿಧಿಗಳು ಸಂಬಂಧಿಸಿದ ತಾಲೂಕಿಗೆ ಅಗ್ನಿಶಾಮಕ ಠಾಣೆಗೆ ಅಗತ್ಯ ಜಾಗ ಹಾಗೂ ಅನುದಾನ ಒದಗಿಸಬೇಕು” ಎಂಬುದು ಸ್ಥಳೀಯರ ಒತ್ತಾಯವಾಗಿದೆ.
ಈ ಸಂಬಂಧ ಅಗ್ನಿಶಾಮಕ ದಳ ಇಲಾಖೆ ಅಧಿಕಾರಿಗಳು ಈ ದಿನ.ಕಾಮ್ಗೆ ಪ್ರತಿಕ್ರಿಯಿಸಿದ್ದು, “ಹೊಸ ತಾಲೂಕುಗಳಿಗೆ ಅಗ್ನಿಶಾಮಕ ಠಾಣೆ ಸ್ಥಾಪನೆಗಾಗಿ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಕೆಯಾಗಿದೆ. ಬಬಲೇಶ್ವರ ಹಾಗೂ ನಿಡಗುಂದಿಗೆ ಅಗ್ನಿಶಾಮಕ ಠಾಣೆಗಳು ಮಂಜೂರಾಗಿದ್ದು, ಬಬಲೇಶ್ವರಕ್ಕೆ ಅಗತ್ಯ ಜಾಗವೂ ಮಂಜೂರಾಗಿದೆ. ಸದ್ಯದಲ್ಲೇ ಕಾಮಗಾರಿ ಆರಂಭದ ಪ್ರಕ್ರಿಯೆ ನಡೆಯಲಿದೆ. ದೇವರ ಹಿಪ್ಪರಗಿಯಲ್ಲಿ ಠಾಣೆ ಆರಂಭಕ್ಕೆ ಜಾಗ ಹಸ್ತಾಂತರವಾಗಿದ್ದು, ಅನುದಾನ ಇಲ್ಲದೆ ಕಾಮಗಾರಿ ಆರಂಭವಾಗಿಲ್ಲ. ಅಲಮೇಲ, ಚಡಚಣ, ತಿಕೋಟ ಹಾಗೂ ಕೊಲ್ಹಾರದಲ್ಲಿ ಜಾಗದ ಲಭ್ಯತೆಯಾಗಿಲ್ಲ. ಹೀಗಾಗಿ ಕೆಬಿಜೆಎನ್ಎಲ್, ಕೆಐಎಡಿಬಿ, ಕಂದಾಯ ಇಲಾಖೆಗೆ ಜಾಗ ಒದಗಿಸಿ ಕೊಡುವಂತೆ ಮನವಿ ಮಾಡಲಾಗಿದೆ. ಹಾಗೆಯೇ ವಿಜಯಪುರ ಹೊರವಲಯದ ಕೈಗಾರಿಕಾ ಪ್ರದೇಶದಲ್ಲಿ ಮತ್ತೊಂದು ಅಗ್ನಿಶಾಮಕ ಠಾಣೆ ಸ್ಥಾಪನೆಗೆ ಪ್ರಸ್ತಾವನೆ ಸಲ್ಲಿಕೆಯಾಗಿದೆ” ಎಂದು ತಿಳಿಸಿದರು.
ಇದನ್ನೂ ಓದಿದ್ದೀರಾ? ಹಾಸನ ಮಣ್ಣಿನ ಹೆಣ್ಣು ದನಿಗಳು | ಕಲ್ಲರಳಿ ಹೂವಾದ ಕ್ರೀಡಾಪಟು- ಕೆ.ವಿಜಯಕುಮಾರಿ
ಜಿಲ್ಲಾ ಅಗ್ನಿಶಾಮಕ ಅಧಿಕಾರಿ ಶಶಿಧರ ನೀಲಗಾರ ಈ ದಿನ.ಕಾಮ್ನೊಂದಿಗೆ ಮಾತನಾಡಿ, “ಪ್ರತಿ ತಾಲೂಕಿಗೆ ಅಗ್ನಿಶಾಮಕ ಠಾಣೆ ಸ್ಥಾಪನೆ ಕುರಿತು ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಬಬಲೇಶ್ವರದಲ್ಲಿ ಸದ್ಯದಲ್ಲೇ ಠಾಣೆ ಕಾಮಗಾರಿ ಆರಂಭವಾಗಲಿದೆ. ನಿಡಗುಂದಿಯಲ್ಲಿ ಜಾಗ ಅಂತಿಮಗೊಳಿಸುವ ಪ್ರಕ್ರಿಯೆ ನಡೆದಿದೆ. ಉಳಿದ ಕಡೆ ಜಾಗ ಹಾಗೂ ಅನುದಾನಕ್ಕಾಗಿ ಪ್ರಯತ್ನ ಮುಂದುವರೆದಿದೆ” ಎಂದರು.
ಜಿಲ್ಲೆಯ ಹಲವು ತಾಲೂಕುಗಳಲ್ಲಿ ಕಬ್ಬು ಬೆಳೆಗೆ ಆಕಸ್ಮಿಕ ಬೆಂಕಿ, ದ್ವೇಷದಿಂದಲೂ ಬೆಂಕಿ ಹಚ್ಚಿ ಬೆಳೆ ನಾಶವಾಗಿರುವುದು ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗುತ್ತಿರುವುದರಿಂದ ಕೂಡಲೇ ಸರ್ಕಾರ ಅಗ್ನಿಶಾಮಕ ಠಾಣೆಗಳನ್ನು ಸ್ಥಾಪಿಸಿ ಜನರಲ್ಲಿ ಆತಂಕ ಉಂಟುಮಾಡುವ ಅಗ್ನಿ ಅವಘಡಗಳಿಗೆ ಅಂತ್ಯ ಹಾಡುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
ಜಿಲ್ಲಾ ದುರಸ್ತಿ ನಿರ್ವಹಣಾ ಯೋಜನೆ(DDMP)ಯಲ್ಲಿ ಈ ವಿಷಯವನ್ನು ಆದ್ಯತೆಯಾಗಿ ಸೇರಿಸಿ, ವಾರ್ಷಿಕ ಬಜೆಟ್ನಲ್ಲಿ ನಿಧಿ ನಿಗದಿಪಡಿಸುವುದರಿಂದ ಮತ್ತು ಶಾಸಕರು, ಜಿಲ್ಲಾ ಪಂಚಾಯತ್ ಹಾಗೂ ಎಂಎಲ್ಎಗಳು ಈ ಬಗ್ಗೆ ವಿಧಾನಸಭೆಯಲ್ಲಿ ಪ್ರಶ್ನೆಗಳನ್ನು ಎತ್ತಿ ಒತ್ತಾಯಿಸುವುದು, ಜನಸಾಮಾನ್ಯರೂ ಕೂಡ ಸ್ಥಳೀಯ ಅಧಿಕಾರಿಗಳಿಗೆ ಅರ್ಜಿ ಸಲ್ಲಿಸಿ ಅಥವಾ ಪತ್ರಿಕೆಗಳ ಮೂಲಕ ಜಾಗೃತಿ ಮೂಡಿಸುವುದರಿಂದ ಈ ಕೊರತೆಯನ್ನು ನಿವಾರಿಸಬಹುದು. ಅಗ್ನಿಶಾಮಕ ಠಾಣೆ ಸಮಸ್ಯೆಯನ್ನು ತ್ವರಿತವಾಗಿ ನಿವಾರಿಸಿದರೆ ಬೆಂಕಿ ಅವಘಡಗಳಲ್ಲಿ ಜೀವ ಹಾನಿ ಮತ್ತು ಆಸ್ತಿ ನಷ್ಟ ಕಡಿಮೆಯಾಗಬಹುದು. ರಾಜ್ಯ ಸರ್ಕಾರವು ಕರ್ನಾಟಕ ಅಗ್ನಿಶಾಮಕ ಇಲಾಖೆಯ ಮೂಲಕ ಎಲ್ಲ ಜಿಲ್ಲೆಗಳಲ್ಲಿ ಏಕರೂಪದ ಸುರಕ್ಷತಾ ಯೋಜನೆಯನ್ನು ಜಾರಿಗೊಳಿಸುವುದು ಸೂಕ್ತ. ಜನರ ಸುರಕ್ಷತೆಗೆ ಇದು ಮೂಲಭೂತ ಅಗತ್ಯವಾಗಿದೆ.
